Втор дел од средбите за иновативни туристички пакети во мрежата на СТЕП


Тетово, 21 декември, 2018 - 20:57 (META) 

Во Тетово се одржа вториот дел од заедничките состаноци за идентификување на потенцијална рамка за остатокот од пакетите за делот во Македонија, со учество на бизнисмени, невладини организации и институции кои се занимаваат со туризам во Македонија, На средбата учествуваа и гости од регионот Елбасан, Албанија, да ја видат поврзаноста на потенцијалните заеднички производи.

– Успехот може да биде само резултат на заедничка акција, притоа нудејќи квалитет во уникатните туристички пакети – рече Флорент Бајрами, координатор на проектот за зајакнување на иновативен туризам (СТЕП), финансиран од Европската унија.

Денешната средба, исто така, исфрли на виделина и некои други аспекти на туризмот, како што е можноста за пакет на историскиот пат Виа Игнација, со неговите споредни патишта за снабдување со стока и други ресурси.

Хасан Дражи, претставникот од Советот на округот Елбасан, беше воодушевен од можностите на планинскиот туризам кој го нуди овој регион и се надева дека еден од следните пакети ќе биде Шкумбини (Пена) – едно име, две реки, што ги карактеризира двете страни на границата.

Во прилог на можностите, учесниците исто така наведоа голем број проблеми, кои бараат институционален ангажман, за да се трасира што подобро патот за ефикасен туризам.

Останува во идниот период  да се спроведат неформални состаноци за да се даде почетна рамка за можните прекугранични туристички пакети.


Во Елбасан почна подготовката за заеднички туристички производи на членките на СТЕП


Елбасан, 17 декември, 2018 - 9:00 (META) 

Минатата недела на 13 и 14 декември во Елбасан во Албанија се одржа првиот состанок за подготовка на рамка за заеднички туристички производи на членките на мрежата СТЕП (Проект за зајакнување на иновативен туризам) со учесници од Албанија, кои ги претставуваат бизнисот, академските институции, невладини организации, локални и регионални власти и проектниот персонал.

Во работните сесии се дискутираше одредени географски региони со своите можности да бидат дел од потенцијалниот пакет, со посебен акцент на можностите за пакети кои ќе поминуват низ Белеш и неговите езера, во комбинација со градот Елбасан, познатите лиџи (бањи) на Елбасан, историската рута Виа Игнација, потоа туризам ориентиран кон специфични посети, како што се пакетите за посети на познатите пештери, планински туризам во заштитените подрачја од Либражд, како и комбинации на пакети со календар на настани низ целиот регион.

Вториот дел на овие заеднички состаноци треба да се оддржи во Тетово на 20 и 21 декември, со учество на лица од бизнис секторот, невладини организации и институции кои се занимаваат со туризам во Македонија, каде што ќе се идентификува рамката за остатокот од пакетот за делот од Македонија.

Целта на СТЕП е промовирање на енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на растот и стимулирање на отворањето нови работни места во прекуграничната туристичка зона помеѓу Македонија и Албанија.

Проектот е финансиран од Програмата за меѓугранична соработка на Европската Унија.

Проект-партнери се Фондацијата за интернет и општество „Метаморфозис“, Центарот за регионален развој „Полог“ и советот на Округот Елбасан.


„Китка“, селска идила и гозби под Љуботен ве очекуваат во Вратница


Тетово, 13 декември, 2018 - 9:48 (META) 

Авантуристите, планинарите, ловците, но и секој што љуби планински амбиент и вкусна органски произведена домашна храна и специјалитети од Долни Полог, ќе најдат одлично место за остварување на желбите во хостелот и ловечка куќа „Китка“ во живописното шарпланинско село Вратница, од каде погледот го плени моќниот врв Љуботен.

До селото се стигнува лесно – без разлика дали со автомобил или со велосипед – преку широкиот регионален пат што од Тетово води кон граничниот премин „Јажинце“. Алтернативен правец е локалниот пат, по кој почнувајќи од клучката „Желино“ на автопатот Скопје – Тетово, преку селата Сиричино, Шемшово и Жилче се стасува до Лешок, од каде се свртува десно и се продолжува по патот Тетово – Јажинце.

Селска кујна и специјалитети на чист воздух

Непосредно до овој пат, во средината на селото Вратница, е Хостел и Хантинг Лоџ „Китка“, објект на надморска височина од 750 метри, кој покрај чистиот шарпланински воздух во времето на енормно загадување на воздухот во градовите, ќе ве пречека и со грст специјалитети од дивеч, но и со печурки и други безмесни деликатеси, со тамошни органско произведени свежи зеленчуци и овошја и чаеви собрани од падините на Шар Планина, како и вкусни специјалитети подготвени од нив.

Хостелот за селски и авантуристички туризам нуди шест соби –  една еднокреветна, три двокреветни и две четворокреветни. Од последните две, едната, со претходна резервација, домаќините ќе ја претворат во ВИП соба со дрвен брачен кревет и сопствена бања со масажна када.

Во пакетот „Ноќевање“ е вклучен и појадок кој ја негува традицијата, со познатиот љуботенски природен чај.

Печено и колбаси од дивеч

Гостите ќе бидат послужени со свежи јајца, костени, мед што домаќините го вадат од своите сандаци, овошје и зеленчук произведени од локалните жители, но и нешто што е специфично за „Китка“ – месо од дива свиња, дивокоза, зајак и друго, приготвено на традиционален начин. Се разбира, ако имате стрв за такви специјалитети, тоа ќе мора да им го најавите на домаќините.

Домашните колбаси од дива свиња се уникатен производ на „Китка“ и може да се пробаат во секое време, без најава.

Во секое време ќе бидете послужени и со тетовско гравче подготвено во грне „По рецептот на баба“ и со компири израснати на локалните ниви. Тука се и сезонските салати, а сега, во зимскиот период, туршии направени од вредните домаќини.

Авантури за физички подготвените и локалитети за другите

Во близина на хостелот се наоѓат неколку прекрасни места, како Вратничко Езеро, кое е на еден километар јужно од „Китка“. На полпат е и манастирската црква „Свети Цар Константин и Елена“, изградена на темелите на стара црква од 12. век.

За тие што сакаат пешачење во планина, на еден час пеш од Вратница се наоѓа заедничка мала планинарска куќа од отворен тип, која е на половина од правецот од Ливадичко Езеро до границата со Косово. Вратница, инаку, е почетното место за сите што сакаат да го освојат врвот Љуботен.

Доколку не можете да пешачите долго, хостелот располага со две теренски возила со кои ќе ве одвезат до таму до каде што се може на четири тркала.

Хостелот и ловечка куќа „Китка“ ги нуди и сите услови за велосипедистите, а тоа досега го искористиле и голем број странци.

Ведрите домаќини велат дека во рамките на Проектот за зајакнување на иновативен туризам (СТЕП) се планираат и комплетни туристички пакети, како „Планински велосипедизам“, „Пчеларење“, и „Селски пакет“, односно собирање костени, правење ајвар, печење ракија и се друго што може да биде интересно за гостите од бетонските „џунгли“.


СТЕП ќе развива заеднички туристички пакети за Полог и Елбасан


Тетово, 11 декември, 2018 - 16:20 (META) 

Проектот за зајакнување на иновативен туризам (СТЕП) почнувајќи од четврток, почнува со процесот на подготовка на туристички пакети кои би се реализирале во Полошкиот регион во Македонија и во регионот Елбасан во Албанија.

Во рамките на програмата на подготвителни состаноци за прекугранични пакети на услуги и искуства, првиот ќе се одржи в четврток и петок во Елбасан. Се очекува учесниците – бизниси, академици, невладини организации, локални и регионални власти, како и проектниот персонал од двете страни на границата да ја дефинираат рамката за заеднички туристички пакети кои би се реализирале заеднички во Македонија и во Албанија.

Основа ќе бидат производите и услугите што ги нудат членовите на мрежата на СТЕП, па доколку некои туристички капацитети од оваа мрежа вовеле нови услуги или производи, треба да ги достават до персоналот на СТЕП.

Пакетите што ќе се креираат ќе комбинираат превоз, сместување и храна и секогаш ќе вклучуваат локации и атракции од двете страни на границата меѓу Македонија и Албанија.

Ќе се дизајнираат имајќи предвид одредена област на интерес, како уметност, храна и вино, спорт, култура или земјоделство. Се планираат и пакети „Авантура“, кои ќе вклучуваат качување по карпи или планинарење, пешачење, скијање или возење велосипед.

Од СТЕП предвидуваат и тури со целосна придружба. „Тие честопати се добар избор за осамени патници или мали групи. Овој вид тури нуди чувство на сигурност или надминување на јазичните и културните пречки. Исто така, овие видови на тури често вклучуваат едукативен аспект, бидејќи придружувањето обезбедува локални, историски и културни знаење, знаење и  им нуди на туристите драгоцено искуство и значење за посетените места“, објаснуваат од СТЕП.

Целта на СТЕП е промовирање на енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на растот и стимулирање на отворањето нови работни места во прекуграничната туристичка зона помеѓу Македонија и Албанија. Проектот е финансиран од ЕУ, преку програмата ИПА2.

Проект-партнери се Фондацијата за интернет и општество „Метаморфозис“, Центарот за регионален развој „Полог“ и Советот на Округот Елбасан.


Лешница – „Швајцарија на Шара“ го одзема здивот со боите и пределите


Тетово, 30 октомври, 2018 - 9:41 (META) 

Екипата на Проектот за зајакнување на иновативен туризам (СТЕП), во својата мисија да ги истражи и промовира туристичките вредности на Македонија неодамна ја посети долината Лешница на Шар Планина, еден од најубавите предели во земјава, со глетки од кои се зема здивот.

Комбинацијата на карпите со вегетацијата, надополнето со водопадите и неколкуте водотеци, неизбежно потсетува на Швајцарија.

Членовите на екипата на СТЕП велат дека навистина се исплатува човек да се помачи да отиде во Лешница, посебно сега во есен, кога на падините жолтата боја на некои од листопадните дрвја создава вистинска уметност во спој со зелената боја на четинарите.

– По повеќе од еден час патување со теренско возило, кога дојдовме таму се почувствувавме како да сме во рајот – велат тие.

Овој проект со грант од Програмата ИПА 2 на ЕУ го спроведуваат Фондацијата „Метаморфозис“, Центарот за регионален развој Полог и Советот на Округот Елбасан од Албанија. Целта е да се промовира енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на растот и стимулирање на отворањето нови работни места во прекуграничната туристичка зона помеѓу Македонија и Албанија.


Заврши потпишувањето меморандуми за туристичка соработка на општините во Полог


Брвеница, 6 октомври, 2018 - 19:22 (META) 

Со потпишувањето на меморандумот за соработка меѓу Фондацијата за интернет и општество „Метаморфозис“ и општина Врапчиште се затвори поглавјето на потпишување на меморандуми за соработка со девет општини вклучени во Полошкиот плански регион (Тетово, Гостивар, Желино, Боговиње, Теарце, Јегуновце, Врапчиште, Брвеница и Маврово – Ростуше).

Во согласност со меморандумот, Фондацијата „Метаморфозис“ се обврзува да ги промовира вредностите на сите потенцијални места и можности за развој на туризмот во регионот на Полог, додека споменатите општини ќе обезбедат информации, експертиза и искуство, и ќе ги охрабри малите и средните претпријатија и сите заинтересирани страни активно да придонесат за реализација на целите на проектот.

Исто така, од другата страна на границата, Советот на округот Елбасан потпиша идентичен меморандум за соработка со седумте општини во регионот Елбасан (Елбасан, Прењас, Либражд, Пеќин, Церик, Белш и Грамш).

До сега 73 субјекти (ресторани, хотели, туристички агенции), невладини организации, институции и поединци – потенцијални претприемачи, од двете страни на границата, одговорија позитивно на повикот да бидат дел од мрежата за зајакнување на иновативен туризам (СТЕП).

Меморандумот за соработка е со рок до 31 март 2020 година. Проектот е финансиран од програмата за прекугранична соработка на Европската Унија.


Во селските хостели во Гостиварско гостите редовно остануваат подолго од планираното


Гостивар, 29 август, 2018 - 16:33 (META) 

Во селските хостели во Гостиварско, се случува феномен: гостите честопати остануваат подолго од планираниот датум. Ни изгледаше неверојатно, па решивме самите да провериме.
Денот е петок, за некого почеток на викенд, а за некого почеток на најзафатен период од седмицата. Ние одиме воресторанот„Тивко катче“, чија традиција датира повеќе од половина век. Откако ја поминавме реката Вардар, од лева страна на улицата, на нејзиниот десен брег, ја здогледуваме фирмата „Тивко катче“… Десетина метри подолу, ете куќа со сите нишани на традиционалните куќи од овој крај.

Иако горните катови се реновираат, приземјето е веќе ресторан украсен со разни традиционални реликти уникатни за Гостивар. Тука е и оригиналната носија на баба и на Билјана, која го води бизнисот, наследен од татко и, од кого ги учела готварските вештини типични за овој крај. Традиционалните јадења што се служат во „Тивко катче“ не може да остават рамнодушен ниту еден љубител на добрата храна, правејќи им проблем на тие што сакаат да пробат сè.
Билјана не беше сама. Беа дојдени неколкумина нејзини пријатели, сите на некој начин поврзани со угостителскиот и туристичкиот сектор.

Tivko katche Gostivar 3 - Meta

Гоце и Жаклина Матески се професионални пчелари од селото Зубовце, кои во иднина планираат да се вклучат активно во делот на промовирање на туризмот преку пакетот за практично и активно промовирање на процесот на одгледување на пчели за сите заинтересирани. Подготвени се во иднина и да присособат соби за ноќевање на заинтересираните.

На другиот дел од масата, Виктор Лазаревски раскажува за перипетиите што ги има со неговиот „Вертикал хостел“ во мавровското село Никифорово. Со капацитет од 22 лица, обезбедувајќи место за кампирање, тој раскажува дека во неговото сместувалиште уште до 2015 година ниту еден гостин кој резервирал за една ноќ не отишол наредниот ден, туку ја пролонгирал посетата барем и за еден ден.

– Ова се должи на новите пријателства што се создаваат во хостелот, честопати и во големите соби има и по осум гости, коишто не се познавале порано меѓу себе – раскажува Виктор.

Дел од групата на пријатели на Билјана беше и Владимир Ѓорѓиоски којшто го води планинарскиот дом „Царевец“ во Маврово. Почнувајќи од нула, Владимир, како и Виктор, го оставиле градот за да живеат во село и да нудат алтернативен туризам за сите што се изморени од морето. Тој заедно со девојка му посетува курс за интернационален водич за планински туризам, со цел да научи како да нудат што попрофесионална услуга на клиентите.

Билјана на шега дофрлува дека често им пречат на двајцата другари во хостелите во екот на сезоната. Но, тие како од пушка враќаат дека тоа е во нивна корист, оти категоријата туристи што одат кај нив, обожаваат вакви собиранки.

На крај, ни се придружуват и сопствениците на Ски Хут, Димитар и Косима, која што ја има оставено Германија за убавините на Маврово. Тие веќе се целосно навлезени во користење на ИТ технологијата за привлекување на туристите. Сепак, еден од главните проблеми им е како да ги занимават туристите, за нивниот престој да се пролонгира од сегашните во просек два дена, на повеќе денови.

Tn

Затоа и нив ги заинтригира и заинтересира идејата за креирање заеднички продукти на членовите на мрежата во рамките на Проектот за зајакнување на иновативен туризам – СТЕП, кој е финанциран од Европската Унија, а спроведен од Фондацијата за интернет и општество „Метаморфозис“, заедно со Центарот за регионален развој на Полог и Советот на округот Елбасан во Албанија.

Целта на проектот е да се промовира енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на порастот и стимулирање на отворањето нови работни места во прекуграничната туристичка зона помеѓу Македонија и Албанија, во подрачјето на Гостивар и Елбасан.

Општината Гостивар ќе обезбеди информации, експертиза и искуство, како и ќе ги поттикне малите и средни претпријатија и сите заинтересирани страни активно да дадат придонес кон реализирање на целите на проектот.

Проектот е финансиран од Програмата за меѓугранична соработка на Европската Унија (ИПА 2).


Се формира мрежа за иновативен туризам


Скопје, 14 мај, 2018 - 17:12 (META) 

Во рамките на проектот за зајакнување на иновативен туризам (СТЕП) денеска се одржа првата конститутивна седница на мрежата за проширување и унапредување на стратешкиот и координиран пристап до нови и стратешки пазари за извоз на туризам за туристички бизниси и за подобрена комуникација и соработка.

Учесници беа претставници мали и средни претпријатија, владини агенции на централно и на локално ниво, стопански комори, стартери и граѓани, како и невладини организации и медиуми.

На првиот состанок беа разгледани активностите кои ќе доведат до постигнување на резултатите од проектот.

Сите учесници се подготвени да бидат активен дел од мрежата. На средбата беа презентирани и позитивните искуства на некои нови компании и бизниси кои ќе бидат поттик за сите други потенцијални членови.

Утре ќе се одржи првата конститутивна седница во регионот на Елбасан.

Проектот за зајакнување на иновативен туризам (СТЕП) партнерски го спроведуваат Фондацијата за интернет и општество „Метаморфозис“, Центарот за регионален развој на Полог и Советот на округот Елбасан.


Општина Гостивар и „Метаморфозис“ потпишаа Меморандум за соработка за Проектот за зајакнување на иновативен туризам


Гостивар, 19 март, 2018 - 16:55 (META) 

Општина Гостивар и Фондацијата за интернет о и општество „Метаморфозис“, денеска потпишаа Меморандум за соработка за Проектот за зајакнување на иновативен туризам (СТЕП).

Меморандумот го потпишаа градоначалникот Арбен Таравари и извршниот директор на Фондацијата „Метаморфозис“, Бардил Јашари.

На свеченоста на потпишувањето присуствуваше и шефот на Делегацијата на Европската Унија во Македонија, Самуел Жбогар.

Целта на проектот е да се промовира енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на порастот и стимулирање на отворањето нови работни места во прекуграничната туристичка зона помеѓу Македонија и Албанија, поточно во подрачјето на Гостивар и Елбасан.

Со меморандумот Фондацијата „Метаморфозис“ со Заедницата за развој на полошкиот регион и Советот на Елбасан е превидено да ги промовираат вредностите на сите потенцијални места и можности за развој на туризмот во полошкиот регион.

Општината Гостивар ќе обезбеди информации, експертиза и искуство, како и ќе ги поттикне малите и средни претпријатија и сите заинтересирани страни активно да дадат придонес кон реализирање на целите на проектот.

Проектот е финансиран од Програмата за меѓугранична соработка на Европската Унија (ИПА 2).


Македонија и Албанија ќе развиваат иновативен туризам во Полошкиот и регионот на Елбасан


Тетово, 15 март, 2018 - 15:24 (META) 

Денеска во хотелот „Меркур“ во Тетово беше претставен новиот проект на Европската Унија за прекугранична соработка помеѓу Македонија и Албанија во областа на развојот на туризмот СТЕП.

Проектот за зајакнување на иновативниот туризам (СТЕП) ќе биде имплементиран од Фондацијата „Метаморфозис“ во соработка со Центарот за развој на Полошки плански регион и Советот на Округот Елбасан.

На промотивниот настан каде што покрај официјалните претставници на двата региона, носителите на проектот и десетици туристички претприемачи од двата региона, свои обраќања имаа градоначалничката на Тетово, Теута Арифи и словенечкиот амбасадор, Милан Јазбец.

Покрај размената на искуства, на настанот беа претставени потенцијалните придобивки од проектот за малите и средните претпријатија и другите релевантни јавни и приватни туристички субјекти од регионот на Елбасан во Албанија и Полошкиот регион во Македонија.

Фокусот на проектот е зајакнување на конкретниот потенцијал на тутристичката понуда преку иновативни пристапи и употребува на онлајн алатки со цел зајакнување на капацитетите, меѓуграничната соработка, креирање на подобри понуди и отворање кон нови пазари.

Воедно, овој настан беше почетна точка за креирање на СТЕП мрежа на туристички субјекти од двата региони.