Почина академик Матеја Матевски


Скопје, 7 јуни, 2018 - 10:50 (META) 

Истакнатиот поет и академик Матеја Матевски почина ноќеска на 89-годишна возраст.

Матевски е роден во Истанбул во 1929 година, детството го поминал во Гостивар, а студирал во Белград и Скопје, каде завршил Филозофски факултет. Работел како наставник по македонски јазик, а потоа бил новинар во Радио Скопје.

Тој бил генерален директор на Радиотелевизија Скопје, членувал на Друштвото на писателите на Македонија и во МАНУ, а беше и претседател на Академијата во 2001-2004.

На јубилејното, 50-то издание издание на Струшките вечери на поезијата во 2011 година, Матевски го доби „Златниот венец“.

Автор е на стихозбирките: „Дождови“, „Рамноденица“, „Перуника“, „Круг“, „Липа“, „Раѓање на трагедијата“, „Оддалечување“, „Црна кула“, „Завевање“, „Мртвица“, „Внатрешен предел“, „Заминување на светулката“ .

Погребот на академик Матеја Матевски ќе биде извршен утре во 12 часот на Градските гробишта Бутел во Скопје.


Мартин Безак: Охрид е стожерот на словачко-македонските културни врски


Охрид, 5 јуни, 2015 - 16:40 (META) 

Охрид е стожерот на словачко-македонските културни врски од времето на Моравската мисија на светите браќа Кирил и Методиј, па сè до денес, изјави денеска амбасадорот на Република Словачка во земјава, Мартин Безак, во рамките на промоцијата на стихозбирки на двајцата великани на словачката книжевност, Мирослав Валек и Војтех Михалик.

Во Центарот за култура „Григор Прличев“ во Охрид, пред македонската публика беа претставени неодамна објавените стихозбирки на македонски јазик, „Минута пред заспивање“ од Мирослав Валек и „Еротикон“ од Војтех Михалик.

Преводот е на Стојан Лекоски, а препевите се од Матеја Матевски („Минута пред заспивање“ ) и од Тоде Илиевски („Еротикон“).

Писателот Тоде Илиевски имаше осврт за авторите и за објавените стихозбирки, додека актери од Охридскиот театар читаа песни од двајцата словачки автори.

Промоцијата ја организираше Институтот за традиционални вредности – Здружение за култура и соживот со природата (ИТВ-ЗКСП) од Охрид.


Промоција на стихозбирки на Мирослав Валек и на Војтех Михалик


Охрид, 5 јуни, 2015 - 10:57 (META) 

Денеска, со почеток од 13 часот, во Центарот за култура „Григор Прличев“ во Охрид, пред македонската публика ќе бидат претставени неодамна објавените стихозбирки на македонски јазик, од двајца великани на словачката книжевност: Мирослав Валек – „Минута пред заспивање“ и Војтех Михалик – „Еротикон“.

Преводот го направи Стојан Лекоски, а препевите се од Матеја Матевски („Минута пред заспивање“ ) и од Тоде Илиевски („Еротикон“).

Тоде Илиевски ќе го даде освртот за авторите и за објавените стихозбирки, а на манифестацијата ќе се обрати и Мартин Безак, амбасадор на Република Словачка во Република Македонија.

Ќе бидат читани песни од двајцата автори.