!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Иницијатива за бесплатно сместување за обожавателите што ќе дојдат за Суперкупот


Скопје, 25 јули, 2017 - 10:26 (META) 

Поради огромниот пораст на цените за сместување во хотелите во Скопје и кај некои станоиздавачи поради претстојниот Суперкуп на УЕФА, неколку млади луѓе почнаа акција да го обелат образот на Скопје пред фудбалските обожаватели. Со нивниот проект „Суперкуп Скопје“ SuperCupSkopje, членовите на заедницата WeTalkIT ги поврзуваат фудбалските обожаватели на кои им треба сместување со луѓе од Македонија кои имаат желба да им понудат бесплатен престој.

Целта на овој проект е што поголем број граѓани да бидат домаќини на еден или двајца гости во својот дом, за да им овозможат место за преноќување на обожавателите кои ќе дојдат да го следат натпреварот помеѓу „Реал Мадрид“ и „Манчестер јунајтед“.

За да му овозможите сместување на некој од обожавателите, сè што треба да направите е да се логирате на специјалната веб-страница и да наведете каков тип сместување може да понудите. Гостите заинтересирани за сместувањето преку е-маил директно ги контактираат оние тие што објавиле сместување, а домаќинот потоа самиот одлучува кој гостин или гости сака бесплатно да ги прими во својот дом.


Хотелиерите бараат да се почитува забраната за издавање станови на туристи


Охрид, 3 август, 2015 - 12:53 (META) 

Хотелиерите и граѓаните на Охрид бараат да се почитува забраната за издавање станови на туристи во згради за живеење. Во согласност со измените во Законот за угостителска дејност, општините не смеат да издаваат нови решенија за станоиздавачи во колективни станбени згради за живеење. Во најголемиот туристички центар во земјата, Охрид, такви има 420. На десетици од нив им се истечени решенијата за категоризација, поради што тие законски не смеат да вршат дејност.

Незадоволни, станоиздавачите имаа средба во локалната самоуправа и поднесоа иницијатива до Министерството за економија за промена на спорните одредби од законот, но додека официјално не биде добиена согласност, Општината нема да издава решенија за категоризација, а станоиздавачите не ќе можат да работат легално.

На нивната иницијатива се побунија хотелиерите, но и соседите, во стабените згради кои не гледаат благонаклоно на нив.

Од здружението на хотелиерите (ХОТАМ) велат дека од минатата година се направени измени во Законот за угостителска дејност, поради што на станоиздавачите на кои им се истечени решенијата за категоризација, општината повеќе не може да им издава нови или да им ги продолжи постојните, а што беше потврдено и од секторот за туризам и локален економски развој.

– Ограничувањето за број на соби и на легла е дадено во законот уште од 2004 година и е дополнето во 2008 година, со тоа дека не смее да се издаде повеќе од едно одобрение под еден заеднички покрив. Само што надлежните одлучиле во изминатите години да го игнорираат Законот и да издаваат одобренија свесно кршејќи го законот – појаснуваат хотелиерите.