Екологистите до Владата: Решете го „рудникот на смртта“ или народот сам ќе го реши


Скопје, 8 октомври, 2018 - 23:03 (META) 

Активистите на еколошките здруженија кои се спротиставуваат на отворањето на рудникот на бакар и злато Иловица во струмичката котлина ѝ упатија ултиматум на Владата да ѝ ја одземе концесијата на компанијата „Еуромакс Рисорсис“ најдоцна до вторник, 16 октомври, кога е предвидена да се одржи седница на Владата. Во спротивно, тие најавија дека „ќе го повикаат народот сам да се заштити и сам да го реши проблемот“.

„Повеќе не прифаќаме никакви одложувања или оправдувања. Не прифаќаат ниту граѓаните, кои од нас бараат акции за сопирање на рудникот“, велат еколошките здруженија кои го потпишаа обраќањето до Владата на Зоран Заев.

Тие наведуваат дека постојат бројни аргументи во полза на ваквото решение на проблемот со рудникот Иловица од кои најважниот е дека самиот премиер Зоран Заев дал предизборно ветување дека рудници нема да има. Тие, исто така, потсетуваат дека Заев не го исполнил ниту рокот што сам го даде (крајот на мај) за решавање на проблемот со рудниците во Југоисточна Македонија.

„Владата и Собранието не ја почитуваат јасно изразената волја на граѓаните на референдумите одржани во септември 2017 во општините Босилово и Ново Село, како и на протестниот марш одржан на 16 јуни 2018, под мотото ДА ГО СОПРЕМЕ ПРЕД ДА НЕ СОТРЕ! Владејачката коалиција,  и, што е уште полошо, во содејство со опозицијата, во август го попречи изгласувањето на предложените измени во Законот за металични и минерални суровини, кој веќе 11 месеци чека да биде усвоен од Собранието. Концесионерот на рудникот Иловица – Штука „Еуромакс Рисорсис“, веќе две години функционира надвор од законите, а нивните студии се полни со недоследности, се вели во соопштението на организациите „Здрава котлина“ – Струмица , „Еко Долина“ – Ново Село и граѓанската иницијатива „СПАС за Струмичка котлина – СТОП за рудникот на смртта“.

Еколозите потсетуваат дека самиот премиер истакнал дека постојат најмалку три-четири правни основи за одземање на концесијата. Според нив, „поединци од претходната и сегашната власт криминално го штитат „Еуромакс Рисорсис“ и притоа се прекршуваат сите меѓусебни договори, законите и Уставот на РМ“.

„Ова не е владеење на правото, туку пример за коруптивна зделка која ги става под сомнеж сите кои не сакаат да ја решат во полза на граѓаните. Наводните измени на технологијата за експлоатација воопшто не се во согласностсо законите на Република Македонија и како такви се целосно надвор од утврдена процедура која треба да биде иста за сите. Ваквите криминални дејности се потенцијална општа опасност и можат да предизвикаат масовна катастрофа“, се вели во соопштението.

Според екологистите, локалните самоуправи на општините Босилово, Ново Село и Струмица во овој случај не застанале во заштита на граѓаните што, заедно со сите претходно изнесени факти, влијаеле на националниот референдум одржан на 30 септември 2018, директно засегнатите општини Ново Село и Босилово да имаат рекордно ниска излезност, најмногу поради неисполнувањето на ветувањето за сопирање на рудникот.

„Ние сме свесни дека проблемот со рудниците е наследен од претходната власт, за што силно сме ја критикувале, но новата власт презеде обврска пред граѓаните дека ќе го реши проблемот. Проблемот се уште не е решен. Во меѓувреме, цело струмичко и Југоистокот се чувствуваат егзистенцијално загрозени од потенцијалниот рудник, кој доколку биде отворен од благородната Струмичка Котлина ќе направи економски, национално и културолошки деградирана и иселена пустелија“, се вели во соопштението.


Земјотрес во Струмица ноќеска


Струмица, 30 август, 2018 - 9:22 (META) 

Сеизмолошката опсерваторија при Природно-математичкиот факултет во Скопје ноќеска во 2.10 часот регистрирала земјотрес во струмичкото подрачје, поточно на 125 километри југоисточно од Скопје.

Рихтеровата магнитуда на земјотресот изнесува 3 степени, а земјотресот од населението во Струмица и околината бил почувствуван со интензитет од 4 степени според Европската макросеизмичка скала, соопшти Сеизмолошката опсерваторија.


Македонија ќе го добие првото верско радио


Скопје, 16 јули, 2018 - 15:03 (META) 

Советот на Агенцијата за аудио и аудиовизуелни медиумски услуги денеска донесе одлука да се распише јавен конкурс за верско, католичко, радио на територијата на Струмица.

Како што објаснија од стручните служби, првин Комисијата за односи со верските заедници поднела барање за такво непрофитно радио, а потоа со исто барање излегло и Здружението на граѓаните „Радио Марија“.

Со двајца отсутни членови на Советот, преостанатите петмина едногласно ја донесоа оваа одлука за, како што рече членот на Советот, Милаим Фетаи, и претходно имало такви барања, но не биле дадени дозволи.

Распишувањето конкурс е законска обврска, иако веќе е познат заинтересираниот што сака да го отвори.


Контраспин: Петте струмички студенти, петте пратеници на ВМРО-ДПМНЕ и Мицкоски


Скопје, 9 јули, 2018 - 17:14 (META) 

Барањето за амнестија може да биде поставено, но само откако сите ќе дознаеме што навистина се случи на 27 април 2017 година. А, да се споредуваат тие настани, петте обвинети пратеници на ВМРО-ДПМНЕ и петте стрелани струмички студенти во 1951 г. е неумесно, невкусно и калкулантски, пишува „Вистиномер.мк“.

Лидерот на ВМРО-ДПМНЕ, Христијан Мицкоски, од говорот на протестниот марш на неговата партија во Струмица даде изјави што ги оценуваме како спин:

Спин: И на ова лудило на политички реваншизам мора еднаш, еднаш засекогаш да му дојде крајот, затоа што премногу долго се делиме на ваши и наши, на Македонци, и помалку Македонци и затоа апелирам е потребна амнестија за луѓето од 27 април, затоа што мора да продолжиме напред, а нема напред ако живееме во минатото. Тоа е она што го бараме. И тоа е она за што ќе се бориме и ќе се залагаме.

Контраспин: Христијан Мицкоски недвосмислено, не по прв пат, побара амнестија за сите инволвирани во настаните од 27 април 2017 година во Собранието на РМ, но упорно одбива да даде своја или партиска квалификација на тие настани.

Нешто што е најблиску до квалификација на настаните е реченицата на Мицкоски дека луѓето „се воделе од чесна идеја и мисла“, а дека мотив им бил „Република Македонија“. Притоа, тој негира дека има какво било кривично дело, туку обвиненијата и досегашните пресуди ги сведува на политичка хајка:

„Ако кренете главата може да ви случи ова“, тоа е пораката. ВМРО-ДПМНЕ има денес 5 пратеници кои се теретат за нешто што не го направиле, односно за тероризам, а немојте никогаш да помислите дека ги заборавам и оние наши браќа и сестри кои сега се по затворите, и кои се дел од оваа конструирана политичка хајка, насочена против секој слободномислечки Македонец. Јас ги живеам нивните судбини. И не заборавајте дека, сепак, има невини луѓе по затвортите, затоа што се воделе од чесна идеја и мисла и единствен мотив им била нивната татковина Република Македонија.

Претседателот на ВМРО-ДПМНЕ, барајќи амнестија за настаните од 27 април 2017 година, практично спинува дека станува збор за „чесна идеја и мисла и единствен мотив им била нивната таковина Република Македонија“.

Спинот е очигледен, бидејќи никој кој се води од чесна идеја и мисла, нема да ја доведе Република Македонија пред работ на граѓанска војна, пред работ на воведување на вонредна состојба, пред работ на неизвесност и грч на своето население, а особено нема да дозволи загрозување на невини животи на пратеници, граѓани, новинари, службени лица вработени во Собранието…

Целата статија прочитајте ја на „Вистиномер.мк“.


СДСМ: Струмица беше заборавена од ВМРО-ДПМНЕ 11 години, Мицкоски да се извини


Скопје, 3 јули, 2018 - 15:00 (META) 

Мицкоски да им се извини на граѓаните за тоа што Струмица 11 години беше заборавена од ВМРО-ДПМНЕ, се вели во реакцијата на СДСМ на повикот на лидерот на ВМРО-ДПМНЕ, на протестен марш в недела во Струмица.

Од СДСМ додаваат дека „во отсуство на конкретни ставови, политики,  решенија, идеи, Христијан Мицкоски се обидува да ги направи граѓаните нервозни“.

„Македонија добива покана за членство во НАТО, и тоа за неколку денови, на следниот Самит на Алијансата.Обезбеден е датум за почеток на преговори за полноправно членство во ЕУ. Македонија е слободна и демократска во која се враќа правдата а граѓаните и нивните потреби се во центарот на вниманието.Платите растат, инвестициите се зголемуваат, повеќе пари завршуваат кај граѓаните, економијата се движи во вистински правец на раст и развој“, се вели во соопштението на СДСМ и се додава дека токму Струмица е пример за европски град и општина која не сака да се врати назад.


Мицкоски повикува на протестен марш в недела во Струмица


Скопје, 3 јули, 2018 - 13:41 (META) 

Лидерот на опозициската ВМРО-ДПМНЕ, Христијан Мицкоски преку видео обраќање повика на протестен марш во Струмица во недела со почетокот од 13 часот од паркот во Струмица до општината.

– Јас како и многумина од ВМРО-ДПМНЕ сме одлучни дека ќе одиме до крај и нема назад се до конечната победа која ќе и донесе победа на Македонија. Време е да се чуе нашиот заеднички глас. Да ја победиме неправдата и да се чуе тој пркосен глас кој силно вриска во вашите срца и да кажеме да, мора подобро – вели Мицкоски.

Тој во обраќањето кој го почнува со „драг сограѓанин“ вели дека живееме живот во кој поразите стануваат секојдневие, а победите ги нема.

– Во општеството сеат поделба, владата и министрите кои те убедуваат во сосема спротивна розова и разубавена слика од она која реално ја гледаш и чија суровост ја живееш секој ден те прави пасивен. Дополнително ти вели премиерот името Македонија морало да се избрише, ама пустото боли, пече, затоа што тоа е името под чиј бајрак и име растеле и умирале твоите предци, и под чиј код се родени твоите деца. Името кое го изговараш со чест, достоинство и трепет во душата и сега ти велат морало да се откажеш затоа што само така ќе било подобро, а ти знаеш дека тоа не е така – вели Мицкоски.

На прашањето дали може поинаку тој одговора дека може доколку „се крене и чуе твојот глас, гласот на твоите блиски, роднини и пријатели“. На крајот тој вели дека влегол во политиката со чиста мисла и со надеж дека ќе остави зад себе нешто добро за иднината на државата.


Саем на книгата на „Македоника Литера“ во Струмица


Струмица, 4 јуни, 2018 - 11:12 (META) 

Во Струмица од утре до четврток, на платото пред Центарот за култура „Антон Панов“ ќе се одржи саем на книгата организиран од издаваштвото „Македоника литера“.

На оваа изложбено-продажна манифестација, од 10 до 20 часот во секој од трите дена ќе се продаваат изданијата на „Македоника литера“ од повеќе области и жанрови.

Утре со почеток во 12.30 часот, во фоајето на Центарот за култура „Антон Панов“, ќе биде промовирана најновата книга на истакнатиот македонски писател за деца Киро Донев „Било и се скрило“. Киро Донев (1942, Моноспитово, Струмичко) е автор на четириесетина книги за деца, од кои осум се во издание на „Македоника литера“. За своето творештво е добитник и на неколку високи книжевни награди. Неколку негови книги се објавени во повеќе изданија. Негови дела се преведени на десетина јазици.


Мицкоски: Зоран Заев преку посредник му продал државно земјиште за зграда на Вице Заев


Струмица, 8 мај, 2018 - 14:29 (META) 

Претседателот на ВМРО-ДПМНЕ, Кристијан Мицкоски денеска обвини дека премиерот Зоран Заев, додека бил градоначалник на Струмица, продал на струмички бизнисмен огромна квадратура државно земјиште кај поранешната касарна, кое на крајот завршило во рацете на неговиот брат Вице Заев и на фирма во која член на Управен одбор е нивниот братучед, Трајче Заев.

Според Мицкоски, спорно е тоа што на јавното наддавање за отуѓување државно земјиште се јавил само еден понудувач – Сашко Брндевски од Струмица, за кој рече дека е бизнис партнер на фирмите на Заеви  – кој потоа го продал земјиштето на Вице Заев и фирмата „АД Пелагонија – Струмица“, во која висока функција има Трајче Заев.

– Ова е случај каде може многу јасно да се види како се прават бизниси во Струмица, по клучот на картелско и клановско поврзување и ползување на придобивките на функцијата дадена од граѓаните. Имено, на 29.12.2014 година одржано е јавно наддавање за отуѓување на градежно земјиште во општина Струмица и на аукцијата се јавува само еден понудувач, а тоа е лицето Сашко Брндевски, од Струмица, бизнис партнер во една од компаниите на братот на премиерот Зоран Заев, Вице Заев.  На лицитацијата постигната е цена од 2.300 денари за м2, а парцелата со намена за изградба на објект за колективно домување е со вкупна површина од 18.462 м2 – вели Мицкоски, кој презентираше обемна документација.

Претседателот на ВМРО-ДПМНЕ додава дека пред да се издаде одобрението за градење, Општина Струмица одобрила на продадената локација да се градат осум нови седумкатници, со вкупна бруто изградена површина од 52.850 м2. Веднаш потоа Брндевски го пренел правото на градење на зградата 8 на фирмата Тотал Инженеринг на Вице Заев, а за возврат добил само еден стан од 40 квадратни метри, нагласува Мицкоски.

– Во февруари 2016 година, Зоран Заев на Сашко Брндевски му издава одобрение за градење за изградба на станбена зграда бр. 8. Во истиот месец во 2016 година, лицето Сашко Брндевски склучува договор за пренесување на право на градење на предметната парцела со правните лица „Тотал Инженеринг“, сопственост на Вице Заев и АД “Пелагонија Струмица“ во чиј управен одбор во тоа време пак е братучедот на Заев, Трајче Заев. Ќе потсетам дека „Тотал Инженеринг“ е истата фирма која беше во  средиштето на аферата со камиони и превоз на јаглен. Како надоместок за тоа што им отстапил право на градење, лицето Сашко Брндевски добило стан од само 40 м2. Значи еден стан за локација на која се гради зграда со нето површина 6.888 м2, профит над 1 милион евра за братот и братучедот на Зоран Заев – рече Мицкоски.

Како што вели претседателот на ВМРО-ДПМНЕ, потоа во март 2016 година, Зоран Заев донел решение за промена на инвеститор, каде што наместо Сашко Брндевски, нови инвеститори на станбената зграда се двете наведени фирми.

– Ова е случај каде Зоран Заев продал земјиште на кое денес таму гради братот Вице Заев. Таму се градат згради, а личните заработки се огромни и се бројат во милиони евра. Остануваат прашањата како тоа токму братот и братучедот на премиерот ја добил дозволата да гради на тоа место, дали ги искористил повластувањата на функцијата на Зоран Заев тогаш градоначалник на Струмица, дали тоа не е конфликт на интереси и целосен морална дисторзија – рече Мицкоски и побара Јавното обвинителство да испита дали се работи за постапка каде однапред се знае добитникот на парцелата, под кои услови е отстапено правото на градење, како и да го испита потеклото на парите на Брндевски – околу 700.000 евра – кои се уплатени на сметката на општината.


Јаневски: Во периодот што доаѓа во Струмица ќе станат повидливи ветените проекти


Стримица, 25 април, 2018 - 14:14 (META) 

Коста Јаневски, градоначалник на Струмица и поранешен пратеник и член на Советот на Општината изразува умерено задоволство од досега сработеното, пред се затоа што, вели, за да се реализираат проектите мора да се исполнат законските предуслови, а за тоа е потребно време.

Запрашан како е задоволен од ветеното и текот на реализацијата, во интервјуто, спроведено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED ( National Endowment for Democracy), Јаневски најбројува повеќе активности.

Овој период е попасивен, се подготвуваат проектите и тендерските документации. Еден дел од нашите предизборни ветувања се во тек и се движат, а некои и се реализирани, како што е оној за згрижување на кучињата бездомници. Тој проект е доведен до фаза за одобрување за градење.

Ги исчистивме и каналите за наводнување, што наиде на одобрување… Имавме бетонирање во Турското маало со потпорен ѕид, исто така потпорен ѕид и на ул. Првомајска, таа активност ја завршивме.

Советот веќе донесе е одлука поврзана за т.н. зелени кровови, со што се достапни одредени комунални олеснувања. Во тек е последната фаза на подготовка за изградба на станица за полнење на електрични возила, со цел да го поттикнеме еколошкиот аспект преку нашиот буџет. Го помагаме и спортот преку поддршка на спортските клубови, но на одреден поправичен начин и преку рамномерно исплаќање на ратите.

Работиме не само во градот туку и низ населените места

Ветивме и реализираме финансиска подршка за новороденчињата… Сега е време и фаза кога не се многу видливи проектите што се реализираат или треба да се реализираат, но работите се во теки се подготвуваат многу проектни документации и тоа луѓето ќе го видат наскоро и тоа не само во градот.

Има приклучок на канализациониот систем во населено место Добрејци, бараме изведувачи за канализициони системи во Дабиле и Просениково… Јавното осветлување го правиме поефикасно со нови поефикасни светилки и тоа не само во градската средина, сега имаме интервенција во Куклиш, Добрејца…

Мислам дека во наредниот период согледувањата за исполнети ветување ќе бидат уште поубедливи. Знаете имаше ветување со рок за оваа година, некои за наредната година, а некои се прилично опсежни, амбиициозни и комплексни, но јас стојам на тоа дек аќе дадеме се од себе да ги исполниме 100 процентно.

Не гледаме потреба за портпарол

Во врска со отчетноста, на стандардизираните прашања градоначалникот Јаневски одговори:

  • Портпарол, посебно некое означено лице во Општина Струмица нема. Смета, а и досега така било, дека можеби и нема некоја потреба од посебно делегирано лице за тоа. Мисли дека сите вработени, се достапни и ги коментираат одлуките, да даваат изјави….
  • Се јавува на телефон кога го бараат новинарите и претставници на граѓанското општество. Неговиот телефон е десетина години ист, тој број го знаат струмичани и од неговата медицинска пракса, кога активно работел како доктор. Ако некогаш не се јави, пишува пораки и се труди секогаш да одговори што е можно повеќе.
  • Се објавуваат сите одлуки на градоначалникот и на Советот на општината, во службениот весник на општината и на сајтот на Општина Струмица
  • Објавена е и административната структура на Општината – раководители на секотри, на одделенија, ги има на веб страната.Објавен е и буџетот на Општината и во Служебе весник и на веб страницата.
  • Вели дека се објавени и проектите и трошоците за истите. Објавени се и на веб страницата, а преку кварталните извештаи се следат промените, реализацијата на буџетите, процентите и т.н.
  • Објавени се и податоците за трошоците на Општината од типот храна, пијалоци, телефон итн., преку кварталните извештаи…„Имаме и обврска тие трошоци да ги објавууваме и на сајтот на Бирото за јавни набавки“.
  • Записниците од седниците на Советот не се објавуваат. „Меѓутоа седниците се јавни, тие директно се пренесуваат и граѓаните можат да имаат увид. Би можеле да размислиме и записниците да ги закачиме на веб страницата“.
  • Има назначено и лице за информации кои се од јавен карактер и листа на достапни документи.
  • Се објавува и годишната програма за работа и реализацијата, како и трошоците за спроведување на таа програма.

Целото интервју кое го реализира новинарот Ване Трајков може да го проследите подолу:

 

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED – National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа.


Тренов: Откупувачите на зелка купуваат само од тие што не протестираа


Скопје, 12 април, 2018 - 14:11 (META) 

Иако претставници на министерството и владата се фалат дека експресно го решиле проблемот со откупувачите и производителите на зелка, и договориле цената да се движи од 20-25 денари по килограм, состојбата е поинаква. Откупот е драстично намален, а воопшто не се откупува од производители што минатата седмица протестираа, обвини Ромео Тренов на прес-конференција во седиштето на ВМРО-ДПМНЕ.

– Забележано е драстично намалување на количините на откупената зелка, иако откупувачите до вчера декларативно ја држеа цената од 20 денари. Откупните пунктови ги држат повеќе затворени отколку отворени. Истите откупувачи имаат добиено целосни инструкции да не откупуваат зелка од лицата кои протестираа минатата недела заради ниските цени, така што се случува дискриминација на лице место, и производителите се делат на подобни и неподобни согласно правилата на неспособната влада – рече Тренов.

Тој вели дека одредени откупувачи се обидуваат да ја исплаќаат зелката со репроматеријали наместо со пари, и со тоа да ги намалат откупните цени.

– И покрај ветувањата на неспособната влада дека цената ќе се движи од 20-25 денари во моментот на ова обраќање цените на откупот изнесуваат 15 денари по килограм, со тенденција на понатамошен драстичен пад. Во одредени региони на полињата има и до 70 отсто од засеаната зелка, па производителите се соочени истите количини да презреат и да им пропаднат, заради слабиот откуп последниве денови – обвинува Тренов.