!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Богоев му го честиташе поразот на Јакимовски и најави ревизија на финансиското работење


Скопје, 15 октомври, 2017 - 23:03 (META) 

Кандидатот за градоначалник од СДСМ за општина Карпош, Стефан Богоев, вечерва изјави дека со задоволство му го честита поразот на неговиот противкандидат Стевчо Јакимовски, најавувајќи ревизија на финасиското работење на Општината.

– Карпошани уште еднаш докажаа дека се авангардата во Скопје и во Македонија. Докажаа дека знаат достоинствено, чесно и културно да го поминат изборниот ден, впрочем на тој начин ја поминавме изборната кампања – рече Богоев.

Тој најави ревизија на финансиското работење на Општината и на спорните детални урбанистички планови.

Општина Карпош е една од општините во која СДСМ убедливо победи во првиот круг на изборите, а Јакимовски вечерва му ја честиташе победата на својот противкандидат Богоев.


Јакимовски му ја честиташе победата на Богоев во Карпош


Скопје, 15 октомври, 2017 - 22:06 (META) 

Кандидатот за градоначалник на Карпош од Граѓанската опција за Македонија (ГРОМ), која е дел од Коалицијата за подобра Македонија предводена од ВМРО-ДПМНЕ, Стевчо Јакимовски, му ја честиташе победата на неговиот противкандидат Стефан Богоев, кандидат на СДСМ.

Јакимовски на прес-конференција изјави дека Богоев води убедливо.

– Јас му го честитам изборот за градоначалник. Очигледно е дека граѓаните на Карпош наместо резултати, избраа приказна. Ние ќе останеме присутни меѓу граѓаните на општината. Какви ќе бидат резултатите од изборот на новиот градоначалник на Карпош и дали граѓаните го направиле вистинскиот избор, ќе видиме по четири години – изјави Јакимовски.

Тој рече дека на денешното гласање во Карпош се случувале чудни нешта, односно дека според информациите што ги добил, на некои избирачки места недостигале избирачки ливчиња.


СДСМ најави пријава против Јакимовски поради кршење на Изборниот законик


Скопје, 13 септември, 2017 - 18:00 (META) 

Социјалдемократскиот сојуз на Македонија денеска најави дека ќе поднесе „соодветна пријава“ против градоначалникот на општина Карпош, Стевчо Јакимовски, поради кршење на Изборниот законик со поставувањето камен-темелник за нова градинка во општината.

„Откако СДСМ вчера ги обелодени лошите услови во градинката „Мајски цвет“ и беше обелоденето дека Стевчо Јакимовски со години ги лажеше граѓаните и им ветуваше изградба на нова градинка во населбата Бардовци, продолжената рака на Никола Груевски и градоначалник во заминување, денеска побрза да удри камен-темелник на новата градинка „Аврам Писевски“ во оваа населба“, велат од СДСМ.

Според партијата, ваквите активности на Јакимовски се спротивни на членот 8-а од Изборниот законик.

„Јакимовски нема да успее да ги прикрие штетите што им ги нанесе на граѓаните со неговото неодговорно, расипничко и коруптивно владеење со општина Карпош“, порачуваат од СДСМ.


Јакимовски: Не може некој да дојде на власт со слушалки на уши


Скопје, 15 март, 2016 - 19:59 (META) 

Тука сме да го браниме Уставниот суд, да ја одбраниме државата, порача претседателот на ГРОМ, Стевчо Јакимовски, пред насобраните граѓани пред Уставниот суд.

Тој рече дека еден аболиран Зоран Заев не може да го урива уставниот поредок на Република Македонија.

– Сега ја напаѓаат Македонија, кога е соочена со бегалската криза и кога постои опасност за дестабилизација на државата. Со тоа сакаат само да си направат алиби за повторно одложување на изборите. Не може вака некој да доаѓа на власт, без визија, без социјална и економска програма, туку само со слушалки на уши – рече Јакимовски.

Тој најави дека од утре, секој ден ќе бидат пред Уставниот суд за да го одбранат и него и државата.

– Судот треба да се остави сам да донесе одлука, без мешање однадвор. Народот не ги сака, народот не сака кодоши. Не е срамота, нека земат странски служби, какви сакаат, нека се качат на бина и нека речат „Да, ние сме со нив“. На овој народ му било тешко и во 1903 година, и во 1912, 1913, во 1943 година, а тешко му е и сега, во 2016 година, но ќе ја пребродиме – рече Јакимовски.


Со патриотски песни почнува контрапротестот пред Уставниот суд на Македонија


Скопје, 15 март, 2016 - 18:01 (META) 

Со „Се собрале комитите“ и со „Земјо македонска“, се пречекуваат неколкуте стотини граѓани пред Уставниот суд на Македонија во организација на партијата ГРОМ на Стевчо Јакимовски.

Низ Камениот мост, кој е прооден, има мало полициско обезбедување, но спроти новиот Македонски народен театар, кој е на стотина метри од Уставниот суд, е стационирано засилено полициско обезбедување, со два водени топа и со неколку борбени оклопни возила.

На истото место се забележува зголемено полициско обезбедување од специјалните единици на МВР, кои најверојатно ќе бидат кордонот помеѓу групата која прокламира дека го брани Уставниот суд и демонстрантите поддржувани од невладините организации и од СДСМ, кои ќе протестираат против партизацијата и на највисоката судска институција во државата.

На собирот пред Уставниот суд се очекува да се обрати лидерот на ГРОМ, Стевчо Јакимовски.

Граѓаните што се собрани тврдат дека тука дошле самоиницијативно, во одбрана на уставниот поредок на државата.