!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

90 проценти од компаниите имаат потреба од странски експерти


Скопје, 17 јули, 2017 - 18:01 (META) 

90 проценти од домашните претпријатија повторно би аплицирале на проектот „Странски експерти за домашни компании“, поддржан од швајцарската и од други амбасади, информираат од Владата каде што беше промовиран третиот јавен повик за проектот „Странски експерти за домашни компании“.

„Суштината на овој проект е да се пренесат искуствата од странски експерти во македонските компании за да се примени нивото на новите технологии во нашите компании, нивото на соработка со странски компании што имаат поголемо искуство во примената на новите технолошки достигнувања и менаџирање. Овој проект треба да им помогне на домашните компании да ги зголемат својот капацитет и своите знаења за да можат да бидат поконкурентни на светскиот пазар“, изјави вицепремиерот за економски прашања, Кочо Анѓушев.

Досегашните постигнувања од овој проект покажуваат дека дури 78 проценти од компаниите се задоволни од користењето на странска експертиза. Рокот за пријавување на третиот повик е до 29 јули.

На настанот присуствуваа претставници на стопанските комори и амбасадорката на Швајцарија во Македонија, Сибил Сутер Тејада, која рече дека Швајцарија поддржува 14 економски проекти во земјава.


Странците предлагаат нов закон за тајните служби


Скопје, 22 јануари, 2016 - 16:43 (META) 

Работата на разузнавачките служби и на нивните вработени треба да биде регулирана со нов закон, бидејќи примената на актуелните законски решенија е на незадоволително ниво, поради што нема ефикасна контрола и надзор врз тајните служби. Ова го препорачале експерти од швајцарска организација за демократска контрола на вооружените сили (DCAF), кои три месеци работеле заедно со пратениците, членови на собраниските комисии за контрола и за надзор на тајните служби, пренесува „Телма“.

Странските експерти предложиле да се спроведат обуки за пратеници за да можат поефикасно да ја вршат контролата на службите, како и да се направи безбедна соба во Собранието, каде ќе може да се расправа на теми кои вклучуваат и информации од доверлив карактер.

Пратеникот од редовите на ВМРО-ДПМНЕ, Павле Саздов, на денешната седница на комисии за надзор врз на работата на тајните служби и за надзор над следењето на комуникациуте, рече дека предлозите на странските експерти можат да се реализираат, но, според него, најголем проблем е ниската безбедносна култура.

– Во Република Македонија имаме проблем со ниското ниво на безбедносна култура, а тоа е случај и кај пратениците. Имаме проблем со ниското ниво на доверба што постои меѓу пратениците – рече Саздов.

Членовите на комисијата од опозицискиот СДСМ, пак, потсетија дека тие што требало да контролираат биле незаконски прислушувани, како што е случајот со поранешниот претседател на комисијата за надзор врз следењето на комуникациите, Тито Петковски.

– Човекот што во согласност со законот треба да врши надзор од евентуална злоупотреба на средствата за следење на комуникациите бил следен токму од Управата за безбедост и контраразузнавање. Целата моја комуникација со него, телефонските пораки, јавно потврдувам дека се точни – рече претседателот на Комисијата за надзор над следењето на комуникаиците, Горан Мисовски.