!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Српски државајнин се обидел да изнесе фалсификувани евра од земјава


Куманово, 14 март, 2017 - 13:40 (META) 

Царинските службеници од граничниот премин Табановце вчера спречиле обид за изнесување од држвата на фалсификувани пари со вкупен износ од 27.700 евра. Фалсификуваните банкноти, како што информираат од Царинската управа, биле пронајдени во возило што го управувал српски државјанин, против кого е поднесена кривична пријава.

„На 13 март годинава, околу 7 часот наутро, на граничен премин Табановце за излез од Република Македонија се пријавило патничко возило со српски регистарски таблички управувано од српски државјанин. При контролата на возилото и на патникот, во потпирачот меѓу предните седишта, во врзано снопче со ластик, замотани во бела хартија, пронајдени биле девизи. Царинските службеници забележале дека има 39 банкноти во апоени од 100 евра со ист сериски број, потоа 39 банкноти во апоени од 200 евра со ист сериски број, како и 32 парчиња во апоени од 500 евра исто така со ист сериски број. При преглед со УВ-лампа, констатирано било дека девизите се со лош квалитет и се фалсификувани“, стои во соопштението на Царината.

Српскиот државјанин бил веднаш уапсен и предаден на инспекторите од одделението за истраги на Царинската управа, кои, според доказите, утврдиле дека осомничениот фалсификуваните евра ги направил сам и ги испечатил со печатач во боја на обична хартија, а истото го потврдиле од Народната банка на Република Македонија при вештачењето на парите.

„Царинската управа против осомничениот до Основното јавно обвинителство Куманово поднесе кривична пријава за фалсификување пари, а осомничениот е предаден на судија за претходна постапка во Основниот суд Куманово, кој му одреди мерка претпазливост – привремено одземање на патна исправа со обврска да се јавува во судот двапати неделно“, додаваат од Царинската управа.


Притворен српски државјанин фатен во шверц на 47 мигранти кај Демир Капија


Неготино, 25 август, 2016 - 14:14 (META) 

Полициска екипа вчераутро во товарно возило, на автопатот Удово – Неготино, кај тунелите кај Демир Капија, открила 47 мигранти од Сирија, Пакистан и од Авганистан, информираше денеска МВР.

Според полицијата, вчера околу 7.30 часот полициските службеници дале знак за запирање на автомобил марка „голф“ со скопски регистарски ознаки и на товарно возило „ивеко“, исто така со скопски таблички, кои не застанале на знакот и продлжиле со движењето.

„Голфот“ по кратко време се исклучил по патот кон Демир Капија, а товарното возило продолжило уште 500 метри, по што застанало, а возачот излегол и се обидел да побегне. Сепак, по кратко време тој бил приведен, а полицијата утврдила дека станува збор за 38-годишен српски државјанин, со иницијали Н.С.

По прегледот на возилото, во него полицијата затекнала 47 мигранти од Сирија, Пакистан и од Авганистан.

Српскиот државјанин и мигрантите биле приведени и задржани во полициската станица во Неготино за понатамошна постапка.

Од МВР информираат дека регионалниот центар за гранични работи Југ против српскиот државјанин поднел кривична пријава за криумчарење мигранти, а судија на претходна постапка на српскиот државјанин му одредил притвор од 30 дена.

Јавното обвинителство неодамна информираше дека во случаите на шверц на мигранти како извршители сè почество се јавуваат српски државјани. Тие, според Обвинителството, го користат екот на туристичката сезона и транзитот на голем број туристи од Србија кон Грција за да ги прикријат своите криминални активности.


Обвинителство: Српски државјани ја користат туристичката сезона за шверц на мигранти


Скопје, 12 август, 2016 - 11:06 (META) 

Основното јавно обвинителство за гонење на организиран криминал и корупција отворило истражна постапка против српски државјанин кој вчера бил фатен како превезува мигранти, од кои седум биле деца, соопшти денеска Јавното обвинителство.

Осомничениот, според информациите од Обвинителството, со уште едно, засега непознато лице, од подрачјето на Гевгелија прифатиле и кон Куманово превезувале неутврден број на мигранти. Полицијата во возилото на српскиот државјанин пронашла 11 мигранти, од кои седум биле деца.

Судија на претходна постапка, по предлог од јавен обвинител, на осомничениот српски државјанин му одредил притвор од 30 дена.

Од Обвинителството велат дека новина во случаите со криумчарење на мигранти е појавата на српски државајни како извршители на ова кривично дело. Тие, според Обвинителството го користат екот на туристичката сезона и транзитот на голем број на туристи од Србија кон Грција за да ги прикријат своите криминални активности.

„Тие како туристи легално влегуваат во Република Македонија и се движат со возила со странски регистарски ознаки по овој коридор, што во обратна насока е позната рута по која се движат мигрантите. Кај досегашните криминални групи што Основното јавно обвинителство за гонење на организиран криминал и корупција и Министерството за внатрешни работи во голема мера ги десеткуваа, како што е предметот „Којот“, кај непосредните извршители подолг период наназад не се пронаоѓаа и запленуваа парични средства, бидејќи плаќањето се извршуваше преку организатори и посредници. Дека станува збор за нова појава говори фактот што во новиот облик кај извршителите од Србија наплатата на криминалниот приход е непосредно од мигрантите. Во вчерашниот случај кај сторителот се пронајдени и одземени 1.700 евра за кои основано се сомнева дека потекнуваат од предметното и претходно извршени кривични дела на криумчарење мигранти“, стои во соопштението од Јавното Обвинителство.

Оттаму додаваат дека истрагата треба да утврди дали пронајдените пари кај осомничениот се криминален приход или се од легално потекло, а Министерството за внатрешни работи презема мерки за откривање и на вториот извршител.


Поднесено обвинение за убиството во Охрид на Нова Година


Охрид, 1 јуни, 2016 - 16:31 (META) 

Основното јавно обвинителство Охрид денеска до локалниот Основен суд поднел обвинение против српски државјнин кој се товари за убиството на 27-годишен охриѓанец кое се случи на 1 јануари, оваа година.

„Со поднесеното обвинение тој се товари дека на 1 јануари 2016 година, пред кафе-бар во Охрид, со употреба на физичка сила, лишил од живот едно лице. Обвинетиот со силни удари му нанел тешки телесни повреди на 27-годишно момче од Охрид, по што тоа починало. Потоа српскиот државјанин се вратил во кафе-барот и продолжил да се забавува“, стои во соопштението од Јавното обвинителство.

На барање на надлежниот јавен обвинител, се додава во соопштението, судот на обвинетиот му ја продолжил мерката притвор за нови 30 дена.

Убиството за кое се товари српскиот државјнин се случи во кафе-барот „Табана“ во Охрид, по вербална расправија помеѓу две групи, во кои од една страна бил сега починатиот, со двајца негови пријатели од Охрид, а од другата обвинетиот заедно со уште двајца српски државјани, кои исто така беа уапсени и осомничени за помагање.


Српски државјанин фатен при шверц на 29 илегални мигранти


Демир Капија, 6 мај, 2016 - 12:53 (META) 

Вчера, околу 7.30 часот, на стариот пат Удово – Демир Капија, полициски службеници откриле 29 илегални мигранти при контрола на возило со српски национални ознаки, информираат од МВР.

Товарното возило, марка „ивеко“, го управувал 23-годишен српски државјанин со иницијали Н.Т. Против него е поднесена кривична пријава за криумчарење мигранти, а судија на претходна постапка му одредил мерка притвор од 30 дена.

Според полициските информации, од мигрантите откриени во возилото, четворица биле од Пакистан, а 25 биле Авганистанци.


На Табановце уапсен српски државјанин кој се барал за силување


Куманово, 9 март, 2016 - 12:39 (META) 

Педесет и четиригодишен српски државјанин, кој се барал за кривично дело силување, вчера околу пладне бил уапсен на граничниот премин Табановце, соопшти полицијата.

Како што информираат оттаму, вчера околу 12.25, при пасошка контрола, полицајците на граничниот премин констатирале дека В.К.(54) од Република Србија е евидентиран во стоп-листата и се бара за сторено кривично дело силување.

Во 13.35 часот В.К. бил предаден на полициските службеници од СВР Куманово за понатамошна постапка.


Српски државјанин низ Македонија шверцувал мигранти од Пакистан и од Иран


Демир Капија, 23 февруари, 2016 - 14:34 (META) 

Регионалниот центар за гранични работи Југ поднел кривична пријава против 36-годишниот српски државјанин Н.Х., во чие возило полицијата вчера открила 33 илегални мигранти од Пакистан и од Иран, информира МВР.

Според пријавата, српскиот државјанин се товари за криумчарење мигранти. Тој вчера, околу 18.45 часот, бил предаден во истражниот затвор „Скопје“, откако судија на претходна постапка му одредил мерка притвор од 30 дена.

Како што информираат од МВР, вчераутро, околу 2.40 часот, на автопатот А1, во правец Демир Капија – Неготино, полициски службеници, во товарно возило, марка „фиат дукато“, со српски регистарски ознаки, што го управувал осомничениот, откриле 32 илегални мигранти од Пакистан и еден од Иран.


Српски државјанин баран од Интерпол поради убиство, приведен на Табановце


Куманово, 9 декември, 2015 - 14:58 (META) 

Државјанин на Србија, кого Интерпол Австрија го бара со потерница, вчераутро бил приведен на граничниот премин Табановце при влез во Македонија, соопшти полицијата.

Станува збор за С.Ќ. (37) од Белград, кого Интерпол го бара со меѓународна потерница поради основан сомнеж дека извршил убиство.

По приведувањето, српскиот државјанин бил предаден на полициските службеници од Секторот за внатрешни работи Куманово за понатамошна постапка.