!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ го обвини СДСМ дека со насилство сака да ја освои власта


Скопје, 29 септември, 2017 - 16:33 (META) 

СДСМ се обидува да отствари изборен резултат со брутално насилство и со учество на криминалци, како и со злоупотреби на капацитетите на државата, обвини Никола Србов, член на извршниот комитет на ВМРО-ДПМНЕ, на партиска прес-конференција.

– Државата и институциите се веќе целосно заробени. Луѓето чии усти беа полни со демократија, сега истата ја укинаа на најбрутален начин. Вакво помрачување не било видено досега. Јавноста секојдневно е сведок на престрелки низ улиците каде жртви се неистомислениците на власта. Се демолираат штабови и се врши притисок. Се поднесуваат бројни измислени и монтирани кривични пријави против актуелни градоначалници и кандидати за градоначалници од ВМРО-ДПМНЕ – обвини Србов.

Тој рече дека во Македонија има досега невидена злоупотреба на институциите за партиски цели, дека МВР наместо да презема мерки за безбедноста на граѓаните и за осигурување фер и демократска атмосфера, стоело настрана и со тоа го поддржувало насилството и вандализирањето на штабовите. Тој го обвини и Министерството за труд и социјална политика дека е алатка на Социјалдемократскиот сојуз за дисциплинирање и за поткупување на гласачите.

Во партиското седиште, Златко Перински, исто така член на извршниот комитет на ВМРО-ДПМНЕ, го праша СДСМ каде се тие 500.000 фантоми за кои партијата предупредуваше пред парламентарните избори во декември лани.

– Главниот аргумент за непризнавање на изборните резултати им беше лагата за наводни 500.000 фантоми во избирачкиот список. Ги прашуваме Заев и Шекеринска каде исчезнаа 500.000 фантоми од претходните парламентарни избори? За оваа фрапантна бројка од фантоми кои живеат во државата, Социјалдемократскиот сојуз ја лажеше македонската јавност три месеци пред изборите. 500.000 фантоми одеднаш ги снема, а избирачкиот список се зголеми – рече тој.

Христијан Делев, пак, на третата прес-конференција, која се одржа веднаш по првите две, обвини дека Владата на СДСМ за само 110 дена ја уништила македонската економија.

– Индустриското производство во август годинава, во однос на истиот месец лани е намалено за цели 5,3 отсто. Индустриското производство тоне веќе трет месец по ред. Рударството забележа пад за 6,1 отсто, преработувачка индустрија опадна за историски рекордни 8 проценти, а  огромен пад има и на преработките од земјоделските производи. Неспособноста на СДС за менаџирање со парите на граѓаните ќе предизвика затворање на постојните индустриски капацитети, како и отселување на странските инвеститори – порача Делев.


Делев: Бркањето на странските инвеститори ќе им користи само на тајкуните на СДСМ


Скопје, 13 септември, 2017 - 17:43 (META) 

Прес-конференцијата на Владата за странските инвестиции е уште еден обид за манипулација на јавноста и за нејзино дефокусирање од деструктивните економски политики на неспособната влада предводена од СДС, велат од опозициската ВМРО-ДПМНЕ.

Од партијата велат дека новата влада, во паника од економски колапс, денеска излегла со неточни информации во делот на странските инвестиции.

– На денешната прес-конференција, од СДС сами се демантираат! Вкупната помош на сите странски компании во Македонија изнесува 25 милиони евра за повеќе од 20 компании за 10 години во зоните и исто толку надвор од зоните. 25 милиони евра за креирање на повеќе од 25.000 работни места, плус огромна бројка на индиректни вработувања. СДС и Владата не се способни да пресметаат државна помош, па во веселата математика се ставени и платите на генералниот секретаријат, ставени се средствата за градба на индустриски зони, технолошки зони и да биде апсурдот поголем, најголема ставка е ДДВ, кој според закон е повратен – изјави Христијан Делев во ВМРО-ДПМНЕ.

Тој нагласи дека бркањето на странските инвеститори „ќе им користи само на тајкуните на СДС“ и ќе ја намали просечната плата.

– Оваа погубна политика на СДС мора за престане. Доколку оваа лудило продолжи, Македонија ја чека економски колапс, полош и од криминалната транзиција – рече Делев.


Странските инвеститори сметаат дека бизнис-климата е добра


Скопје, 12 септември, 2017 - 15:29 (META) 

Претставници на Меѓународниот монетарен фонд (ММФ), предводени од Јасмин Рахман, шеф на Делегацијата на мисијата на Меѓународниот монетарен фонд за Македонија, денеска се сретнаа со потпретседателот на Советот на странски инвеститори (ССИ), Ирена Јакимовска, информираат од Стопанската комора на Македонија.

Јакимовска ги информирала претставниците на ММФ дека странските инвеститори кои веќе се дел од македонското стопанство веруваат во системот и со тоа што веќе подолго време се на македонскиот пазар, генерално бизнис-климата ја сметаат добра за стопанисување.

„Постојат области во кои е потребно надградување, особено поголема соработка помеѓу домашните и странските инвеститори. На тој план, Советот на странски инвеститори веќе работи на поинтензивни контакти и деловни врски со домашните компании“, изјавила Јакимовска.


Владата ги декласифицира договорите за државна помош со странските инвеститори


Скопје, 29 август, 2017 - 19:52 (META) 

Владата одлучи да се декласификацират доверливите информации и договори за доделување државна помош, склучени помеѓу Владата и странски инвеститори во Република Македонија, соопшти владината прес-служба.

„Со одлуката на Владата, во согласност со Законот за класифицирани информации и во согласност со препораките на Дирекцијата за безбедност на класифицирани информации, поведена е постапка според која Владата на РМ ќе ги направи јавни сите информации и договори за доделување државна помош со странските инвеститори“, стои во соопштението.

По ваквата одлука, Агенцијата за странски инвестиции и техничко-индустриските развојни зони, како и сите други министерства и државни органи што поседуваат класифицирани информации и договори за државна помош, треба да поведат постапка за достапност на овие информации и договори.

Рокот за обелоденување на документите е седум дена. Иницијативата за декласификација на информациите и на договорите за државна помош за странските компании е мерка предвидена со планот „3-6-9“.


Марковиќ – Заев: Се надеваме дека и Македонија ќе стане членка во НАТО


Подгорица, 2 август, 2017 - 16:22 (META) 

Премиерот Зоран Заев одржа средба со премиерот на Црна Гора, Душко Марковиќ, пред почетокот на Самитот на земјите членки на Јадранската повелба, на кој Македонија претседава и е кодомаќин со Црна Гора.

– Успехот на новата влада за напредок на Македонија е мотивација за регионот. Капацитетите на владата да ги сработи потребните реформи се видливи. Се надеваме дека и Македонија ќе стане членка во НАТО – изјавил Марковиќ.

Црногорскиот премиер истакнал дека имало голема промена во интересот на странските инвеститори за вложувања во Црна Гора откако државата стана членка на НАТО.

– Имаме стабилна влада, која ги обединува сите граѓани и етнички заедници во државата. Енергично работиме на потребните промени, вклучувајки ги сите во општеството. Ги развиваме искрено и динамично добрососедските односи. Со ова, веруваме дека ги отвораме европските перспективи и се надеваме дека ќе бидеме следната членка на НАТО – изјавил Заев.

На Самитот предвидена е и работна сесија на која свои излагања, освен Заев, ќе имаат и премиерите на земјите членки на Јадранската повелба: на Албанија, Еди Рама, на Хрватска, Андреј Пленковиќ, на Црна Гора, Душко Марковиќ, на Босна и Херцеговина, Денис Звиздиќ, како и на земјите набљудувачи, на Србија, Ана Брнабиќ, на Словенија, Миро Церар, и на Косово, Хашим Тачи.

На Самитот во македонската делегација се и министерката за одбрана, Радмила Шекеринска-Јанковска, заменик-претседателот задолжен за спроведување на Рамковниот договор и политички систем, Хазби Лика, министерот за надворешни работи, Никола Димитров, и пратеникот Стево Пендаровски.


Ќе се тргне тајноста од договорите со странските инвеститори


Скопје, 26 јули, 2017 - 11:23 (META) 

На вчерашната 16. седница, Владата усвоила барање за декласификација, односно симнување на тајноста, на сите договори склучени како државна тајна помеѓу поранешната влада и странските инвеститори во економските зони. Сите податоци по декласификацијата, ќе бидат целосно и транспарентно достапни на јавноста, порача Владата.

Истовремено, на седницата е усвоена информација за пороен дожд, електрични празнења, силен ветер и град и причинети штети на земјоделски култури на 20 јули 2017 година во Ресенскиот и во Тетовскиот Регион. Задолжено е Министерството за земјоделство, шумарство и водостопанство да формира комисии што ќе предложат решенија по поднесените барања за утврдување на настаната штета од земјоделците или организациите на производители.

За да овозможи продолжување на работите за изградба на автопатот Демир Капија – Смоквица, Владата усвоила одлука да се помогне на МЕПСО да обезбеди имотен лист за далеководите што се наоѓаат на трасата и коишто има потреба да бидат поместени. Владата истовремено ги задолжила надлежните државни претпријатија, заедно со ЕВН, да предложат системско решение за овој и другите проблеми што ја следат изградбата.


Странските инвеститори во државата организираа хуманитарен пикник


Скопје, 22 мај, 2017 - 10:19 (META) 

Стопанската комора на Македонија и Советот на странски инвеститори организираа хуманитарен јавен настан во Градски парк. Специјалитетите од различни земји се продаваа за симболична цена од 100 дена, а собраните парични средства ќе бидат донирани на народната кујна во црквата „Св. Апостол Петар и Павле“ и на хуманитарното здружение „Ел-Хилал“.

Странските инвеститори кои доаѓаат од Австрија, Белгија, Бугарија, Велика Британија, Германија, Грција, Италија, Луксембург, Франција, Холандија, Хрватска, САД, Словенија, Турција и Швајцарија се дружеа со граѓаните и ја промовираа гастрономијата на земјите од каде што потекнуваат преку најавтентичните рецепти од нивните национални кујни.

– Овој настан беше одлична можност да се прослави долгогодишната посветена работа на Советот на странски инвеститори при Стопанската комора на Македонија и ветување за понатамошни успешни проекти, настани и случувања кои ќе ја потврдат нивната општествена одговорност – изјави Штефан Петер, претседател на Советот на странски инвеститори.

Компании-членки на Советот на странски инвеститори вработуваат повеќе од 50.000 граѓани.


ВМРО-ДПМНЕ: СДСМ со своето деструктивно однесување предизвика штета на економијата


Скопје, 18 април, 2017 - 15:31 (META) 

„Лицемерно е СДС да се прикажува како партија на економски експерти ако се земе предвид дека во време на владеење на оваа партија, земјата достигна историски највисоко ниво на невработеност и највисока стапка на невработеност во Европа“, се вели во реакцијата на ВМРО-ДПМНЕ на прес-конференцијата на претседателот на комисијата за економија на СДСМ, Драган Тевдовски.

Од партијата велат дека СДСМ со своето „деструктивно однесување“ изминатиот период предизвикал доволно штета и на државата и на граѓаните и на економијата.

– Станува збор за невработеност од дури 38 отсто, која беше последица на криминалната приватизација што ја спроведе СДС и благодарение на која 200.000 семејства останаа без извор на егзистенција. Владата на ВМРО-ДПМНЕ, пак, отвори нови 170.000 работни места и ја намали невработеноста за 15 процентни поени – се вели во соопштението на ВМРО-ДПМНЕ.

Во него се додава дека и во екот на политичката криза, странските инвеститори продолжиле да веруваат во економските политики на владата на ВМРО-ДПМНЕ и отворале нови капацитети или ги прошириле постојните.


Инвеститорите со хуманитарен настан ќе одбележат 10 години од основањето на Советот


Скопје, 23 мај, 2016 - 12:41 (META) 

Советот на странски инвеститори при Стопанска комора прославува 10 години од постоењето во Македонија, и по тој повод ќе организира хуманитарен настан во Градски парк, на 5 јуни.

Граѓаните ќе имаат можност да вкусат храна која е традиционална за земјите од каде што доаѓаат странските инвеститори.

– Македонците ќе можат да вкусат од автентичната храна на повеќе од 10 земји. Храната ќе се продава по симболична цена, а парите кои ќе се соберат ќе бидат дадени на народните кујни – изјави претседателот на Советот на странски инвеститори при Стопанската комора, Штефан Петер.

Според него, бројот на членови на Советот постојано се зголемува.

– Странските инвеститори се интегрираа во македонското општество, а  помагаат и во интернационализација на локалната култура. Храната е најдобар начин преку која може да се запознае одредена култура, а токму затоа прехрабената индустрија е најголема во светот – додаде Петер.


Политичката нестабилност и борбата против корупцијата предизвици за инвеститорите


Скопје, 23 мај, 2016 - 12:15 (META) 

Недоследност на правната сигурност, политичка и општествена нестабилност, борба против корупцијата, процесот на интеграција на државата кон ЕУ, административни процедури се дел од предизвиците со кои се соочуваат странските инвеститори во државата.

Ова го покажува истражувањето на Советот на странски инвеститори при Стопанска комора на 118 членки за деловната клима во 2015 година.

– Според 68 проценти од инвеститорите, брзите и чести промени на регулативата има негативни ефекти врз нивното работење и ги отежнува планираните активности. Одложувањето на полтичката криза ќе има долгорочни последици врз стопанството, странските инвеститори ќе ги одложат своите планови за инвестирање – изјави претседателот на Советот на странски инвеститори, Штефан Петер.

Според Петер, и покрај политичката несигурност 68 проценти од странските инвеститори сметаат дека деловната клима во 2015 година е задоволителна. Генерално, 74 проценти од инвеститорите повторно би инвестирале ако имаат можност.

Странските инвеститори позитивно ја оценуваат високо-квалификуваната работна сила, трошоците за деловно работење, даночна политика, достапноста и квалитетот на добавувачите, стабилното деловно опкружување, геостратешко позиционирање и близината до ЕУ.