!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ципрас: Ако Скопје направи отстапки, 2018 година би можела да биде позитивна


Белград, 9 декември, 2017 - 16:26 (META) 

Македонската влада треба да сопре со иредентизмот и со реторката за единствени потомци на Македонците, за да се направат суштински чекори и да се најде заемно прифатливо решение, порача грчкиот премиер Алексис Ципрас од Белград, велејќи дека ако се направат неопходните чекори, следната година може да донесе позитивен развој на прашањето за името.

Во Белград, по вториот состанок на четворката – Србија, Бугарија, Романија и Грција, на само два дена пред средбата на Нимиц со преговарачите на двете земји во Брисел, Ципрас напомена дека ако се преземат неопходните чекори и се прифати решение за името, тој ќе биде првиот што ќе се залага Грција да ја гарантира перспективата и безбедноста на Македонија, која ја нарече „соседната земја“.

– Можно е 2018 да е година во која би можеле да имаме позитивна разврска за долгогодишниот проблем, доколку новата влада на Скопје реши да направи суштински чекори напред, ако запре со, според моето мислење, непотребната реторика дека се единствените потомци на Македонците и на Александар Велики. Ако запре со иредентистичката реторика и во исто време прифати едно решение за името, заемно прифатено со соседите. Во оваа перспектива, секако, јас, ќе бидам првиот за Грција да ја гарантира развојната перспектива и безбедноста на оваа соседна земја – рече грчкиот премиер.

Теми на белградската средба беа бугарското претседателство со ЕУ како балканско претседателство, како и за оживување на Солунската агенда од 2003 година и за конкретни проекти, како што се енергетското и железничкото поврзување на балканските земји.


Борисов: Да се обединиме и да помогнеме во решавање на проблемот за името


Белград, 9 декември, 2017 - 15:39 (META) 

Прашањето за името меѓу Македонија и Грција мораме да го решиме. Мора да се обединиме и да ѝ помогнеме на Европската комисија да му помогне на Брисел да донесе правилни одлуки, а не да поставува некакви ултиматуми, истакна бугарскиот премиер Бојко Борисов денеска во Белград, по средбата со српскиот претседател Александар Вучиќ и со премиерите на Грција, Алексис Ципрас, и на Романија, Михај Тудосе.

Борисов посочил дека четирите застапени земји на денешната среддба се неразделно парче на Европа и дека треба се покаже на дело дека се научени лекциите.

– Балканот многу векови наназад генерирал само војни. Сега е клучен момент, многу од големите играчи во светот се заинтересирани за Балканот, а ние сакаме обединет Балкан, модерна инфраструктура, дигитална инфраструктура. Лидерите на Западен Балкан сознаваат дека доцнат со остварувањето на обврските и треба да се ангажираат. Продолжуваме, испраќаме кон нашите пријатели во Европа порака дека имаат еден мудар, сигурен Балкан, кој не генерира проблеми, туку ги почитува сите правила – рече Борисов.


ЕУ отвора уште две поглавја во преговорите со Србија


Брисел, 6 декември, 2017 - 14:48 (META) 

Постојаните претставници на земјите членки на ЕУ на денешниот состанок донеле одлука на меѓувладината конференција со Србија да ги отворат поглавјето 6, кое се однесува на правата на претпријатијата, и поглавјето 30 за економските односи со странство.

Конференцијата е закажана за 11 декември, а официјален Белград се надеваше дека ќе отвори три поглавја, но одлуката на земјите членки зависеше од извештајот на Европската комисија за напредокот на Србија во најважните поглавја, 23 и 24.

Според извори од Брисел, Европската комисија оценила дека постои недоволен напредок во имплементацијата на Акциониот план за поглавјата 23 и 24, поради што земјите членки оцениле дека Србија не може да отвори повеќе од две поглавја во оваа рунда преговори.

Од Брисел се препорачува конкретен напредок во поглавјата 23 и 24, кои се однесуваат на владеењето на правото, кои се од суштинска важност за Србија да напредува во претпристапните преговори со Европската Унија. Паралелно со тоа, за да напредува во пристапниот процес, Србија мора да напредува и во дијалогот со Косово, кој треба да придонесе за целосна нормализација на односите меѓу Белград и Приштина.

Србија официјално ги почна преговорите за влез во ЕУ во јануари 2014 година.


Милан Зарубица, притворениот од „фабриката“ во Тетово, бил доктор за рак и за дрога


Белград, 5 декември, 2017 - 13:45 (META) 

Милан Зарубица, некогаш угледен фармацевт кој докторирал на анализа за лекување карцином, а подоцна станува озлогласен српски нарко-хемичар, е еден од главните организатори на нелегалното производство на амфетамини во „лабораторијата“ во Тетово.

Бил уапсен во Мала Речица, во фабриката за екстази и за каптагон во петокот, но тоа не е неговото прво апсење.

Како што пишува српскиот весник „Блиц“, Милан Зарубица од Земун, по ненадејната смрт на неговиот брат, фармацевт и стоматолог, Горан Зарубица, во деведесетите години на минатиот век, го презел неговиот бизнис со увоз на лекови и на фармацевтска опрема, го развил, но набргу зачекорил на другата страна на законот.

Милан докторирал на почетокот од деведесеттите години на минатиот век, со дисертација за лекување рак на тироидната жлезда на медицинскиот факултет во Белград, а откако го презел фармацевтскиот бизнис од брат му, односно во моментот на првото апсење во февруари 2003 година, бил сопственик и косопственик на фирмата „Ленал НБЦ“ и уште пет фирми за увоз на лекови и на фармацевтска опрема – „Микропоинт“, „Давидшпед“, „Варан фармасеутикалс“, „Варан кемикалс“ и „Кимел“. Повремено хонорарно ангажирал професори од Фармацевтскиот факултет во Белград, а таму доведувал и светски имиња.

Истовремено го ширел и бизнисот со производство на синтетички дроги, сокривајќи го зад фиктивните фирми кои му биле параван за продажбата, сè до моментот кога го „извезува“ бизнисот во Македонија. За тоа, како што пишува „Блиц“, информацијата дошла од американската агенција за борба против дрогата ДЕА.

Милан Зарубица првпат е уапсен на 4 февруари 2003 година, заедно со неговиот татко Филип, пред дрогата од тогаш најголемата балканска „фабрика“ да ја продаде на купувачи од Македонија и од Бугарија. Иако нивниот идентитет не се дознал, Зарубица добил 11 години затвор. Но, затворската управа на докторот на науки од Земун му дала повластен статус и слободни викенди, а тој тоа го користел за развивање на „бизнисот“, во кој го вклучил и внукот од брат, Бојан Зарубица, кој исто така бил уапсен во Белград, во рамките на големата акција на полициите на Македонија, Србија и на ДЕА.

Второто апсење на Милан поради производство и продавање синтетички дроги се случило на 12 мај 2011 година, откако на границата со Македонија била фатена негова пратка за двајца Турци и за еден Македонец. И откако во последниот ден до 2014 година излегол од затвор отслужувајќи ја првата затворска казна, следната година направил спогодба со српското обвинителство за организиран криминал за случајот од 2011 година, признавајќи дека поседува опрема и материјал за производство на синтетичка дрога, но специјалниот суд му ја потврдил казната и му изрекол единствена казна за случаите од 2003 и од 2011 година, односно 11 ипол години без решетки. Сепак, бидејќи веќе ја одлежал, не се вратил во затвор.

Потоа, пишува српскиот весник, со клиентите од Македонија кои првин му купувале дрога, а потоа посакале и повеќе и го довеле во Македонија за да произведува, бил следен од ДЕА, која заедно со српската и со македонската полиција обезбедила докази за да го врати зад решетки.

Милан Зарубица сега е во 30-дневен притвор изречен од судија на претходна постапка по барање од Основното јавно обвинителство за гонење организиран криминал и корупција на Македонија.


Илир Мета од Медвеѓа најави нова епоха на соработка меѓу Албанија и Србија


Медвеѓа, 26 ноември, 2017 - 18:28 (META) 

Моето доаѓање во Медвеѓа е јасна порака дека сме за соработка, изјави претседателот на Албанија, Илир Мета, за време на неговата неофицијална посета на оваа општина на југот на Србија, пренесува балканскиот сервис на „Радио Слободна Европа“.

– Се наоѓаме во нова епоха на соработка меѓу Србија и Албанија. Нашата заложба е да зајакнеме на патот кон Европа – изјавил Мета за медиумите пред почетокот на неформалната средба со претседателот на општината, Небојша Арсиќ, и со советниците во општината.

Делегацијата на албанскиот претседател, кој, како што е најавено, е во приватна посета на општината, ја пречекал шефот на координативното тело за Прешево, Медвеѓа и Бујановац, Зоран Станковиќ.

Прашан зошто претседателот на Албанија доаѓа во приватна посета на Медвеѓа, Мета рекол дека тој детаљ нема големо значење, додавајќи дека за утре бил повикан во посета на Гњилане и дека одлучил еден ден порано да ја посета Медвеѓа што му било одамнешна желба.

Шефот на координативното тело за југот на Србија, Зоран Станковиќ, за медиумите изјавил дека доаѓањето на Мета е договорено во соработка со Амбасадата на Србија во Тирана и дека албанската страна изразила желба тоа да биде неформална посета.

– Точно е дека нивото за еден претседател е да го пречека претседателот на државата, но, откако тој изрази желба тоа да биде приватна посета, надлежните државни органи ме одредија да бидам негов домаќин – изјавил Станковиќ, кој додал дека една од темите на средбата ќе биде прашањето за учебниците на албански јазик, но и други теми кои се однесуваат на албанската заедница во Србија.


Мадагаскар ја призна независноста на Косово, соопшти Пацоли на „Твитер“


Париз, 26 ноември, 2017 - 11:11 (META) 

Министерот за надворешни работи на Косово, Беџет Пацоли, изјави дека Мадагаскар ја признал независноста на Косово, на маргините на министерската конференција на Меѓународната организација на франкофонијата во Париз.

Пацоли информацијата ја објави на својот твитер-профил.

„Задоволство ми е да објавам дека Мадагаскар го призна Косово како независна и суверена држава“, напиша шефот на косовската дипломатија на „Твитер“.

Заменик-министерот за надворешни работи, Петрит Сељими, исто така „твитна“ дека Мадагаскар го признал Косово.

На истата конференција во Париз учествува и шефот на српската дипломатија, Ивица Дачиќ, кој изразил очекување дека „ќе продолжи процесот на повлекување на признавањата“, соопштило Министерството за надворешни работи на Србија, пренесува балканскиот сервис на „Радио Слободна Европа“.


Заев: Србија е земјата со која односите најмногу ни напреднаа во последните пет години


Белград, 21 ноември, 2017 - 13:32 (META) 

Перцепцијата на граѓаните во Република Македонија е дека Србија е на прво место од соседите со кои најмногу се подобрени односите во последните пет години, сосед со кој граѓаните имаат најдобри лични искуства, сосед чија историја и култура најдобро ги познаваат, сосед за кој се има најдобро мислење, како и сосед со кој би сакале најблиски односи, рекол македонскиот премиер Зоран Заев на заедничката прес-конференција со премиерката на Србија, Ана Брнабиќ, во Белград.

Зборувајќи за регионалната соработка, Заев нагласил дека таа ќе се базира на принципот за еднакви услови за сите, пренесува владината служба за информирање.

– Планот за регионална економска област на Западен Балкан, кој се базира на принципите на еднакви услови за сите во регионот, предвидува наши заеднички интереси: промовирање на понатамошна трговска интеграција, воведување динамичен регионален инвестициски простор, олеснување на регионалната мобилност и креирање агенда за дигитална интеграција – нагласи Заев.

Македонскиот премиер посочил дека со премиерката Брнабиќ се согласиле дека од особен интерес на двете земји е соработката во областа на дигитализацијата, партнертво на отворени влади, ИТ-секторот, како и креирање на култура на иновативни бизниси и претприемачки дух кај младите.

Заев ја оценил економската соработка меѓу Македонија и Србија како константно добра, укажувајќи на фактот што Србија е трет по обем на размена трговски партнер на Македонија, веднаш зад Германија и Велика Британија.

Српската премиерка Брнабиќ истакнала дека унапредувањето на односите меѓу двете земји е од особен интерес на Република Србија, со оглед на фактот дека двете земји делат многу заеднички интереси како што се евроинтеграциите, инфраструктурните проекти во рамките на Коридорот 10 и многу други.

Зборувајќи за малцинските прашања, Заев рекол дека српскиот народ е еден од конститутивните народи наведени во Уставот на Република Македонија и српскиот е службен јазик во општините Старо Нагоричане и Чучер-Сандево, како и еден од службените во Општина Куманово. Зборувајќи за Македонците во Србија, тој истакнал дека е добро што е во службена употреба во повеќе места, се изучува во неколку училишта во Србија, а во Статутот на Војводина, Македонците се наведени како конститутивен народ.


Следната недела ќе биде густо: Хан во Скопје, Заев во Белград, Османи во Атина и пет судења


Скопје, 17 ноември, 2017 - 11:50 (META) 

Следната недела македонските политичари, но и судовите ќе имаат набиена агенда. Се очекува посетата на еврокомесарот за проширување и за соседска политика, Јоханес Хан, посета на владина делегација во Србија и средба помеѓу вицепремиерот за европски прашања Бујар Османи и грчкиот министер за надворешни работи Никос Коѕиас.

Во скопскиот Кривичен суд, за следната недела на распоредот се рочишта за случаите „Поткуп“, „Шамари“, „Труст“, „Триста“ и „Сопот“, кои предизвикуваат голем интерес во јавноста.

  • 20/21 ноември (понеделник/вторник) – Премиерот Зоран Заев ќе престојува во официјална посета на Србија, каде ќе се сретне со српската премиерка, Ана Брнабиќ, и со претседателот на Србија, Александар Вучиќ.
  • 20/21 ноември (понеделник/вторник) – Во официјална посета на Македонија ќе пристигне еврокомесарот за проширување и за соседска политика, Јоханес Хан, откако оваа недела тој во Брисел имаше средба со вицепремиерот за европски прашања, Бујар Османи, и со шефот на македонската дипломатија, Никола Димитров. „Со нетрпение ја очекувам мојата посета на Скопје следната недела, со политички состаноци и со средби со граѓанското општество“, напиша Хан на „Твитер“.
  • 20 ноември (понеделник) – Во Кривичен суд е закажано рочиштето за случајот „Поткуп“ на кое треба да се појави Заев, но поради неговата посета на Србија, најверојатно рочиштето ќе биде одложено.
  • 20 ноември (понеделник) – Ќе има рочиште и за случајот на СЈО за „Шамарите“ во Центар.
  • 20 ноември (понеделник) – Во хотелот „Александар Палас“ ќе има јавна дискусија за предлог-измените во Законот за аудио и аудиовизуелни медиумски услуги, на која ќе присуствуваат министерот за информатичко општество и администрација, Дамјан Манчевски, и министерот без ресор задолжен за комуникација, транспарентност и отчетност, Роберт Поповски.
  • 21 ноември (вторник) – Ќе има рочишта за предметите на СЈО, „Труст“ и „Триста“.
  • 22 ноември (среда) – На Комисија за европски прашања на второ читање ќе биде ставен законот за употреба на јазиците.
  • 22 ноември (среда) –  Ден на албанската азбука.
  • 23 ноември (четврток) – Во Кривичен суд е закажано судењето за „Сопот“.

Во текот на наредната неделa, a можеби и таа по неа, се очекува и официјалната посета на вицепремиерот за европски прашања, Бујар Османи, на Грција, каде ќе се сретне со шефот на грчката дипломатија, Никос Коѕиас.


Гутереш: Дијалогот меѓу Белград и Приштина бара цврста посветеност


Њујорк, 14 ноември, 2017 - 18:15 (META) 

Седницата на Советот за безбедност на Обединетите нации, на која ќе биде разгледан извештајот на генералниот секретар Антонио Гутереш за работата на Мисијата на ОН на Косово (УНМИК) почна денеска во седиштето на организацијата во Њујорк.

Генералниот секретар на ОН, Антонио Гутереш во најновиот извештај оценува дека дијалогот меѓу Белград и Приштина бара цврста посветеност и додаде дека долготрајниот мир е можен само со одржлив напредок и нормализирање на односите.

Гутереш во редовниот тримесечен извештај за работата на УНМИК, за периодот од 16 јули до 15 октомври, наведува дека мисијата работела на градење доверба меѓу заедниците на Косово.


Хојт Ји: На Србија ѝ дадов совет, не ултиматум


Вашингтон, 7 ноември, 2017 - 10:37 (META) 

Пораката Србија да не седи на две столчиња беше совет, а не ултиматум, рече заменик-помошникот на американскиот државен секретар, Хојт Брајан Ји, на собирот за Балканот во Центарот за меѓународни односи во Вашингтон, пренесува „Гласот на Америка“.

Тој нагласи дека тоа што го кажал, иако изгледало нетактично, го рекол во контекст на напредокот на Србија кон Европската Унија.

– На конференција во Белград пред една недела, можеби невнимателно ја употребив српската поговорка дека не може да се седи на две столчиња, но тоа беше во контекст на совет за Србија како побрзо да оди кон ЕУ. Тоа не беше ултиматум или предупредување – изјави тој, спомнувајќи ја Црна Гора како пример за брзо приближување кон ЕУ.