Во Црна Гора најголем инвеститор е НАТО, во Македонија – Бахамите (Инфографик)


Скопје, 5 септември, 2018 - 13:47 (META) 

Можат ли македонските граѓани да очекуваат зголемен обем странски инвестиции, а следствено на тоа и отварање нови работни места доколку успее референдумот за прифаќање на договорот со Грција, што би резултирало со забрзано зачленување на земјава во НАТО е прашање што заслужува внимание со оглед на тоа што се наближува 30 септември, ден на кој е закажано гласањето за референдумот.

„Свежите“ искуства на Црна Гора, земја која една деценија од почетокот на патот кон НАТО стана полноправна членка на алијансата во јуни, минатата година го навестуваат одговорот на ова прашање. Црногорската Централна банка ги објави податоците за странските директни инвестиции кои откриваат дека во првата половина од годинава има удвојување на инвестициите од земјите-членки на НАТО во однос на истиот период, минатата година кога земјата се уште не беше членка на Алијансата.

Во првото полугодие од 2018 година во Црна Гора влегле странски директни инвестиции во вкупен износ од 403,5 милиони евра, а од нив 215,2 милиони евра биле од земји-членки на НАТО, што е значително повеќе во однос на истиот период од минатата година кога земјите од евроатлантскиот пакт вложиле 96,6 милиони евра во црногорската економија. Најголеми инвеститори од НАТО во Црна Гора годинава се Италија која е на првото место на листата најголеми странски инвеститори со вложени 72 милиони евра, Унгарија (54 милиони евра), Турција( 29 милиони евра) и Белгија (11 милиони евра).

Од друга страна, најновите податоци за директните странски инвестици на Народната банка на Македонија откриваат дека во првата половина од годинава странските инвеститори во земјава пласирале 325 милиони евра.

Меѓутоа, за разлика од Црна Гора, каде што најголем инвеститор е Италија, во Македонија најмногу странски инвестиции во 2018 година односно 25,2 милиони евра влегле од Бахамите. Статистичките податоци од изминатите години откриваат дека многу често на врвот на листата на странски инвеститори во земјава се јавуваат егзотичните острови како Сент Винсент и Гренадини, Девствените острови и други што пиратите порано ги користеле за криење на пленот, а денес служат како даночни раеви кои, бизнисмените ги користат за да избегнат давачки кон таковината при инвестирање на капиталот.

 

foto brit emb foto uk gov Овој текст е подготвен во рамките  на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.

 


Владата предложи нови членови на Регулаторна комисија за енергетика


Скопје, 20 јуни, 2018 - 9:56 (META) 

На 75. седница Владата го состави списокот на нови членови на Регулаторната комисија за енергетика (РКЕ). Владата на Собранието му предлага да ги избере Марко Бислимоски,  за претседател, а за членови Наташа Вељановска, Атанаско Тунески и Куштрим Рамадани, кој е актуелен член на Комисијата.

Владата на 75. седница ја усвоила предлог – завршната сметка на буџетот за 2017 година, со конечен извештај на овластен државен ревизор. Во завршната сметка е констатирано дека минатата година капиталните инвестиции изнесувале 19,8 милијарди денари, вкупните приходи биле 179,70 милиони денари, додека вкупните расходи 196,56 милион денари.

На седницата исто така било одлучено за доделување на државна помош на друштво за производство и трговија „Теламон Европа Македонија“. Станува збор за нова инвестиција во Македонија, која изнесува 4 милиони евра и ќе оствари 300 вработувања во првите пет години. Компанијата Теламон произведува машини за спојување, автоматски машини за сечење кабли, ленти, машини за пресекување и затворање. Инаку, компанијата е една од најголемите во САД.

Исто така е донесена одлука да се усвои договорот со „Аим проперту“ за закуп на земјиште во Технолошко индустриската развојна зона Скопје 2.

На предлог од Mинистерството за труд и социјална политика, министрите го прифатиле предлог – законот за спречување и заштита од дискриминација.

Како една од точките, Александар Дамески е именуван за директор на прилепскиот затвор.


Странските инвестиции во првите девет месеци само 45,5 милиони евра


Скопје, 4 декември, 2017 - 12:24 (META) 

Вкупниот прилив на странски инвестиции во Македонија заклучно со септември годинава изнесуваа 45,6 милиони евра, соопшти Народната банка.

Странските инвестиции во првите три квартали споредено со истиот период минатата година се помали за 145,6 милиони евра. Во истиот период лани, приливот на странски капитал изнесувал 191,3 милиони евра.

Само во септември, инвестициите биле во минус од 54,1 милион евра, а во август е регистриран одлив од 9,7 милиони евра. Позитивно салдо на странските инвестиции имало во јули, кога е регистриран прилив на странски капитал од 6,1 милион евра.


ВМРО-ДПМНЕ: Наместо 500 евра просечна плата, СДСМ ја намалува платата за 1,3 отсто


Скопје, 4 октомври, 2017 - 10:29 (META) 

Заев ветуваше „живот“ и 500 евра плата, а по долг период на економски пораст, СДС успеа да ја намали просечната плата за 1,3 отсто два месеци по ред, вели ВМРО-ДПМНЕ. Опозициската партија тврди дека македонската економија е без кормило и се работи целосно без план, дека инвеститорите се уценувани, а Македонија не е веќе позната по добрите вести, туку по негативните и црни економски извештаи и биланси.

„На Македонија со владата на СДС не ѝ бега рецесија и огромна сиромаштија.Кризата се почувствува и во фирмите. Се бележи пад во домашниот бруто-производ за 1,8 отсто. Откако СДС дојде на власт, нема ниту една странска инвестиција. Се огласи и Народната банка. Таа потврди пад на активноста на банките за 1,6 отсто. СДС успеа да ги задолжат граѓаните за 420 милиони евра, пари кои беа расипнички и неодговорно потрошени. Единствено нешто што граѓаните видоа од тие пари беше луксузирање и партиско вработување“, се вели во партиското соопштение.


Лага е дека странски инвеститори си заминуваат од Македонија, реагира СДСМ


Скопје, 17 септември, 2017 - 17:04 (META) 

Лага е дека странски инвеститори планираат да заминат од земјава, реагираат од СДСМ на прес-конференцијата на пратеникот на ВМРО-ДПМНЕ, Драган Данев.

„Нереформираната ВМРО-ДПМНЕ на Никола Груевски упорно шири лажни вести. Вистината е дека Владата предводена од СДСМ докрај ќе ги испочитува сите договори со странските инвеститори што се во тек, со заемно почитување на обврските“, стои во соопштението на СДСМ.

Од владејачката партија велат дека новиот план за економски пораст обезбедува стабилна бизнис-клима за трајни и долгорочни инвестиции, а новите мерки за привлекување странски и домашни инвестиции предизвикуваат заинтересираност и ентузијазам кај инвеститорите.

„ВМРО-ДПМНЕ и Данев очигледно се уплашени од изборниот пораз и видно вознемирени од соочување со одговорноста за сомнителното трошење на 225 милиони евра народни пари што Никола Груевски и неговите соработници го правеа 10 години во бесцелни и економски неиздржани политики за наводно привлекување странски инвестиции“, додаваат од СДСМ.


Во Владата залудно постојат министри за странски инвестиции, обвини ВМРО-ДПМНЕ


Скопје, 17 септември, 2017 - 13:36 (META) 

Владата на СДСМ за само три месеци ја покажа својата неспособност во привлекувањето инвеститори и во отворање нови работни места, обвини денеска опозициската ВМРО-ДПМНЕ.

– Во Владата залудно постојат министри без ресор за привлекување инвестиции. Во Владата залудно постојат двајца советници од Србија кои се плаќаат со народни пари. Овие дебели хонорари не донесоа никаква добробит. Резултатот од оваа неодговорност се нула инвеститори во овие три месеци и нула отворени работни места – изјави пратеникот на ВМРО-ДПМНЕ, Драган Данев.

Тој истакна дека економската политика на СДСМ е „фијаско“, а Владата наместо да привлекува странски инвеститори, по секоја цена сака да ги избрка и тие што веќе инвестирале во земјава.

– Ова нема да се одрази само на невработеноста. Тоа ќе се одрази и врз целото стопанство, бидејќи голем број фирми се директно поврзани со производствениот процес во странските инвестиции – рече Данев.


ВМРО-ДПМНЕ: Владата сака да ја покрие својата неспособност со апсурдни прес-конференции


Скопје, 16 септември, 2017 - 21:43 (META) 

Владата и СДСМ не можат да ја покријат својата неспособност со апсурдни прес-конференции на кои изнесуваат невистинити бројки и податоци, реагираат од ВМРО-ДПМНЕ на денешната прес-конференција на портпаролот на Владата, Миле Бошњаковски.

– Ставиле сè на куп, и за промоција на туризмот, и за плати на вработени, и за инфраструктура, и за сè, само за да ги напумпаат бројките и така да ја манипулираат јавноста. Доколу беа убедени Заев, Анѓушев и Тевдовски дека имаат  каков било резултат, сами ќе излегуваа да ги држат ваквите апсурдни прес-конференции – изјави Христијан Делев од ВМРО-ДПМНЕ.

Тој додаде дека Владата нема капацитет да работи во интерес на граѓаните, да привлекува инвеститори и да отвора нови работни места.

– Доколку имаше капацитет Заев да привлекува странски инвестиции, тоа ќе го направеше во Струмица и во индустриската зона Сачево, која со години зјае како празна ливада. Сега целта на црната економска тројка е цела Македонија да ја претвори во Сачево, која секој инвеститор ќе ја избегнува, а работниците ќе работат за ниски плати во нивните фирми – рече Делев.


Владата на Груевски потрошила 130 милиони евра за реклами, промотори и за „роуд шоуа“


Скопје, 16 септември, 2017 - 13:48 (META) 

Претходната влада потрошила повеќе од 31 милион евра од буџетот на државата за рекламирање на бизнис-потенцијалите на земјава во странски медиуми, соопшти денеска на прес-конференција портпаролот на Владата, Миле Бошњаковски.

На прес-конференцијата, Бошњаковски ги објави податоците за сумите од буџетот што претходната влада ги потрошила за привлекување странски инвестиции во земјава.

Како што истакна портпаролот на Владата, станува збор за потрошени повеќе од 130 милиони евра.

Покрај трошоците за реклами во странски медиуми, претходната влада предводена од ВМРО-ДПМНЕ и од тогашниот премиер Никола Груевски, за привлекување странски инвестиции во домашните медиуми платила 12,5 милиони евра, за т.н. „роуд шоуа“ биле потрошени 5,6 милиони евра, а економските промотори ги чинеле граѓаните и државата 12,5 милиони евра.

„Како дополнителни приходи, станарини, закуп и друго на министрите без ресор кои биле задолжени за странски инвестиции, им биле исплатени 2,8 милиони евра надвор од месечната бруто-плата“, велат од Владата.

Пред два дена, на прес-конференција Владата објави дека биле потрошени 225 милиони евра за влез на 25 странски компании, кои оствариле 20.000 вработувања.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Отворена фабриката на „ОДВ Електрик“, Анѓушев порача дека инвеститорите се добредојдени


Струга, 15 септември, 2017 - 19:42 (META) 

Вицепремиерот Кочо Анѓушев денеска на отворањето на фабриката на „ОДВ Електрик“ во технолошко-индустриската развојна зона во Охридско им честиташе на менаџментот и на вработените во компанијата и ги претстави главните насоки на планот за економски пораст, информира кабинетот на вицепремиерот.

– Компаниите, каква што е и „ОДВ Електрик“, се добродојдени во Македонија и ќе бидат сестрано поддржани. Новите инвестиции, кои ќе се вклучат во новата програма за поддршка, која вчера ја промовиравме, ќе бидат уште посилно поддржани од Владата на Република Македонија. Доколку „ОДВ Електрик“ немаше потпишано договор за државна помош и сега донесеше одлука за инвестиција, јас ви гарантирам дека државната поддршка би била и повисока – нагласил Анѓушев.

Според на менаџментот на „ОДВ Електрик“, оваа компанија досега инвестирала 4,7 милиони евра во изградба на производствениот погон и во набавка на опрема, а во компанијата работат 220 лица.


Владата со програма за пораст преку поддршка и на домашните и на странските компании


Скопје, 14 септември, 2017 - 15:13 (META) 

„Новиот план за економски пораст во земјава што го подготви Владата има цел транспаретно да ги стимулира фирмите што бележат пораст и го зголемуваат извозот, но и да ги стимулира компаниите да отвораат добро платени работни места и да отвораат развојни центри. Крајната цел е да се постигне развој од кој корист ќе имаат граѓаните“, рече премиерот Зоран Заев на денешната прес-конференција, на која заедно со вицепремиерот за економски прашања, Кочо Анѓушев, го презентираше планот за кој вели дека ќе стане владина политика по јавните дебати во следниве две-три седмици.

Планот предвидува три групи мерки насочени кон нови инвестиции, поддршка на постојни компании, како и поддршка на компании кои се рестартирани по стечај или ликвидација. Исто така, ќе се поддржува и извозот, а особено забележаниот пораст во извезени стоки, а посебни мерки се предвидени и за поддршка на малите и на средните претпријатија, кои, според премиерот, треба да креираат нови работни места, како чекор кон намалување на невработеноста, и да бидат генератор на домашниот, но и на регионалниот развој. Целта на предвидените мерки, порача тој, е зголемување на домашниот бруто-производ, а ќе се стимулираат и странските и домашните компании под речиси еднакви услови.

– Крајната цел е пораст на благостостојбата на граѓаните, преку зголемување на платите и на куповната моќ на граѓаните. Притоа, сè ќе зависи од резултатите. Кој колку ќе оствари, толку пари ќе може да земе. Ако има нула пораст, и стимулациите ќе бидат нула – рече Заев.

Како што објаснија и премиерот и вицепремиерот, новите мерки за економски пораст нема да чинат повеќе од 225-те милиони евра што претходната власт ги дала на странските инвеститори, а ќе се спроведуваат транспарентно.

– Целта се нови инвестиции, извоз и конкурентност. Основниот критериум ќе биде транспарентност и со оваа програма е исклучена секаква дискреција, а таа ќе биде ориентирана спрема резултатите. Ќе може да аплицираат сите компании, ако покажат резултат и ако ги задржат работните места. Сите мерки се насочени кон резултатите и ќе ги стимулираме компаниите да ги даваат парите за развој и за плати – рече Анѓушев.

Како што образложи тој, за новите странски инвеститори, но и за постојните, како и за домашните компании ќе се предвидуваат стимулации за новокреирани работни места од најмалку 10 отсто од платата ако таа изнесува барем 50 отсто повеќе од гарантираната минимална плата, но под услов ако најмалку 80 отсто од вработените биле евидентирани како невработени најмалку три месеци или ако тукушто го завршиле образованието. До 20 отсто од исплатената плата ќе им се враќа на странските инвеститори ако таа изнесува двојно повеќе од просечната плата. Околу една петтина од исплатената плата ќе се враќа на инвесторите кои отвориле или преселиле свои развојни центри во земјава, како и 30 отсто од инвестираните пари за тие центри.

– Но, тоа ќе се случува сè додека се постигнуваат очекуваните резултати – појасни Заев.

Премиерот додаде дека мерките ќе траат сè додека се постигнуваат бараните резултати и дека инвеститорите не ќе мора по 5-10 години, кога им истекува поддршката што ја давала претходната власт, да си заминат.

Посебни мерки, како што образложи Анѓушев, се предвидени за инвеститори кои имаат годишен приход кој надминува една милијарда долари.

За малите и за средните претпријатија, особено тие што ќе бележат брз пораст, се предвидени низа мерки за поддршка во различни аспекти, особено во поглед на развојот и на стимулација за давање повисоки плати.
Новите мерки ќе бидат дел од низа јавни дебати во следниве две-три седмици, а се очекува во октомври, откако ќе се чујат мислењата на бизнис-секторот, експертите и на јавноста, тие да бидат соодветно дефинирани и да почне да се применуваат веќе од 2018 година.