Можна средба на Могерини со премиерите од Западен Балкан во декември


Белград, 29 ноември, 2018 - 12:57 (META) 

Во Европската Комисија се разгледува можноста високата претставничка за надворешна политика Федерика Могерини во втората половина на декември да се сретне со премиерите од Западен Балкан.

Како што пренесуваат медиумите во Србија повикувајќи се на извори во Брисел, би станувало збор за Западнобалканската шестка – Албанија, БиХ, Црна Гора, Косово, Македонија и Србија – а засега нема најава за нова рунда од дијалогот на Белград и Приштина.

Како можен датум за средбата се посочува 19 декември, а темите би биле регионалната соработка и процесот на евроинтеграции, заедно со преглед на сработеното од реформите во текот на 2018 година, која што беше најавувана како преломна година за процесот на проширување и следните чекори на патот кон ЕУ.


Заев: Ќе сторам сè процесот на уставни измени да биде успешен


Скопје, 27 ноември, 2018 - 16:17 (META) 

На средбата со Никола Тодоров и Митко Јанчев разговарав за Координативното тело за помирување и реформите, рече премиерот Зоран Заев на новинарско прашање на маргините на регионалниот форум „Промовирање на имплементацијата на Истанбулската конвенција во земјите на Западен Балкан и во Турција – Интегрирани политики, инклузивни партнерства“

-Јасно изразената одговорност од Никола Тодоров и градоначалникот Митко Јанчев, верувам дека може многу да охрабри одредени пратеници кои што знаат кој е исправниот чекор, а се уште немаат доволно храброст да го направат тој чекор. Навистина, ќе сторам се за реализирање на овој процес, имаме максимална консолидација во општеството, во врска со ова исклучително важно прашање за Македонија, а тоа се уставните амандмани, заради тоа што, гледате дека уште во првата фаза имавме инклузивен процес. Верувам дека и во оваа фаза сега, која што привршува со пленарната седница, која ќе почне на 1 декември, но посебно во последната фаза кога ќе помине јавната дебата и ќе бидат конечни амандманите, можеме бројката од 80 пратеници да ја зголемиме многу повеќе. Затоа што и таа бројка од 80, која што беше овозможена при првото гласање беше само за тогаш и никој не може да каже дека таа бројка ќе опстојува. Јас искрено се надевам дека бројката ќе расте – рече Заев.

Тој смета дека иако Тодоров и Јанчев се исклучени од партиските органи, се уште контактираат и имаат влијание врз пратеници и рече дека за тоа ги повикал на кафе во Струмица.

На прашењето дали ќе го поддржи законот што го подготвија осуммината пратеници од Координативното тело за помирување, тој рече дека не го видел законот, но дека со задоволство би учествувал на средбата на Координативно тело, за да ги види сите детали.

– Јас сум иницијаторот на процесот на помирување, верувам искрено во него. Оваа закрвавеност, омраза кои што се јавуваат во нашето општество, треба да помогнеме, сите заедно да се надминат разликите, посебно во периоди кога сме сите заедно за стратешките цели, а тоа е членството во НАТО и во Европската Унија – вели Заев.


Орбан: Немам време да дишам, а не пак да се сретнам со Груевски


Будимпешта, 27 ноември, 2018 - 9:24 (META) 

Немам време да дишам, а не пак да се сретнам со Никола Груевски, рече вчера унгарскиот премиер Виктор Орбан, пишува унгарскиот новински сајт „Азонали“.

– Видете, нема време двапати да се вдише и издише, гледате како се натегаме тука – одговори Орбан на прашањето од „Азонали“ дали се сретнал со поранешниот македонски премиер кој преку Албанија, Црна Гора и Србија избега во Унгарија и таму доби азил.

Замолен да појасни дали се сретнал со Груевски кога овој пристигнал во Унгарија, Орбан одговара „Не, за жал тоа не се случи“.

– Сега сум среќен што сум жив. Не паничете, ако се случи тоа, ви ветувам дека ќе ви кажам – вели Орбан.


Иванов: Лага е дека се одржала средба со посредник на Јанакиески


Скопје, 15 ноември, 2018 - 16:00 (META) 

Ниту е побарана, ниту одржана средба со посредник на Миле Јанакиески, како што е наведено во службената белешка на УБК, класифицирана „строго доверливо“, а која е основ за определување на мерката притвор, велат од кабинетот на претседателот Ѓорге Иванов, по објавата на решението на Основниот суд Скопје 1 за определување на мерка притвор за Јанакиески.

„Миле Јанакиески телефонски побара средба со Претседателот Иванов која е одржана на 13.11.2018 година, вторник во 16 часот во кабинетот на Претседателот на Република Македонија. На средбата, воопшто не беа дискутирани темите амнестија, на која се повикува судот во решението за притвор, која е во надлежност на Собранието на Република Македонија, ниту пак темата аболиција. Сметаме дека станува збор за конструкција на лаги врз основа на претпоставки со цел да се инволвира Претседателот на Република Македонија, видливо од јавно објавеното образложение на решението на Судот“, велат од претседателскиот кабинет.

Од таму додаваат дека ова претставува груба полициска манипулација и инволвирање на полициски службеници со што се извршени кривични дела злоупотреба на службена положба и овластување, фалсификување на исправа, употреба на исправа со невистинита содржина.

„Останува нејасно, врз основа на што се следат активностите на претседателот Иванов и неговиот Кабинет од страна на УБК? Очекуваме итни одговори од Министерот за внатрешни работи, од директорот на УБК, од претседателот на Основниот суд Скопје 1 на дописите од Кабинетот на Претседателот на Република Македонија коишто беа испратени денеска“, додаваат од кабинетот.


Тодоров: Со Хан зборував за потребата од демократизација во ВМРО-ДПМНЕ


Хелсинки, 8 ноември, 2018 - 11:23 (META) 

Поранешниот министер за здравство, Никола Тодоров, кој беше исклучен од ВМРО-ДПМНЕ, се сретна со еврокомесарот за проширување и соседска политика, Јоханес Хан на маргините на самитот на Европската народна партија кој се случува во Хелсинки.

Тодоров на неговиот профил на „Фејсбук“ објави фотографии од средбата со Хан и напиша дека двајцата разговарале за евро-перспективите на Македонија и ВМРО-ДПМНЕ, како и за заканите кон оние кои мислат поинаку од актуелното партиско раководство.

„Од двете страни беше изразена силна поддршка за евро-интегративните процеси на Македонија и потребата од имплементација на реформите неопходни за интеграција на Македонија во ЕУ. Беше истакната и неопходноста од демократизација преку измена на статутот на партијата со цел ВМРО-ДПМНЕ да продолжи да дејствува како европска, модерна центар-десна партија“, напиша Тодоров.

Тој додаде дека од страна на Хан било потенцирано дека заканите и притисоците мора да запрат и била изразена јасна поддршка за одлучните и храбри чекори кои се во правец на интеграцијата на Македонија во Европската Унија.

На Конгресот на ЕПП покрај претседателот Христијан Мицкоски, потпретседателот Александар Николоски, секретарот за меѓународна политика Влатко Ѓорчев и советникот за меѓународна политика Тимчо Муцунски, за првпат беше поканета и втора партиска делегација, односно членовите кои ВМРО-ДПМНЕ ги исклучи од партиските функции. Поканети биле разрешниот заменик-генерален секретар Петар Богојески и разрешениот член на Извршниот Комитет, Костадин Богданов, разрешениот потпретседател на партијата Митко Јанчев и исклучените Никола Тодоров и пратеничката Емилија Александрова.

Јанчев и Богданов ја одбија поканата, додека за Хелсинки заминаа Богојески, Тодоров и Александрова.


Османи во Атина на средба со Катругалос


Атина, 1 ноември, 2018 - 9:38 (META) 

Вицепремиерот за европски прашања, Бујар Османи денеска е во работна посета на Атина каде ќе се сретне со алтернативниот министер за надворешни работи на Грција, Јоргос Катругалос, по која двајцата функционери ќе имаат изјава за медиуми.

Од Секретаријатот за европски прашања велат дека ќе стане збор за билатералните односи меѓу двете земји, Договорот од Преспа но и за сите останати прашања од билатерален интерес, како што се мерките за градење доверба, унапредување на односите меѓу двете земји, поддршката од страна на Грција за нашите европски интеграции итн.

Вицепремиерот Османи и Министерот Катругалос ќе присуствуваат заедно на првиот лет од Атина за Скопје по пауза од над 10 години при што Османи ќе се врати во Македонија со тој лет.

-Тоа што прв ќе летам на оваа релација е уште една симболика дека односите се затоплуваат, дека стратешкото партнерство ќе почне да функционира и соработката да се зголемува. Грција станува нов стратешки партнер на Македонија и со грчкиот министер ќе разговараме за поддршката на Грција во евроинтегративниот пат на Македонија. Ова е турбулентен период, и во Македонија и во Грција, но процесот за имплементација на Договорот во двете земји не е загрозен и покрај дневните политички турбуленции. Веќе утре ќе потврдиме дека Балканот добива две држави со силни и блиски релации – рече Османи на прес-конференција во Владата.


Мицкоски и Ахмети се сретнале вчера, потврди Груби


Скопје, 5 октомври, 2018 - 16:29 (META) 

Лидерот на ДУИ Али Ахмети вчера се сретнал со претседателот на ВМРО-ДПМНЕ Христијан Мицкоски, а од ДУИ не ја исклучуваат можноста за нови средби во наредните денови, за да се убеди ВМРО-ДПМНЕ да ги поддржи уставните амандмани во Собрание.

Мицкоски и Ахмети на средбата дискутирале за актуелната политичка ситуација во земјата, потврди Артан Груби, кој истакна дека на средбата се разговарало и за евентуалното гласање за уставните измени во Собранието.

-Лидерите разговарале за тоа пратениците на ВМРО-ДПМНЕ да ги поддржат уставните измени кои ги налага договорот со Грција. Тие се легитимни пратеници и треба да го направат тоа – изјави Груби за „Макфакс“.

Опцијата за предвремени избори е извесна, но не и посакувана за Ахмети, велат од ДУИ и додаваат дека во партијата веќе разгледуваат варијанти како најдобро би минале на изборите, самостојно, во коалиција со СДСМ, во коалиција со Европски предзнак или заедно со сите партии од албанскиот политички блок. Секоја од опциите за Ахмети има предности и маани и затоа е упорноста, работата да се заврши во Законодавниот дом.


Вучиќ ќе се сретне со Путин на почетокот на октомври во Москва


Белград, 24 септември, 2018 - 14:50 (META) 

Претседателот на Србија, Александар Вучиќ ќе се сретне со рускиот претседател Владимир Путин на почетокот на октомври, но во Москва а не во Белград, како што беше најавено.

„Посетата ќе се одржи на почетокот на октомври. Се очекува, Вучиќ и Путин да разговараат за клучните билатерални и регионални прашања. Расположението е позитивно“, напиша на неговиот твитер-профил амбасадорот на Русија во Србија, Александар Чепурин.

Чепурин денеска се сретна со Вучиќ, а како што беше соопштено разговарале за неговата посета во Москва.

Вучиќ рекол дека е почестен што ќе има прилика да разговара со Путин и дека и овој состанок има големo значење за понатамошно зацврстување на пријателството на рускиот и српскиот народ, како и за развојот на соработката помеѓу двете земји.

Тој додал дека Србија исто така останува воено неутрална земја и дека ништо не може да ја загрози нејзината сувереност и независност.

Последната средба помеѓу Вучиќ и Путин се одржа во мај годинава во Моска. Чепурин на почетокот на септември изјави дека Путин ќе дојде во Србија во октомври или ноември, но од Кремљ соопштија дека таква одлука се уште нема.


Заев утре во Вашингтон на средба со Пенс


Вашингтон, 19 септември, 2018 - 9:34 (META) 

Премиерот Зоран Заев патува утре во Вашингтон ќе има билатерална средба со потпретседателот на САД, Мајк Пенс, информираат од владиниот кабинет.

„Средбата ќе се реализира на покана на потпретседателот Пенс, а на неа ќе се разговара за напредокот на Република Македонија кон членството во НАТО“, информира владината прес-служба.

Средбата следува три дена откако во Македонија дојде американскиот секретар за одбрана Џејмс Матис, а претходно во државата беше и помошник-државниот секретар на САД Вес Мичел.

Матис на прес-конференција со Заев и министерката за одбрана Радмила Шекеринска порача  дека „гласот на референдумот е најважниот глас во историјата на вашата нација“ и ја потенцираше поддршката на САД.


Иванов до Столтенберг: Заслужуваме членство во НАТО без дополнителни услови


Скопје, 6 септември, 2018 - 10:58 (META) 

Претседателот Ѓорге Иванов и генералниот секретар на НАТО, Јенс Столтенберг разговарале за актуелната политичка состојба во Македонија, за евроатлантските интеграции на земјата и за напредокот на реформите во одбраната и безбедноста во согласност со НАТО стандардите, информираат од кабинетот на претседателот.

Иванов истакнал дека Македонија е силно посветена на промовирањето на мирот и стабилноста и придонесува за безбедноста во и надвор од нашиот регион.

„Претседателот Иванов потенцираше дека Македонија во континуитет покажува дека е доверлив и стратешки партнер и сојузник на НАТО,  додавајќи дека уште во 2008 година Македонија ги исполни условите за членство во НАТО и сиве овие години активно придонесувајќи во меѓународните мировни мисии, го заслужува членството во НАТО без дополнителни услови“, се вели во соопштението.

Столтенберг изјавил дека вистинското место на Македонија е во Европската Унија и НАТО Алијансата.

„Ќе продолжам да ги поддржувам нашите стратешки цели. Ho, Европската Унија и НАТО во никој случај не смеат да бидат алиби за лош договор“, му порачал претседателот Иванов на Столтенберг.

Иванов истакнал дека сите негови обврски како Врховен командант на вооружените сили во однос на одбраната се завршени и дека АРМ ги исполни поставените задачи и успеа да се покаже како рамноправен партнер со армиите на земјите-членки на НАТО како на обуките, вежбите и проверките, така и во пракса во изведувањето на операциите.

„Во таа насока, претседателот Иванов посочи дека го поддржа процесот на донесувањето на стратегискиот одбранбен преглед согласно препораките на НАТО советодавните тимови и дека новата стратегија, што е исклучиво ориентирана кон зачленувањето во НАТО, е изготовена. Имајки ги предвид новите реални предизвици со коишто се соочуваат регионот и Европа, додаде претседателот Иванов, одржувањето на безбедноста, стабилноста и просперитетот на нашиот регион треба да претставува колективен интерес на сите“, се додава во соопштението.