Димитров во Стразбур ќе разговара со европарламентарците за напредокот на Македонија


Скопје, 2 јули, 2018 - 13:24 (META) 

Министерот за надворешни работи, Никола Димитров, утре ќе престојува во  работна посета на Стразбур, во Европскиот парламент, при што ќе се сретне со шефови на пратеничките групи во Парламентот, меѓу кои се претседателот на АЛДЕ – Ханс ван Бален, претседавачот со Комисијата за надворешни работи на Европскиот парламент (АФЕТ) – Дејвид МекАлистер кој доаѓа од Европската народна партија, како и со неговиот сопартиец Андреј Ковачев.

„Во фокус на разговорите ќе бидат натамошните фази од евроинтегративниот процес на Република Македонија, по заклучоците на Европскиот совет минатата недела“, најавуваат од Министерството за надворешни работи.


Пресуда на Стразбур против Македонија за неправедно протерана бегалка


Стразбур, 18 мај, 2018 - 12:51 (META) 

Европскиот суд за човекови права донесе пресуда за случајот „Љатифи против Република Македонија“, со која се утврдува повреда на членот 1 од протоколот 7 на европската конвенција за човековите права, кој се однесува на процедуралните гаранции во случај на протерување на странци.

Како што образложува судот во Стразбур, жалителката Ѓилизаре Љатифи, родена во 1991 година, на осумгодишна возраст, заедно со своето семејство, избегала од Косово во Македонија, каде што во 2005 година ѝ бил одобрен азил и ѝ бил дозволен престој.

Азилот и престојот ѝ биле продолжувани сè до 2014 година кога министерството за внатрешни работи ѝ го прекинува азилот, со тврдење дека таа претставува закана за националната безбедност. Љатифи се жалела на ваквата одлука и започнала административно-судски постапки кои не завршиле во нејзина корист, бидејќи судските инстанции се повикувале на документи од класифициран карактер во кои жалителката немала увид, со што се оневозможило нејзиниот случај адекватно да биде презентиран во поведените постапки.

Според судот во Стразбур, во овој случај постои прекршување на процедуралните гаранции во случај на протерување странци.


Утре Брисел ќе препорача отворање на преговори со Македонија


Брисел, 16 април, 2018 - 10:08 (META) 

Европската комисија повторно препорачува отворање на пристапните преговори со Македонија, а извештајот за напредокот на земјата е меѓу попозитивните во овој пакет на Брисел, кој, како што стои во извештајот, „јасно ја препознал политичката волја за напредок“, јави Радио Слободна Европа (РСЕ), чии дописници од Брисел имале увид во документот што ќе биде објавен утре во Стразбур.

Во него се предупредува дека „штетата која се правела години наназад, не може да се среди преку ноќ“, но дека земјава ја надминала длабоката политичка криза и дека структурните реформи се долг процес кој може да потрае.

Според РСЕ, во извештаите невралгични точки во сите држави од Западен Балкан остануваат владеењето на правото, организираниот криминал и корупцијата, како синоними за секоја држава во регионот. Исто така, ЕК повторно во повеќе наврати го користи изразот „заробени држави“, со забелешка дека јавната управа во државите од регионот останува слаба, и малку или воопшто нема прогрес на полето на слобода на изразување.

Како и во минатогодишните извештаи, повторно се нагласува дека билатералните спорови и понатаму се главни пречки во процесот на евроинтеграција.

За Македонија во нацрт-извештајот се нагласува дека за понатамошен напредок на државата одлучувачки фактор е задржување и продлабочување на динамиката во процесот на итни реформски приоритети. ЕК изразува подготвеност да го поддржи тој процес со примена на засилен пристап за преговарачките подрачја за судството, основните права и слободи и слободата и безбедноста на државата.


Судот во Стразбур пресуди дека Велија и Емел Рамковски биле притворени без аргументи


Стразбур, 8 февруари, 2018 - 13:39 (META) 

Судот за човекови права во Стразбур, пресуди во корист на Велија Рамковски и неговата ќерка Емел Рамковска, кои поднесоа тужби до судот за критериумите по кои бил одреден притворот и за должината на притворот во случајот „Пајажина“.

Согласно пресудата, државата ќе треба да им исплати и парична оштета во износ по 780 евра на двајцата. Дополнително, ќе се утврдува дали има основа да се поведе постапка и пред македонските судови за начинот на кој бил одреден притворот.

Според нивниот адвокат Филип Медарски, судот утврдил повреда на член 5, став 3 од Конвенцијата (право на слобода, непостоење на причините за притвор ). Ова значи дека македонските судии не ги зеле предвид објективните критериуми при определување на притворот, туку донеле одлука за притвор без да дадат конкретни аргументи по ниту една од трите точки: опасност од бегство, повторување на делото или влијание врз сведоци – кои можат да бидат причини за определување на притворот.

Велија Рамковски беше сопственик на телевизијата „А1“  и беше во притвор една година и два месеци.


Судот во Стразбур ѝ пресуди 9.500 евра обесштетување на ПОА на Вранишковски


Стразбур, 16 ноември, 2017 - 15:51 (META) 

Европскиот суд за човекови права (ЕСЧП) во Стразбур денеска донел пресуда во полза на Православната охридска архиепископија (ПОА) на Јован Вранишковски, а Република Македонија ќе мора да исплати 9.500 евра обештетување на ПОА, извести Хелсиншкиот комитет за човекови права на Република Македонија.

Со пресудата се констатира дека со одбивањето на надлежните во Македонија да се регистрира ПОА како посебна верска заедница, се прекршени членот 11, за слободата на собирање и на здружување, во врска со членот 9, кој се однесува на слободата на мислата, совеста и на религијата, од Европската конвенција за човекови права.

Со пресудата од Стразбур, Република Македонија како тужена и одговорна држава е задолжена да ѝ исплати на ПОА 4.500 евра како надомест на нематеријалната штета, како и дополнителни 5.000 евра за трошоците и за издатоците направени при оваа постапка пред ЕСЧП.

Хелсиншкиот комитет ја почнал постапката во името на ПОА, наведувајќи дека двете барања за регистрација на ПОА како верско здружение биле одбиени.

„ЕСЧП нагласува дека јавното мислење на државата не треба да биде заштитено на штета на малцинските ставови, така што ниту огромната важност што автокефалноста на МПЦ ја има за нејзините верници и поддржувачи, не може да го оправда преземањето мерки што би го спречиле апликантот сеопфатно и безусловно да почне со каква било религиозна активност. Токму врз таа основа, имајќи ја предвид потребата од одржување на религискиот плурализам, во ситуација на каков било конфликт помеѓу или во рамките на самите верски групи, Судот во Стразбур експлицитно го осуди преземањето превентивни мерки со кои би се сузбила слободата на собирање и на изразување во едно демократско општество“, констатира Хелсиншки комитет.


Петмина работници ја победија Црна Гора во Стразбур


Стразбур, 24 февруари, 2017 - 20:11 (META) 

Петмина поранешни вработени во некогашниот гигант на СФРЈ и потоа на СРЈ, производителот на градежни машини „Радоје Дакиќ“, по седум години чекање, го добија спорот против владата на Црна Гора што го поведоа во Европскиот суд за човекови права во Стразбур, јавија црногорските медиуми.

Сега црногорската влада мора да им исплати најдоцна за три месеци сума од 217.000 евра, колку што изнесува сумата од нивните 77 неисплатени месечни плати. Покрај тоа, владата на Црна Гора мора да им исплати и по 2.000 евра за нивните трошоци и за претрпената штета.

Пресудата ќе има далекусежни последици, оти, според нивниот адвокат, прифаќајќи ја тужбата од петмината работници, судот во Стразбур го утврди принципот според кој сите поранешни вработени, а не само оние 369 што ги застапува пред Европскиот суд за човекови права, ќе може да си ги остварат правата.

Доколку сите 1.800 некогашни работници на гигантот за градежни машини тргнат по патот на своите колеги, тоа би можело Црна Гора да ја чини 80 милиони евра.

Петтемина работници се обратиле до судот во Стразбур жалејќи се дека владата на Црна Гора не ја почитувала одлуката во нивна полза што црногорските судови ја донеле уште во 2005 година.


ПССЕ го избра Јован Илиевски за судија во Стразбур


Стразбур, 11 октомври, 2016 - 19:30 (META) 

Парламентарното собрание на Советот на Европа (ПССЕ) денеска со 106 гласа „за“ го избра обвинителот во македонското Обвинителството за организиран криминал, Јован Илиевски, за судија во Европскиот суд за човекови права во Стразбур.

Освен Илиевски, кандидати за судија беа и судијката од Уставниот суд, професорката Наташа Габер-Дамјановска, која добила 86 гласа, како и Звоимир Јанкуловски.

Претходно, Комисијата за избор на судии при ПССЕ, ги разгледа кандидатурите и имаше разговори со кандидатите од Република Македонија, по што до другите членови на ПССЕ, со тесно мнозинство гласови, предност ѝ даде на Наташа Габер-Дамјановска. Звонимир Јанкуловски, не доби препорака од Комисијата на ПССЕ.

Изборот на судија од Македонија во Европскиот суд за човекови права денеска беше една од точките за која се расправаше на есенската сесија на Парламентарното собрание на Советот на Европа (ПССЕ) во Стразбур.


Никола Попоски во Стразбур на состанок на Паневропската Унија


Скопје, 7 март, 2016 - 10:58 (META) 

Министерот за надворешни работи, Никола Попоски, денеска ќе има обраќање на состанокот на работната група на Европската народна партија (ЕПП) во Паневропската Унија, во Европскиот парламент во Стразбур.

Како што соопшти Министерството за надворешни работи, пред членовите на работната група, министерот Попоски ќе се осврне на европскиот интегративен процес на Република Македонија и на перспективите за почнување на преговорите за членство во Европската Унија.


Стразбур утврди дека истрагата за случајот на Мартин Нешковски била законски спроведена


Скопје, 21 јануари, 2016 - 14:13 (META) 

Европскиот суд за човекови права донесе пресуда во која се вели дека за случајот со убиството на Мартин Нешкоски нема повреда на членот 2 од Европската конвенција за човековите права во смисла на ефективноста на истрагата, објави „Академик“.

Мајката на Мартин Нешкоски, Ленка Нешкоска, до Европскиот суд за човекови права се жалела дека истрагата за смртта на нејзиниот син не била ефективна.

Судот образложува дека нејзиниот син, Мартин Нешкоски, бил убиен од припадник на специјалните полициските сили за време на прославата за резултатите од изборите во 2011 година.

Повикувајќи се на домашниот судски процес против полицаецот Игор Спасов, судот истакнува дека за убиството на Нешковски имало судски процес, кој резултирал со изречена 14-годишна затворска казна за Спасов.

Во врска со истрагата за случајот, судот образложува дека јавниот обвинител побарал од истражниот судија да отвори истрага против Спасов, но за време на истрагата мајката на Мартин Нешкоски поднела кривична пријава против уште четири лица, од кои тројца била припадници на полицијата, под сомневање дека тие му помогнале на Спасов да го прикрие убиството и погрешно му кажале на јавниот обвинител дека Нешкоски починал од предозираност со дрога.

Но, на 29 ноември 2011 година, јавниот обвинител ги отфрлил кривичните пријави, наоѓајќи дека нема основа посочените лица кривично да се гонат, односно, повикувајќи се на доказите, нашол дека три од лицата не биле присутни кога Спасов смртоносно го удрил Нешкоски. Незадоволна од ваквата одлука, мајката на Нешкоски продолжила правдата да ја бара како супсидијарен тужител. И во овој случај нејзината пријава била отфрлена.

 


Прилепски таксист доби спор против Македонија во Стразбур


Прилеп, 27 септември, 2015 - 16:04 (META) 

Таксист од Прилеп, кој не знаел дека превезува албански државјани кои нелегално ја преминале границата, ја доби правдата пред Европскиот суд за човекови права во Стразбур, во врска со конфискувањето на неговото возило од марката „мерцедес“.

Државата треба во рок од три месеци од денот на правосилноста на пресудата да му го врати возилото, кое судот му го конфискувал пред осум години поради повреда на членот 1 од протоколот 1 од Европската конвенција за заштита на човековите права.

Доколку не постои таква реституција, државата треба да му плати 10.000 евра, во рамките на истиот период од три месеци. На таксистот, исто така, треба да му се исплатат 3.000 евра нематеријална штета, како и судски трошоци.