!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Тетовци протестираа пред седиштето на ЕВН во Тетово


Тетово, 10 февруари, 2017 - 15:55 (META) 

Околу илјада граѓани протестираа попладнево пред седиштето на ЕВН во Тетово, незадоволни, како што велат, од цената што ЕВН им ја наплатува за потрошена електрична енергија. Тие упатија повеќе барања до компанијата ЕВН, меѓу кои и да се либерализира пазарот на дистрибуција на струја.

– Бараме ЕВН да ја намали цената на киловат-час електрична енергија, затоа што цената на отворена берза е многупати помала од таа што се фактурира на граѓаните на Македонија, да се отстрани индустриската тарифа, итно да се либерализира за сите потрошувачи пазарот на дистрибуција. Да ѝ се забрани на ЕВН основните средства за дистрибуција што ги плаќа потрошувачот да ги присвои како свои инвестиции. Да не наплатува такса за приклучок на потрошувачот од 500 евра, затоа што тоа е нешто кое е забрането со закон – рече Џемал Хасипи од организациониот одбор за протести против ЕВН.

Учесниците на протестот побараа од компанијата да ги пронајде крадците на струја, за да не се казнуваат сите потрошувачи и да се забрани поставување на броила на јавни површини.

Од организациониот одбор за протести против ЕВН, рекоа дека протестите ќе продолжат и понатаму, во зависност од тоа дали ЕВН ќе ги прифати нивните барања.


ЕЛЕМ: ТЕЦ Осломеј не откажала ниту, пак, е исклучена поради дефект


Скопје, 7 февруари, 2017 - 16:15 (META) 

„Не е точно дека ТЕЦ Осломеј откажала ниту, пак, е исклучена поради дефект. Овој капацитет во изминатиот период на зголемен потрошувачки конзум и потреба од електрична енергија, во целост одговори на потребите на тарифните потрошувачи“, се вели во реакцијата на ЕЛЕМ на соопштението на СДСМ.

– Основна причина зошто капацитетот е надвор од електроенергетскиот систем е намалената потрошувачка на електрична енергијa. Со опаѓање на конзумот и со реоптимизација на електраните, донесена е одлука тој да се исклучи, затоа што вкупната потреба од електрична енергија од почетокот на месецов, АД ЕЛЕМ во целост ја обезбедува од домашното производство и без потреба од увоз. Истовремено, во услови кога без овој термокапацитет во целост се одговара на потребите на потрошувачите, компанијата избегнува дополнителни трошоци, со оглед на тоа што специфичната производствена цена на ТЕЦ Осломеј надминува 100 евра за мегават-час електрична енергија – се вели во соопштението на компанијата.

Во однос на водостојот на Тиквешкото Езеро, од ЕЛЕМ велат дека не е точно дека акумулацијата е на минимално ниво, туку во согласност со денешните податоци, таа е на пет метри од минималната работна кота.


СДСМ: Осломеј откажа, го празнат и Тиквешко Езеро


Скопје, 7 февруари, 2017 - 10:53 (META) 

Раководството на ЕЛЕМ поврзано со криминалното раководство на ВМРО-ДПМНЕ, освен природното Охридско Eзеро, го празни и Тиквешкото Езеро преку хидроелектраната Тиквеш, велат од СДСМ.

Тие додаваат дека „несовесните власти на АД ЕЛЕМ посегнаа по максимално искористување на езерските води, во паниката дека скапиот увоз на струја зазема огромни размери во милиони евра за што ќе следува отчет“.

„Според нашите информации, од неделата не работи термоелектраната Осломеј, што власта едвај ја подигна да произведува струја. СДСМ постојано предупредуваше дека тендер-политиките на криминалната власт на ВМРО-ДПМНЕ, којашто ја користеше ЕЛЕМ за рајски градини и за лично богатење на поединци, наместо за вложување во енергетски капацитети, ќе донесат штетни последици за граѓаните и за државата“, се вели во соопштението на СДСМ.

Во него се посочува дека „граѓаните во најстудената зима се оставени да зависат од скап увоз на струја, којшто достигна вредност од повеќе од шест милиони евра, а домашна струја нема бидејќи единствениот комбинат што работи е РЕК Битола, и тоа со постојани падови на системот по криминалните реконструкции“.


ЕЛЕМ: Нема неконтролирано испуштање вода од Охридско Езеро


Скопје, 6 февруари, 2017 - 15:51 (META) 

Од АД ЕЛЕМ велат дека е „лага дека водите од Охридско Езеро биле прекумерно искористувани за производство на електрична енергија“, како реакција на соопштението на СДСМ.

– Зголеменото производство во декември е според планот за работа за тој месец, како и поради натпросечните дотеци во ноември, а, пак, намаленото производство за јануари се базира врз планот  во енергетскиот биланс за тој период и согласно потпросечните дотеци во декември минатата година – велат од ЕЛЕМ.

Оттаму истакнуваат дека го прилагодуваат испустот на вода од Охридско Езеро во Црн Дрим според котата на езерото, а во согласност со референтните податоци на УХМР, како и според страничните дотеци во сливот на ХЕЦ „Глобочица“.


ЕЛЕМ: Нема неконтролирано испуштање на вода од Охридско Езеро


Скопје, 2 февруари, 2017 - 18:45 (META) 

ЕЛЕМ го прилагодува испустот на вода од Охридско Езеро во Црн Дрим според котата на езерото, во согласност со податоците на УХМР, како и според страничните дотеци во сливот на ХЕЦ Глобочица, информираат од компанијата, а по повод информациите дека ЕЛЕМ ја користи водата од Дрим за пороизводство на енергија, со што Охридско Езеро има низок водостој.

– Следејќи ги хидролошките состојби, АД ЕЛЕМ во изминатиот период го редуцира, во целост го прилагоди и го оптимизира производството на електрична енергија од хидроцентралите по течението на Црн Дрим во согласност со дотеците и со хидролошката состојба – велат од ЕЛЕМ.

Оттаму очекуваат зголемување на водостојот на Охридското Езеро во наредниот период, особено со топењето на снегот на околните планини, како и поради очекуваните врнежи од дожд и од снег што директно ќе придонесат за зголемување на дотеците во езерото.


СДСМ: ЕЛЕМ е под контрола на криминалното раководство на ВМРО-ДПМНЕ


Скопје, 14 јануари, 2017 - 18:58 (META) 

Криминалното раководство на ВМРО-ДПМНЕ инсталирано во ЕЛЕМ е фатено во злоупотреба на штета на граѓаните на Република Македонија, велат од СДСМ.

Од СДСМ информираат дека извештај на Регулаторна комисија за енергетика покажува дека ТЕЦ Осломеј во 2016 година произвел само 8 проценти од струјата што ја произведувала компанијата во 2006 година.

sdsm tec oslomej

„Во 2017 година, ТЕЦ Осломеј има произведено нула мегават-часови струја. Не работи ни ТЕЦ Неготино, а РЕК Битола не произведува струја со полн капацитет. Да работеа ТЕЦ Неготино и ТЕЦ Осломеј, и стабилно да работеше РЕК Битола, граѓаните немаше да мора да платат огромни 4,2 милиона евра за струја од увоз, за само две недели. Криминалното раководство на ВМРО-ДПМНЕ инсталирано и во ЕЛЕМ, се вознемири зашто станува јасно за чии интереси е уништено домашното производство на струја – за Македонија да мора да увезува скапа струја“, велат од СДСМ.

Од партијата додаваат дека граѓаните гласале за нова и одговорна влада, која ќе го крене домашното производство на струја и ќе се грижи за нивните потреби.


Манчев: Струјата произведена на мазут би била поскапа од увезената


Скопје, 13 јануари, 2017 - 19:15 (META) 

„Неуките експерти на СДСМ целосно промашуваат кога станува збор за вклучувањето на ТЕЦ Неготино. Вистината е дека според цената на мазутот, струјата произведена на мазут би била многу поскапа од увезената, која е купена на берза“, изјави на прес-конференција Ванковер Манчев од ВМРО-ДПМНЕ, како реакција на изјавата на Митко Андреевски од СДСМ за цената на увезената струја.

Според Манчев, „безобразно е СДСМ да критикува за ТЕЦ Осломеј, кога токму во нивно време, таа термоелектрана беше оставена без грам јаглен и без каква било можност за ископ на потребните ресурси“.

– За разлика од СДСМ, ВМРО-ДПМНЕ континуирано работи на подобрување на енергетската слика на Македонија, а така и ќе продолжи во иднина, со реализирање на бројните мерки и проекти предвидени со досега најобемната програма „Реално“ – додаде Манчев.


Андреевски: Увозот на струја ќе ги чини граѓаните 4,2 милиона евра


Скопје, 13 јануари, 2017 - 15:57 (META) 

Неверојатни 4,2 милиона евра ќе ги чини граѓаните увозот на електрична енергија и тоа само за период од две недели, од 7 јануари заклучно до 22 јануари, истакна денеска претседателот на Комисија за енергетика на СДСМ, Митко Андреевски.

Тој истакна дека „ако РЕК Битола, ТЕЦ Неготино и ТЕЦ Осломеј работеа, немаше да има ризик од останување без струја“.

– Срамно, безобразно и несовесно од страна на менаџментот на ЕЛЕМ е да нè убедува дека снегот што ќе се стопи напролет, ќе нè спаси од ново поскапување на струјата – изјави Андреевски.


Државните службеници во подрачните одделенија во Тетово два дена се без греење


Тетово, 13 јануари, 2017 - 15:34 (META) 

Државните институции сместени во зградата на Општина Тетово, од вчера се без греење. Работи само една фаза од електричната мрежа, на која не можат да се приклучат грејни тела. Административците од подрачните одделенија во Тетово, на министерствата за правда, земјоделство, финансии, работат со јакни, капи, шалови.

– Па, нема никакакви услови, многу е студено, работиме на температура под нулата, а не е првпат ова да ни се случува – изјави еден вработен во тетовското подрачно одделение на Министерството за финансии.

Од ЕВН велат дека поради замена на електричен кабел, вчера не работела една фаза во тој дел од градот каде се лоцирани и државните институции.

Денеска, како што ни изјави портпарол на ЕВН, Атанас Ковачевски, бил прегорен осигурувач, па затоа не работеле двете фази во просториите каде се сместени државните институции.

Оваа грејна сезона, зградата на Општина Тетово нема централно греење. Во октомври минатата година целосно изгоре котларницата. Сега административците се греат на разни печки на струја и поради преоптовареност на мрежата, честопати се појавуваат прекини во напојувањето со струја.

Од Општина Тетово велат дека се работи на реконструкцијата на котларницата, но поради ниската температура десетина дена градежните активности биле во мирување. Деновиве се очекува целосно да се обнови котларницата и зградата на Општина Тетово повторно да добие централно греење.


СДСМ: Kолку ќе платиме за струјата што треба да ја увеземе следната недела


Скопје, 12 јануари, 2017 - 15:17 (META) 

„Ситуацијата со недостиг на струја е сериозна, ќе се увезува струја и следната недела. Ќе се одлеваат нови милиони евра народни пари за скапиот увоз“, се вели во соопштение на СДСМ.

Во него се додадава дека е распишан нов тендер за увоз на струја за периодот од 14 до 22 јануари.

– Ова на денешната прес-конференција го сокри директорот на АД ЕЛЕМ, Христијан Мицоски. Ако за пет дена плативме 2 милиона евра за увезена струја, колку ќе платиме за струјата што треба да ја увеземе во следните осум дена – прашуваат од партијата преку соопштението.