Нимиц, Димитров и Коѕиас денеска се среќаваат во Виена


Скопје, 25 април, 2018 - 9:36 (META) 

Министрите за надворешни работи на Македонија и на Грција, Никола Димитров и Никос Коѕиас денеска во Виена ќе се сретнат со Метју Нимиц, посредникот во преговорите за името под покровителство на ОН.

Како што соопштија од седиштето на ОН во Њујорк, Нимиц ќе им „асистира на двете страни во изнаоѓање заедничко прифатливо решение за прашањето со името“.

Иако вчера еврокомесарот Јоханес Хан изрази оптимизам дека во следните две седмици може да се реши проблемот со името, премиерот Зоран Заев рече дека посакува, но не верува дека спорот со Грција ќе биде решен за две недели.

По изјавата на Хан реагираше и официјална Атина. Грчкото министерство за надворешни работи преку соопштение го повика еврокомесарот да престане да дава погрешна слика за преговорите, оти не ги разбира, а со такви изјави и ги поткопува.


Димитров, Коѕиас и Нимиц за пет дена на нова средба во Виена?


Атина, 20 април, 2018 - 9:48 (META) 

Медијаторот Метју Нимиц и министрите за надворешни работи на Македонија и Грција, Никола Димитров и Никос Коѕиас, наредната недела на 25 април ќе одржат нова средба во Виена, објавија грчките медиуми, пренесува МИА.

На оваа средба, според грчките медиуми, ќе се направат напори да се надминат разликите од средбата во Охрид. За десетина дена по оваа, најверојатно ќе следува уште една средба, како што најави Коѕиас од Охрид, на 4 и 5 мај во Солун.


Димитров и Коѕиас имале „разговор без надмудрување“ и дефинирале временска рамка


Охрид, 12 април, 2018 - 13:10 (META) 

Разговаравме за првпат за временската рамка и за чекорите кои ќе следат, доколку се постигне решение, односно како тоа ќе изгледа и ќе се имплементира. Ова беше разговор без надмудрување, со големо разбирање за потребите на другиот. Нашиот главен предизвик е како главните грижи на двете страни да ги составиме и да ја најдеме комбинацијата што ова ќе го обезбеди.

Тоа го порача македонскиот министер за надворешни работи Никола Димитров на прес-конференцијата со неговиот грчки колега Никос Коѕиас во владината вила во Охрид, истакнувајќи дека за дел од прашањата има напредок и работите се созреани, а за дел уште нема усогласеност. И грчкиот министер за надворешни работи рече дека е постигнат напредок.

На денешните средби на работните групи е веќе усогласен текстот за идната соработка, порача Димитров.

– Имавме отворени и искрени разговори, разговаравме за сите прашања коишто ја составуваат разликата од прашањето на името. За дел од тие прашања има напредок, бидејќи се созреани, а за дел сè уште постојат разлики. Додека ние разговаравме, средба имаа работните групи составени од високи дипломати, кои врз основа на напредокот што го направија во Виена пред десетина дена, практично го усогласија текстот за идната соработка во различни области. Тие исто така работеа и на текст за спречување на иредентизмот од двете страни и исто така работеа на преамбуларните параграфи од идниот договор за меѓусебна соработка – рече шефот на македонската дипломатија.

Според Никос Коѕиас, двете страни во преговорите се обидуваат да решаваат проблеми што се однесуваат на минатото и се предизвикани од други, но, како што рече, тоа е работата на дипломатијата.

– Го направивме тој чекор што можевме денеска, позитивен чекор, и секогаш се надеваме дека ќе успееме и најтешките проблеми да ги направиме полесни. Секако бевме соочени со големите и тешките проблеми, бидејќи секогаш кога се среќаваме дискутираме за тешки прашања но освен темите што ги решаваме, постои и меѓусебно разбирање. Сакам да изразам благодарноста и на дипломатите на двете земји. За предметот што го имаат забележуваме напредок, посебно оваа рамка на заедничка соработка, но и за тоа тешко прашање што се однесува на иредентизмот – рече шефот на грчката дипломатија.

Двајцата министри рекоа дека средбите продолжуваат и во наредниот период, на 3 и 4 мај во Солун, но и на 11 и 12 мај.

– Како што сфаќате, колку што се доближуваме и ги решаваме нашите проблеми, остануваат и помалку теми за решавање, но сепак се најтешките. Ќе ги информираме за овие разговори нашите премиери – рече Димитров.


Коѕиас по средбата со Дачиќ: Направен е чекор напред во преговорите на Грција и Македонија


Белград, 11 април, 2018 - 14:14 (META) 

Грчкиот министер за надворешни работи Никос Коѕиас по денешната средба со неговиот српски колега Ивица Дачиќ во Белград изјави дека во преговорите на Грција и Македонија за спорот за името е направен чекор напред, како и дека клучот за решавање на проблемот се „реализмот, прагматизмот и сфаќањето дека треба да се направат компромиси“, пренесуваат српските медиуми.

– Треба да направиме компромиси, но не „гнили“ компромиси, туку такви од коишто ќе добијат двете страни. Компромис значи дека обете страни треба да сфатат дека не може да добијат сè, но дека треба да имаат придобивка – рече шефот на грчката дипломатија.

Коѕиас додава оти се надева дека двете страни во преговорите ќе го сфатат тоа и оти ќе има позитивни резултати.

Српскиот министер за надворешни работи, пак, рече дека најделотворно и најкорисно би било тие разговори да се водат директно и да се мисли на заедничкиот интерес во целиот регион. Дачиќ истакна дека Србија има разбирање за ставот на Грција и го повтори својот повеќепати изнсен став дека било грешка тоа што поранешна Сојузна Република Југославија ја признала Македонија под нејзиното уставно име, нагласувајќи дека тоа било „непромислен и погрешен чекор“.

– Однесувањето на Скопје кон Србија и српскиот национален и државен интерес не беше адекватно. Тие признаа еднострани акти – рече тој, мислејќи на признавањето на Косово од страна на Република Македонија.

Според Дачиќ, Србија сака прашањето за името да се реши, но дека не може многу да помогне, освен да понуди двете страни понекогаш да се состануваат во Србија.


Жбогар: Се интензивираат разговорите за спорот за името


Прилеп, 28 март, 2018 - 14:43 (META) 

Постои посветеност и дискусиите се интензивираат, што е добро. Со нетрпение ги очекуваме состаноците оваа недела, изјави амбасадорот на Европската Унија Самуел Жбогар при денешниот престој во Прилеп, одговарајќи на прашањето како ги оценува последните разговори и средби меѓу Македонија и Грција за решавање на прашањето за името.

– Добро е што дискусиите продолжуваат и дека се интензивираат. Гледаме дека од двете страни постои посветеност за изнаоѓање решение кое ќе биде прифатливо за двете страни. Ние со нетрпение ги очекуваме состаноците кои ќе бидат оваа недела. Како Европска Унија одблиску го следиме ова прашање и, се разбира, процесот го поддржуваме од страна – изјави Жбогар.

Што се однесува до најновата ситуација околу настаните во Собранието од 27 април, Жбогар рече дека не ги коментира судските процедури и остава судовите да си ја завршат работата. Тој рече дека нема ништо повеќе да додаде од она што порано го кажал околу прашањето за Законот за употребата на јазиците.


Димитров – Коѕиас: Чесно решение е она кое ќе ги земе предвид позициите на двете страни


Скопје, 23 март, 2018 - 12:19 (META) 

По билатералната средба на двете делегации – македонската и грчката – шефовите на дипломатиите изразија добра волја за постигнување на решение, но и поприлична резервираност во однос на брзо решение на проблемот со името. Сепак, двајцата министри за надворешни работи упатија заедничка порака – дека мора да се работи на надминување на проблемите и на градење заедничка иднина. И од двете страни беше упатена и пораката дека решението е само во вистински компромис, во кој и едната и другата страна ќе го добијат најважното од своите барања.

-Имавме добри разговори за разликите околу името. Кога зборуваме за иднината, тешко е да се најде разлика. Но, за да се стигне таму ни треба да ја надминеме разликата околу името. Задачата не е лесна. Тоа е многу деликатен баланс. Јас пола ден мислам што е важно за јавноста во Грција, а втората половина што е важно за јавноста во Македонија. Бараме начин кој нема да го понижи никого, а ќе ја отвори вратата за решение – рече македонскиот министер за надворешни работи, Никола Димитров.

Шефот на грчката дипломатија Никос Коѕиас рече дека е во Скопје за да ја отвори втората фаза за согласноста и за поддршка за влезот на Македонија во ЕУ.

– Верувам длабоко дека можеме и ако направиме чекори може да ги решиме разликите, а должни сме да ги решиме, дека тоа ќе даде можност за напредок на двете држави и развој на целиот регион – рече Коѕиас, кој забележа и дека најлесно во политиката е да не правиш ништо.

Тој верува во чесен договор од кој двете страни ќе имаат придобивки и нема да има некој да добие и некој што ќе загуби, туку дека ќе се постигне компромис.

На прашањето колку се „поклопуваат“ трите документи кои се на масата (грчкиот, македонскиот и оној на Нимиц), Коѕиас рече дека „текстовите се за да се разјаснат позициите, а на крајот ќе се направи еден заеднички текст кој Нимиц ќе го достави до ООН“.

Според Димитров одржливо решение е тоа што ќе биде прифатено од двете страни и од јавноста и од граѓаните.

– Искрено мислам дека ова е натпревар меѓу иднината и минатото. На Балканот имаме многу минато – рече тој, потенцирајќи дека „историјата е многу важна, но не можеме да ја смениме“.

Шефот на македонската дипломатија има големи резерви за предлогот „Горна Македонија“, како еден збор и напишано на кирилица.

– Можам да најдам многу аргументи да објаснам зошто тоа не е добар правец. Тешко ми е на својот народ да му кажам за сложено име со некаква одредница и ако има еден збор. Ако се изговори брзо, терминот Македонија може да се подизгуби  – рече Димитров.

Коѕиас на прашањето „што е чесно решение“, рече дека „тоа е решение што ги зема предвид главните точки на секоја страна“.

Следуваат средби на Коѕиас со премиерот Зоран Заев, претседателот на Собранието Талат Џафери, но и со лидерите на ДУИ и на ВМРО-ДПМНЕ, Али Ахмети и Христијан Мицкоски.


МАНУ: Апсурдни, неодржливи, невозможни и неостварливи се предлозите за името


Скопје, 20 март, 2018 - 17:21 (META) 

Претседателот на Македонската академија на науките и уметностите (МАНУ), Таки Фити во своето експозе на годишното собрание на академијата апелираше за изнаоѓање заемно прифатливо решение за прашањето за името и ги охрабри властите на Македонија и на Грција да ја преземат одговорноста и храбро да се соочат со реалностите на времето.

Tој порача и дека решение за име за сеопшта употреба е неостварливо и дека не смее да се преговара за идентитетот.

Дефинирајќи ги ставовите на МАНУ во своето обраќање, Фити рече и дека спорот е всушност билатерален, а не интернационален и дека се преговара само за името, а не за идентитетските прашања, кои влегуваат во сферата на елементарни човекови права, за кои не се преговара. Тој се изјасни и против име на македонски јазик кое нема да биде преведено.

– Предлозите името Република Македонија, или евентуално име со географска одредница да се изговара како во македонскиот јазик и да се пишува само со латинско писмо, односно името на јазикот, македонски, исто така да се пишува со латинско писмо и да се изговара како што тоа се прави во нашата земја, се апсурдни и неодржливи. Прифаќањето на ерга омнес решение, едно име за севкупна, значи едно име и за меѓународна и за внатрешна употреба  би значло промена на уставот на Републима Македонија, промена на имињата на нашите институции, ревизија на сите меѓународни договори, билатерални и мултилатерални во кои се користи уставното име на земјата, и тн. Според тоа ваквото решение е фактички невозможно и неостварливо – рече Фити.


Димитров: Нашата платформа се разликува од грчката, нема поместување од минатата средба


Скопје, 20 март, 2018 - 16:43 (META) 

Одговарајќи на новинарски прашања, министерот Никола Димитров не сакаше да коментира за точките на грчката нацрт-платформа за решавање на спорот, а за македонската платформа рече дека се разликува од грчката.

– Грчката нацрт сподогоба е предмет на анализа во овој период, не знам колку ќе биде корисно да коментирам за содржината. Имаме и наша нацрт-спогодба за која не зборувавме оти, учејќи од самиот процес, научивме дека е подобро да сработиме, по потоа да обелодениме. Убедени сме дека елементите од нашата нацрт-спогодба ќе бидат корисни и во рамките на главниот процес, тој што се води со посредништво на медијаторот Метју Нимиц – рече Димитров.

Тој објасни дека најсуштинската работа што се случила од неговото вклучување во преговорите како министер за надворешни работи е средбата што тој и неговиот грчки колега Коѕиас ја имале со посредникот Нимиц во Виена, иако на неа не е постигнат значителен напредок.

– Се обидуваме за неколку месеци да направиме огромни скокови. Еден од главните предизвици е да се изгради доверба, да се убедат двете јавности, а притиснати сме и од европската агенда – рече Димитров.

Во однос на роковите, тој рече дека ни следните преговори со Нимиц во Виена на 30 март не се зацртани како момент на постигнување спогодба.

– Ние в петок ќе го отвориме тој процес, ќе го продолжиме со медијаторот Нимиц. Ова не е строго пропишан процес – рече шефот на македонската дипломатија.


Коѕиас в четврток слетува на „Скопје“


Скопје, 20 март, 2018 - 13:20 (META) 

Грчкиот министер за надворешни работи Никос Коѕиас в четврток ќе пристигне во официјална дводневна посета на Македонија, извести македонското Министерство за надворешни работи.

Посетата на Коѕиас в четврток ќе почне со неговото слетување на меѓународниот аеродром „Скопје“, само повеќе од месец откако со одлука на македонската влада името на овој аеродром беше сменето од „Александар Велики“ во „Скопје“.

На 30 март, петок, тој  со својот македонски колега Никола Димитров ќе бидат во Виена, каде ќе се сретнат со личниот пратеник на Генералниот секретар на ОН и посредник во преговорите за името, Метју Нимиц.


Заев: Недозволиви се закани, омаловажувања и сеење страв пред домовите на пратениците


Скопје, 19 март, 2018 - 11:53 (META) 

Премиерот Зоран Заев смета дека со протестите што се организираат пред домовите на пратениците се вршат неколку кривични дела и тој лично ќе ги заштити нивните деца, врз кои демонстрантите сеат страв и терор. Заев ова го изјави пред Основниот суд Скопје 1, по одржувањето на денешното рочиште за случајот „Поткуп“.

– Протестите се уставно право, дозволиво е протестирање на граѓаните и тоа е нешто што треба да се ползува. Сепак, она што се прави пред домовите и пред дечињата на пратениците, пред членовите на нивните семејства и родители е апсолутно недозволиво, зашто е кршење на приватноста на домот, се упатуваат директни закани, омаловажување и целосно сеење страв и трепет кај дечињата. Јас лично ќе ги заштитам дечињата на пратениците – рече Заев и посочи дека Министерството за внатрешни работи презема дејствија.

Во врска со преговорите за името, Заев е оптимист и верува во решение до летото.

– Верувам дека е можно да се најде решение и оптимист сум ако притоа водиме сметка за достоинството и за идентитетот. Мене ми е важно како тоа ќе го прими грчката јавност и дали ќе биде прифатливо  низ нивните институции. Верувам дека и на грчките политичари и на премиерот Ципрас треба да им биде важно како тоа ќе биде прифатено овде од граѓаните на Македонија, но и како ќе помине низ институциите на системот – изјави Заев, одговарајќи на новинарско прашање.

Тој вели дека ги информира претседателот на државата и опозицијата за текот на преговорите кога смета дека има потреба за тоа.