!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев: Имаме асови во ракавот што не сме ги употребиле против Грција


Скопје, 15 септември, 2017 - 20:13 (META) 

„И ние имаме асови во ракавот што не сме ги употребиле, немојте да мислите дека ги немаме поради тоа што не ги употребуваме. Веројатно и Грција има такви адути, но тоа е нејзина работа“, рече премиерот Зоран Заев, одговарајќи на прашање за спорот за името со Грција во вечерашната емисија „Топ-тема“ на телевизијата „Телма“.

Премиерот Заев кажа дека новата власт бара помош од Грција и сака конструктивно да разговара, но не по секоја цена.


Димитров: Паралелно да се одвиваат преговорите за влез во ЕУ и за спорот за името


Лондон, 14 септември, 2017 - 11:14 (META) 

Македонија се надева дека направи доволно за да ја убеди Европската Унија да почне преговори и покрај тоа што сè уште не е решен спорот со Грција за името, изјави вчера шефот на македонската дипломатија, Никола Димитров, за „Ројтерс“.

– Ако ги спроведеме реформите во земјата, се надеваме дека ќе стигнеме до таа фаза (почеток на преговори за влез во ЕУ) и паралелно да го решаваме спорот за името – вели Димитров.

Во однос на аспирациите за влез во НАТО, Димитров вели дека интеграцијата е можна само преку дијалог.

– Не можеме да го избоксуваме влезот во НАТО, мора со разговори да влеземе. Мора во Атина да нè гледаат како сојузници. Долгорочно, и во интерес на Грција е северниот сосед да ѝ биде земја во која владее правото – вели Димитров.


Димитров: Преговорите со Грција дефинитивно ќе почнат до крајот на годинава


Берлин, 8 септември, 2017 - 18:00 (META) 

Министерот за надворешни работи, Никола Димитров, во интервју за „Дојче веле“ дадено при неговата посета на Германија, изразува силна увереност дека преговорите со Грција за спорот околу името, кои подолго време беа во застој, ќе продолжат до крајот на годинава.

– За време на посетата на грчкиот министер Никос Коѕиас, минатата среда во Скопје, ги дискутиравме мерките за градење доверба. Сè уште не ги почнавме преговорите. Тие ќе почнат дефинитивно пред крајот на годината. Јас го правам она што мислам дека треба да биде работа на дипломатите: решавање на проблеми, отворање врати и создавање пријатели. Можеби не можеме да ја смениме историјата, но сигурно можеме да се обидеме да влијаеме на иднината и да го направиме животот подобар за нашите граѓани денес. Тоа е нашата цел – вели Димитров.

Тој во интервјуто нагласува дека балканската рута на мигрантите мора да остане затворена.

– Мислам дека треба да направиме сè што е потребно за да остане затворенa, бидејќи сите ние, вклучувајќи ги и бегалците, имаме интерес за организирана помош и мораме да се бориме против илегалната миграција. Она што е навистина важно е ЕУ да продолжи да ја поддржува Турција во финансиска смисла, бидејќи имаат милиони бегалци во нивната земја. Еднакво важно е да продолжиме да ѝ помагаме на Грција и тоа на солидарен начин – единствениот начин на кој треба да се решава ова прашање – вели Димитров.

Прашан дали Македонија е подготвена да прими бегалци кои се во ЕУ, тој вели дека тоа би се случило дури откако земјата ќе стане членка на Унијата.

– Пред сè, во интерес на македонските граѓани е Македонија да влезе во ЕУ, а кога еднаш ќе бидеме дел од ЕУ, тогаш дефинитивно ќе бидеме подготвени да го делиме товарот со ЕУ. Но, пред тоа треба да влеземе во ЕУ, за да може да се даде одговор на ова прашање – вели шефот на македонската дипломатија.


Димитров: Допрва почнува процесот за решавање на спорот за името


Скопје, 30 август, 2017 - 12:17 (META) 

Министерот за надворешни работи, Никола Димитров, денеска не сакаше да прецизира за што конкретно ќе се разговара на утрешната средба со неговиот грчки колега, Никос Коѕиас, додавајќи дека е некоректно да се каже дека ќе зборуваат само за мерките за доверба, имајќи предвид дека довербата е клучна за добрите односи.

– Треба да се утврди што е најважно за Грција по ова прашање, да објасниме што е најважно за Република Македонија. Јасно е дека процесот и формално и суштински е под покровителство на Обединетите нации. Допрва почнува процесот на преговори, по посетата на Нимиц и по неговата средба со Коѕиас во Брисел и ќе видиме колку ќе трае и колку ќе биде интензивен – рече Димитров.

Тој истакна дека новата влада почнала низа сериозни корективни мерки во согласност со Привремената спогодба.

– Ова министерство и оваа влада сериозно ги сфаќаат обврските што ги имаме преземено и сериозно го сфаќаме Уставот на РМ и ќе бидеме многу принципиелни и многу цврсти во поглед на излетот што ни се случи во Канада – рече Димитров, истакнувајќи дека Македонија не сака карти на големи земји, туку карта на голема Европа.

Прашан дали сè уште постои оптимизам за влез во НАТО до крајот на годинава, тој рече дека ентузијазмот гради високи очекувања и нè турка напред, но дека зачленувањето не зависи само од нас, туку и од Грција, како и од тоа колку брзо ќе успееме да ги тргнеме критиките од самитот во Варшава, кои се однесуваат на одговорноста, владеењето на правото и на слободата на медиумите.

– Клучно прашање не е кога, туку дали сакаме како општество и нација да си ја зацврстиме иднината, за да не се прашуваме секој трет ден дали ќе нè биде и што ќе биде со Македонија. Во услови кога регионот е поразнишан, важно е судбината да си ја земеме во свои раце и да направиме сè што можеме – рече Димитров.


Работни групи на Македонија и на Грција ќе усогласуваат нови мерки за доверба


Скопје, 27 август, 2017 - 16:05 (META) 

Министерот за надворешни работи на Грција, Никос Коѕиас за време на својата посета на Скопје во четврток, покрај средбата со шефот на македонската дипломатија, Никола Димитров ќе има состанок и со претседателот Ѓорге Иванов, како и со вицепремиерот за евроинтеграции Бујар Османи, дознава „Мета“.

Коѕиас со автомобил ќе допатува во Скопје и тоа непосредно пред планираните средби. Причината за ваквиот начин на патување е да се избегне слетувањето на скопскиот аеродром „Александар Велики“.

Како што претходно објави „Мета“, спорот за името нема да биде тема на разговорите Димитров – Коѕиас, туку мерките за градење доверба и нивното досегашно имплементирање. Пред посетата на грчкиот министер на Скопје, како што дознаваме, работна група од македонското МНР ќе замине во Атина каде ќе се усогласуваат ставовите на нов пакет мерки за подобрување на билатералните економски, транспортни и енергетски односи.

Посетата на Коѕиас на Скопје, која доаѓа по неговата средба во Брисел со посредникот на Обединетите нации во спорот за името, Метју Нимиц, претставува уште еден обид за опипување на ставовите на двете страни за можното решавање на отвореното прашање. Нимиц по средбата со шефот на грчката дипломатија рече дека постои „нов импулс“ во напорите за наоѓање решение за проблемот, а премиерот Зоран Заев вчера во Драч изјави дека очекува медијаторот да му достави нови предлози за решавање на проблемот до крајот на годината.


Заев очекува од Нимиц нови предлози за името до крајот на годината


Драч, 26 август, 2017 - 15:34 (META) 

Премиерот Зоран Заев денеска во Драч изјави дека очекува од специјалниот претставник на Обединетите нации во разговорите за прашањето за името меѓу Грција и Македонија, Метју Нимиц, да добие нови предлози до крајот на годинава.

– Очекувам до крајот на годината да има нови идеи од Нимиц за решавање на овој проблем. Убеден сум дека позитивниот амбиент што постои во целиот регион и позитивниот однос на Македонија со сите земји од регионот може само да бидат од полза за решавање на вака чувствително прашање, рече Заев, одговарајќи на новинарско прашање дали на неформалната средбата на премиерите од Западен Балкан во Драч била понудена помош за решавање на спорт со Грција.

Прашан за законот за употребата на јазиците, Заев рече дека значењето законот се гледа во тоа што тој е дел од владината програма.

– Владата го донесе законот. Ќе се разговара за законот во септември во Парламентот. Очекувам, и уште еднаш ја покануваме опозицијата да учествува во тоа. По гласањето на законот, Венециската комисија и нашите институции ќе имаат можност да дадат коментар за него. Новиот закон ги поврзува нашите граѓани и сакаме да го подобриме законот бидејќи е право на нашите граѓани на начин за градење на едно општество за сите граѓани во нашата земја, рече Заев.


Димитров и Коѕиас нема да разговараат за спорот за името


Скопје, 24 август, 2017 - 9:48 (META) 

Спорот со името нема да биде тема на претстојната средба на шефот на македонската дипломатија Никола Димитров и неговиот грчки колега Никос Коѕиас во Скопје, дознава „Мета“ од добро упатени извори.

Коѕиас во Скопје, вообичаено, ќе допатува со автомобил, за да се избегне слетување на аеродромот „Александар Велики“.

Димитров и Коѕиас следниот четврток повторно ќе разговараат за мерките за градење доверба, а ќе го разгледаат и прогресот на двете работни групи на министерствата за новите мерки за приближување. Сепак, не се исклучува можноста министрите да разговараат и за случајот со македонскиот конзул во Торонто, Јовица Палашевски кој се сликаше со карта на Голема Македонија, што во Грција беше протолкувано како нова провокација.

Посетата на Коѕиас на Македонија доаѓа по посетата на Димитров на Атина, но и по средбите на двајцата министри со специјалниот претставник на Обединетите нации во спорот за името, Метју Нимиц.

Медијаторот Нимиц за време на својата посета на Скопје во јули изјави дека не треба да се очекува драстични промени во следните месеци, бидејќи владите допрва се запознаваат и оти е прерано да се излезе со дефинитивни предлози за името.


Во Берлин Димитров ќе бара помош за почеток на преговорите со ЕУ


Скопје, 22 август, 2017 - 17:24 (META) 

Министерот за надворешни работи Никола Димитров за време на посетата на Берлин, на 6 септмеври, ќе побара Германија и Европската Унија да и помогнат на Македонија целосно да ја реализира евроатлантската интеграција.

– Ова е шанса и за ЕУ и за Германија да покажат дека не само што можат да помогнат да се стопира кризата и да не оди подлабоко, туку и да помогнат кога има добри работи и добар развој, да се донесе работата до конечен успех – рече Димитров на денешната прес-конференција во Владата.

Прашан дали на средбата со неговиот колега Зигмар Габриел ќе побара вклучување на Германија во решавањето на спорот за името со Грција, Димитров рече дека е поважно е да се обезбеди почеток на пристапните преговори. Тој истакна дека Македонија ја научила својата лекција, но дека и ЕУ има лекција која треба да ја научи.

– Нашата реформска лекција, мислам дека ја научивме. Лекцијата за Европа треба да биде дека е рискантно и штетно една земја да се остава во чекалната зад затворени врати, и за ЕУ и за НАТО. Примарната одговорност за тие заклучени врати ја имаме ние и соседите со кои имаме отворени прашања, во случајот Грција, но и европската политика има минус и одговорност за таквата ситуација. Убеден сум и дека ова е шанса и за Грција – рече Димитров.


Османи почнува редовни консултации со амбасадорите од Западен Балкан


Скопје, 15 август, 2017 - 13:29 (META) 

Вицепремиерот за европски прашања Бујар Османи денеска ја одржа првата средба со амбасадори на земјите од Западен Бакан, која, како што рече е увод во постојани координативни средби. Во средбата во Секретаријатот за европски прашања (СЕП) учествувале претставници на Албанија, Босна и Херцеговина, Косово, Србија и на Црна Гора.

На средбата се разговарало за регионалната соработка на земјите од Западниот Балкан и се разменила искуства и мислења за начините на кои може да се зголемат капацитетите на земјите за поголема апсорпциона моќ за искористување на ИПА средствата, како и евентуалните последици врз ИПА фондовите со намалувањето на буџетот на Европската Унија по завршувањето на Брегзитот.

По средбата, вицепремиерот Омани нагласи дека Владата на Република Македонија во следниот период ќе се фокусира на прашањето на името со цел забрзување на евроинтеграциите. Тој најави дека во тие рамки тој денеска заминува во посета на Германија, а месецов ќе ја посети и Атина. Во рамките на новата владина офанзива за решвање на проблемот со името е и посетата на шефот на грчката дипломатија Никос Коѕиас на Скопје, нагласи Османи.


Албани: Се надеваме со посредство на ЕУ да се најде компромис за спорот за името


Брисел, 24 јули, 2017 - 13:18 (META) 

Македонија, со новата влада предводена од Зоран Заев, повторно ќе може да се фокусира на проектите од надворешната политика, како што е интеграцијата во ЕУ и во НАТО, оцени во интервју за „Јуропиен Вестен Балканс“, германскиот пратеник од редовите на владејачката Христијанско-демократска унија (ЦДУ), Штефан Албани, кој претседава и со германско-југоисточната европска парламентарна група.

– Македонија од 2005 година е кандидатка за членство во ЕУ. За жал, корупцијата, криминалот и слабиот правен систем се дел од секојдневните проблеми со кои се соочуваат. Спорот за името со Грција, исто така, е пречка на патот кон ЕУ. Се надеваме дека посредништвото од ЕУ ќе дозволи да се најде разумен компромис за ова прашање. Македонија сака да го реши спорот со членката на ЕУ, Бугарија, со потпишување договор за добрососедство на 2 август 2017 година. Ова е охрабрувачки чекор во вистинска насока – вели Албани.

На прашањето дали се можни промени во германската политика кон проширувањето на ЕУ по парламентарните избори во Германија, Албани рече дека владејачката коалиција ЦДУ/ЦСУ и понатаму ја поддржува перспективата за влез на земјите од Западен Балкан во ЕУ. Тој, сепак, истакна дека земјите мора да ги исполнат условите за да станат членки.

– Влезот во ЕУ е отворен за земјите што ги исполниле критериумите од Копенхаген. Последните внатрешно и надворешно-политики расправии претставуваат пречка на тој пат, без разлика на резултатите од изборите во Германија – вели Албани.