Променливо облачно време со ветер и повремен снег


Скопје, 12 февруари, 2019 - 9:24 (META) 

Времето во Македонија ќе биде променливо облачно и постудено, со повремен локален снеr, особено на запад и претежно претпладне. Ќе дува засилен северен ветер, најизразен долж Повардарието.

Дневната температура ќе изнесува од 0 до 9 Целзиусови степени.

Во Скопје ќе биде променливо облачно. Ќе дува засилен северен ветер. Дневната температура ќе се искачи до 5 Целзиусови степени.


Осум жртви на екстремниот студ во САД, „Полaрниот вител“ продолжува


Чикаго, 31 јануари, 2019 - 11:46 (META) 

Арктичките температури што зафатија неколку сојузни држави од Средниот запад на САД беа причина за смртта на најмалку осум лица, јавуваат американските медиуми.

Студениот бран наречен „Поларниот вител“, кој донесе рекордно ниски температури, карактеристични за поларните региони, блокираше голем дел од градовите. Прогласена е вонредна состојба во огромен дел од средниот појас на САД, дури и во Алабама и Мисисипи, кои се на крајниот југ.

Температурите паднаа до -30 Целзиусови степени во Чикаго, третиот најголем град в САД, а до -37 степени во Северна Дакота, што е пониско од најниските температури во некои делови на Антарктикот. Рекордот ноќеска е постигнат во градот Понсфорд, Минесота, каде беа измерени -66 Целзиусови степени.

Студот однесе најмалку осум животи – двајца луѓе во државата Мичиген смрзнале до смрт блиску до своите домови од кои излегле недобро облечени. Еден 55-годишен маж починал во Милвоки, откако колабирал поради студот по долгото чистење снег пред гаражата. Во Пекин, Илиноис, бил пронајден 82-годишник кој исто така станал жртва на студот.

Во Чикаго 75-годишен маж загинал откако бил удрен од камион што ринел снег, а во северниот дел на државата Индијана двајца млади луѓе загинале во сообраќајка поради голомразица. Крај една од зградите на Универзитетот на Ајова бил пронајден починат од студ и еден студент.

Таканаречениот „Поларен вител“ ќе го почувствуваат околу 250 милиони Американци, од кои 90 милиони се соочени со температури од најмалку -17 Целзиусови степени и надолу.

Во Чикаго беа откажани 1.500 од двата аеродрома, а железничката компанија „Амтрак“ исто така ги откажа сите возови што тргнуваат од Чикаго или требало да пристигнат во него.

Снегот продолжи да паѓа и вчера на потегот од Големите Езера до Нова Англија. Во државата Висконсин наврнаа 60 сантиметри снег. И денеска се очекува да продолжи поларното невреме со ниски температури и смрзнувачки ветер, а според некои прогнози така ќе биде се до крајот на викендот.

Како што пренесуваат американските медиуми, според полициски извори, стапката на криминал во Чикаго пораснала, а криминалците дури со пиштоли напаѓаат луѓе за да им ги одземат нивните јакни.

Метеоролозите предупредуваат дека е опасно на таков студ да се стои непрописно облечен и заштитен повеќе од 10 минути, бидејќи се појавуваат смрзнатини. Многу Американци купуваат скијачки очила за да си ги штитат очите.


Сончево и студено време, од утре нови обилни врнежи од снег


Скопје, 8 јануари, 2019 - 9:27 (META) 

Времето денеска ќе биде сончево и студено време со мала до умерена облачност. Утрото ќе биде ведро и студено со многу ниски температури, кои во целата земја ќе се спуштат под минус 10 Целзиусови степени, а во Пелагонија и Малешевијата и до минус 18 Целзиусови степени.

Дневните температури скоро насекаде ќе бидат под нула. Утринската температура ќе се движи од минус осум до минус 12 Целзиусови степени, а дневната температура ќе се движи од минус еден до два Целзиусови степени.

Во Скопје ќе биде сончево и студено со мала до умерена облачност. Утринската температура ќе достигне до минус 11 Целзиусови степени, а дневната температура до минус еден Целзиусов степен.

Под влијание на влажен и студен бран, во среда и во четврток претпладне ќе има нови пообилни врнежи од снег, особено во западните делови.

Потоа следува период на стабилно и суво време повторно со ниски утрински температури, а дневните ќе бидат во благо покачување.


МЗШВ: Не се очекуваат позначителни штети од снегот и студот врз овошките


Скопје, 23 март, 2018 - 13:05 (META) 

Министерството за земјоделство, шумарство и водостопанство (МЗШВ) соопшти дека не се очекуваат значителни штети на родот на овошките од снегот и студот.

Од министерството велат дека во соработка со Управата за хидрометеоролошки работи (УХМР), состојбата се следи внимателно и дека според метеоролозите снежниот бран ги затекнал овошките во фаза на полно цветање, во која нивната издржливост кон ниски минимални температури е околу -2 до -3 Целзиусови степени.

„Бидејќи остварените температури беа во тие граници, не се очекуваат значителни оштетувања на родот“, се вели во соопштението од МЗШВ.

Сличните временски услови и облачноста во текот на викендот нема да дозволат драстично опаѓање на утринските температури, а најниските температури се очекуваат в недела наутро, кога ќе се спуштат до -4 степени. Но и тоа нема да предизвика позначителни штети.

„Бидејќи овие температури се блиску до границите на издржливост, може да предизвикаат само проретчување на родот, но не и негово оштетување“, стои во соопштението од министерството.

Според податоците од Подрачните единици на МЗШВ, досега земјоделците немаат пријавено штети од ниските температури и врнежите од снег, но состојбата на терен континуирано ќе се следи, со цел навреме да се преземаат доколку е потребно соодветни мерки.

На почетокот на наредната седмица се очекува променливо време со повремени врнежи од дожд, кои ќе одржуваат позитивни утрински температури, но и покачување на дневните температури до 15 степени. Во втората половина од следната седмица се очекува стабилизирање на времето и пораст на дневните температури и до 20 степени.


Времето денеска со повремен снег


Скопје, 22 март, 2018 - 9:41 (META) 

Времето денеска ќе биде облачно и студено со повремени врнежи од снег, а во јужните делови од земјава дожд и снег, додека во крајниот југоисточен дел од дожд. На повеќе места врнежите ќе бидат пообилни и ќе наврнат над 15 литри на квадратен метар. Снежната покривка на планините значително ќе се зголеми.

Ќе дува слаб до умерен, а во западните делови повремено засилен ветер од северен правец.Максималната температура ќе достигне од 1 до 6 Целзиусови степени.

Во Скопје времето ќе биде облачно со врнежи од снег и со слаб до умерен ветер од североисточен правец правец. Температурата ќе достигне до 2 Целзиусови степена.

Утре се уште ќе има повремени врнежи од дожд и снег, но кон крајот на денот ќе престануваат. В сабота ќе биде променливо облачно со провејување на слаб снег.


Поларни температури од денеска, Македонија во вонредна состојба


Скопје, 1 март, 2018 - 9:07 (META) 

Студен бран од портокалова фаза денеска ја зафати целата држава. Утринските температури се движеа од -18 до -9 Целзиусови степени, а дневните ќе изнесуваат од -4 до 2 степена.

Во Скопје ќе биде променливо облачно и студено со сончеви периоди. Ќе дува слаб до умерен југоисточен ветер. Утринската температура се симне до -15 Целзиусови степени, а дневната ќе се искачи до -2 степена.

Во текот на ноќта, почнувајќи од запад, ќе има врнежи од снег, кои до петок претпладне на некои пониски места ќе поминат во дожд, а локално ќе има и појава на замрзнат дожд. Ќе дува слаб до умерен југоисточен ветер.

За време на викендот се уште ќе има слаб локален дожд, но ќе настапи значително затоплување што ќе услови нагло топење на снежната покривка.

Поради студениот бран, Комисијата за превенција од штетни ефекти од студени бранови при Министерството за здравство препорача да се ослободат од работа бремените жени и лицата над 60 години.

За оние работници кои работат на отворено се препорачува реорганизација на работното време од 10 до 16 часот, со повремени паузи по половина час во топли простории на секои два часа.

Комисијата апелира да се избегнува физичка активност на отворено, а при движење да се внимава на лизгави површини и да се носи топла повеќеслојна облека, соодветни обувки за снег и мраз, како и почесто да се консумираат топли напитоци. Хронично болните лица редовно да ја земаат препишаната терапија. Во случај на настинка и потешкотии на дишењето, се препорачува граѓаните веднаш да се јават кај својот матичен лекар.

Утрово најниската температура е измерена во Берово, –18 степени, во Скопје-Петровец и Крива Паланка -15, а во Куманово, Маврово и Крушево -14 степени. Во Ѓуриште се измерени -13, во Лазарополе и Пожаране -12 а во Скопје-Зајчев Рид, Тетово, Виница -11 степени. Во Гевгелија се измерени -5 степени,  минус седум во Битола,  минус осум во Прилеп, Дебар, Претор, Охрид, Струмица, Демир Капија, и -10 во Штип.

Најмногу снег, пак, има во Маврово, каде висината на снежната покривка изнесува 87 сантиметри, во Лазарополе 79, во Крушево 58 и во Пожаране се измерени 50 сантиметри.


Балканот ќе биде зафатен со поларен студ и интензивни снежни врнежи


Загреб, 22 февруари, 2018 - 15:49 (META) 

Балканот за време на викендот ќе биде зафатен со интензивни снежни врнежи и многу ниски температури, каде што во некои делови ќе се спуштат и до минус 20 Целзиусови степени, предупредуваат метеоролозите од Србија и Хрватска.

Хрватска веќе се соочува со големо снежно невреме, при што и хрватската војска е вклучена во расчистување на снегот и отстранување на последиците.

Во Македонија, овој бран се очекува од недела, при што метеоролозите најавуваат минусни температури и интензивни снежни врнежи како на планините така и на пониските места.


Сончево и релативно топло време денеска


Скопје, 29 јануари, 2018 - 9:16 (META) 

Времето во Македонија денеска ќе биде сончево и релативно топло. Мала локална облачност се очекува на истокот во претпладневните часови, а ќе дува слаб до умерен северен ветер.

Во котлините претпладне ќе биде магливо, а температурите се очекува да се движат од 9 до 15 Целзиусови степени.

Во главниот град претпладне ќе биде магливо со локална облачност. Температурата ќе достигне до 12 Целзиусови степени.

Во текот на неделата која што следува утринските температури ќе бидат во благ пораст, а до четврток се очекува стабилно и суво време. Магла ќе има по котлините, додека во петок ќе преовладува зголемена облачност, со јужен ветер. Во западните делови ќе започнат врнежи од дожд, а во текот на ноќта на некои места ќе преминуваат во снег.


Поради снежното невреме и студот во САД, починаа најмалку 17 лица


Њујорк, 5 јануари, 2018 - 13:15 (META) 

Најмалку 17 лица починаа од студ, предизвикан од снежното невреме и поларни температури кои зафатија најголем дел од Соединетите Американски Држави. Сите летови од Њујорк и од Њу Џерсу се откажани поради силниот ветер и снежната бура која се најавува. Во Њујорк се очекува да наврнат од 15 до 20 сантиметри снег.

Таканаречената метеоролошка „циклон бомба“ е проследена со силен ветер и обилен снег, денеска го погоди североистокот на САД, поради што се затворени училиштата и државните институции. Покрај обилните врнежи од снег, до крајот на неделата се очекува и голем пад на температурите.

Утрово, околу 65.000 домаќинства и компании останаа без струја, а се очекува дека бројката ќе се зголемува. Вонредна состојба е прогласена и во Флорида, каде што снег заврна по 28 години.


Температурата утре ќе падне за осум степени


Скопје, 27 октомври, 2017 - 17:49 (META) 

Во текот на утрешниот ден ќе има повремени врнежи од дожд, особено претпладне во југозападните делови, а на планините врнежите ќе бидат од снег, вели прогнозата на Управата за хидрометеоролошки работи (УХМР) на Република Македонија.

Ќе дува повремено засилен северен ветер, особено долж Повардарието и на исток, каде на моменти ќе достигнува брзина и над 70 км/час.

Дневната температура ќе опадне за околу 8 степени.

В недела преку денот ќе биде суво и малку потопло, а кон крајот на денот и во текот на ноќта, се очекува значително заладување со засилен ветер и локални врнежи од дожд, а снег на планините.

Потоа од вторник времето ќе биде стабилно со ниски утрински температури кои на повеќе места ќе се спуштат под нулата.