Ахмети: Надвор од НАТО, Македонија тешко ќе опстои


Тирана, 12 септември, 2018 - 10:18 (META) 

Референдумот на 30 септември е печат кој му дава вредност на мирот, стабилноста и ќе се затвори едно поглавје која трае веќе 25 години. Ова е референдум за НАТО, изјави претседателот на ДУИ, Али Ахмети во емисијата „Опинион“ на тиранската телевизија „Клан“.

Тој вели дека Албанците се во својата земја, во нивната држава и затоа ќе гласаат „за“ Договорот со Грција.

Лидерот на ДУИ исто така вели дека треба да се има разбирање за другиот во заедничката земја.

– Додека живееме во една држава, ние треба да внимаваме за историјата и идентитетот на другиот. Јас не сум за реваншизам. Ние треба да упатиме порака дека не сакаме да владееме, или да бидеме арбитри на други проблеми. Сега е време за зачленување во НАТО и почеток на преговорите во ЕУ – истакна Ахмети.

Идентитетот на нашите сограѓани Македонци и самата Македонија, додава Ахмети, тешко дека ќе опстојат надвор од НАТО и ЕУ.

– И Македонците се уморни од блокирањето на интеграцијата на земјата, така што атмосферата генерално е позитивна – истакна Ахмети.


МАНУ ќе прави напори да не се менува нејзиното име


Скопје, 11 септември, 2018 - 19:00 (META) 

Македонската академија на науките и уметностите (МАНУ) ќе се консултира со експерти за да се утврди дали постои можност за поголема флексибилност во однос на прашањето за преименување на оваа институција согласно одредбите од Договорот од Преспа, беше кажано вчера во научната расправа „Спогодбата од Преспа: Меѓународно значење и импликација врз евроатланските интеграции на Република Македонија“ што ја организираше МАНУ.

Претседателот на Академијата, Таки Фити, кој инаку го поддржува договорот за името, рече дека тој е најдобриот можен компромис што носи евроатлантска перспектива и економски развој и покрај тоа што во текот на преговорите МАНУ побара името со географска одредница да важи само за меѓународна употреба. Фити меѓутоа рече дека ќе се разгледаат сите опции за МАНУ да не го менува своето име.

Академик Владо Камбовски во разговор со новинарите по завршувањето на првиот дел од научната расправа „Спогодбата од Преспа: Меѓународно значење и импликација врз евроатланските интеграции на Република Македонија“ нагласи оти во Договорот јасно се дефинира каде се користи придавката.

– Таа се користи за јавните институции, чиј поим е доста широко определен, кои вршат јавни функции, но и јавните институции во сферата на културата,  образованието, науката. Ова останува евентуално предмет за натамошни разговори во духот на едно бона фиде толкување на таа одредба во однос на инстиуции кои се во независната сфера на општеството како МАНУ, поради нивното брендирање во светската, научната и културната јавност. Да можат да го задржат тоа име и придавката македонски – рече Камбовски, нагласувајќи оти за ова прашање ќе се разговара со други научни академии.

Премиерот Зоран Заев побара од МАНУ поддршка за договорот за името со Грција и за референдумот. Заев пред академиците рече дека овој договор го гарантира идентитетот и јазикот и со тоа земјата станува рамноправна со другите членки на НАТО и ЕУ

Американскиот амбасадор Џес Бејли рече дека на 30 септември, граѓаните имаат единствена можност да ја обезбедат иднината што ја сакаат.

-Знам дека повеќето граѓани и родители во Македонија ја гледаат ситуацијата и сакаат нивните деца да живеат во безбедна, просперитетна, инклузивна демократија. Тие сакаат да ја видат оваа земја како место на надеж. Мислам дека ова е единствен момент во историјата на Македонија да ја искористи оваа можност – порача амбасадорот Бејли.

За време на дебата, шефот на дипломатијата Никола Димитров и германскиот амбасадор Томас Герберих апелираа до опозицијата за конструктивност.


Хан: Да не се ризикува иднината на Македонија поради дневно-политички причини


Брисел, 30 јули, 2018 - 16:53 (META) 

Ги повикувам сите политички лидери да постапуваат конструктивно за да се постигне целта и да не се загрози напредокот поради дневно-политички причини, им порача еврокомесарот за проширување на Европската унија, Јоханес Хан на македонските политичари во интервју за „Еурактив“.

Тој вели дека дефинитивно Македонија постигнала најголема напредок во изминатава година, со тоа што ја надминала длабоката политичка криза со демократски средства.

– Земјата отствари значителен напредок со спроведувањето на Пржинскиот договор и реформските приоритети со нова, реформски ориентирана и проевропска влада. Посебно важни за одбележување се напорите на владата на Зоран Заев за добрососедски односи. По договорот за пријателство со Бугарија, конечно, по 27 години јалови обиди под посредништво на ОН, спорот за името меѓу Скопје и Атина е е решен. Овој историски договор е важен чекор кон остварување на евроатлантските перспективи на земјата – вели Хан, ословувајќи ја земјава „Поранешна југословенска република Македонија“.

Тој потсетува дека за успешен договор неопходен е и успешен референдум.

– Поради тоа, ги повикувам сите политички чинители конструктивно да работат за да ја постигнат оваа цел, а не да го загрозат напредокот поради дневно-политички интереси. Се работи за иднината на земјата, поради што референдумот за договорот со Грција и новото име треба да се спроведе што е можно поскоро. Ратификацијата и успешниот референдум се суштински чекори на патот кон членство во НАТО и ЕУ – потенцира еврокомесарот Хан.

На прашањето дали 2025 година, која во Стратегијата се наведува како година за можно проширување на ЕУ, е премногу далеку за земјите кои сакаат да бидат дел од Унијата, Хан потенцира дека тој индикативен датум не е предалеку, бидејќи за реформи и усвојување на стандардите на ЕУ е потребно време. Тој вели дека не станува збор само за промена на законите, туку и за нивна примена.


Коѕиас: Граѓаните на соседната земја имаат право да се нарекуваат Македонци


Атина, 23 јули, 2018 - 9:45 (META) 

Не можеме да го смениме универзалното право, соседите да се нарекуваат Македонци, на индивидуално и неофицијално ниво, но ние можеме да ги нарекуваме како сакаме, порача министерот за надворешни работи на Грција, Никос Коѕиас во интервју за грчката новинска агенција АНА-МПА и додава дека „вон институционалниот систем и вон јавниот простор, не можеш на луѓето да им наметнеш како ќе се самоопределуваат“.

– Еден жител на Скопје и вели на неговата девојка дека е Македонец. Што ќе правиме? Ќе создадеме метафизичка држава што ќе го става во затвор? Она што го кажавме е дека граѓаните на оваа земја имаат право да се самоопределуваат како сакаат. Тоа е универзално право што не можеме да го смениме. Но, во исто време, ние можеме да ги викаме како сакаме – вели Коѕиас, објаснувајќи дека кога говориме за индивидуално ниво, „само тоталитарна држава и држава со владетел, може да контролира како некој ќе се нарекува неофицијално“ и додава дека на официјално ниво за државните институции ќе се користи името Северна Македонија.

Во однос на Договорот од Преспа, шефот на грчката дипломатија, вели дека „условите беа зрели, а кога условите се зрели значи дека она што можеш да го направиш, треба да го направиш“.

Како што јави дописничката на МИА од Атина, Коѕиас, во интервјуто неколку пати споменува дека станува збор за компромис, за отстапки од двете страни, бидејќи „Грција не го освоила северниот сосед за да му ги наметне нејзините позиции“.

Прашан за трговските производи и од двете земји што ја носат придавката „македонско/и“, министерот за надворешни работи на Грција вели дека ќе биде потребен временски период за да се реши ова прашање.

– Постојат производи во Грција што со право се нарекуваат македонски производи и производи од ПЈРМ кои и таму се викаат македонски. Постојат 3.500 компании од двете страни, толку регистрираше Универзитетот во Солун, кои го имаат натписот „македонско“. Затоа рековме дека ќе формираме комисија под покровителство на Европската унија и ОН – објаснува шефот на грчката дипломатија за АНА-МПА.


Грабар-Китаровиќ: Договорот за името е многу добар


Брисел, 11 јули, 2018 - 15:03 (META) 

Хрватската претседателка Колинда Грабар Китаровиќ за хрватските медиуми пред Самитот на НАТО изјави дека Договорот на Македонија и Грција е исклучително добар, бидејќи се зачувуваат зборовите Македонци и македонски. Хрватската претседателка се надева дека Договорот ќе биде потврден од македонските граѓани на референдумот.

– За нас е посебно важно да се стабилизира југоистокот на Европа, драго ми е што ќе се упатат позитивни пораки за Македонија, која постигна договор со Грција. Верувам и се надевам дека ќе биде потврден на референдум, кој е историски. Ги разбирам чувствата на некои Македонци. Меѓутоа сметам дека овој Договор е исклучително добар, бидејќи освен што со името Северна Македонија, грчкиот дел станува Јужна, сепак се споменува „Македонци“ и сè друго. Мислам дека е тоа добар компромис и се надевам дека сите ние во НАТО ќе и помогнеме на Македонија да го заврши процесот, но пристапувањето може да се очекува дури за година, година и половина – рече Колинда Грабар – Китаровиќ.


Костадинов: Договорот е патриотски чин, Иванов е должен да потпише


Скопје, 5 јули, 2018 - 14:00 (META) 

Пратеникот од СДСМ и коалицијата, Костадин Костадинов, на прес-конференција во Собранието, откако пратениците вторпат го ратификуваа Договорот со Грција, порача дека станува збор за патриотски чин и договор што го обезбедува и зајакнува македонскиот идентитет, носи членство на Македонија во ЕУ и НАТО и ја обезбедува македонската иднина.

Тој рече дека претседателот Ѓорге Иванов е должен да го потпише, бидејќи и вторпат мнозинството пратеници гласаа „за“.

– Македонски народ, македонско оро, Македонец, Македонка…   се обезбедени еднаш засекогаш. Конечно ќе станеме дел од европските и светски демократии, кои гарантираат напредок, просперитет, стабилност и безбедност. Бидејќи Законот за ратификација на овој Договор Собранието денеска го изгласа по втор пат со големо мнозинство, Ѓорге Иванов е должен, повторувам, е должен да го потпише  – порача Костадинов.

Пратеникот нагласи дека ако постапи спротивно, претседателот на државата ќе направи кривично дело и ќе излезе надвор од неговите надлежности, а директно ќе се вмеша во законодавната власт, односно, Собранието.


Џафери: Западен Балкан повеќе не е „буре барут“


Скопје, 27 јуни, 2018 - 14:54 (META) 

Денес, благодарение на волјата и зрелоста на сите нас кои живееме во Регионот, меѓутоа и ангажираноста на нашите меѓународни пријатели, Западен Балкан не е веќе симболично кажано „буре барут“, порача претседателот на Собранието, Талат Џафери, на отворањето на семинарот „Рос-Рот“ во Собранието.

Потсетувајќи на потпишувањето на договорите со Грција и Бугарија, Џафери се потсети на 75-от семинар „Рос-Рот“ во Скопје, кога порачал дека евроатлантската интеграција е прашање што треба да го обедини регионот и да ги вклучи и другите држави во Европа, и тоа, како што рече, веќе се случува. Истовремено, тој рече оти може да се очекува во декември или на почетокот на јануари 2019 година, Македонија да влезе во НАТО.

– Да потсетам дека неодамна во Атлантскиот клуб, како полноправен член беше примена Црна Гора. Понатаму, Белград и Приштина, иако имаат многу отворени прашања, сепак и двете страни многу јасно истакнуваат дека само преку дијалог можат да се решат сите прашања. Јас сум убеден дека Договорот кој го потпишаа премиерите Заев и Ципрас, најдоцна до крајот на годинава ќе биде имплементиран од двете страни во целост, и ние веќе во декември оваа година или на почетокот на јануари, ќе станеме триесетта, полноправна членка на НАТО – рече Џафери.


„Путиновиот конгресмен“, Рорабакер, божемно го поддржува договорот за името и провоцира


Вашингтон, 27 јуни, 2018 - 11:37 (META) 

Дејна Рорабакер, републиканскиот конгресмен од Калифорнија, што го нарекуваа „омилениот конгресмен на Путин“ и многу пати се огласуваше во полза на идејата за Голема Албанија, а исто така и предизвика сериозна вознемиреност со неговата изјава дека Македонија „не е држава“ и треба да се подели, го поздрави Договорот меѓу Македонија и Грција.

Во обраќањето преку неговата официјална страница, по потпишувањето на Договорот во Нивици (Псарадес) на брегот на Преспанското Езеро во Грција, тој вели дека посебно го радува благонаклоноста со која „новоименуваниот народ го прифаќа својот идентитет“ како Северномакедонци.

„За мнозина од нас, оваа работа изгледа тривијално, во најдобра рака како мал проблем. Но за луѓето во регионот, тоа беше сериозно вознемирувачки проблем во меѓудржавните односи. Ги комплицираше трговијата и дипломатијата и требаше да се разреши мирно“, објаснува Рорабакер.

Тој во соопштението посебно се задржува на „благонаклоноста“ со која народот го прифаќа новиот идентитет како Северномакедонци“.

„Од срце го поздравувам овој договор и се надевам на брза ратификација од законодавните домови во двете земји. Ова е уште еден доказ дека растечките сентименти посветени на националните интереси по целиот свет може спокојно да се третираат и дека несогласувањата може да се разрешат во духот на мирот и соработката без интервенции на глобалистичките суперсили. Посебно ја поздравувам благонаклоноста со која новоименуваниот народ го прифаќа својот идентитет како Северномакедонци“, вели Рорабакер.

Во февруари минатата година овој конгресмен ја разлути тогашната влада и македонската јавност со изјавата дека Македонија не е држава.

– Со ова ќе ги разлутам сите, но што ми е гајле. Македонија не е држава. Жал ми е, ама не е држава – рече Рорабакер во интервју за албанската телевизија Визион Плус.

Претседателот на Подкомисијата за Европа, Евроазија и растечките закани на Долниот дом на Конгресот на САД потоа рече дека Косоварите и Албанците во Македонија „треба да бидат дел од Косово“, а остатокот од Македонија „треба да биде дел од Бугарија или која било друга држава со која се поврзани“.

Откако јавноста реагираше бурно, Рорабакер „дообјаснуваше“ што сакал да каже, обидувајќи се да се извлече од ситуацијата.  Тој во официјална изјава рече дека Македонија е легитимна држава со право на самоопределување и почитување на границите.

„Мојот коментар алудираше, можеби погрешно, на мојата загриженост кон предизвиците во внатрешното владеење со кои Македонија се соочува во врска со етничките малцинства. Јас во никој случај не сакав да кажам дека некој друг, освен Македонците треба да го утврди суверенитетот или границите на Македонија. Ако моите зборови беа сфатени на друг начин, јас длабоко се извинувам“, рече Рорабакер неколку дена подоцна.

Рорабакер, кој е избран во Оринџ Каунти, инаку важи за еден од најголемите руски пријатели во Конгресот. Тој влезе во центарот на вниманието во февруари годинава, кога Ричард Гејтс, поранешен соработник во кампатањата на Трамп се изјасни како виновен за лажењето за средбата во 2013 година помеѓу Рорабакер, поранешниот шеф на кампањата на Трамп, Пол Манафорт и еден лобист.

Дополнително, во 2016, водачот на парламентарната група на мнозинството во Претставничкиот дом, Кевин Мекарти, исто така републикански конгресмен од Калифорнија како и Рорабакер, им рекол на другите републикански претставници оти смета дека и Трамп и Рорабакер се платеници на Русите. Но Мекарти подоцна рече дека тоа е шега.


Влада: Македонија доби датум за преговори, препознаени се позитивните промени


Скопје, 27 јуни, 2018 - 9:10 (META) 

Уште еден голем ден за Република Македонија. Уште едно големо признание за нашата земја. Советот на министри за надворешни работи на земјите членки на Европската Унија, на седницата вчера донесе одлука преговорите за членство на Република Македонија да започнат во јуни 2019 година, соопшти Владата.

„Европската Унија и лидерите на сите земји членки ја препознаа Република Македонија како земја на позитивни промени, на динамичен процес на реформи, на инклузивност и на општествен дијалог. Држава која со силна, добронамерна политичка волја ги решава споровите со соседите и земја на граѓани кои покажаа дека имаат јасно изразена визија за европска иднина. Патот на реформи и градењето на нашата земја како држава по европски правила, е неповратен процес“, соопштија од Владата.


„Република Северна Македонија“ за Алијанса за Албанците е прифатливо име


Скопје, 25 јуни, 2018 - 11:14 (META) 

Новиот предлог за името на државата „Република Северна Македонија“  преставува позитивен момент во изнаоѓање на трајно решение за името во спорот меѓу двете соседни земји и го отвара патот за ЕУ и НАТО интеграциите, смета Алијанса за Албанците.

„Веруваме дека овој предлог е прифатлив за сите, и не го уценува мултиетничкиот карактер на државата, за разлика од претходниот предлог соопштен од Владата и промовиран од ДУИ кој што содржеше историски и религиозни елементи“, порачуваат од Алијанса за Албанците, посочувајќи дека партијата ќе ја поддржи ратификацијата на договорот во Собранието и поддржува одржување референдум.

Сепак, како што се вели во соопштението, станува збор за првичен став, а откако ќе го добијат предлог-договорот, ќе се изјаснат и за другите детали од договорот „предлог кој што треба да го реши и прашањето на националниот идентитет“.