!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Девојче од Гостиварско починало во возило на брза помош


Гостивар, 12 јуни, 2017 - 13:03 (META) 

Девојче на 15-годишна возраст вчера починало додека со возило на брза помош било пренесувано од Медицинскиот центар во Гостивар кон Ургентен центар во Скопје, соопшти МВР.

При приемот на телото во Ургентен центар била констатирана смрт, а на него немало траги на насилство. Причините за смртта ќе се утврдуваат допрва, информира МВР.

Девојчето од гостиварското село Долна Гуновица, кое имало болки во стомакот, било донесено вчера во 4.30 часот во Медицински центар Гостивар. По укажаната помош, бидејќи сериозно му се влошила здравствената состојба, со брза помош било испратено за Скопје и починало на пат.


Во експлозија, повреден поранешниот грчки премиер Пападимос


Атина, 25 мај, 2017 - 19:51 (META) 

Поранешниот грчки премиер Лукас Пападимос е повреден во експлозија на писмо-бомба во неговиот автомобил во центарот на Атина. Поранешниот премиер е надвор од животна опасност. Експлозивниот материјал бил поставен во писмо адресирано до Пападимос и експлодирал при отворање, додека тој се возел низ градот.

Во експлозијата се повредени Пападимос, неговиот возач и еден член на неговото обезбедување од грчката Народна банка, кои биле со него во автомобилот.

Повредите не се сериозни по живот, но тројцата се префрлени во една од поголемите болници во Атина. Според информациите во Грција, Пападимос ќе биде опериран со цел, темелно да му бидат исчистени раните. Поранешниот премиер според информациите е повреден во делот на нозете, градниот кош и стомакот.

Благодарение на тоа што автомобилот бил блиндиран, експлозијата не предизвикала штети надвор од возилото.

Пападимос е поранешен заменик-претседател на Европската централна банка и поранешен технички премиер на Грција, кој за време на оваа функција беше главно воздржан од политички изјави и посветен на спроведување на мерките договорени со кредиторите.

Во Грција последнава година има зачестени напади на функционери, судии и официјални институции, а за поголемиот дел од нив одговорност презема терористичката организација „Огнени јадра“ како реакција против политиката на грчките влади во соработка со меѓународните кредитори. Неодамна писма со експлозивна содржина со грчки печат беа испратени и до неколку европски функционери.


Променливото време ги разбуди вурусите и ги наполни ординациите


Скопје, 20 септември, 2016 - 14:57 (META) 

Зголемен број пациенти со вирусно заболување чии симптоми се повраќање, дијареа, болки во стомакот, зголемена температура и главоболка, се регистрирани во здравствените ординации во последниот месец, потврдуваат неколку матични лекари за „Мета“.

Тие велат дека вирусот од заболениот се шири во најблиското негово опкружување, па така има заболувања и на цели семејства.

Препорака е да се избегнуваат контакти со веќе заболени, рацете да се мијат редовно, а ако веќе вирусот го имаат, да се земаат електролити, пробиотици и да се биде на хигиено-диететски режим на исхрана.

Директорката на Клиниката за детски болести, Аспазија Софијанова, вели дека знае оти е зголемен бројот на луѓе и деца кои се жалат на болки во грлото, но тоа засега не е алармантно.

– Сепак, за очекување е дека во овој период ќе се зголемува бројот на заболени од вируси, затоа што времето е променливо – вели Софијанова.

Според извештајот за заразните болести во Македонија, на неделно ниво, најмногу заболени има од инфекција на горни респираторни патишта (7.834), од инфекција на долните респираторни патишта (2.104) и од дијареа (757).


Малолетник нападнат со нож на улица во Скопје


Скопје, 5 ноември, 2015 - 14:16 (META) 

Тринаесетгодишно момче, вчеравечер, додека се враќало од продавница, било нападнато и повредено со нож од две засега непознати лица, соопшти скопската полиција.

Нападот се случил околу 19.30 часот, кога 13-годишниот Д.Ј. бил пресретнат од двете лица, од кои едното го турнало момчето со раката по рамо, а потоа извадило нож и му нанело исеченица на стомакот.

Напаѓачите веднаш потоа побегнале, а малолетникот бил пренесен во Ургентниот центар, каде му биле констатирани телесни повреди и по укажаната лекарска помош бил пуштен на домашно лекување.

Скопската полиција презема мерки за пронаоѓање на напаѓачите.