!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Стотина средношколци од Охрид отворено застанаа зад „За заедничка Македонија“


Охрид, 20 март, 2017 - 12:37 (META) 

Средношколци од Охрид од утринава застанаа зад протестите на движењето „За заедничка Македонија“.

Околу стотина ученици од средното техничко училиште „Св. Наум Охридскки“, средното угостителско училиште „Ванчо Питошески“ и од охридската гимназија „Св. Климент Охридски“, се собраа на градскиот плоштад.

Носејќи го државното знаме, скандираа дека се за зачувување на унитарниот карактер на државата и за поддршка на политиката на претседателот Ѓорге Иванов.

Тие тврдат дека никој не ги организирал, туку спонтано ги напуштиле училиштата за да се приклучат кон барањата да не се воведе двојазичност во земјава и да се зачува унитарноста на државата.

Некои од учениците рекоа дека имале поддршка од директорите и најавија ново собирање в среда.


Петнаесетгодишник повреден со нож од соученик


Скопје, 11 март, 2017 - 12:38 (META) 

Петнаесетгодишен ученик со нож е повреден во пределот на вратот од страна на соученик, во тепачка што се случила вчера изутрина, околу 9 часот во Основното училиште „Петар Здравковски – Пенко“, соопшти денеска Министерството за внатрешни работи.

Повредениот веднаш бил пренесен во Клиничкиот центар Скопје, од каде по укажаната лекарска помош бил пуштен на домашно лекување.

Полицијата презема мерки за целосно расчистување на случајот.


СДСМ: Средношколци преку летоци се повикуваат на протести


Охрид, 8 март, 2017 - 9:49 (META) 

Општинската организација на СДСМ во Охрид ги обвини надлежните локални власти дека преку летоци ги повикуваат учениците во гимназијата „Свети Климент Охридски“ на протести, јавува дописникот на „Мета“ од Охрид.

Од партискиот разгранок на СДСМ укажуваат дека злоупотребата на ученици за лични и за партиски цели е кривично дело и дека секој што ќе стори ваков прекршок ќе мора да одговара, а од директорот и од надлежните во охридската гимназија „Свети Климент Охридски“ побараа да ја почитуваат својата законска обврска да ги заштитат учениците од партиски злоупотреби.

– Недозволиво е ученици преку летоци истакнати на видни места да се повикуваат да напуштаат настава за да бидат дел од протести на кои се поттикнува и се шири етничка и национална омраза. Тие треба да бидат воспитувани и образувани во духот на заедништвото, еднаквоста и на демократските вредности. Никој нема право да ги манипулира и да ги злоупотребува учениците за остварување партиски цели. Учениците, но и нивните родители имаат право да се чувствуваат безбедни, без какви било притисоци за време на училишниот ден. Злоупотребата на деца и на ученици, за лични и за партиски цели е кривично дело и секој што ќе стори ваков прекршок ќе мора да одговара – велат од СДСМ Охрид.


Завршува продолжениот зимски распуст, учениците од утре на настава


Скопје, 22 јануари, 2017 - 11:48 (META) 

Завршува зимскиот распуст и од утре почнува второто полугодие од учебната 2016/2017 година за околу 270.000 ученици, од кои 188.000 основци и 80.000 средношколци.

Зимскиот распуст беше продолжен за два дополнителни дена, односно 18 и 20 јануари, со одлука на Министерството за образование и наука, а по препорака на Комисијата за заразни болести и на Министерството за здравство, како превентивна мерка за да се избегне ширењето на грипот. Двата дополнителни дена од распустот, како што претходно соопшти заменик-министерот за образование и наука, Спиро Рсистовски, ќе бидат одработени во сабота, најверојатно во март и во април.

Од наредниот понеделник, на 30 јануари, ќе почне екстерното тестирање на 18.600 матуранти, кое ќе трае до 3 февруари 2017 година.


Тетовските гимназијалци ќе следат настава во старото медицинско училиште


Тетово, 7 октомври, 2016 - 15:31 (META) 

Наставата на македонски наставен јазик за тетовските гимназијалци ќе продолжи привремено да се одвива во двете згради на старото медицинско училиште. Децата во овие објекти ќе почнат да учат откако, најверојатно месецов, ќе заврши нивната реконструкција. Засега средношколците следат предавања во големата сала на Општина Тетово.

– Па, тука е лошо за следење настава. Ги нема потребните услови. Нема табла, има само една сала, па поради тоа цела настава ни трае час и половина, што е недоволно – изјави ученичка од гимназијата „Кирил Пејчиновиќ“ во Тетово.

Од секторот за образование на Општина Тетово велат дека интензивно се работи на реконструкција на зградите, кои подолг период беа во рунирана состојба. Се работи и на трајно решение за просторниот проблем на тетовските гимназијалци.

– Работиме на добивање дозвола за изградба на објект во рамките на централниот објект на гимназијата, што би било трајно решение за просторниот проблем на гимназијалците што следат настава на македонски јазик. По добивањето дозвола, се надеваме дека централната власт ќе одвои пари за изградба на овој објект, изјави Ахмед Ќазими, раководител на секторот за образование при Општина Тетово.

Инаку, предлогот тетовските гимназијалци привремено да следат настава во двата објекти на старото медицинско училиште, го понуди градоначалничката на Тетово, Теута Арифи. Но, тој беше одбиен од советот на родители и професори при тетовската гимназија. По десетина дена, советот се премисли и го прифати предлогот, со образложение дека најважно е учениците да не губат настава.


Средношколците од Тетово и денеска протестираа поради проблемот со превозот


Тетово, 23 септември, 2016 - 13:37 (META) 

Втор ден тетовските средношколци од руралните општини протестираа пред општинската зграда, барајќи да им се обезбеди бесплатен превоз.

– Немаме пари да го платиме превозот. Според законот за децентрализација, општината е одговорна да обезбеди бесплатен превоз, затоа одговорноста за овој проблем ја бараме кај локалната самоуправа – изјави ученик од гимназијата „Кирил Пејчиновиќ“ во Тетово.

Од Општина Тетово велат дека проблемот ќе се реши, откако Комисијата за јавни набавки ќе одговори на жалбата за поништениот тендер за превоз, кој минатиот месец го поднеле до тетовските превозници.

– За оваа учебна година како блок-дотација за превоз на ученици од Тетовскиот Регион предвидени се 68 милиони денари. Превозниците бараа поголема сума, ние не се согласивме со тоа и го поништивме тендерот за превоз. На оваа одлука тетовските превозници поднесоа жалба до Комисијата за јавни набавки. Сега решавањето на проблемот ќе зависи од одлуката на комисијата – изјави Ахмед Ќазими, раководител на секторот за образование при Општина Тетово.

Средношколците најавија дека секојдневно ќе протестираат пред општинската зграда, сè додека надлежните не го решат проблемот со превозот.


Новата учебна година ќе ја почнат околу 270.000 ученици


Скопје, 1 септември, 2016 - 9:49 (META) 

Учебната година за основците и за средношколците почнува денеска. Нoвaтa учебнa гoдинa ќе јa пoчнaт oкoлу 270.000 ученици, oд кoи 188.000 oснoвци и 80.000 среднoшкoлци.

Спoред последните пoдaтoци од Министерството за образование и наука, зaпишaни се 21.250 првaчињa, нo oвoј брoј не е кoнечен зaштo уписите вo првo oдделение траaт и вo текoт нa септември.

Денеска ќе пoчне нaстaвaтa и вo училиштaтa вo нaселените местa вo пoплaвените подрачја.

Кaкo штo инфoрмирaат oд МOН, oпштините ги сaнираaт штетите вo училишните oбјекти, се врши дезинфекцијa, дезинсекцијa и дерaтизaцијa зa дa се oбезбедaт услoви зa непреченo oдвивaње нa нaстaвaтa.


Сè повеќе средношколци од Голо Брдо учат во Охрид


Охрид, 29 април, 2016 - 12:55 (META) 

Учениците од областа Голо Брдо во Албанија, по завршувањето на основното образование, нејчесто го избирааат Охрид како место каде го продолжуваат средното образование.

Во моментов во Охрид двајца средношколци го продолжија образованието во средното медицинско училиште, еден во средното економско и двајца во угостителското училиште.

Велат дека се многу задоволни со учењето и со однесувањето на професорите, со начинот на кој им помагаат да ги совладуваат методолошките единици во училиштето, но и со прифатеноста и со можноста да се интегрираат со врсниците во училиштата и во градот.

За сето ова, се интересираше и го истакна како позитивен пример, претседателот на Македонско друштво „Илинден“ од Тирана, Никола Ѓурѓај, кој претпразнично ги посети во нивните нови средини.

Ѓурѓај, и во ова пригода, ја истакната заложбата што повеќе деца од Голо Брдо, но и од други региони каде живеат Македонци, да бидат испраќани во Република Македонија за да се образуваат во матичната држава Република Македонија.

– Во Република Македонија, но и кај нас, во политичките и граѓански асоцијации на Македонци, се создава перцепција дека нас нè има само во Мала Преспа. Тоа не е точно и не е добро. Фокусот на интересот за Македонците треба да биде еднаков и кон оние од Голо Брдо, од Гора, како и поголемите градски средини како Корча, Поградец, па и самата Тирана – вели Ѓурѓај.


Битолските средношколци со едноминутно молчење за „мртвото образование“


Битола, 11 ноември, 2015 - 14:22 (META) 

Едноминутно молчење за „мртвото образование“ посветија битолските средношколци на денешниот марш против реформите на Владата во образованието. Се молчеше токму пред вратите на Општината, каде средношколците ги пречека полицијата.

Стотина средношколци маршираа по Широк сокак и бараа да се врати стариот начин на полагање матура и да се укине екстерното тестирање. На Широк сокак ги повикуваа битолчани да го остават кафето и да им дадат поддршка на протестите. Но, ретко кој им се приклучи на мирниот марш. На протестот со своите ученици беа и дел од професорите.

– Тука сме зашто образованието е мртво. Како да одиме напред кога ние тапкаме во место. Како да бидеме горди ние, младите, кога гледаме дека сè се распаѓа пред нашите очи. Минатата година се разбудивме и видовме колку неправди ни нанеле овие надлежни за нашиот образовен систем. Нè осакатија со нивните реформи, но нашите мозоци не се закочени како што е закочен нивниот образовен систем – велат средношколците.

Тие обвинија дека денеска имале големи притисоци од директорите во неколку училишта, па дури наишле и на заклучени врати. Професори од техничкото училиште велат дека инспектори им вршеле контрола и запишувале кој е на настава, а кој е отсутен.

– Директорот на горната гимназија ги заклучил вратите за да не одат учениците на протест сè до шестиот час. И во музичкото училиште им се закануваа на средношколците со казни и со бркање од училиште. Затоа сме само толку собрани – рече Бојан Петровски, средношколец од Битола.


Средношколците немаат законска можност да учествуваат во креирањето на образованието


Тетово, 29 октомври, 2015 - 13:31 (META) 

Средношколците се многу малку вклучени во процесот на носење одлуки во образовниот процес, затоа што тоа не им го дозволува законската регулатива, сметаат од Институтот за развој на заедници. Институтот денеска со група ученици организираше локална дискусија, на тема „Можноста за регулирање на учеството на средношколците во Законот за средно образование“. Не постои никаква рамка преку која организирањето на средношколците во носењето на законите би било регулирано, тврдат присутните.

– Засега формално-правно, преку Законот за средно образование, освен правото да се даде приговор на оцена од учениците, друга мерка не постои. Иако постои Унија на средношколци, нејзината последна активност е забележена во 2010 или 2011 година. За жал, за таа унија не можеме да дознаеме ни преку интернет. Само еднаш додоа изјава дека тие се согласуваат со екстерното тестирање, затоа сега ние бараме преку закон, средношколците да имаат право да го креираат образовниот систем – изјави Предраг Каранфиловски од Институтот за развој на заедниците.

Целна група на денешната дискусија од која ќе произлезат препораки се средношколците.

На локалните дискусии ќе се презентира компаративната анализа на учеството на деца и на млади во образовниот процес, ќе се престават европски практики, регионални практики и каква е моменталната ситуација. Ќе се претстави и анкета за учеството на средношколците во донесувањето на одлуките во образовниот процес и како може да се подобри состојбата во овој поглед.

Локална дискусија за учеството на срендошколците во образовниот процес ќе се одржи и утре, во Тетово, каде ќе учествуваат родители и просветни работници.