Милијардата евра за Западен Балкан се средства на ИПА и нема нови пари


Скопје, 9 февруари, 2018 - 14:56 (META) 

При презентацијата на Стратегијата за Западен Балкан на Европската комисија во ЕУ парламентот во Стразбур, беше најавено дека за оваа година се предвидени 1,07 милијарди евра како претпристапна помош, како надоврзување на речиси девет милијарди евра дадени во периодот 2007-2017 година.

Според Малинка Ристевска Јорданова од Институтот за европска политика (ЕПИ), во новата стратегија нема ништо ново во однос на средствата за регионот за овој финансиски период (2014-2020).

– Можни се само реалокации во постојните вкупни средства за Западен Балкан, што е во рамките на веќе важечкото. Македонија би можела да ги надмине досега определените 664 милиони евра доколку ги троши ефикасно, а потоа како „наградa“ да се прелеe нешто од преостанатите средства од ИПА II. Стратегијата најавува дека ќе бидат потребни повеќе средства за регионот во следната финансиска перспектива 2021-2027.  Во таа смисла, од финансиски аспект, оваа Стратегија е само загревање. Преговорите за новата финансиска перспектива во ЕУ почнуваат оваа година. За појаснување, споменатата една милијарда се годишни средства на ИПА за регионот за оваа година“, вели Ристевска Јорданова за „Мета“.

Таа додава дека, нормално е во секој финансиски период трошењето постепено да се зголемува, но ова е во рамките на предвидената алокација за ИПА за седумте години во тек и нема нови средства.


Jункер на 25 февруари во официјална посета на Македонија


Скопје, 8 февруари, 2018 - 12:24 (META) 

Вицепремиерот за европски прашања, Бујар Османи, информираше дека претседателот на Европската комисија, Жан Клод Јункер ќе ја посети Македонија на 25 февруари. Македонија ќе биде првата земја која Јункер ќе ја посети како дел од неговата турнеја низ државите од Западен Балкан за презентација на Стратегијата на ЕУ за регионот.

– Ова е важен момент за презентација на Стратегијата, но и за охрабрување на владите да ги удвојат напорите за постигнување на новите скратени таргети – рече Османи.

Според него, Стратегијата ги исполнува сите очекувања на Македонија, бидејќи се валоризираат успесите на земјата во однос на реформите.

– Македонија со овој вординг што е даден во Стратегијата е задоволна зашто овозможува кога ќе почне да преговара да може да ги престигне и предводниците во процесот доколку постигне резултати. Ние тоа го посакувавме, бидејќи Македонија е најстара во овој процес и пред Србија, Црна Гора и сите други држави од Западен Балкан, оти имавме Договор за стабилизација и асоцијација во 2001 година, кандидат сме од 2005 година и има најмногу напреднато во процесот на хармонизација со европското законодавство и трансформацијата на општеството – рече Османи.

Тој посочи дека Извештајот на Европската комисија за напредокот на земјата ќе биде соопштен на 17 април и очекува чиста деветта по ред препорака за отпочнување преговори.

Во врска со содржината на Стратегијата, она што ја издвојува во однос на сите досегашни документи, е што таа определува обврски не само за земјите кандидати, туку и за ЕУ односно процесот на проширување го прави двонасочен.

Во анексот на Стратегијата, според Османи, содржана е и листа на задачи за ЕУ преку кои таа треба да ги подготви земјите за членство.

Од земјите кандидати се очекува да спроведат сеопфатни реформи во клучните области во однос на владеење на право, фундаментални права и управувања, зајакнување на економијата, примена на правилата и стандардите на ЕУ и помирување и добрососедски односи.


Се подготвува нов Закон за спорт и десетгодишна национална стратегија за спорт


Скопје, 7 февруари, 2018 - 15:40 (META) 

Нов Закон за спорт и десетгодишна национална стратегија за спорт најави денеска премиерот Зоран Заев по дебатата во Владата со спортски работници, претставници на спортски федерации, здруженија и поддржувачи на развојот на спортот, за стратешките основи за развојот на спортот во Македонија.

– Ве уверувам дека во мене имате спортски партнер, а во Владата поддршка. Целта е спортистите да го добијат заслуженото место во општеството со финансиска, но и логистичка поддршка. Посебно внимание ќе посветиме на наставата по физичка култура во училиштата – рече Заев.

Директорот на Агенцијата за млади и спорт, Дарко Каевски, рече дека дел од приоритетни мерки кои ќе ги преземе Агенцијата ќе биде градењето на мали реонски базени, наградување на 250 младински клубови како и враќањето на спортски сали на федерациите.

На новинарско прашање за обвинувањата од Александар Маленко дека Каевски направил упад во пливачката Федерација на Македонија, Каевски рече дека 15 пливачки клубови бараат од Агенцијата за млади и спорт да го преиспита последното Собрание на Пливачката федерација на Македонија.

Маленко пред два дена го обвини Каевски дека направил прекршок и упад во работењето на Федерацијата со барањето на одржување на вонредно Собрание и дека со тоа ја нарушил самостојноста и независноста на ПФМ.

Каевски рече дека Маленко не е легитимен претседател на Федерацијата затоа што не е заведен во Централен регистар.

– Федерацијата има десетгодишна блокирана сметка со долг од над 20 милиони денари и дополнително треба да утврдиме и да видиме каде се тие средства. Федерацијата пет години немала завршно Собрание и нема завршна сметка, а доколку две години нема доставено завршна сметка и годишно Собрание по автоматизам треба да се оди во стечај. Ние како АМС не сакаме да го направиме тоа, не сакаме да го укинеме пливањето. Напротив, апелираме дека треба да се преземат чекори за пливањето повторно да се врати на она ниво како што беше пред 10—15 години– изјави Каевски.


Билт: „Тешкашите“ од ЕУ треба да се вклучат во решавањето на спорот за името


Лондон, 5 февруари, 2018 - 12:12 (META) 

Во решавањето на спорот за името меѓу Македонија и Грција треба да се вклучат силните членки на Европската Унија, за да се избегне колапс на стратегијата на ЕУ за Балканот, смета ко-претседавачот на Европскиот совет за надворешни работи и поранешен шеф на шведската дипломатија, Карл Билт.

„Мислам дека ќе треба силна посветеност на силните земји-членки и на институциите на Европската Унија за да се постигне компромис за името на Македонија. Без тоа, стратегијата на ЕУ за Балканот ризикува да доживее колапс“, напиша Билт на својот твитер-профил, споделувајќи текст на грчкиот весник „Катимерини“ за вчерашните протести во Атина.


При крај е Стратегија за намалување на смртноста кај новороденчињата, рече Филипче


Охрид, 20 јануари, 2018 - 15:36 (META) 

Министерот за здравство, Венко Филипче денеска имаше работна средба со раководителите на здравствените институции во Охрид. Целта на посетата, рече тој, е да се запознае со работата на здравствените установи, преку разговор со нивните менаџерски тимови за проблемите во работењето и начините за нивно надминување.

– Во болницата „Свети Еразмо“ разговаравме за текот на реконструкцијата на објектот, како ќе продолжат градежните активности, како и за потребата на установата од соодветен кадар, едукација и доедукација, зголемување на квалитетот на услугите што се нудат и воведување нови – рече Филипче.

Најави дека градежните активности за реконструкција и изградба на објектот ќе продолжат, како и во насока на изнаоѓање најдобри можности тоа да се спроведе без да се попречува тековното работење на установата.

Филипче не кажа дали ќе се реализираат плановите што ги најави претходната раководна гарнитура во Министерството за префрлање на Заводот за кардиоваскуларни заболувања „Свети Стефан“ во рамки на комплексот „Свети Еразмо“.

Што се однесува на проблемот со високата смртност на новороденчиња регистриран минатата година, Филипче истакна дека во тек се интензиви разговори со лекарите во педијатриската служба, во службите за интензивна нега на клиниките за педијатрија и гинекологија така што, рече, во одмината фаза е изготвувањето на Стратегија за намалување на смртноста кај новороденчињата.

– Вклучени се и странски организации под капата на Обединетите нации кои нудат експертиза, а се формира и рамка за тренинг на кадарот за надминување на проблемот, како и планови за структурни промени во рамки на интензивната нега на гинеколошката клиника, во делот каде се лоцирани проблеми – рече министерот за здравство.

Најави и рамка за решавање на проблемот со набавката на инсулин, преку обезбедување поголеми количества и на тој начин елиминација на ризик од дефицит.


ИК на ВМРО-ДПМНЕ ќе прави „стратегии за спасување на државата“


Скопје, 16 јануари, 2018 - 11:43 (META) 

Новиот Извршен комитет на ВМРО-ДПМНЕ на првата одржана седница ги разгледал актуелните состојби во државата и донел заклучок дека не постои сектор во кој што Македонија не назадува и дека „треба да се изготват соодветни стратегии со кои партијата ќе се спротивстави на уништувањето на земјата“.

На седницата, одржана вчера, Извршниот комитет на најголемата опозициска партија го осудил политичкиот прогон од страна на власта кој, како што се наведува во соопштението, преку правосудните органи се врши врз пратеници, уметници, полициски службеници и останати лица, а чија цел е „замолкнување на секаква критика и ширење на страв меѓу народот и сите кои мислат поинаку“.

На состанокот било заклучено и дека носењето на „неуставниот закон за двојазичност и ратификувањето на асиметричниот договор со Бугарија“ се доказ за штетните антидржавни политики на СДСМ кои ја редефинираат Република Македонија и нанесуваат штети на долг рок.

„Извршниот комитет на вчерашната седница ја анализираше и катастрофалната економска политика што ја води црното економско трио Заев, Анѓушев и Тевдовски, која земјава ја турка во банкрот. Нивната неспособност ја плаќаат граѓаните кои за само 15-тина дена, актуелната влада ги задолжи со над 570 милиони евра“, стои во соопштението.

„Додека Заев е на луксузно зимување во италијанските монденски ски-центри, а Шилегов во Загреб, Скопјани ги полнат клиниките како резултат на загадениот воздух“, велат од партијата.


Град Скопје изработи анализа за можностите за намалување на ризикот од поплави


Скопје, 30 ноември, 2017 - 15:01 (META) 

„Анализа на можностите за намалување на ризикот од поплави во Скопскиот Регион“ е името на студијата што Град Скопје ја изработи во соработка со УНДП, а денеска беше презентирана пред јавноста.

– Градот Скопје почнува нова практика во начинот на работењето, во смисла на споделување на резултатите од научните студии со јавноста. Сакам да нагласам дека Градот Скопје и УНДП во декември 2014 година почнаа заедничка реализација на проектот за зголемување на урбаната отпорност на природни катастрофи и на климатски промени, со примена на информатичка технологија, кој сè уште е активен – рече Љубица Јанчева, претседателка на Советот на Град Скопје.

На презентацијата на овој значаен документ присуствуваа и постојаниот претставник на УНДП, Луиза Винтон, како и претставнци од скопските општини, јавните градски претпријатија, министерствата и од научните институции, невладини организации и граѓани.

Во анализата се содржани сите активности, анализи и моделирања во стратегијата за климатски промени, како и сознанијата од поплавите во септември 2016 година во Стајковци и во населените места во близина.

Постојаниот претставник на УНДП, Луиза Винтон, порача дека треба да се работи на намалување на ризиците од поплавите, имајќи го предвид, пред сè, доброто и безбедноста на луѓето, зашто алармот од климатските промени е веќе вклучен.


Царовска: 220.000 работници се сиромашни, односно секој трет вработен


Скопје, 15 септември, 2017 - 16:20 (META) 

Според податоци од Министерството за труд и социјална политика, 220.000 работници, односно секој трет вработен е сиромашен, додека според одредени индикатори на Еуростат за 2015 година, 8,9 проценти од вработените се сиромашни.

Ова денеска го истакна министерката за труд и социјална политика, Мила Царовска, која се обрати на шестата национална конференција на сиромашни и социјално исклучени лица во организација на Македонската платформа против сиромаштија. Настанот со „Работа, колку да не е без ич“ беше посветен на лицата кои се вработени, но сиромашни.

Во обраќањето на министерката беше спомнато дека за надминување на сиромаштијата кај вработените, клучна улога имаат синдикатите.

„Многу е важно тие да функционираат и да се грижат повеќе да бидат блиски со работниците, наместо со политичките елити. Ако имаме силни синдикати, многу помалку ќе зборуваме за кршење на работничките права. Во Македонија малку работници се свесни за нивните права или чувствуваат страв дека нема кој да ги заштити. Во таа насока, во секоја приватна компанија со најмалку 20 вработени, ќе треба работните односи да се уредат и со колективен договор, покрај Законот за работни односи“, изјави Царовска.

Таа укажа дека постои неповолна почетна позиција за креирање политики поради недостигот од релевантна статистика, затоа што истата се базира на податоци од пописот во 2002 година, а оттогаш состојбата во Македонија е многу изменета.

Министерката се задржа и на проблемот со неформалната, сива економија. Луѓето кои собираат пластика, хартија, стакло, како што посочи, се исклучени од системот. Иако тие помагаат државата да го исчисти сметот, тие не се социјално обезбедени и немаат заштита при работа.


Советниците во Општина Штип гласале за распишување референдум за мигрантите


Штип, 30 август, 2017 - 20:03 (META) 

Советот на Oпштина Штип, со 13 гласа „за“, денеска изгласал да почне постапка за распишување референдум, на кој граѓаните ќе се изјаснат за „Стратегијата за интеграција на бегалци и странци 2017-2027 година“.

Советниците од редовите на ВМРО-ДПМНЕ гласале „за“, а советниците од СДСМ пред гласањето ја напуштиле салата.

Граѓанската иницијатива „Будење“ од Штип до Советот на Општината приложила 356 потписи од граѓани кои ја поддржуваат иницијативата за референдум.

Денеска и Советот на Општина Кавадарци гласал против населување мигранти во нивниот град, а воедно Советот ја усвоил одлуката за распишување референдум.


Подготвена нацрт-стратегија за реформата на правосудниот сектор


Скопје, 18 август, 2017 - 17:32 (META) 

На денешниот, втор состанок на Советот за реформа на правосудниот сектор, што се одржа во Министерството за правда, е презентиран и нацрт за Стратегијата за реформа на правосудниот сектор, информираше министерството .

„Нацрт-стратегијата беше поздравена како добар стратешки  документ, во кој се нотирани повеќето слабости на правосудниот систем со конкретни предлог мерки. Членовите на Советот со конкретни забелешки даваа предлози за идно надополнување и изменување на документот, кои ќе бидат разгледани од страна на работната група задолжена за подготовка на Стратегијата“, се вели во соопштението од Министерството за правда.

На состанокот биле разгледани и Нацрт-законот за изменување и дополнување на Судскиот совет на Република Македонија и Законот за престанок на важењето на Законот за Советот за утврдување на факти и покренување на постапка за утврдување на одговорност за судија, за кои Советот ќе се произнесе на наредната седница.