Покрај Мичел, неделава доаѓа и американскиот секретар за одбрана Џејмс Матис


Скопје, 12 септември, 2018 - 10:16 (META) 

Американскиот секретар за одбрана, Џејмс Матис викендов ќе ја посети Македонија за да изрази јасна поддршка за претстојниот референдум за прашањето за името, но и загриженост поради можното мешање на Москва во процесот.

– Ќе одам да ги посетам нашите македонски пријатели и јасно ќе ставам до знаење дека САД го поддржуваат македонскиот народ – рече Матис во изјава за новинарите во Пентагон.

Матис истакна дека е загрижен дека Русија би можела да се обиде да се вмеша во референдумскиот порцес во Македонија.

– Ако имате гласање, Москва ќе се меша. Јас сум загрижен за тоа. Такво мешање Русија практикуваше од Естонија до Соединетите Американски Држави, од Украина и сега до Македонија, секогаш се прилагодува на конкретната ситуација – рече американскиот секретар за одбрана.

Утре, ќе допатува и помошникот американски државен секретар за Европа и Евроазија, Вес Мичел, кој ќе оствари средби со премиер Зоран Заев и со други државни и партиски функционери.


Столтенберг ја започна серијата средби со Иванов, Џафери, Мицкоски и Заев


Скопје, 6 септември, 2018 - 9:38 (META) 

Генералниот секретар на НАТО, Јенс Столтенберг утринава во вилата Водно имаше средба со претседателот Ѓорге Иванов, по што следува средбата со претседателот на Собранието, Талат Џафери во Собранието.

Потоа, во 10.15 часот е предвидена и средба со претседателот на ВМРО-ДПМНЕ, Христијан Мицкоски.

Со премиерот Зоран Заев Столтенберг ќе разговара во Клубот на пратениците во 13.15 часот.

По средбите во Скопје, тој вечерва заминува во Атина каде што ќе се сретне со грчкиот премиер Алексис Ципрас.


Петмина американски конгресмени на средби во македонското Собрание


Скопје, 27 август, 2018 - 10:00 (META) 

Петмина американски конгресмени, Гери Коноли, Дина Титус, Сузан Дејвис, Дејвид Прајс и Бил Флорез денеска и утре се во посета на македонскиот Парламент

Тие денеска, според собраниската агенда, треба да остварат средба со претседателот на Собранието Талат Џафери, со тројцата потпретседатели, како и со координаторите на пратеничките групи на СДСМ, ВМРО-ДПМНЕ, ДУИ, БЕСА и генералниот секретар на Собранието, Цветанка Иванова.

Потоа предвидено е американските конгресмени да имаат разговори и со претседателите на повеќе собраниски комисии. Поединечни средби ќе имаат со претседателите и членовите на комисиите за одбрана и безбедност и за деловнички и мандатно-имунитетни прашања, а ќе се сретнат и со членките на Клубот на жени пратенички.

Утре когресмените Коноли, Титус, Дејвис, Прајс и Флорез ќе бидат запознати со активностите на Парламентарниот институт.


Иванов денеска и утре во посета на Бугарија, средби со Радев, Борисов и Захариева


Софија, 14 јуни, 2018 - 9:30 (META) 

Претседателот на Република Македонија, Ѓорге Иванов, придружуван од сопругата Маја Иванова, од денеска престојува во дводневна официјална посета на Република Бугарија, информираат од претседателскиот кабинет.

Денеска Иванов во Софија ќе биде примен од претседателот на Република Бугарија, Румен Радев. Предвидено е двајцата претседатели да одржат тет-а-тет средба, по што двете официјални делегации ќе одржат пленарен состанок. Претседателот Иванов, придружуван од претседателот Радев, ќе положи венец пред Споменикот на Непознатиот војник во Софија.

За време на официјалната посета на Република Бугарија, претседателот Иванов ќе оствари средба со претседателот на Народното Собрание на Република Бугарија, Цвета Карајанчева, со бугарскиот премиер, Бојко Борисов и со вицепремиерката и министерка за надворешни работи, Екатерина Захариева.

Иванов ќе го посети Културно-информативниот центар на Република Македонија во Софија, каде е предвидена средба со македонски граѓани, стопанственици и културни дејци кои живеат и работат во Република Бугарија.


Заев и владина делегација денеска во Берлин на средби со Меркел, Штајнмаер и Габриел


Берлин, 21 февруари, 2018 - 9:36 (META) 

Премиерот Зоран Заев, вицепремиерката и министерка за одбрана, Радмила Шекеринска, вицепремиерот задолжен за европски прашања, Бујар Османи и министерот за надворешни работи Никола Димитров денеска престојуваат во официјална посета на Сојузна Република Германија.

Владината делегација во Берлин ќе има средба со канцеларката Ангела Меркел, по што двајцата лидери ќе имаат заедничка прес-конференција на која ќе ги презентираат најважните прашања од нивните разговори од интерес на двете земји, информираат од владината прес-служба.

Заев ќе има средба и со германскиот претседател, Франк-Валтер Штајнмаер и со Фолкер Трир заменик претседателот на Унијата на германски комори за индустрија и трговија.

Премиерот во седиштето на Фондацијата „Фридрих Еберт“ ќе има обраќање на тема „Од предизвици до перспективи: демократски реформи и евро-атлантска интеграција на РМ“ а во дискусијата ќе се вклучат државниот министер за Европа во Министерството за надворешни работи на СР Германија Михаил Рот и претседателот на Фондацијата „Фридрих Еберт“ во Берлин, Курт Бек.

Владината делегација ќе присуствува на вечера ко-организирана од „Аспен“ институтот во Германија, на која ќе присуствуваат министерот за надворешни работи на СР Германија, Зигмар Габриел, и пратеници од германскиот Бундестаг.


Димитров од утре во Бугарија на средби со Борисов, Радев и Захариева


Скопје, 13 февруари, 2018 - 14:07 (META) 

Шефот на македонската дипломатија, Никола Димитров, од утре до 16 февруари ќе престојува во работна посета на Бугарија, соопшти Министерството за надворешни работи.

За време на посетата е предвидено тој да има средби со бугарскиот претседател Румен Радев, премиерот Бојко Борисов и со министерката за надворешни работи на Бугарија, Екатерина Захариева.

„Во рамки на билатералната средба со министерката Захариева, која е закажана за утре, предвидено е министрите да извршат размена на ратификациони документи на Договорот за пријателство, добрососедство и соработка, со што и практично ќе се заврши формалната постапка за стапување на Договорот во сила, по неговата ратификација во Собранието на Република Македонија, на 15 јануари 2018, и во Националното Собрание на Република Бугарија на 18 јануари 2018“, стои во соопштението.

Од МНР информираат и дека на покана на високата претставничка на Европската Унија за надворешни работи и безбедносна политика, Федерика Могерини и министерката за надворешни работи на Бугарија, Екатерина Захариева (во својство на земја претседавач со Советот на ЕУ), Димитров на 15 и 16 февруари ќе учествува и на неформалниот состанок на Министрите за надворешни работи на земјите-членки на Европската унија и земјите-кандидати за членство во ЕУ – Македонија, Албанија, Црна Гора, Србија и Турција – Гимних што ќе се одржи во Бугарија.

Дискусиите на состанокот ќе се фокусираат на соработката и партнерството во областа на безбедноста и одбраната.


Мицкоски во посета на Вашингтон, ќе присуствува и на појадокот кај Трамп


Скопје, 6 февруари, 2018 - 11:52 (META) 

Претседателот на ВМРО-ДПМНЕ, Христијан Мицкоски заедно со Влатко Ѓорчев, Тимчо Муцунски и Слободанка Алексовска ќе бидат во неколкудневна работна посета на Вашингтон САД, информира партијата.

Од ВМРО-ДПМНЕ велат дека за време на посетата Мицкоски ќе реализира повеќе средби со претставници на Белата Куќа, Стејт Департментот и членови на Претставничкиот дом и Сенатот. Мицкоски ќе се обрати и на Безбедносниот форум организиран од членови на американскиот Сенат, а воедно ќе присуствува на молитвениот појадок кој се одржува под покровителство на претседателот на САД Доналд Трамп.

Предвидена е и реализација на средби со претставници на македонската дијаспора во САД.

„Престојот во САД ќе се искористи за остварување на меѓународни контакти, зацврстување на односите на ВМРО-ДПМНЕ и лобирање за државните и национални интереси на Република Македонија. По скорешните посети на Брисел, и Будимпешта, престојот во Вашингтон преставува продолжување на интензивната меѓународна активност на ВМРО-ДПМНЕ“, стои во партиското соопштение.


Нимиц се сретна со Иванов и Заев, на ред се Димитров, Ахмети и Мицкоски


Скопје, 1 февруари, 2018 - 12:41 (META) 

Посредникот во преговорите за спорот за името меѓу Македонија и Грција под покровителство на ОН, Метју Нимиц се сретна со претседателот Ѓорге Иванов и со премиерот Зоран Заев.

Потоа е предвидена средба со министерот за надворешни работи Никола Димитров, по што ќе следуваат изјави за медиумите.

Попладне Нимиц ќе се сретне со лидерите на ВМРО-ДПМНЕ, Христијан Мицкоски во 15 часот и во 16 часот со лидерот на ДУИ, Али Ахмети.


Нимиц: По Атина, очекувам добри разговори и во Скопје


Скопје, 31 јануари, 2018 - 13:46 (META) 

Имавме добри средби во Атина. Се надеваме дека ќе имаме добри средби и тука. Се радувам на средбите во Владата и со другите лидери, изјави посредникот на Обединетите нации (ОН) Метју Нимиц по пристигнувањето во Скопје, пренесува државната новинска агенција МИА.

Тој претпладнево, со своите соработници, беше во скопскиот хотел „Холидеј Ин“. Средбите на Нимиц со македонскиот државно-политички врв се закажани за утре.

Како што беше соопштено денеска, Нимиц утре ќе се сретне со шефот на македонската дипломатија, Никола Димитров, со со претседателот на државата Ѓорге Иванов, со премиерот Зоран Заев и со лидерите на ВМРО-ДПМНЕ и на ДУИ, Христијан Мицкоски и Али Ахмети.

Официјална изјава за посетата и ефектите од разговорите во Скопје медијаторот Нимиц, според најавите од МНР, ќе даде утре по средбата со министерот за надворешни работи, Никола Димитров.


Нимиц денеска на средби во Атина, ОН сметаат на можно решение на проблемот со името


Атина, 30 јануари, 2018 - 9:53 (META) 

Обединетите нации (ОН) сметаат дека може да биде постигнат напредок во решавањето на 25-годишниот спор помеѓу Грција и Македонија за името, ако има компромис кај раководствaта и народите на двете земји, изјави заменик-портпаролот на ОН, Фархан Хак.

Хак додал дека ОН целосно ја дели оценката на медијаторот дека е создаден позитивен импулс во релациите меѓу двете земји и оти е можно решение на проблемот со името.

Инаку, специјалниот претставник на ОН во разговорите помеѓу Македонија и Грција, Метју Нимиц денеска во Атина ќе има средби со шефот на грчката дипломатија Никос Коѕиас и со одговорниот за надворешна политика во опозициската Нова демократија, Јоргос Кумуцакос.

По посетата на Атина, Нимиц утре и задутре доаѓа во Македонија на средби со државниот врв.