Владата го испраќа во Собрание законот за обештетување на уште 1.600 стечајци


Скопје, 1 август, 2018 - 9:28 (META) 

Предлог-законот за обештетување уште 1.600 стечајци од фирми во доминантна сопственост на државата бил усвоен на вчерашната 82. седница на Владата и е испратен во Собранието. На вчерашната седница владиниот кабинет исто така донел одлука да го реши проблемот со одлагањето на ѓубрето и го задолжила ЕЛЕМ да обезбеди еден од ископите кај ТЕЦ Осломеј за складирање на ѓубрето.

Со предлог-законот за материјално обезбедување на невработените лица поради приватизацијата на претпријатијата со доминантна сопственост на државата, се предвидува надомест за 1.600 работници, без разлика дали биле вработени на определено или на неопределено време или пак престанокот на работа бил по волја на работникот или по негова вина.

Исто така, министрите на вчерашната седница на владиниот кабинет ја усвоиле Информацијата за времена комунална депонија во Општина Кичево, и го задолжиле АД ЕЛЕМ да обезбеди место за времено складирање на комунален отпад на некоја од локациите на ископите на ТЕЦ Осломеј Кичево.

Вчера биле одобрени и повеќе од 100 договори за  финансиска поддршка на инвестиции, според Законот за финансиска поддршка на инвестиции. Во оваа бројка влегуваат и домашни фирми. Сите што ќе добијат пари на подарок од владата ќе мора да ја докажат реализацијата на инвестициите, пред да бидат исплатени предвидените суми. Дополнително, владата бара компаниите што треба да добијат финансиска поддршка да достават потпишана изјава за конфликт на интереси.

На 82. седница, Владата вчера ја усвоила и Информацијата за состојбата со правичната застапеност на вработените во Управата за јавни приходи (УЈП), и ја задолжила УЈП да направи план за превземање на дел од вработените преку Секретаријатот за спроведување на Рамковниот договор што досега добиваа плати, а не одеа на работа.


Бошњаковски: Сите вработени во „Еурокомпозит“ в понеделник ќе добијат плата


Скопје, 3 мај, 2018 - 12:34 (META) 

Доцна синоќа владата постигна договор со вработените од Еурокомпозит, при што е договорено во понеделник линеарно на сите вработени да им се исплати платата, информира денеска владиниот портпарол Миле Бошњаковски.

– Вработените презедоа обврска да ја завршат работата, а постигнат е и договор да се смени менаџерскиот тим. Вработените на „Еурокомпозит“, кои вчера протестираа пред владата и во Прилеп – од денеска веќе се наоѓаат на своите работни места – рече Бошњаковски.


Царовска: Нема зголемување на старосната граница за пензионирање


Скопје, 13 април, 2018 - 12:03 (META) 

Нема да има зголемување на старосната граница за пензионирање, а пензиите се стабилни и безбедни, рече денеска министерката за труд и социјална политика Мила Царовска, која на прес-конференција во Владата информираше за сработеното во изминатите 11 месеци.

– Работиме на стабилизација на системот за пензии, затоа што знаеме дека за 10 години ВМРО-ДПМНЕ за трипати го зголеми долгот на пензискиот фонд. Редовно ги усогласуваме пензиите, за разлика од ВМРО-ДПМНЕ, кое две години не предвиде средства. Но, размислуваме и за идните пензионери и наскоро ќе излеземе со планот за стабилизација на ПИОМ. И, повторувам, дека покачувањето на старосната граница нема да има, иако тоа излезе од многу места како информација – рече Царовска.

Во однос на стечајците, таа рече дека 453 стечајни работници добиле позитивни решенија според Законот за стечајци, а со донесувањето на новиот закон за минималната плата, повеќе  од 90.000 граѓани добиле повисока плата, со што се изедначени примањата за сите работници во државата во текстилната и кожарската индустрија.

Ообезбедени се средства за 138 нови вработувања во центрите за социјална работа и се вработени 486 лица на неопределено време во градинките, отворени се три нови регионални преноќувалишта за бездомни лица и е завршена реконструкцијата на 30-те центри за социјална работа кои опслужуват повеќе од 200.000 граѓани.

Покрај капиталните и проектите за детска заштита, се подготвуваат нови закони за социјална заштита и за работни односи, се работи и на нов европски закон за недискриминација.

 


Собранието го донесе законот за стечајни работници


Скопје, 19 септември, 2017 - 12:07 (META) 

Пратениците во Собранието едногласно го донесоа законот за стечајни работници во рамките на 12. седница.

Со овој закон, се овозможува околу 3.000 лица да добиваат месечен надомест од по 8.356 денари, односно 34 проценти од просечно исплатената месечна нето-плата минатата година. Годишно за таа намена од буџетот на Агенцијата за вработување ќе бидат обезбедени 300.816.000 денари.

Невработените лица опфатени со законот треба да имаат најмалку 15 години стаж во претпријатија со доминантна сопственост на државата, а таму работниот однос да им престанал врз основа на стечај, ликвидација или технолошки вишок, заклучно со 30 јуни годинава.

На денот на стапување на сила на законот, тие треба да се на возраст од најмалку 52 години, за жени, односно 55 години за мажи.

Пратениците од парламентарното мнозинство рекоа дека со овој закон се исправа неправда на одредена категорија граѓани и дека не станува збор за популизам.

Опозицијата го поддржа законот, но посочи дека во него има недоследности и со него повторно дел од стечајците нема да бидат опфатени.


Собранието ќе расправа за минимална плата и за укинување на радиодифузната такса


Скопје, 15 септември, 2017 - 10:20 (META) 

Собранието денеска во 11 часот ќе ја продолжи 12. седница, на која како точки на дневен ред се законот за минимална плата, законот за стечајците и укинување на радиодифузната такса.

Освен тоа, на дневен ред ќе се најде и предлог за утврдување на бројот на потпретседатели на Собранието, ратификација на Спогодбата за соработка помеѓу Владата на Република Македонија и Советот на министрите на Босна и Херцеговина во процесот на пристапување во Европската Унија и предлог-закон за ратификација на Договорот од Париз.

Вчера Собранието отвори општ претрес по предлог-законот за употреба на јазиците.

Од ВМРО-ДПМНЕ велат дека предлог-законот е неуставен, дека тој произлегува од т.н. тиранска платформа и дека со него се воведува двојазичност на целата територија на државата.

Од парламентарното мнозинство сметаат дека предложениот закон нема да ја уништи туку ќе ја унапреди државата и дека тој произлегува од амандманот 5 на Уставот.

Претседателот на Собранието, Талат Џафери, вчера ја прекина седницата два часа порано поради партиските обврските на пратениците за поднесување кандидатски листи.


Шилегов: ВМРО-ДПМНЕ го блокира носењето на законите за минимална плата и за стечајци


Скопје, 7 септември, 2017 - 16:43 (META) 

Два дена пратениците на ВМРО-ДПМНЕ и Влатко Ѓорчев со јалови дискусии и со бесцелни меѓусебни репики, ја блокираат Комисијата за труд и социјална политика и постапката за донесување на предлог-законите за минимална плата и за стечајци, изјави денеска пратеникот на СДСМ, Петре Шилегов.

– ВМРО-ДПМНЕ во суштина ја блокира можноста на вработените кои имаат најниски примања и на вработените во текстилната и во кожарската индустрија да им се зголеми платата на 12.000 денари. Ја блокираат можноста конечно стечајните работници финансиски да го решат својот статус. Ги блокираат реформите во оваа држава, го блокираат просперитетот кој граѓаните го очекуваат. Со ваквото однесување ДПМНЕ само го потврдува фактот дека за нив не се важни интересите на граѓаните, нивната подобра економска состојба, нивната подобра социјална заштита, туку се загрижени само за тесно-партиските интереси и за благосостојбата на раководството од оваа партија – рече Шилегов.

Пратеникот нагласи дека СДСМ нема да го дозволи ова сценарио и нема да дозволи блокада на процесите што ќе обезбедат напредок, реформи и подобра економска состојба на граѓаните.


Законот за јазиците и огласот за наследникот на Зврлевски денеска во Собранието


Скопје, 6 септември, 2017 - 10:52 (META) 

Собраниската Комисија за европски прашања денеска треба да ја продолжи седницата на која се расправа за предлог-законот за употреба на јазиците, во прво читање. Со законот се предвидува во сите органи на државната власт во Република Македонија, централни институции, јавни претпријатија, агенции, дирекции, установи и организации, комисии, правни лица кои вршат јавни овластувања согласно закон и други институции, службен јазик, покрај македонскиот јазик и неговото писмо, да биде и албанскиот јазик.

За предлагачот и за пратениците од мнозинството, законот е дел од патот на евроатлантските интеграции на Македонија и на никаков начин не го нарушува ниту Уставот, ниту унитарниот карактер на државата. За пратениците од опозицијата, пак, тој е противуставен за што, според нив, говори и фактот што се носи со европско знаменце иако нема никаква европска регулатива со која се усогласува и тој ќе донесел само дополнителни поделби, а не кохезија во општеството.

Во Собранието треба да продолжи и седницата на која ќе се расправа за предлогот за распишување оглас за нов јавен обвинител на Република Македонија.


СДСМ: 3.000 стечајни работници ќе добиваат месечен надоместок од 7.596 денари


Скопје, 18 август, 2017 - 10:21 (META) 

Отстранети се сите пречки и наскоро ќе биде донесен законот за материјално обезбедување на невработени лица поради приватизација на претпријатија со доминантна сопственост на државата, во јавноста познат како законот за стечајци, се вели во утринското соопштение на СДСМ.

Во него се додава дека „со оваа мерка ќе се реши проблемот со статусот на стечајните работници и ќе се исправи долгогодишната неправда кон оваа категорија на граѓани.“

„Со законското решение ќе бидат опфатени околу 3.000 стечајни работници кои ќе добиваат месечен надоместок од 7.596 денари за што се обезбедени пари преку ребалансот на буџетот“, се додава во соопштението.


Јовановиќ: Со ребалансот пративме порака, ќе кратиме на „чоколадо“ а ќе трошиме за „леб“


Скопје, 17 август, 2017 - 10:42 (META) 

„Министерот за задолжување“, Драган Тевдовски за 70 дена успеа да стопи цели 126 милиони евра пари на граѓаните од девизните резерви, се вели во утринското соопштение на ВМРО-ДПМНЕ.

До сега, откако ВМРО-ДПМНЕ се опозиција, најголем дел од утинските партиски соопштенија се однесуваат на обвинувања за задолжувањето на оваа влада.

Иако министерот за финансии, Драган Тевдовски неколку пати кажа дека владата до сега повеќе се раздолжила отколку што се задолжила, со став на фејсбук-профилот излезе и советникот на Тевдовски, економскиот аналитичар Бранимир Јовановиќ.

„Откако ние влеговме во Министерството за финансии, се задолживме седум пати на домашниот пазар, во вкупен износ од околу 145 милиони евра. Истовремено, се раздолживме околу 95 милиони евра на домашниот пазар и 75 милиони евра во странство, кредитот од „Дојче банк“,“ вели Јовановиќ.

Според него, еднакво важно како движењето на долгот е и неговата цена, односно каматната стапка, а стапките по кои тие се задолжуваат се многу пониски од стапките на долгот кој го враќаат.

„Така, просечната стапка по која ние се задолжувавме е околу 2,5 проценти, додека каматната стапка на долгот кон „Дојче банк“ кој го вративме беше 6,5 проценти. Најважно од сè, сепак, е на што ќе се трошат овие пари, а тука ја направивме и најголемата промена. Со ребалансот на буџетот пративме јасна порака дека ќе кратиме на „чоколадо“, а ќе трошиме за „леб“. Скративме трошоци за „Скопје 2014“, за репрезентација, за патувања, за коли, а предвидовме средства за зголемување на минималната плата, за решавање на проблемот на стечајците, за подобро здравство, за вработување на младите“, додаде Јовановиќ.

Според него, законите за минималната плата и за стечајците до денеска беа заглавени во Собранието, заради блокадата, но се надева дека по повлекување на опозицијата од расправата за јавниот обвинител, конечно ќе може да се донесат.


Ременски: ВМРО-ДПМНЕ да не ги блокира законите за стечајците и за минималната плата


Скопје, 15 август, 2017 - 15:49 (META) 

Крајно време е да се откажете од тесно-партиските интереси и од партиската пропаганда, и да  престанете да ги блокирате законските решенија кои што ќе им помогнат на две групи наши сограѓани, побара денеска пратеничката од СДСМ Фросина Ременски од нејзините колеги од ВМРО-ДПМНЕ.

– Со вашите јалови дискусии во Собранието на Република Македонија за одбрана на криминалот и попречување на правдата, вие директно го блокирате усвојувањето на Законот за минималната плата кој ќе овозможи решавање и подобрување на стандардот на илјадници работнички семејства во Република Македонија. И Законот за материјално обезбедување на невработени лица поради приватизација на претпријатија со доминантна сопственост на државата, во јавноста познат како ,,Законот за стечај“, со кој што ќе се реши долгата егзистенцијална агонија на овие наши сограѓани – рече Ременски.

Таа нагласи дека новите закони ќе овозможат илјадници работници во текстилната и кожарската  индустрија да имаат агарантиран минимален приход од 12.000 денари, наместо досегашните 9.000, како и околу 3.000 работници – стечајци од  претпријатија со доминантна сопственост на државата да добиваат по 7.596 денари месечно.

– Нема да помине обидот преку грбот на граѓаните и нивните реални потреби, со блокирање на процесите и постапките во Собранието да се покрие катастрофалниот рејтинг на Никола Груевски и неговата партија, која во пресрет на локалните избори со беспредметни пропаганди, дискусии и сеење на страв помеѓу граѓаните се обидуваат да го попречат решавањето на проблемите кои што тие ги создадоа изминативе години криминално владеење – порача Ременски.