!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Родот на 650 земјоделци од Пелагонија настрада од априлскиот студ


Битола, 15 мај, 2017 - 10:50 (META) 

Априлскиот студ и мраз годинава го уништи родот кај близу 650 земјоделци од Пелагонија. Според подрачниот раководител  на Министерството за земјоделство, водостопанство и шумарство во Битола, Илија Србиновски, денеска завршува увидот на стручните комисии за проценка на штети, по што извештаите ќе бидат пратени во министерството во Скопје за исплата на штетите.

– Три комисии, секоја со три члена, постапија по секоја пријава на оштетените земјоделци и заклучно е дека 648 индивидуални земјоделци, земјоделски фирми како и ЗК „Пелагонија“, „Лозар Битола“ претрпеле штети од 50 до 100 проценти од априлските мразеви и од студот. Најмногу се оштетени лозовите насади, јаболката, крушата, црешите – изјави Србиновски.

Според земјоделците, родот е преполовен не само од мразот, туку и од пролетната суша.

Во Битолско-пелагонискиот Регион под есенски култури се засеани 22.000 хектари, по што со преполовени приноси се соочуваат производителите на јачмен и на пченица.

– Ваква априлска суша, никогаш не сме имале на ова подрачје. На многу места комбајните нема што да работат, и пченицата и јачменот и другите култури се загрозени. Ни една машина не може да сработи на ваква суша – вели Вељо Тантаров, претседател на Сојузот на земјоделци на Македонија.

Земјоделците спасот од сушата го гледаат во копање бунари, како и во средствата за обесштетување од претрпени штети, кои не влегуваат во осигурителните полиси.


Тројца бегалци починале од студ во кампот Морија на Лезбос


Атина, 30 јануари, 2017 - 13:46 (META) 

Бегалец утринава е пронајден мртoв во кампот Морија на Лезбос. Станува збор за момче на возраст меѓу 18 и 20 години, најверојатно од Пакистан, кое починало од премрзнување.

Момчето е трета жртва од студот во бегалскиот камп Морија во Грција. Викендов од студ почина и 46-годишен бегалец од Сирија, а на 24 јануари од премрзнување почина и 20-годишно момче од Египет, кое, исто така, престојуваше во бегалскиот камп на Лезбос.

На Лезбос има повеќе од 5.000 бегалци, што го прави остров на кој се згрижени најголем број бегалци и мигранти од сите други грчки острови.

Според информациите на локалните медиуми, во Морија владее вознемиреност меѓу бегалците и постои страв од демонстрации поради смртта на тројцата бегалци.

Дел од бегалските кампови низ Грција имаат соодветни услови за престој, но дел од нив немаат соодветно греење и бегалците едвај преживуваат на ниската зимска температура.


Oблачно со врнежи од снег и со температура до 4 степени


Скопје, 18 јануари, 2017 - 9:38 (META) 

Времето денеска ќе биде облачно со врнежи од снег. Претпладне врнежите ќе бидат послаби и локални, а попладне, почнувајќи од запад, ќе се интензивираат. Најобилни ќе бидат кон крајот на денот и во текот на ноќта во западните и во јужните делови од земјава. Во крајните југоисточни делови, врнежите ќе бидат од дожд и од снег. Ќе дува слаб до умерен, повремено засилен ветер од северен и од североисточен правец, што ќе услови можна појава на снежни навеви. Дневната температура ќе биде во интервал од минус 1 до 4 Целзиусови степени.

Во Скопје и во околината ќе преовладува облачно со повремени врнежи од снег, во текот на денот послаби, а пообилни кон крајот на денот и во текот на ноќта.

Утринава најстудено било во Маврово каде се измерени минус 6 Целзиусови степени, во Ѓуриште, Пожаране и во Крушево минус 4, Крива Паланка, Берово и Лазарополе минус 3, Скопје, Куманово, Тополчани и Претор минус 2, Тетово и Прилеп минус 1, Демир Капија, Битола, Виница и Штип нула, а во Струмица, Охрид, Гевгелија и во Дојран измерени се 2 Целзиусови степени.
Од УХМР соопштуваат дека во текот на денот и на ноќта ќе дојде до зголемување на снежната покривка за околу 15 до 20 сантиметри.

И утре нè очекува слично време, а од петок се најавува стабилизирање на времето и намалување на облачноста.


ВМРО-ДПМНЕ: Бочварски да ги провери состојбите со снегот во Струмица и во Куманово


Скопје, 17 јануари, 2017 - 17:02 (META) 

Наместо да тера политика, Благој Бочварски треба прво да ги провери состојбите во општините Струмица и Куманово, реагираат од ВМРО-ДПМНЕ на изјавата на Благој Бочварски од СДСМ дека состојбата поради студот и снегот е показател за негрижата на власта за граѓаните.

„Токму во овие општини не се исчистени градските улици и патиштата до околните села. Бочварски нека погледне какви се патиштата до селата Рич, Пчиња, Винце, Вакав, Пезово, Кокошиње, Павлешенце, Брсјак, Колицко, Скачковце и други. За каква одговорност зборува Бочварски кога во овие општини владее ледена доба“, велат од ВМРО-ДПМНЕ.
Од партијата велат дека СДСМ се обидува својот изборен неуспех да го дефокусира со лаги и со манипулации.

„Благој Бочварски се обидува со манипулативни настапи да фрли дамка на институциите кои макотрпно работат на терен и да ги плаши граѓаните со црни сценарија. СДСМ не сака да види дека цела Европа, а не само регионот и Македонија, се соочуваат со екстремни временски услови. Благодарение на посветената работа на надлежните институции, нема поголеми сообраќајни застои, ниту отсечени градови како што има во други земји. Додека СДСМ и Бочварски денеска ги навредуваат надлежните институции и нивниот труд и ангажман, тие посветено работат на терен. Кога ќе се врати дома Бочварски по патот кој вработените од надлежните институции го чистат, ќе сфати дека лажно ги обвинувал“, велат од ВМРО-ДПМНЕ и додаваат дека денешната прес-конференција на СДСМ е само паушална и неаргументирана лага.


Бочварски: Власта им ги врза рацете на институциите со криминалните тендери


Скопје, 17 јануари, 2017 - 15:00 (META) 

Претседателот на комисијата за транспорт и врски на СДСМ, Благој Бочварски, оцени дека тоа што се случува деновиве поради студот и снегот, е показател за целосната негрижа од досегашната власт за граѓаните. Тој истакна дека власта ги оставила институциите со врзани раце поради криминалните тендер-политики за свои интереси.

– Пријавувате неисчистени патишта. Се случија стотици сообраќајни незгоди, верижни судири, има повредени граѓани, голема материјална штета. Загрозена е безбедноста на граѓаните. Еве зошто е тоа така. Власта во заминување издвојува најмалку средства во регионот за тековно и за зимско одржување на патиштата. Само 3.300 евра по километар! За споредба, Србија издвојува 300 проценти повеќе – 9.000 евра по километар. Босна и Херцеговина, пак, 7.700 евра по километар – изјави Бочварски.

Тој истакна дека институциите немаат соодветна механизација за да ги одржуваат патиштата во зимски услови.

– Снегот се расчистува со 100 проценти застарена механизација! Освен што се стари возилата, јавните претпријатија располагаат со многу мал број возила. Поради тоа ангажираат други приватни фирми, но и тие, според нашите информации, имаат стари и дотраени возила. Ете, затоа на терен ситуацијата е алармантна. Македонија трета недела по ред е во хаос со неисчистени државни патишта и градски улици. Но, уште полошо, со отсечени градови и села. Семејства со денови се оставени без јадење. Бремена жена три километри одеше пеш по снегот до првото родилиште. Ако институциите беа подготвени навреме, ова немаше да се случува – рече Бочварски.


Старица почина од студ во пехчевско Црник


Пехчево, 9 јануари, 2017 - 17:43 (META) 

Поларната температура во Малешевијата ја зеде првата жртва. Ноќеска околу полноќ 80-годишна старица паднала во ходникот на семејната куќа, каде останала во текот на целата ноќ. Премрзната, со слаби знаци на живот, старицата изутрината ја нашол член на семејството. Веднаш дошла итна медицинска помош, чија екипа три часа се борела за животот на жената.

– Ги применивме сите мерки за реанимација, применивме електрошокови и соодветна терапија, но, за жал, пацинетката почина – изјави доктор Гоце Стојменовски, раководител на итната медицинска помош од Делчево.

Ова е втор случај на премрзнување на жител во беровско-делчевскиот крај. Пред измрзнување, на Бадник, бил пронајден паднат во дворот 57-годишен делчевец. За среќа, човекот бргу бил пронајден, по што му била пружена лекарска помош, што му го спасило животот.

Малешевијата изминатите денови ја зафати екстремно ниска температура. Деновиве беа измерени минус 28 Целзиусови степени, што е блиску до рекордните минус 31 степен од 1954 година.


ЕЛЕМ: Електроенергетската состојба е стабилна, се задоволуваат сите потреби на потрошувачите


Скопје, 8 јануари, 2017 - 13:48 (META) 

Електроенергетската состојба е стабилна и граѓаните и целата индустрија што е на регулираниот пазар ги добиваат сите потребни количества енергија, соопшти денеска директорот на АД ЕЛЕМ, Христијан Мицкоски.

– Во првите седум денови од годинава АД ЕЛЕМ своето производство го има надминато за 10,9 проценти и во целост одговори на потребите на граѓаните и на индустријата – рече Мицкоски и додаде дека деновиве, откако земјата е зафатена со студен бран, потрошувачката на енергија е зголемена за десетина проценти во споредба со истиот период минатата година.

Мицкоски истакна дека АД ЕЛЕМ во целост ги има ставено на располагање сите свои производствени капацитети кои работат, а оти хидроелектраните се во резерва. Доколку дојде до зголемување на потребите на потрошувачите, компанијата ќе ги стави во функција и хидроелектраните за да одговорат на потребите на потрошувачите.


Објавени превентивни мерки пред претстојниот студен период


Скопје, 3 јануари, 2017 - 22:51 (META) 

Управувачкиот комитет за кризи вечерва донесе повеќе превентивни мерки по најавата од Управата за хидрометеоролошки работи за врнежи од снег и за многу ниска температура на територијата на Република Македонија во наредните денови.

Портпаролот на Владата, Александар Георгиев, соопшти дека на состанокот било разговарано за тоа дека временските услови можат да придонесат за појава на ризици во поглед на снабдувањето со електрична енергија, движењето, односно сообраќајот, ризици по здравјето, водоснабдувањето. Во таа насока, како што рече Георгиев, биле донесени определени заклучоци и препораки кои вечерва ќе бидат испратени до сите надлежни институции чија цел и основна задача е подобра подготовка во функција на справувањето со определени ризици кои може да се појават.

Во однос на можните проблеми со снабдувањето со електрична енергија, Управувачкиот комитет донел заклучок со кој компанијата ЕВН треба да формира тимови кои ќе бидат со зголемена мобилност и со зголемена оперативна подготвеност и ќе треба да реагираат во случај на нарушување на системот за снабдување со електрична енергија.

На состанокот е донесен заклучок според кој екипите на ЈП „Македонија пат“ треба да бидат во постојана оператива, готовност за реакција на определени критични точки, а доколку има потреба ќе биде воведена и забрана за движење на тешки транспортни возила на определени делови од патиштата. Во заклучоците се апелира граѓани кои немаат особена потреба за патување во текот на викендот да не патуваат, а транспортерите кои можат да ги одложат своите транспортни рути во текот на викендот да ги одложат доколку тоа не им предизвкува економска штета. Тие што ќе патуваат, задолжително треба да поседуваат зимска опрема за сообраќај и за чистење на патиштата, пакети за прва помош и определено количество вода и храна.

Согласно акцискиот план, поради ниската температура која би можело да се спушти до мунус 23 Целзиусови степени, треба да се известат граѓаните дека во овој период, особено од петок до недела, па дури и в понеделник, да не излегуваат од дома доколку немаат потреба заради заштита на здравјето од студениот бран и од грипот. Постарите и хронично болните не треба да излегуваат од дома, а ако имаат потреба од терапија да се јават на патронажна служба, на Црвен крст или на итна медицинска помош, за да им се обезбеди таа терапија.

Граѓаните, ако имаат потреба од медицинска или каква било друга помош и ако се најдат во неповолна ситуација, може да се јават на телефонскиот број на ЦУК, 195, или да се јават на телефонскиот број на Црвениот крст, 3139 578.


Најмногу дожд во Крива Паланка, а најстудено во Лазарополе


Скопје, 3 мај, 2016 - 19:34 (META) 

Влажниот бран што ја зафати Македонија денеска донесе најмногу дожд во Крива Паланка, каде до 16 часот наврнаa 18 литри на еден квадратен метар, соопшти Управата за хидрометеоролошки работи на Македонија. Најмалку дожд наврнало во Гевгелија, односно 1 литар на еден квадратен метар.

Според мерењата на УХМР, до 16 часот најмногу воден талог има во Пожаране и во Лазарополе, каде наврнале по 6 литри на еден квадратен метар, потоа следуваат Берово, Струмица и Виница со 5 литри дожд на еден квадратен метар, Петровец со 3 литри и Скопје и Маврово со 2 литри дожд на еден квадратен метар.

Според УХМР, до крајот на денот ќе биде променливо облачно и свежо, а во источните делови на земјата ќе продолжат врнежите од дожд. Во вечерните часови се очекува намалување на интензитетот на ветерот.

Најстудено денеска е во Лазарополе, каде се измерени 5 Целзиусови степени, а според мерењата на УХМР, најтопло е во Демир Капија, каде живата на термометарот се искачила до 18 Целзиусови степени.

Во текот на утрешниот ден ќе биде променливо облачно, со појава на повремени локални дождови во западните и во северните делови на земјата. Утринската температура ќе се движи од 5 до 11 Целзиусови степени, а дневната од 12 до 19 Целзиусови степени.

Во Скопје и во околината се очекува слично време, со температура до 15 Целзиусови степени.

 

 


Две мигрантки починале од студ во Бугарија


Софија, 7 февруари, 2016 - 17:11 (META) 

На југоистокот на Бугарија, блиску до турската граница, две жени мигрантки беа пронајдени мртви од студ. Нивните сопатници се испратени во болница, а од нив двајца се во тешка состојба.

– Две жени починаа, едната е на возраст од 14 до 16 години, а втората помеѓу 30 и 40 години. Нашите граничари ги држеле во прегратка во обид да ги стоплат, но не успеале во тоа. Двете се мртви од студ – изјави Румијана Бачварова, министерка за внатрешни работи на Бугарија.

Жените биле дел од група од 19 бегалци кои се обидувале тајно да ја минат границата, а биле откриени од полицијата во планинскиот регион Малко Трново, кој е под снежна покривка.

Околу 30.000 бегалци, главно од Сирија, Ирак и од Авганистан беа регистрирани во Бугарија во 2015 година. Но, оваа бројка е повисока ако се знае дека најголем дел од нив нелегално минуваат низ земјата и одбиваат да бидат регистрирани, стравувајќи дека така ќе бидат принудени да останат во Бугарија.

Меѓународните организации повеќепати ги обвинија бугарските власти за лош третман на бегалците.

И покрај големиот број бегалци што минуваат низ Бугарија, оваа земја не е главниот пат кон Европа за луѓето што бегаат од војната. Според бугарската влада, причината е строгата контрола на границите што ја воведе Бугарија.