!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев ќе се обрати пред Генералното собрание на ОН


Њујорк, 22 септември, 2017 - 10:21 (META) 

Премиерот Зоран Заев денеска ќе се обрати пред Генералното собрание на Обединетите нации во Њујорк и ќе се сретне со генералниот секретар на ОН, Антонио Гутереш, соопшти владината прес-служба.

На денешната агенда на македонскиот премиер е предвидена средба со вицепремиерот и министер за надворешни работи на Виетнам, Фан Бин Мин, како и кратка средба со премиерот на Непал, Шер Бахадур Деуба, на приемот по повод националниот ден на оваа земја.

Заев денеска ќе има и обраќање на конференцијата „Нов старт на Балканот“, во организација на УНДП.

Претседателот на македонската влада вчера имал средба со премиерот на Кралството Холандија, Марк Руте, кој дал поддршка на реформскиот процес што го почна Владата и ги поздравил чекорите што ги презема државата за градење на добрососедски односи и регионална соработка.

Руте истакнал дека Холандија останува силен поддржувач на Македонија во заложбите на нашата држава за постигнување на стратешките цели, членство во Европската Унија и во НАТО.

Заев на средбата посочил дека очекува есенва да се тргне условеноста на препораката за членство на Македонија во ЕУ, а следен чекор да биде датум за почеток на преговори.


Заев учествуваше на дипломатскиот прием организиран од Трамп


Њујорк, 21 септември, 2017 - 11:11 (META) 

Премиерот Зоран Заев учествуваше на дипломатскиот прием организиран од претседателот на Соединетите Американски Држави, Доналд Трамп, во рамките на 72. Генерално собрание на Обединетите нации во Њујорк.

„Дипломатскиот прием организиран од претседателот на САД на ГС на ОН е можност за зацврстување на пријателствата и за идни соработки во интерес на нашите држави“, напиша Заев на „Твитер“.

Премиерот Заев, во рамките на активностите на Генералното собрание на ОН денеска ќе има билатерална средба со премиерот на Беглија, Чарлс Мишел, соопштија од владината прес-служба.

Заев ќе присуствува и на приемот по повод кандидатурата на Германија во Советот за безбедност на ОН, за периодот 2019-2020 година, што, во име на канцеларката Ангела Меркел, го организира министерот за надворешни работи на Германија Зигмар Габриел.

„Во текот на денот предвидени се и други средби и разговори со влијателни гости на Генералното собрание на ОН, како и со американски политичари и тинк-тенк експерти од сферата на надворешните политики и меѓународните односи на САД“, стои во соопштението на Владата.


Димитров со низа билатерални средби на маргините на ГС на ОН


Њујорк, 20 септември, 2017 - 14:50 (META) 

Министерот за надворешни работи, Никола Димитров, на првиот ден на маргините од генералната дебата на 72. сесија на Генералното собрание на Обединети нации остварил билатерални средби со заменик-министерот за надворешни работи на Мексико, Карлос де Гонзалес Иказа, со министерката за надворешни работи на Канада, Кристина Фриланд, министерот за надворешни работи на Украина, Павло Климкин, исо  министерката за надворешни работи на Индонезија, Ретно Марсуди, информираше МНР.

Карлос де Гонзалес Иказа го поканил Димитров да го посети Мексико, а зборувале и за билатералната соработка меѓу двете земји, за која била констатирано дека постои простор за понатамошен развој, меѓу другото и во областа на визна либерализација.

Со министерката за надворешни работи на Канада, Димитров разговарал за новата страница во домашната и во надворешната политика на Македонија по тешката политичка криза во земјата. Од нејзина страна беше изразен интерес и за состојбите во регионот, како и за новиот позитивен пристап на Македонија во односите со соседите.

Министерот Фриланд искажал целосно разбирање и поддршка за демократските аспирации на земјата и за нејзините амбиции за што поскоро приклучување кон НАТО.

Со Министерот на Украина разговарале за состојбите во регионот, унапредување на билатералната соработка, пред сè на економски план, како и преку натамошно уредување на договорната состојба, а Димитров добил покана за посета на Украина.

Димитров имал и куси средби со високата претставничка за надворешна политика и за безбедност на ЕУ, Федерика Могерини, и со комесарот за европска соседска политика и за проширување, Јоханес Хан.


Заев во Њујорк на ГС на ОН и на средби со Трамп, Гутереш, Могерини и со Туск


Скопје, 17 септември, 2017 - 11:16 (META) 

Премиерот Зоран Заев од денеска до 23 септември ќе присуствува на 72. Генерално собрание на Обединетите нации (ОН) во Њујорк, САД, соопшти владината прес-служба.

Во составот на делегацијата предводена од Заев, ќе бидат министерот за надворешни работи, Никола Димитров, и министерот без ресор задолжен за дијаспората, Едмонд Адеми.

Премиерот ќе присуствува на отворањето на работата на Генералното собрание на ОН и ќе има обраќање на конференцијата на тема „Отворена влада“, со која ќе претседава претседателот на Франција, Емануел Макрон.

Премиерот, според агендата, ќе има работен ручек со генералниот секретар на ОН, Антонио Гутереш, и други билатерални средби, меѓу кои и со претседателот на Европскиот совет, Доналд Туск, со високата претставничка за надворешна политика и за безбедност на Европската Унија, Федерика Могерини, со премиерите на Норвешка и на Малта, како и со претседателот на САД, Доналд Трамп.

Заев ќе има средби и со претставниците на македонската дијаспора во САД, како и со американски бизнисмени.


Претседателот на Државниот збор на Словенија, Милан Брглез, во посета на Скопје


Скопје, 12 септември, 2017 - 9:53 (META) 

Претседателот на Државниот збор на Република Словенија, Милан Брглез, денеска престојува во официјална посета на Македонија. Тој во 9.45 ќе биде пречекан на главниот влез на Собранието со високи државни и воени почести.

Во 10 часот Брглез ќе има тет-а-тет средба со претседателот на македонското Собрание, Талат Џафери.

Во 11 часот претседателот на Државниот збор на Словенија ќе има заедничка средба со Антонио Милошоски, претседател на Комисијата за надворешна политика, и со Артан Груби, претседател на Комисијата за европски прашања, а во 12 часот ќе има свое обраќање пред пратениците во Собранието на 14. седница.

Брглез ќе се сретне и со премиерот Зоран Заев, вицепремиерот за европски прашања, Бујар Османи, и со претседателот на Република Македонија, Ѓорге Иванов. Претседателот на Државниот збор, исто така, ќе се сретне со претставници на опозицијата, а посетата ќе ја заврши со средба со Словенци што живеат во Македонија, како и со словенечки стопанственици.

Од словенечката амбасада велат дека посетата е наменета за развој на билатералните односи, особено на парламентарно ниво, како и за размена на мислења за некои клучни политички и други актуелни теми (областа на Западен Балкан, вклучување и членство во евро-атлантските интеграции, мигрантска криза, мирно решавање на спорови и други).


Заев во Њујорк на ГС на ОН ќе има средби со Трамп, Гутереш, Могерини и со Туск


Скопје, 6 септември, 2017 - 13:11 (META) 

Премиерот Зоран Заев ќе ја предводи делегацијата на Република Македонија, на 72. Генерално собрание на Обединетите нации во Њујорк од 17 до 23 септември, соопшти секторот за односи со јавноста на Владата.

Во составот на делегацијата ќе бидат министерот за надворешни работи, Никола Димитров, и министерот без ресор задолжен за дијаспората, Едмонд Адеми.

Заев ќе присуствува на отворањето на работата на Генералното собрание на ОН и ќе има обраќање на конференцијата на тема „Отворена влада“, со која ќе претседава претседателот на Франција, Емануел Макрон.

Премиерот ќе има работен ручек со генералниот секретар на ОН, Антонио Гутереш, и други билатерални средби, меѓу кои и со претседателот на Европскиот совет, Доналд Туск, со високата претставничка за надворешна политика и за безбедност на Европската Унија, Федерика Могерини, со премиерите на Норвешка и на Малта, како и со претседателот на САД, Доналд Трамп.

Заев ќе има средби и со претставниците на македонската дијаспора во САД, како и со американски бизнисмени.


Заев најави решение за проблемот со колекторот за прочистување на Охридско Езеро


Скопје, 21 јули, 2017 - 11:40 (META) 

Премиерот Зоран Заев, заедно со министерот за финансии, Драган Тевдовски, доцна вчера попладнето имал одделни средби со в.д. градоначалникот на Општина Струга, Мустафа Забзун, и со градоначалникот на Општина Охрид, Никола Бакрачески, на кои било разговарано за финансиските и за проблемите со колекторот за прочистување на Охридско Езеро.

„Еден од заедничките проблеми за кои стана збор на оваа средба се проблемите во финансиското работење на двете единици на локална самоуправа, кои се соочуваат со хронично блокирање на сметките на општините поради долгови кои се создадени од повеќе причини. Во најголема мера, долговите на Охрид и на Струга произлегуваат од кумулираните обврски поради ненавременото намирување на кредитот од Европската банка за обнова и развој, кој во 1998 година го договори тогашното Министерство за трговија, за изградбата на колекторот за прочистување на водата во Охридско Езеро, а кое потоа отплатата на кредитот им го префрли на општините“, стои во соопштението на Владата за средбите.

Премиерот Заев истакнал дека е детално запознаен со овој проблем и изразил подготвеност за негово решавање наскоро.

Тој најавил дека Владата е подготвена да најде решение за управувањето со колекторот за прочистување на Охридско Езеро да биде изземено од надлежноста на општините, бидејќи едно такво решение ќе го олесни работењето на општините Охрид и Струга. Заев истовремено најавил дека ќе биде „подготвен детален проект за реконструкција и за доградба на колекторот за трајна заштита на водите на Охридско Езеро“.

Градоначалникот на Охрид, Никола Бакрачески, изразил благодарност за поддршката и побарал помош од Владата и за решавање на проблемот со регионалната депонија.

На средбите премиерот прифатил Владата и надлежните министерства во најкус можен рок да ги разгледаат и информациите за другите важни прашања за функционирањето на двете општини.


Заев и владина делегација на Самитот за Западен Балкан во Трст


Трст, 11 јули, 2017 - 12:24 (META) 

Премиерот Заев денеска и утре во Трст ќе ја предводи владината делегација на четвртиот самит ЕУ – Западен Балкан, во рамки на Берлинскиот процес кој официјално ќе почне утре.

На самитот кој е под покровителство на Италија ќе учествуваат премиерите и министри од шесте земји од Западен Балкан, како и високата претставничка за надворешна политика и безбедност на ЕУ, Федерика Могерини, еврокомесарот за преговори за проширување и соседска политика, Јоханес Хан, и еврокомесарката за транспорт, Виолета Болц.

Заев во рамките на самитот ќе има билатерални средби со премиерите на Албанија, Еди Рама, на Србија, Ана Брнабиќ, и на Словенија, Миро Церар, а ќе се сретне и со министерот за надворешни работи на Обединетото Кралство, Борис Џонсон.

Утре пред почетокот на самитот Заев ќе биде дел од емисијата „Окружење“ заедно со Рама, Дачиќ, Хан и со Свилановиќ.

Самитот има цел да го поттикне придвижувањето на евроинтеграциите на земјите од Западен Балкан и да донесе конкретен чекори во однос на неговото инфраструктурно и економско поврзување.

За таа цел е обезбеден фонд од 1,3 милијарди евра за Западен Балкан, средства кои треба да се искористат до крајот на 2020 година за проекти во областа на транспортот, инфраструктурата, енергетиката, животната средина и на иновациите, кои треба да бидат реализирани во рамките на Транспортната заедница на Западниот Балкан, која со свечена церемонија ќе биде основана со потписите на премиерите на земјите од регионот.


Путин денеска ќе се сретне со Макрон, Меркел, Ердоган и со Јункер


Хамбург, 8 јули, 2017 - 12:35 (META) 

Рускиот претседател Владимир Путин денеска во Хамбург ќе има низа билатерални состаноци на маргините на самитот на Групата 20 индустриски развиени земји – Г20.

Путин најпрво ќе разговара со претседателот на Франција, Емануел Макрон, и со германската канцеларка Ангела Меркел, а потоа со турскиот претседател Реџеп Таип Ердоган и со претседателот на Европската комисија Жан-Клод Јункер.

Русија и САД вчера постигнаа договор за примирје на југозападот на Сирија како еден од резултатите на првиот состанок на претседателите Доналд Трамп и Владимир Путин.


Потребна е соработка и консензус, им порача Хан на лидерите на албанските партии


Скопје, 26 јуни, 2017 - 20:50 (META) 

Интегративните процеси, соработката меѓу партиите и неопходноста од консензус околу реформските процеси биле во фокусот на средбите на лидерите на албанските парламентарни партии – Али Ахмети (ДУИ), Билал Касами (Беса), Мендух Тачи (ДПА) и Зијадин Села (Алијанса за Албанците) со еврокомесарот за проширување и за добрососедска политика, Јоханес Хан.

Лидерот на ДУИ, Али Ахмети, средбата со Хан ја оцени како многу важна и нагласи дека на неа го уверил еврокомесарот дека ДУИ стои цврсто зад сите договори што партијата ги постигнала и ги потпишала.

– Го уверив Хан дека ДУИ ќе опстои на сите договори што ги постигнала за коалиција и дека ќе ги преземеме сите чекори што се потребни за да бидеме што поблиску до реализацијата на сите прашања што нè доближуваат до Европската Унија – рече Ахмети.

Членовите на тимот на Хан на „Твитер“ соопштија дека Хан и лидерот на ДПА, Мендух Тачи, имале добра средба, на која било разговарано за претстојните предизвици за постигнување напредок на патот кон Европската Унија. Тачи не даде изјава по средбата со Хан и најави дека за неа ќе ги информира преку соопштение.

На средбата со Касами било дискутирано за меѓупартиската соработка, реформскиот процес, потребата за национален консензус и за улогата на опозицијата.

Лидерот на Беса ја оцени средбата со Хан како добра, додавајќи оти се надеваат дека оваа Влада ќе биде навистина реформска иако „досегашните чекори не ја потврдуваат таа определба“.

– Ги дадовме нашите забелешки дека би сакале оваа влада навистина да биде реформска и Движењето Беса ќе ги поддржи понатаму сите процеси Македонија да се врати на нејзиниот евроинтеграциски пат – рече Касами.

Последна на агендата на Хан беше средбата со лидерот на Алијанса за Албанците, Зијадин Села.

Хан на „Твитер“ ги оцени како драгоцени средбите со политичките лидери, додавајќи дека со сите соговорници ја нагласил потребата од конструктивна соработка и од национален консензус за реформите во интерес на граѓаните.