САД поддржува целосна имплементација на договорот и му се заблагодари на Коѕиас


Вашингтон, 18 октомври, 2018 - 10:11 (META) 

Стејт департментот му заблагодари на грчкиот министер за надворешни работи, Никос Коѕиас кој вчера даде оставка, за подобрувањето на грчко-американските односи, како и за неговата улога при постигнувањето на историскиот договор за името со Македонија, пишува грчкиот весник „Катимерини“, повикувајќи се на соопштение.

Поддршка за договорот помеѓу Атина и Скопје дал и претставник од Стејт департментот кој за грчката државна новинска агенција „АНА-МПА“ истакнал дека САД поддржуваат целосна имплементација на договорот, што ќе и овозможи на Македонија да го добие нејзиното место во НАТО и ЕУ како Република Северна Македонија.

„Додека во македонскиот парламент продолжува разгледувањето на уставните измени, ние ги повикуваме лидерите да се ослободат од партиските интереси, да ја искористат можноста и да обезбедат посветла иднина за својата земја“, додава тој.


САД: Лидерите да се издигнат над партиските интереси за посветла иднина на земјата


Вашингтон, 1 октомври, 2018 - 9:35 (META) 

Американскиот Стејт департмент, синоќа преку соопштение ги поздрави резултатите од вчерашниот референдумот во Македонија на кој граѓаните изразија поддршка за членство во НАТО и ЕУ со прифаќање на Договорот од Преспа меѓу Македонија и Грција.

„САД силно ја поддржуваат целосната имплементација на Договорот од Преспа, кој и овозможува на Македонија да го заземе заслуженото место во НАТО и ЕУ, и ќе придонесе кон регионалната стабилност, безбедност и просперитет. Со оглед на тоа што македонскиот Парламент сега започнува со разгледување на уставните измени, ги повикуваме лидерите да се издигнат над партиските политики и да ја искористат оваа историска можност да обезбедат посветла иднина за земјата како полноправен член на западните институции“, се наведува во соопштението од Стејт департментот, по одржувањето на референдумот во Македонија.


Палмер: Опозицијата да размисли што нуди Договорот од Преспа


Скопје, 1 август, 2018 - 19:21 (META) 

Метју Палмер, в.д. заменик-помошник на Државниот секретар на САД за Европа и Евроазија, по денешните средби со Христијан Мицкоски и со премиерот Зоран Заев, упати порака на опозицијата дека треба сериозно да размисли што нуди Договорот со Грција за Македонија. Тој се обрати и до македонскиот народ, дека треба да се искористи моментот за историски важна одлука.

-На опозицијата и порачав и ќе продолжам да ја пренесувам таа порака дека на оваа ситуација треба да ја гледа стратегиски, да ја стави Македонија на прво место, и да мисли за иднината на младите луѓе, и што како иднина нуди Договорот од Преспа како европска иднина на Македонија, што отвора како можности и да најдат начин како да ја поддржат оваа европска иднина, рече Палмер по средбата во Владата со Заев.

Тој претходно се сретна со Мицкоски и со претседателот Ѓорге Иванов. вечерва треба да одржи средба и со лидерот на ДУИ Али Ахмети.

Американскиот дипломат го нарече референдумот за Договорот од Преспа историски момент за Македонија и порача оти се надева дека граѓаните ќе излезат на референдумот да го кажат својот став.

„Македонија веќе доби историска покана од страна на НАТО, а доби и јасен пат за пристапни преговори со ЕУ. Референдумот на 30 септември ќе биде важен датум. Се надеваме дека граѓаните ќе излезат да гласаат да го кажат својот став и дека ќе го направат тоа во атмосфера ослободена од дезинформации и обесхрабрување. Ова е навистина историски момент за Македонија и Договорот од Преспа ја отвора европската иднина за Македонија – рече Палмер.


В.Д. заменик-помошникот државен секретар на САД Палмер во Македонија


Скопје, 31 јули, 2018 - 11:45 (META) 

Метју Палмер, Вршител на должноста (В.Д.) Заменик-помошник Државен секретар на САД за Европа и Евроазија, ќе ја посети Република Македонија од 1 до 3 август, за да ја искаже поддршката на САД за Договорот од Преспа што земјата го постигна со Грција, како и за прогресот на земјата кон членството во НАТО и во ЕУ, соопшти амбасадата на САД во Македонија.

При посетата Палмер ќе се сретне со претседателот Ѓорге Иванов, премиерот Зоран Заев и со лидери на политички партии.

Тој ќе учествува на прославата на Илинден во Крушево и ќе се сретне со официјални претставници на локалните власти надвор од Скопје.


Европските компании кои инвестирале во руски гасовод ќе се соочат со санкции од САД


Вашингтон, 12 јули, 2018 - 10:32 (META) 

Санкции за европските компании кои инвестирале во рускиот гасовод „Северен поток 2“ кон Германија, најави администрацијата на американскиот претседател Доналд Трамп.

– Бевме јасни дека постои ризик од воведување санкции за компаниите кои работат во секторот на рускиот енергетски извоз –  изјави претставник на американскиот Стејт департмент.

Тој додаде дека Вашингтон смета дека „гасоводот ќе ја поткопа целата енергетска безбедност и стабилност на Европа, давајќи и на Русија уште еден инструмент за вршење политички притисок врз европските земји, особено врз Украина“.

Доколку САД ги спроведе санкциите, засегнати ќе бидат компаниите „Унипер“ (Uniper), „Винтершел“ (Wintershall), „О-ем-ве“ (OMV), „Анжи“ (Engie) и „Шел“ (Shell).


САД: Реформите мора да продолжат, независно од процесот на пристапување во ЕУ


Вашингтон, 29 јуни, 2018 - 9:33 (META) 

Американскиот Стејт департмент ја поздрави одлуката на Советот на ЕУ да предложи план за отворање пристапни преговори со Македонија и Албанија во јуни 2019 година и уште еднаш ја потврдува важноста на постигнатиот Договор со Грција.

Во соопштението за МИА од Стејт департментот се наведува дека планот на ЕУ зависи од натамошниот напредок во одредени области.

„Одлуката на Советот ги нагласува силните напори што двете земји ги направија во имплементација на реформите за усогласување на нивните закони со стандардите на ЕУ“, истакнуваат од Стејт департментот.

Понатаму се укажува дека како пријател и партнер на Македонија, САД и помага на македонската влада за успех во евро-атлантските интеграции на земјата.

„Ова вклучува владеење на правото, подобрување на одговорното владеење, како и реформи во судството, разузнавачките служби и јавната администрација. Ова се важни прашања кои мора да се решат независно од процесот на пристапување во ЕУ“, посочуваат од американскиот Стејт департмент.


САД ги охрабруваат Македонија и Грција да најдат заемно прифатливо решение


Вашингтон, 8 јуни, 2018 - 10:28 (META) 

Стејт департментот ја потврдува својата континуирана поддршка за разговорите меѓу Македонија и Грција, истовремено охрабрувајќи ги лидерите на двете земји да постигнат заемно прифатливо решение, изјавија од Стејт департментот за грчката новинска агенција АНА-МПА.

„САД продолжуваат да ги поддржуваат тековните разговори под покровителство на Обединетите нации за решавање на прашањето за ПЈРМ. Ги охрабруваме лидерите на Македонија и Грција да најдат заемно прифатливо решение во интерес на евроатланската интеграција, економскиот просперитет, мирот и безбедност во регионот“, се вели во писмената изјава.


Стејт Департментот ги поддржува лидерите на Македонија и Грција во обидот за решение


Вашингтон, 1 јуни, 2018 - 10:04 (META) 

САД и натаму ги поддржуваат актуелните преговори под водство на Обединетите нации за проблемот околу името на Македонија, соопштија од Стејт департментот за Гласот на Америка на македонски јазик, нагласувајќи ја поддршката за решение на овој долгогодишен спор.

„Се надеваме дека лидерите на Македонија и Грција ќе најдат заедничко прифатливо решение за проблемот со името, што ќе биде во интерес на евроатлантската интеграција, економскиот просперитет, мирот и стабилноста во регионот“, соопшти Стејт департментот.

Премиерот Зоран Заев вчера изјави дека решението за деценискиот спор за името никогаш не било поблиску, но не изнесе повеќе детали за евентуалниот договор, кој според најавите треба да се финализира во телефонски разговор со неговиот грчки колега Алексис Ципрас.

Претседателот Ѓорге Иванов, пак, по вчерашната средба со шефот на дипломатијата Никола Димитров на која беше инфомиран за текот на процесот за решавање на спорот со Грција, соопшти дека за него е неприфатливо име за севкупна употреба и промена на Уставот.


Религијата и натаму игра улога во судските спорови, констатира Стејт департментот


Вашингтон, 30 мај, 2018 - 9:43 (META) 

Американскиот Стејт департмент синоќа го објави годишниот извештај за верските слободи за 2017 година, во кој во делот за Македонија се наведува дека верските разлики продолжуваат да играат улога во кривични и граѓански судски процеси.

Притоа, Стејт департментот го нотира повторениот процес против владиката Јован Вранишковски.

„Основниот суд Скопје лани во март го осуди Вранишковски, архиепископ на Охридска архиепископија, за перење на пари. Владиката беше осуден на седум месеци затвор. Судот, исто така, нареди конфискација на земјиште на ОА во вредност од 140 илјади евра, што подоцна и се изврши“, се наведува во извештајот.

Во него, исто така, се наведува дека „Европскиот суд за човекови права во ноември пресуди во корист на ОА, наведувајќи дека со одбивањето да ја регистрира како одделна верска група, власта ги нарушила првата на оваа црква за слобода на здружување и слободно практикување вера“.

Нотирани се и поплаките од Исламската верска заедница во Македонија, за тоа дека во селото Лажец и во Крива Паланка се вршат блокади за изградба на џамии под притисок од локални жители, кои се противат на изградбата. ИВЗ, исто така, се пожалила дека властите продолжуваат да ја блокираат реконструкцијата на џамијата во Прилеп, запалена за време на конфликтот во 2001 година.

Во извештајот за 2017 година се наведува и дека Македонската православна црква се пожалила дека општина Струга се уште не донела одлука за изградба на православна црква во селото Белица и дека општина Тетово одбила да изгради пристапен пат до градската црква.

Стејт департментот наведува дека американскиот амбасадор и други претставници на амбасадата имале средби со владини и парламентарни претставници, верски заедници и организации од граѓанското општество, со кои дискутирале за прашања поврзани со верската слобода.

Стејт департментот вчера славеше 20-годишнина од донесувањето на Законот за меѓународни верски слободи. Оттогаш секоја година поднесуваат извештаи до американскиот Конгрес за поддршка на верските слободи и права на граѓаните низ светот, за кои САД се голем поборник.

По повод годишнината, државниот секретар Мајк Помпео ова лето ќе биде домаќин на министерски совет за поддршка на верските слободи на кој ќе се соберат верски лидери, активисти за човекови права и граѓанско општество од целиот свет.


Шекеринска во Стејт Департментот: Македонија е подготвена за членство во НАТО


Вашингтон, 28 април, 2018 - 12:21 (META) 

Министерката за одбрана Радмила Шекеринска на вториот ден од официјалната посета на САД се сретна со заменик – помошникот на секретарот за одбрана Лора Купер и со високи официјални лица во Стејт Департментот.

Како што соопшти Министерството за одбрана, на средбата со првиот заменик – помошник секретар во Бирото за европски и евроазиски работи на Стејт Департментот, Елизабет Милард, министерката Шекеринска ги образложила аргументите поради кои Македонија го заслужува членството во НАТО – зголемувањето на буџетот и платите за Армијата, одбранбените реформи, зголемувањето на бројот на војници во мисијата во Авганистан, но и на поширок план – враќањето на критичките и слободни медиуми, владеењето на правото, активната транспарентност на која се обврза Владата како една од алатките против корупцијата.

Високата претставничка на Стејт Департментот Милард, се посочува, оддаде признание за напредокот, кој го постигна земјата само една година по кризните настани во Собранието, и потенцираше дека САД се силен пријател на Македонија кој одблизу го следи и поддржува прогресот на земјата.

Во Стејт Департментот министерката Шекеринска се сретна и со заменик – помошник секретарот Метју Палмер, кој истакна дека работите во Македонија се одвиваат многу бргу, а земјата е подготвена не само да биде членка на НАТО, туку членка која активно придонесува во Алијансата.