Вучиќ на Косово: Србија сака и ќе направи се да го зачува мирот


Бањска, 20 јануари, 2018 - 12:59 (META) 

Српскиот претседател Александар Вучиќ денеска им порача на Србите на Косово дека мораат да останат и да опстанат на своите живеалишта на Косово, а дека за тоа ќе има понатамошна и поголема помош од државата.

– Србите мора да останат и да опстанат на своите огништа на Косово и Метохија. Не смееме да бидеме помалку на земјата на која од секогаш сме живееле. Затоа како држава ќе се бориме на сите начини, мора да го обезбедиме нивниот економски напредок, да ја обезбедиме нивната сигурност и да се пресметаме со криминалот и корупцијата – порача Вучи.

Осврнувајќи се на атентатот на Оливер Ивановиќ, Вучиќ рече дека Србија, иако била подготвена да учествува во истрагата, што не било прифатено од албанската страна, ќе разменува информации со косовските институции, и дека ќе ги почека конечните резултати.

– Ќе видиме дали истрагата ќе доведе до извршителите на ова гнасно злосторство. Ако тоа не се случи, многу работи ќе бидат јасни, како што реков првиот ден – рече тој.

На Србите на Косово им се заблагодари на цврстината, постојаноста, храброста и желбата да ја чуваат својата земја, а на Албанците им порача дека, без оглед на различните интереси, Србија сака и ќе направи се да го зачува мирот и да ги реши несогласувањата.

– Дојдов да им порачам на Албанците, без оглед што неретко Србите ги доживуваат како, не би рекол непријатели, туку како противници, и неретко имаме различни интереси, дека Србија не само што сака мир, туку ќе даде се од себе тој мир да го зачуваме. Ќе направиме се со цел да ги решиме повеќедецениските и повеќевековните несогласувања, да обезбедиме трајност на тој мир, и безбедност за секое албанско и српско семејство – додаде Вучиќ.


Во Митровица е убиен Оливер Ивановиќ, еден од лидерите на косовските Срби


Митровица, 16 јануари, 2018 - 10:14 (META) 

Лидерот на иницијативата „Србија, демократија, правда“, Оливер Ивановиќ утрово е убиен од огнено оружје во Северна Митровица, на Косово.

Ивановиќ им подлегнал на повредите откако утрово околу 8.15 часот во него било пукано од огнено оружје пред неговата канцеларија во Северна Митровица, потврдил неговиот адвокат Небојша Влајиќ за „Радио Слободна Европа“.

– За жал, лекарите во болницата во Митровица во 9.30 часот потврдија дека починал – изјавил Влајиќ.

Полицијата пред канцеларијата на Ивановиќ пронашла три чаури, потврдиле од неговата партија.

Северниот дел на Косовска Митровица е блокиран од бројни припадници на косовската полиција кои трагаат по лицето кое пукало во Ивановиќ. Исто така е блокиран и просторот околу седиштето на партијата.

Оливер Ивановиќ беше носител на листата „Србија, демократија, правда – Оливер Ивановиќ“ на изборите на Косово.

На последните избори што се одржаа на 22 октомври, минатата година, поради закани четворица кандидати се повлекоа од неговата листа, а неодмна во Северна Митровица му беше запален и автомобилот.


Заев: Србија е земјата со која односите најмногу ни напреднаа во последните пет години


Белград, 21 ноември, 2017 - 13:32 (META) 

Перцепцијата на граѓаните во Република Македонија е дека Србија е на прво место од соседите со кои најмногу се подобрени односите во последните пет години, сосед со кој граѓаните имаат најдобри лични искуства, сосед чија историја и култура најдобро ги познаваат, сосед за кој се има најдобро мислење, како и сосед со кој би сакале најблиски односи, рекол македонскиот премиер Зоран Заев на заедничката прес-конференција со премиерката на Србија, Ана Брнабиќ, во Белград.

Зборувајќи за регионалната соработка, Заев нагласил дека таа ќе се базира на принципот за еднакви услови за сите, пренесува владината служба за информирање.

– Планот за регионална економска област на Западен Балкан, кој се базира на принципите на еднакви услови за сите во регионот, предвидува наши заеднички интереси: промовирање на понатамошна трговска интеграција, воведување динамичен регионален инвестициски простор, олеснување на регионалната мобилност и креирање агенда за дигитална интеграција – нагласи Заев.

Македонскиот премиер посочил дека со премиерката Брнабиќ се согласиле дека од особен интерес на двете земји е соработката во областа на дигитализацијата, партнертво на отворени влади, ИТ-секторот, како и креирање на култура на иновативни бизниси и претприемачки дух кај младите.

Заев ја оценил економската соработка меѓу Македонија и Србија како константно добра, укажувајќи на фактот што Србија е трет по обем на размена трговски партнер на Македонија, веднаш зад Германија и Велика Британија.

Српската премиерка Брнабиќ истакнала дека унапредувањето на односите меѓу двете земји е од особен интерес на Република Србија, со оглед на фактот дека двете земји делат многу заеднички интереси како што се евроинтеграциите, инфраструктурните проекти во рамките на Коридорот 10 и многу други.

Зборувајќи за малцинските прашања, Заев рекол дека српскиот народ е еден од конститутивните народи наведени во Уставот на Република Македонија и српскиот е службен јазик во општините Старо Нагоричане и Чучер-Сандево, како и еден од службените во Општина Куманово. Зборувајќи за Македонците во Србија, тој истакнал дека е добро што е во службена употреба во повеќе места, се изучува во неколку училишта во Србија, а во Статутот на Војводина, Македонците се наведени како конститутивен народ.


Косово изгласа нова влада


Приштина, 10 септември, 2017 - 12:34 (META) 

Со 62 гласа „за“, во парламентот на Косово беше изгласана нова влада, предводена од лидерот на Алијансата за иднина на Косово, Рамуш Харадинај. Владата ја поддржаа партијата на Харадинај, Демократската партија на Кадри Весели, Иницијативата за Косово на Фатмир Лимај, Алијансата за Ново Косово на Беџет Пацоли, пратеничката група на Србите и онаа на немнозинските етнички заедници.

Пред гласањето салата ја напуштија пратениците на екстремно националистичкото движење Самоопределување и Демократскиот сојуз.

Во кабинетот на премиерот Рамуш Харадинај, прв потпретседател на владата и шеф на дипломатијата е милијардерот Беџет Пацоли, потпретседатели се Енвер Хоџај, Фатмир Лимај, Далибор Јевтиќ, кој ќе биде и министер за враќање на раселените и за заедниците, и Дардан Гаши, кој ќе биде задолжен за дијаспората и за привлекување инвестиции.


Уапсени двајца Срби во Грција за кражба на луксузни возила


Солун, 9 август, 2017 - 12:47 (META) 

Грчката полиција уапсила двајца државјани на Србија осомничени за кражба на неколку луксузни автомобили на Халкидики.

Уапсени се 24-годишна девојка и 33-годишно момче за кои се наведува дека биле јадрото на групата која секојпат крадела автомобили во различен состав.

Украдените возила биле криени во куќа која привремено ја изнајмиле на Халкидики.

Во соопштението на полицијата се наведува дека осомничените од 13 јули во поширокиот регион на Касандра украле четири возила марка „ленд ровер“, а се обиделе да украдат уште едно.

Истрагата продолжува за да се истражи дали осомничените учествувале во уште некои кривични дела.

Приведените ќе бидат изведени пред обвинителот на регионот Халкидики.


Вулин до косовските Срби: Секој договор со Албанците е против интересите на српскиот народ


Белград, 21 мај, 2017 - 19:11 (META) 

Министерот за труд и боречки прашања Александар Вулин денеска изјави дека српската влада „очекува секој Србин на Косово“ на вонредните парламентарните избори на 11 јуни да ја поддржи Српската листа и порача дека „секој кој пред или после прави договори и компромиси со претставниците на Албанците работи против интересите на српскиот народ и за тоа ќе „сноси одговорност“.

„Гласот за Српска листа е глас за политиката на српската влада и Александар Вучиќ“ – рече Вулин после состанокот на Вучиќ со кандидатите на Српска листа на изборите на Косово, кој се одржа зад затворени врати.

Вулин истакна дека на Србите на Косово им е неопходно единство, затоа што, без цврста и јасна соработка со Белград, никој не може да се надева на спроведување на бриселскиот договор, ниту да ги зачува интересите на Србите на Косово. Тој истакна дека само Српска листа ја гарантира непрекинатата врска со Србија и дека нема да биде формирана Војска на Косово.

Директорот на владината канцеларија за Косово, Марко Ѓуриќ рече дека на албанските партии им се потребни четири пратеници за да изгласаат формирање Војска на Косово, а за да ги остварат тие цели, спремни се на секакви злоупотреби, па дури и на купување пратенички мандати.

Србите во парламентот на Косово од 120 пратеници имаат 10 загарантирани места.


Српскиот патријарх г.г. Иринеј ги нарече Македонци во областа Гора „одродени Срби“


Тирана, 12 јануари, 2017 - 15:06 (META) 

Патријархот на СПЦ, г.г. Иринеј, етничките Македонци во областа Гора ги нарече „одродени Срби“.

Поглаварот на СПЦ, таквата квалификација ја дал во опширно интервју за телевизиски канал на СПЦ, „Храм“, на што реагираше македонското друштво „Илинден“ од Тирана.

– Искажаното од страна на патријархот Иринеј, го сметаме за скандалозен став. Тој тврди дека Горанците биле Срби, кои го зборувале најчистиот српски јазик. Македонското друштво „Илинден“ од Тирана посочува дека во областа Гора не постои српско малцинство, таму има само македонско малцинство. Македонското друштво „Илинден“ го потсетува српскиот патријарх дека горанскиот говор е македонски јазик. Бараме од српскиот патријарх Иринеј во иднина да не ги нарекува Македонците во областа Гора, Срби, што е без основа и без никакви аргументи – се вели во соопштението на македонското друштво „Илинден“ од Тирана.


Албански демонстранти спречија Срби да стигнат до црква во Косово


Приштина, 28 август, 2016 - 14:18 (META) 

Албански демонстранти го блокираа патот кон остатоците од манастирот посветен на успението на Пресвета Богородица, а за каде беше најавена богослужба за христијанското население во тој дел од Косово.

Полицијата се судри со група од неколку стотини Албанци, кои го блокираа патот по кој 150 раселени Срби се упатија на литургија до местото Мушутиште кај Сува Река.

Повредени беа неколку лица, меѓу кои полицајци, а уапсени се дваесетина лица кои го блокирале патот.

По четири часа чекање, трите автобуси не успеаја да стигнат до црквата и со придружба на косовската полиција се вратија назад затоа што е утврдено дека не постојат безбедносни услови Србите да дојдат до манастирот.


Отворена постапка против три лица за убиството на 26-годишен охриѓанец


Охрид, 2 јануари, 2016 - 16:20 (META) 

Основното јавно обвинителство – Охрид отвори постапка против три лица, осомничени за вчерашниот настан во кој животот го загуби 26-годишен жител на Охрид.

За трите лица, државјани на Србија, од надлежен обвинител е побарано одредување мерка притвор. Судија на претходна постапка за трите лица определи притвор во времетраење од 30 дена.

Еден од осомничените се гони за кривично дело убиство од член 123, став 2 од Кривичниот законик, односно „убиство извршено на свиреп начин“. Другите двајца се товарат за кривично дело помагање од член 365 од Кривичниот законик.

Основното јавно обвинителство – Охрид ја продолжува истрагата за овој случај.


Притворени тројцата Срби што учествуваа во тепачката во Охрид


Охрид, 2 јануари, 2016 - 14:15 (META) 

СВР Охрид поднесе кривична пријава против 29-годишниот Б.У. од Краљево, Србија, поради основан сомнеж дека извршил убиство.

Во пријавата, поради постоење основани сомневања дека му помогнале, опфатени се и М.П. (26) и Ѓ.П. (25), исто така од српскиот град Краљево. На тројцата пријавени одредена им е мерка притвор во траење од 30 дена.

Според досегашната истрага, на 1 јануари годинава, околу 2 часот, во кафе-барот „Табана“ на улицата Цар Самоил во Охрид, се случило нарушување на јавниот ред и мир со жестока вербална расправија помеѓу две групи во кои од една страна бил сега починатиот Димитар М. (27) со двајца негови пријатели од Охрид, а од другата страна биле сега притворените српски државјани.

Вербалната расправија со меѓусебна турканица се случила во објектот „Табана“, каде имало организирана прослава за дочекот на Нова година и каде сега притворените биле сместени.

Тројцата млади луѓе од Охрид по полноќ дошле во кафе-барот, застанале на шанкот каде биле сега притворените. Во еден момент, тука настанала меѓусебна вербална расправија и туркање по што од персоналот биле разделени. Потоа сега починатиот Димитар М. излегол од угостителскиот објект сакајќи да замине, а прво пријавениот Б.У. излегол надвор од објектот за да го запре и да се пресмета со него. Тука, на плочникот пред објектот, го стигнал и го нападнал, удирајќи го брутално со раце и со нозе во пределот на главата и по телото, по што од силните удари настанала смрт. Веднаш потоа Б.У. влегол во објектот каде на влезот бил пречекан од второпријавениот и од третопријавениот и се упатил кон неговата соба да се преоблече. Неговите пријатели, за да го прикријат делото, најнапред го сместиле Б.У. во собата на нивни пријателки во истиот објект, а подоцна откако се осигурале дека е безбедно, го вратиле во неговата соба.

За целосно расчистување на овој случај, СВР Охрид го обезбеди местото на настанот и во содејство и присуство на јавен обвинител изврши криминалистичко-технички увид за обезбедување материјални траги. По наредба од судија во претходна постапка, извршен е претрес во седум соби во објектот „Табана“, за пронаоѓање на сторителите на кривичното дело. Во една од собите, пронајдени се сега притворените српски државјани. Во нивната соба, пронајдени и обезбедени се траги од крв и на дел од облеката на првопријавениот.

СВР Охрид ги презеде сите неопходни оперативни мерки и истражни дејства, направи увид на местото на настанот, се спроведе постапката за препознавање на сега притворените, како и анкетирање на очевидци и вработени во угостителскиот објект „Табана“. Сите активности беа реализирани во содејство и во координација со јавниот обвинител. По негова наредба, вчера беше извршена обдукција врз телото на сега починатиот.