Македонија и Косово заеднички ќе аплицираат за грантови за гасификација на двете држави


Скопје, 11 февруари, 2019 - 16:38 (META) 

Министерот за економија, Крешник Бектеши денеска беше домаќин на делегација од Република Косово предводена од министерот за економски развој, Валдрин Лука. Бектеши ги претставил актуелните енергетски проекти и можностите за заедничка соработка со косовската страна.

Косовскиот министер Лука изразил интерес за проектот за гасификација, бидејќи со него се отвара можност за развој на оваа мрежа во двете држави. Тој порача дека постои една стара гасоводна траса помеѓу Македонија и Косово, од времето на поранешна Југославија, која е надвор од фунцкија, но нагласи дека би можела да се реактивира со грант и буџетски средства.

-Сметаме дека тоа би било најефикасниот и најевтиниот начин на изградба на гасовод меѓу двете земји. Македонија со конкцијата со Бугарија и со Грција ќе има голем проток на гас и само една третина од количината на гас ќе ја искористи за внатрешни потреби. Заради тоа ќе може да го пласира вишокот на гас надвор од земјата. Токму заради тоа Косово гледа можност да се снабдува со гас од Македонија, особено во зимскиот период кога се троши повеќе за греење – рече Лука.

Бектеши информираше дека минатата недела на седница на Владата донеле одлука освен националниот гасовод, да почнат и со градење на дистрибутивната мрежа низ градовите во Македонија.

-Но, не остануваме тука. Овој меморандум за соработка ќе биде почеток заедно со косовската страна да аплицираме за грантови што  може да ги добиеме од финансиските институции се со цел да се поврземе со гас и со Косово – додаде Бектеши.

По завршување на работниот состанок меѓу делегациите од двете земји, министерот Берктеши и министерот Лука го потпишаа и Меморандумот за разбирање во енергетскиот сектор помеѓу двете министерства, со кој се очекува да се интензивираат билатералните односи во енергетскиот сектор согласно националните политики и стратегии, преку дефинирање на приоритетните области за соработка како што се: секторот за електрична енергија, јаглен, природен гас, обновливи извори на енергија, енергетска ефикасност, безбедно снабдување со енергија, како и подготовка на релевантни инфраструктурни проекти за интерконекција за електриочна енергија и гас и други проектни иницијативи.


Георгиевски: Злоупотреба на средствата за надомест на штета од земјотресите во Охрид


Охрид, 24 јануари, 2019 - 15:40 (META) 

Комисијата за водење на дисциплинска постапка формирана од страна на в.д градоначалникот на Општина Охрид, Константин Георгиески, потврди дека дошло до злоупотреба на средствата наменети за надомест на штета од земјотресите што го зафатија Охрид летото 2017 година.

Административниот работник и претседател на Комисијата за процена и утврдување на висината на штета настаната од природни непогоди, е казнет во висина од 30 проценти од висината на месечната плата. Целокупната документација за овој случај сега е предадена на СВР и Основното Јавно обвинителство од Охрид.

Седумчлената општинска Комисија утврдила дека административниот службеник, вработен во Секторот на ТЛЕР во одделот за Развој на земјоделството, во Општина Охрид, а претседател на Комисијата за процена и утврдување на висината на штета настаната од природни непогоди, несовесно ја извршувал функцијата и придонел за сторени неправилности по однос на исплатата на средствата за надомест на штетите од земјотресите летото 2017.

„Постои основано сомнение и индиции за сторени неправилности по однос на исплатата на средствата за надомест на штетите од земјотресот во 2017 година и презеде соодветни дисциплински мерки спрема раководителот на Комисијата која ја водеше таа постапка. Ценејќи ги сите отежнителни и олеснителни околности, Комисијата утврди престап и со тајно гласање утврди престап и изрекување на дисциплинска мерка во висина на 30 проценти од висината на едномесечниот износ на нето исплатената плата за последниот месец пред извршување на дисциплинскиот прекршок“, рече Георгиески.

Тој додаде дека Комисијата била формирана на почетокот на овој месец, а со записник на Комисијата била одземена целосната документација во врска со исплатата на штетите од земјотресите и под лупа биле ставени сите сомнителни исплати.

„Денеска доставив барање за постапување, до СВР Охрид каде што се наведени сите текови на целокупната постапка, и наоди кои се добиени од дисциплинската комисија, и целиот тој предмет од денеска ќе биде во надлежност на СВР Охрид каде е доставена целата документација. Исто така со одлука на Советот на Општина Охрид, на последната седница на предлог на опозицијата, а ние како позиција тоа го прифативме, ОЈО Охрид е известено со писмо на прецедателката на Советот и во прилог на моето барање за постапување до надлежните органи се сите тие документи“, објасни Георгиески.

Штетите од серијата земјотреси што во 2017 година го погодија Охридскиот регион беа проценети на 58 милиони денари. До општинската Комисија поднесени беа 854 барања за проценка на штети, 802 за индивидуални објекти и 52 за деловни објекти. Исплатата на штетите доцнеше со месеци, а голем број граѓани се’ уште немаат добиено отштата.


Анѓушев: Сите средства предвидени за поддршка на економијата се искористени


Скопје, 26 декември, 2018 - 16:05 (META) 

Сите предвидени средства во буџетот и ребалансот кои што беа за поддршка на економијата во државата се искористени, одговори денеска на новинарско прашање вицепремиерот за економски прашања Кочо Анѓушев за тоа колку од средствата се искористени.

Тој додаде дека заклучно со утре, ќе бидат исплатени 35 милиони евра и над 250 компании ќе бидат помогнати.

Инаку денеска, премиерот Зоран Заев, директорот на Фондот за иновации и технолошки развој, Јован Деспотовски и вицепремиерот Анѓушев на 65 домашни компании им доделија грантови за кофинансирање на проекти од вториот инвестициски бран, во рамки на првиот повик од столб 3 од Планот за економски раст.

Посочувајќи дека досега повеќе од 130 компании од Македонија добија грантови за кофинансирање на нивните проекти, премиерот Заев истакна дека тоа е доказ дека Планот за економски раст во изминатата година не само што ја постигнал, туку и ја надминал зацртаната цел. Тој додаде и дека вкупниот износ на нови инвестиции во економијата само со втората група компании за финансирање е 824.828.614 денари (13.411.847 евра) и дека со инструментот за поддршка – инструмент за подобрување на иновативноста, вкупно се ангажирани 323 лица, од кои 85 се ново вработени.

„И натаму остануваме на нашата определба за раст на поддршката за домашните и странските инвестиции, со буџет повисок за 37 проценти во однос на ребалансот за 2018 година. Предвидуваме 37 отсто повеќе пари за зголемување на конкурентноста на приватниот сектор – преку мерки за нови инвестициони вложувања, мерки за поддршка на извозот и освојување на нови пазари, за поддршка за создавање на нови вработувања, за поддршка на малите и средните претпријатија, за странските инвестиции во технолошко индустриските развојни зони и секако за субвенции за иновативната дејност, технолошки развој и истражување“, рече Заев.


Заев апелира до општините да ги искористат парите наменети за капитални инвестиции


Скопје, 14 декември, 2018 - 16:40 (META) 

Во 2019 година за рамномерен регионален развој издвоивме за 100 отсто повеќе пари во однос на 2017, или за над 50 насто повеќе во однос на 2018 година, рече денеска премиерот Зоран Заев на конференцијата „Децентрализација: Патот што претстои“, во организација на ЗЕЛС и ОБСЕ.

„Од 3,5 милиони евра во 2017 та година, за наредната година за проекти за рамномерен регионален развој во планските региони и во општините, се обезбедени седум милиони евра. Наша цел е овие средства континуирано да се зголемуваат се до целосната трансформација и целосното насочување за реализација на Законот за рамномерен регионален развој по кој треба да се обезбедат законските еден процент од БДП  со зафаќање од капиталните инвестиции кои што би се распределувале според степенот на развиеност во сите плански региони“, изјави Заев.

Тој додаде дека се работи и на тоа да се обезбедат 70 милиони евра од Светска банка за изградба и реконструкција на локални патишта и 50 милиони евра од Европската инвестициона банка за изградба и реконструкција на водоводи и канализации.

„Станува збор за кредитни линии кои ќе станат оперативни уште почетокот на 2019. Во овој процес е важно општините да имаат изработено квалитетни и ревидирани проекти кои ќе ги доставуваат до Министерството за транспорт и врски за да можат да повлекуваат повеќе пари од кредитните линии и да започнат со реализација на проектите. Токму преку овие најсериозни капитални инвестиции во локални патишта, водоводи и канализации, градинките и училиштата имаме намера паралелно со еднократната финансиската помош да ги стабилизираме општините, за да може државата да смета на овој сериозен капацитет кој што за жал во Македонија се уште не е соодветно, ниту пак доволно искористен“, додаде Заев.

Во тек е проект на изградба на канализациони и водоводни мрежи од ЕИБ во висина од 50 милиони евра, од кои остануваат уште помеѓу 10 и 12 милиони евра за реализација.

„Апелирам до општините да ги искористите овие пари. Кредитите не ги враќате вие, Владата, односно државата ќе ги враќа овие кредити и треба да се искористат овие квалитетни средства. Во 2019 година ќе станат оперативни и средствата од „ТАВ Македонија“, тоа се повеќе од 35 милиони евра. Завршуваме со анексот на договорот со „ТАВ Макеодонија“, ќе ги помине сите правни процедури, очекувањата се дека до 15-ти јануари за да може алокацијата на тие 35 милиони евра на транспарентен начин да бидат распределени за тригодишни проекти на сите општини пак за вододовди, канализации, детски градинки, за училишта и за некој од сортските сали во училиштата“, додаде Заев.


Во новиот буџет има 813.000 евра за експропријација за непречена гасификација


Скопје, 16 ноември, 2018 - 16:05 (META) 

За гасификацијата за следна година се предвидени близу две милијарди денари, (околу 30 милиони евра) одговори премиерот Зоран Заев, на прашање на „Мета“ колку средства се предвидени за оваа капитална инвестиција, чија што реализација годинава беше едвај 8 проценти од предвиденото.

– Во буџетот ставивме дополнителни 50 милиони денари (813.000 евра) за експропријација, за да работиме на делницата Гостивар – Кичево, која што ќе почне веројатно не порано од 2020 година. Така што гасификацијата ја има во буџетот, како што ја има и железницата, а патиштата се надвор од буџетот – одговори Заев.

Премиерот додаде дека изградбата на гасоводот се одвива на двата правци, едниот е спрема Кавадарци, Прилеп и Битола и таму, како што кажа, најголем дел од експропријацијата е решена и интензивно се гради. А се гради и на потегот Скопје-Тетово-Гостивар.

– Оваа година испроектиравме динамика, каде што, 54 проценти се решени имотно-правните односи од Гостивар према Кичево. Што значи дека понавремено ги решаваме работите. Сето тоа ми дава за право да верувам дека и гасификацијата ќе се одвива со засилено темпо – рече Заев.

Во однос на реализација на капиталните инвестиции очекува пораст заклучно со 31 декември, бидејќи како што рече, објективните причини за слабата реализација се надминати, а тоа се недоволен број на проекти и незавршени тендерски постапки.

Оттука, како што рече, не добиле сите министри повеќе пари од буџетот, бидејќи не заслужуваат во делот на реализација на капиталните инвестиции.

– Сега е време да се испорачуваат економски резултати и социјална праведност, како основи за подобар живот за сите граѓани. Пред нас е економска година во која парите на граѓаните уште повеќе ќе одат во проекти за поддршка на граѓаните во сите категории. Особено најранливите – рече Заев во однос на предлог-буџетот за 2019 година кој Владата го достави до Собрание.


Сугарески: Средствата за гасоводот што нема да се искористат, ќе се пренаменат


Скопје, 8 октомври, 2018 - 15:03 (META) 

Средствата планирани за изградба на гасоводот, што нема да бидат искористени до крајот на годината, ќе се пренаменат за реализација на други проекти, најави министерот за транспорт и врски Горан Сугарески на денешното одбележување на  69-годишнината од основањето на Градежниот факултет.

Планираните средства во буџетот за оваа намена изнесуваа две милијарди денари.

– Се што сметаме дека може да се потроши до крајот на годината ќе остане во буџетот и ќе се трошат тие пари во реализација на капиталните инвестиции. Се останато, ако се процени дека  дел од тие средства може да се потрошат во други ставки, ќе може да се префрлат, изјави Сугарески, одговарајќи на новинарско прашање дали парите наменети за гасоводот ќе се пренаменат бидејќи има застој во изградбата.


Собранието ќе врати 41 отсто од парите за кампања за референдумот


Скопје, 3 септември, 2018 - 16:18 (META) 

По барањето на Собранието за одобрување на финансиски средства за кампањата за референдумот која што ќе се спроведува од овластениот предлагач на Одлуката за референдум, Владата префрли 80 милиони денари на посебната наменска сметка на Собранието, која што ќе се користи исклучиво за спроведување на кампањата за референдум, информираат од Собранието.

„Алоцираните финансии исклучиво ќе бидат користени само за намената за која се распределени средствата, односно за кампањата којашто ќе биде спроведена од страна на 71 пратеник кои што се изјасниле дека се во коалицијата ЗА референдумот, што претставува 59 проценти од времето за повластено платено рекламирање во медиумите. Оттука информираме дека остатокот од алоцираните финансии за референдумска кампања, односно финансиите наменети за 41 процент од пратениците кои што во писмото до претседателот на Собранието се изјаснија дека бараат средствата за кампања да се пренаменат за други цели, истите не може да се пренаменат за други цели, односно истите ќе останат неискористени“, се вели во соопштението.

Собранието како корисник на средствата, има обврска, по завршувањето на кампањата да изготви извештај за потрошените средства и неискористените финансии ќе бидат веднаш вратени во буџетот.


Ограничување на средствата од донации за партиите, предлагаат граѓанските здруженија


Скопје, 13 август, 2018 - 14:04 (META) 

Граѓанските здруженија реагираат во врска со неодамнешното донесување на измените и дополнувањата на Законот за финансирање на политички партии.

Од таму велат дека „усогласувањето на законските решенија било направено на нетранспарентен начин и иако се наведува дека законското решение црпи легитимитет од препораките на граѓанското општество дадени во документот „Блупринт – Предлог за итни демократски реформи“,  тие препораки се само селективно и делумно употребени во законот.“

„Сумарно овие законски решенија само ги зголемуваат финансиските средства за партиите кои ги обезбедуваат граѓаните, како и начините на кои партиите можат да обезбедат повеќе приходи. Тие не ги спречуваат злоупотребите, туку само индиректно ги намалуваат ризиците од злоупотреби, што може, но не мора, да ги реши проблемите. Со неукинување и неограничување на поединечните донации само се намалува прагот на донирање, но вкупниот износ никако не се ограничува. И во претходниот период, според финансиските извештаи на партиите, индивидуалните донации не биле повисоки од прагот кој сега се воведува. Партиите ќе може да изнајмуваат земјоделско земјиште, но истовремено, не е подобрена проверката на потеклото на донациите“, се додава во соопштението.

Од Институтот за демократија „Социетас цивилис“ Скопје, Центарот за економски анализи, Хелсиншкиот комитет за човекови права, Фондацијата Отворено општество – Македонија, „Еуротинк“, Здружението на новинари на Македонија, Институтот за европска политика Скопје, порачуваат ограничување на вкупниот износ на средства што може да се добијат од поединечни донации.

„Треба да се воведе подобрен механизам за задолжителна проверка на потеклото на средствата за секоја донација. Да се прецизира дека под земјиште како недвижен имот со кој располагаат партиите се однесува на она на кое се наоѓаат партиските објекти. Треба и задолжителна обврска на сите предлагачи на закон во сите фази вклучително и поднесување на амандмани“, се вели во препораките од здруженијата.


Референдумот ќе чини 3,5 милиони евра


Скопје, 30 јули, 2018 - 20:09 (META) 

Собранието попладнево ја усвои одлуката за прераспределба на средства помеѓу буџетските корисници, со која се обезбедуваат 3,5 милиони за спроведување на референдумот за името кој ќе се одржи на 30 септември.

Од Министерството за финансии велат дека со прераспределбата се кратат помали суми од повеќе поголеми буџетски корисници, а се алоцираат 210,4 милиони денари за спроведување на реферeндумот.

„На овој начин се обезбедуваат средства, без да има влијание врз тековното работење на буџетските корисници ниту, пак, врз спроведување на буџетските програми и проекти“, велат од Министерството за финансии.

Одлуката за прераспределба на средствата беше донесена без расправа со 64 гласа „за“ и ниту еден „против“ и „воздржан“, а на неа и претходеа седници на Комисијата за финансирање и буџет и Законодавно-правната комисија.

Според одлуката, најголема прераспеделба на средствата ќе има во Министерство за финансии каде од ставката Разни трансфери ќе се одвојат 60.000.000 денари.

Службата за општи и заеднички работи на Владата, од ставката Други градежни објекти, ќе се издвојат 20.000.000 денари. Истата сума ќе биде прераспределена и од Министерство за транспорт и врски, со пари претходно наменети за Жичарата.

Министерство за труд и социјална политика ќе крати од трансфери наменети за минимална плата во висина од 10.000.000 денари.

Пари ќе бидат пренаменети и од средствата наменети за Големата концертна сала за Македонската филхармонија, во висина од 8.000.000 денари.

Од Министерство за здравство од потпрограма Изградба на ПЕТ Центар, од ставката во делот за Купување на опрема и машини ќе се намали за 10.000.000 денари.

Од Министерство за образование и наука од програмата за Преведување и печатење на стручна литература, од ставката Договорни услуги, ќе се пренаменат 5.000.000 денари, а исто толку ќе се намалат и средствата за договорни услуги за Проектот за превод на книги од реномирани автори.


Потпишани првите договори за користење на средства од ИПАРД 2-програмата


Скопје, 21 јуни, 2018 - 12:29 (META) 

Вкупно 692 договори за набавка на трактори преку ИПАРД 2-програмата вредни 5,8 милиони евра, ќе бидат потпишани во наредните денови, а денеска во Министерството за земјоделство беа потпишани првите 13 договори.

Најголем дел од средствата се за набавка на трактори, но земјоделците покажале интерес и за приклучна механизација мотокултиватори, ѓубре-растурачи, прскалки, системи „капка по капка“, линии за транспорт на храна.

– Ова е рекорден број на корисници на средства од постоењето на ИПАРД-програмата воопшто. Со оваа поддршка ќе се унапреди состојбата на фармите и земјоделските стопанства, а тоа ќе значи поголема конкурентност – рече министерот за земјоделство, шумарство и водостопанство, Љупчо Николовски.

Директорот на Платежната агенција, Николче Бабовски рече дека по детектираните слабости на ИПАРД 1, процедурата за конкурирање за ИПАРД 2 е поедноставена.

Од вкупно проектираните 5,8 милиони евра за што ќе се потпишуваат договорите овие денови, 4,3 милиони се европски пари, а 1,4 милиони средства од националното финансирање.