Борисов: Давањето совети не е дипломатски, ги поддржуваме соседите на патот кон ЕУ


Софија, 2 октомври, 2018 - 14:47 (META) 

Секоја нација ја одредува сопствената судбина и можеме само да кажеме дека ги поддржуваме нашите соседи на патот кон ЕУ и НАТО, бидејќи сме во ова семејство, изјавил бугарскиот премиер Бојко Борисов за референдумот во Македонија, јавува дописничката на „Мета“ од Софија.

„Оттаму, според мене, давањето совети или разбирање не е правилно, дипломатски, ниту чесно. Ние треба да ги оставиме македонските политичари да одлучат кој е патот што ќе го изберат по референдумот и ги поддржуваме на секој начин на тој пат кон ЕУ и НАТО“ додаде Борисов кој што изнесува лично мислење, а не официјален став на владејачката парламентарна група ГЕРБ.


Заев: Одлучуваат тие што гласаат, тие што не гласаат не се ни бројат


Скопје, 25 септември, 2018 - 16:09 (META) 

Премиерот Зоран Заев рече дека на референдумот за името на 30 септември одлучуваат тие што гласаат, а тие што не гласаат не се ни бројат и дека огромното видливо мнозинство на референдумот ќе ги даде насоките на пратениците.

-Одлучуваат тие што гласаат. Тие што не гласаат не се ни бројат. Верувам дека гласот на граѓаните, она што е нивна определба, е правец по кој ќе се движат политичките состојби во Македонија. Нашите одлуки се безвредни ако граѓаните не ги поддржат и гласаат, тие го имаат последниот збор – одговори Заев на новинарско прашање дали референдумот ќе биде успешен, на денешната прес-конференција во Владата заедно со министерката за правда Рената Дескоска.

Тој го повтори ставот дека референдумот за името како идеја потекнува од ВМРО-ДПМНЕ уште пред 12 години.

– Јас ќе излезам на 30 септември и ќе гласам „за“. Треба и другите политички лидери да ги кажат своите ставови затоа што водиме политички субјекти, наша одговорност е да носиме одлуки и да им ги соопштуваме на граѓаните. Ако мнозинството од гласови на референдумот се „против“ тогаш ние ќе го поништиме Договорот со Грција, но ако мнозинството се „за“ тогаш ние треба и ќе ја следиме насоката која граѓаните ни ја даваат – рече Заев.


СДСМ: Иванов останува сам, заробен во сопствената идеја за изолација


Скопје, 24 септември, 2018 - 11:28 (META) 

Во клучната недела за иднината на државата и нејзините граѓани, Ѓорге Иванов одлучи да не ја напушта својата идеја за изолација на Македонија, се вели во реакцијата на СДСМ на изјавата на претседателот Ѓорге Иванов.

Во неа се додава дека „очигледно е дека Иванов е навикнат да им предизвикува проблеми на сопствените граѓани, дури и на оние кои го гласаа.“

„Последниот остаток од криминалниот режим на ВМРО-ДПМНЕ, Ѓорге Иванов е противник на демократијата, бидејќи ја спори најважната демократска алатка – гласањето.  А, токму преку гласање и избори, Иванов стана претседател. Ставот на Иванов е срамно бегство од одговорност. За среќа на граѓаните, Иванов не е тој кој одлучува за иднината. Иванов е премал и премалку важен, граѓаните и нивната волја се тие кои се големината на Македонија, тие ќе ја донесат одлуката. Иванов, за жал, останува да биде лице кое сее омраза и кое ги дели граѓаните, претседател кој оди спротивно на волјата на граѓаните, претседател кој избран преку гласање, а денес има проблем со гласањето“, се додава во соопштението на СДСМ.


Мицкоски: На 30 септември ќе го видите мојот став за референдумот


Скопје, 13 септември, 2018 - 9:43 (META) 

Претседателот на ВМРО-ДПМНЕ, Христијан Мицкоски во вечерашното гостување на „Телевизија 24“ одби да одговори дали ќе излезе да гласа на референдумот за Договорот со Грција.

– Ќе мора да причекате до 30 септември и да го видите мојот став. Дали Христијан Мицкоски ќе излезе или нема да излезе на референдумот во овој момент воопшто не е важно. Важно е дека ВМРО-ДПМНЕ одлучи да не води кампања за овој капитулантски договор. На овој референдум овој таканаречен договор не е дел од референдумското прашање, туку прашањето е трозначно, манипулативно и има задача да внесе забуна кај граѓаните – изјави Мицкоски.


Мицкоски: Секој граѓанин да се изјасни според сопственото убедување


Скопје, 12 септември, 2018 - 9:13 (META) 

По одржаните состаноци со Централниот и Извршниот комитет, а имајќи во предвид сето она што претходно го напоменав и јасниот став дека овој Договор е неприфатлив за нас, како и тоа дека се работи за надпартиско прашање, донесовме одлука секој граѓанин да постапи според сопственото убедување, порача претседателот на ВМРО-ДПМНЕ, Христијан Мицкоски ноќеска, по завршувањето на состаноците на највисоките органи на партијата.

Во долгото обраќање, во кое го повика премиерот Зоран Заев на ТВ дуел, Мицкоски нагласи дека Договорот со Грција за смена на името е документ кој тој и и ВМРО-ДПМНЕ не го прифаќаат.

– Затоа што е надвор од нашите принципи и начела. Ние остануваме на ставот дека сме против овој Договор, затоа што веќе е апсолвирано, и секому јасно дека со овој договор се менува Уставот на Република Македонија, се менува институционалниот идентитет како клучен сегмент од националниот идентитет на еден народ, една  држава,  се менуваат патните исправи, се менуваат личните документи. Се прифаќа комисија за разгледување и ревидирање на културата и традицијата што ќе отвори пат во иднина кога ќе посака јужниот сосед да ги блокира евроатланските интеграции на државата да може тоа да го стори кога сака и како сака. Сето ова е спротивно со нашите ставови, а ние не можеме едно да велиме сега, а друго утре. Тоа јас не можам да го правам, нема да го правам, бидејќи е неодговорно. Ги губиме сите позиции, целата предност сите аргументи стекнати низ годините наназад. Со овој Договор исчезнува Резулуцијата на ОН, Времената спогодба, но и Хашката пресуда – порача Мицкоски.

Претседателот на ВМРО-ДПМНЕ посочи дека тоа не значи дека партијата е против ЕУ и НАТО.

– ВМРО-ДПМНЕ напоменувам и потенцирам е за членство во НАТО и во Европската Унија. Toa се нашите пријатели и партнери. Република Македонија не смее да има поинаква иднина освен онаа трасираната кон овие организации. Но воедно ние сме  силно против Договорот, затоа што тој не ги одразува интересите на Република Македонија и се коси со Уставот и принципите на оваа земја – рече Мицкоски.

На крајот тој го повика премиерот и претседател на СДСМ на ТВ дуел.

-Имајќи предвид дека поминаа четири месеци од нашето последно јавно соочување, а се случија многу работи, почитуван претседател на владата, Зоран Заев ајде заедно на дебата, на ТВ дуел, затоа што имаме на маса  договор со Грција, има многу лаги и лажни очекувања, афери, корупција,  скандали, затоа што многу работи мораат да бидат слушнати, јасно и гласно. Ајде  пред граѓаните да разговараме отворено јас и Вие и искрено за сите случувања што  изминаа минатиот период за договорот, но и за сите останати теми кои што живот значат за граѓаните пред 30 септември – рече Мицкоски.


Мицкоски: Партијата привршува со консултациите за референдумот


Скопје, 6 септември, 2018 - 15:45 (META) 

Претседателот на ВМРО-ДПМНЕ, Христијан Мицкоски на средбата со генералниот секретар на НАТО, Јенс Столтенберг, разговарале за актуелните случувања во земјава, за договорот со Грција и претстојниот референдум, информираат од партијата.

Од таму велат дека „Мицкоски посочил дека ВМРО-ДПМНЕ ги поддржува интеграциите на земјава во НАТО, и дека членството во оваа организација, како и интеграциите во Европската Унија се од стратешки интерес за земјава.“

„Воедно тој подвлече дека договорот со Грција е неприфатлив за ВМРО-ДПМНЕ и е надвор од нејзините познати принципи и начела. ВМРО-ДПМНЕ останува на ставот за негово неприфаќање. ВМРО-ДПМНЕ смета дека власта треба да се посвети на подобрување на реалните области за живот кои се од суштествено значење за граѓанинот, а таму до сега се забележува огромна стагнација проследена со огромен број на афери и сомнежи за злоупотреба. Што се однесува до ставот во однос на референдумското изјаснување, ВМРО-ДПМНЕ привршува со процесот на широки консултации, и во текот на идната недела ќе заседава Извршниот и Централниот комитет на партијата“, се вели во соопштението од ВМРО-ДПМНЕ.


Мицкоски: Поддржувачите на референдумот се во рамки на статистичка грешка


Скопје, 23 август, 2018 - 17:06 (META) 

Луѓето кои ќе го поддржат референдумот се во рамки на статистичка грешка, рече лидерот на ВМРО-ДПМНЕ, Христијан Мицкоски во интервју за телевизијата „Сител“.

Тој вели дека процесот на консултации за ставот на ВМРО-ДПМНЕ за референдумот уште трае.

– Несериозно би било доколку би се затвориле во една канцеларија и би договориле од прилика како би бил нашиот став за референдумот и би излегле два-тројца од нас и би го бранеле тој став пред јавноста. ВМРО-ДПМНЕ е народна партија и логично е бидејќи на тоа го темели и своето битисување како организирана политичка сила во државата, логично е да излезе на терен и да се консултира со народот – рече Мицкоски.

Лидерот на ВМРО-ДПМНЕ очекува „стерилна кампања“, а за граѓаните вели дека се поделени во три групи, но според него, онаа која ќе го поддржи Договорот со Грција е најмала.

– Ние ќе докажеме дека идентитетот е вековно изгубен – рече Мицкоски.

Тој вели дека Заев ветувал зачувување на идентитетот, но тоа не се случило.


Џафери им даде три дена рок на партиите да го кажат ставот за референдумот


Скопје, 23 август, 2018 - 16:28 (META) 

Претседателот на Собранието Талат Џафери денеска достави известување до пратеничките групи во кое бара во рок од три дена да одговорат дали ќе учествуваат во јавната пропаганда за референдумот која треба да ја спроведе Собранието, како и за тоа каква кампања ќе водат, дали ќе бидат „за“ или „против“ референдумското прашање.

Известувањето е упатено до координаторите на пратеничките групи на СДСМ, ДУИ, ВМРО-ДПМНЕ, Беса, како и до пратениците на ДПА и Алијансата за Албанците.

Џафери истовремено ги информира пратениците дека по барање на Собранието, Владата на вчерашната седница донела одлука и одобрила да му се обезбедат средства на Парламентот во висина од 80 милиони денари (1,3 милиони евра).

Рокот од три дена Џафери им го дава на координаторите на пратеничките групи e заради планирана и соодветна распределба на овие средства за реализација на јавната пропаганда.

Собранието вчера формираше Координативно тело за спроведување на референдумот на државно ниво на 30 септември и водење на јавна кампања. Со Координативното тело ќе раководи Џафери, а негови членови ќе бидат потпретседателите и координаторите на пратеничките групи.


Активистите не го даваат Водно, иако МЕР понуди нова траса на гасоводот


Скопје, 16 јули, 2018 - 16:04 (META) 

Граѓанските иницијативи и здруженија во Владата ќе го пренесат својот непроменлив став против уништувањето на Водно.

Средбата во Владата на која ќе присуствува вицепремиерот Кочо Анѓушев е закажана за денеска во 17 часот.

Тие велат дека се задоволни што заеднички го увериле и убедиле Анѓушев за штетата што овој дел од гасоводот ќе ја предизвика врз Водно.

„Но, во исто време длабоко сме разочарани дека и покрај утврдувањето на фактичката состојба на терен, а знаејќи го значењето и вредностите на Водно, Владата се уште останува на ставот дека Водно треба да биде колатералната штета за спроведувањето на магистралниот гасовод кој ќе води од Скопје кон Тетово, Гостивар, Кичево и Косово. Ја поттикнуваме Владата и нејзините надлежни институции, да ги активираат сите свои механизми да го заштитат Водно и да најдат соодветно решение за гасоводот надвор од неговите граници“, се вели во соопштението.

Иницијаторите додаваат дека „грешките што се направени во минатото не треба да продолжат да ја загрозуваат нашата иднина, а последиците од спроведување на лоши проекти, кои воедно кршат ратификувани конвенции и ЕУ директиви.“

„Неколку годишно одложување на делот од магистралниот гасовод за да минува надвор од Водно, не значи никако дека домаќинствата кои се греат на дрва ќе можеле да преминат на гас во тој период. Магистрален гасовод е како една голема артерија која не носи крв до секоја клетка, односно до секое домаќинство. Знаејќи дека постојат и се разгледувани и други траси кои не водат низ парк шума Водно не можеме со чиста совест да се сложиме со било каква траса која што би поминала низ Водно. По заедничкото разгледување на трасата низ Водно, се покажаа основани тврдењата на граѓанските активисти за нејзината должина и импакт, наспроти мислењето базирано на информации кои им биле пласирани на вицепремиерот Кочо Анѓушев и претставници на МЕР“, додаваат иницијаторите.

Анѓушев и директорот на Македонски енергетски ресурси (МЕР), Бајрам Реџепи заедно со претставници од иницијативата „Го сакам Водно“ на 10 јули ја поминаа трасата по која треба да поминува гасоводот и тогаш претставниците на МЕР, понудија нова траса по која тој би требало да поминува.


Иванов: Го повикувам Заев веднаш да покрене импичмент, останувам на ставот за договорoт


Скопје, 20 јуни, 2018 - 10:15 (META) 

Го повикувам Заев со истото двотретинско мнозинство кое е неопходно за менување на Уставот на Република Македонија, веднаш да покрене постапка за утврдување на одговорност на претседателот на Републиката, односно импичмент, се вели во реакцијата на кабинетот на претседателот, Ѓорге Иванов на како што велат „сите изнесени невистини и закани од страна на премиерот, Зоран Заев, во емисијата „Само Вистина“ на телевизија „Канал 5“.

„Мојот став во однос на штетниот договор за името е конечен и останува непроменет и покрај сите искажани закани и притисоци“, се додава во соопштението од кабинетот на Иванов.