Коѕиас: Груевски глумел дека не сака решение за името


Атина, 4 септември, 2018 - 10:11 (META) 

Министерот за надворешни работи на Грција, Никос Коѕиас изјави дека „поранешниот македонски премиер, Никола Груевски глумел дека не сака решение на спорот за името“.

Оваа реакција на Коѕиас следува по информациите што ги објави „Викиликс“ дека македонските власти уште во 2008 година прифатиле промена на името.

– Познато е дека Груевски не сакаше никакво решение на спорот за името. Се исмеваше со меѓународните играчи, се претвораше дека е принуден на компромис. Никој не му веруваше, освен, ако се потсетиме, господинот Мицотакис – изјави Коѕиас.

Инаку, „Катимерини“ објави доверлив документ на американската амбасада во Скопје под наслов „Што треба Македонците да направат за да го решат спорот за името“, кој го напишала тогашната американска амабасадорка во Македонија, Џилијан Миловановиќ.

Во него се пишува дека дека уште во 2008 година официјално Скопје дало согласност за промена на уставното име во „Република Северна Македонија“ ,,под услов тоа да вклучува признавање на македонскиот јазик и националноста“.

Во првиот дел од документот се споменува дека Миловановиќ своите заклучоци ги претставила по разговорите со тогашниот претседател и премиер на Република Македонија, Бранко Црвенковски и Никола Груевски, и наведува дека условите биле прифатливи за земјата.

„Амбасадата на САД во Скопје оценува дека македонската Влада е подготвена заради отворањето на патот во НАТО и членството во ЕУ да се согласи со името Република Северна Македонија во сите меѓународни организации“, се наведува во документот на американската амбасада во Македонија, до кој дошол Викиликс.


Бан Ки-мун: Се надевам дека набргу конечно ќе се затвори спорот меѓу двете земји


Сеул, 27 јуни, 2018 - 13:34 (META) 

Охрабрувачки е фактот што се постигна решение, но загрижувачки е фактот што постои незадоволство кај граѓаните, вели поранешниот генерален секретар на ОН, Бан Ки-мун, во изјава за грчката новинска агенција АНА-МПА.

Тој изразува надеж дека што е можно поскоро ќе има дефинитивно затворање на долгогодишниот спор меѓу двете земји.

– Сметам дека е многу охрабрувачки фактот што и двете страни се согласија да го решат долгогодишното прашање за името. Во исто време, исто така, сум загрижен за фактот што постои некакво незадоволство кај граѓаните. Искрено се надевам дека прашањето за името можно е поскоро, дефинитивно ќе се реши – вели поранешниот секретар на ОН.

Бан Ки-мун додава дека прашањето за името било пречка за продлабочување на соработката на двете земји, но и ги „спречувало да ги прошират односите на соработка, не само со Европејците, туку и со другите земји, а се разбира и со Обединетите нации”.

– Навистина се надевам дека ќе го направат последниот чекор – додава Бан Ки-Мун во изјавата за АНА-МПА.


Владата го осуди насилството, повика на разум и конструктивна атмосфера за дебата


Скопје, 18 јуни, 2018 - 16:10 (META) 

Владата најостро го осудува насилството, говорот на омраза и повиците за насилство од вчерашните настани, кои имаат за цел да манипулираат и да ги вознемируваат граѓаните, соопштуваат од таму.

„Повикуваме на разум и на конструктивна атмосфера за дебата и јавно информирање, сè со цел секој граѓанин на Македонија да има можност да донесе сопствен став пред одржување на референдумот кој што следува и слободно да одлучат за македонската просперитетна иднина. Без страв, заплашување и притисок. Ги повикуваме граѓаните да внимаваат и со воздржан однос да ги препознаваат лажните вести и дезинформациите кои се шират преку социјалните мрежи“, се вели во соопштението на Влада.

Во него се додава дека „сега е моментот сите политички субјекти кои постојано велат дека Македонија нема друга алтернатива за членството во НАТО и во ЕУ, да покажат елементарна политичка одговорност.“

„Секој кој ги повикува граѓаните на насилство има одговорност. Повикот на насилство нема само етичка и морална одговорност, туку и кривична, во согласност со кривичниот законик. Предизвикувањето немири и несигурност е единствената цел на структурите што стојат зад овие немири, а тоа е во целосна спротивност на интересите на нашите граѓани. Омразата и насилството се штетен концепт и не се избор на граѓаните. Граѓаните на нашата земја избраа иднина за сопствената безбедност, за економски развиена земја, eднаквa со другите во регионот и рамноправна членка во НАТО и ЕУ. Случувањата како оној на 27 април минатата година беа одлучно отфрлени од мнозинството граѓани“, се додава во соопштението.


Коѕиас: Го решивме спорот со името со Северна Македонија


Москва, 13 јуни, 2018 - 16:39 (META) 

Надворешната политика на нашата влада е активна, демократска и повеќедимензионална. Во овие рамки, го решивме прашањето што официјално постои веќе 25 години, а вистински, најмалку 70 години, да се запре спорот за името со Северна Македонија.

Ова денеска го изјави шефот на грчката дипломатија, Никос Коѕиас, на прес-конференцијата за медиумите во Москва, по средбата со министерот за надворешни работи на Русија, Сергеј Лавров.

„Постоеја и прашања со иредентизмот, кои со овој договор ги завршивме“, додаде Коѕиас.

Министерот за надворешни работи на Грција, одговарајќи на новинарско прашање за името го употреби новото договорено име Северна Македонија.


Иванов: Несериозно е прашањето за името да се решава преку телефон


Скопје, 12 јуни, 2018 - 10:23 (META) 

Кабинетот на претседателот, Ѓорге Иванов, оценува дека вчерашната изјава на премиерот Зоран Заев, дадена во емисијата „Топ тема“, дека евентуалното отфрлање на договорот со Грција ќе ги загрози перспективите на Македонија за влез во ЕУ и НАТО и ќе ги зголеми внатрешните опасности, претставува „очаен обид за манипулација на јавноста и наведување на македонските граѓани во пресрет на евентуално референдумско изјаснување“.

„Стратешките определби на Македонија за членство во Европската унија и во НАТО се јасно дефинирани и непроменети. Зачувувањето на уставното име и изнаоѓањето на решение кое нема да предизвика уставни промени, во никој случај не е насочено против интеграцијата на Македонија во Европската унија и НАТО. Склучувањето на меѓународен договор содржан во еден или повеќе поврзани меѓусебни документи треба да биде во согласност со Уставот на Република Македонија, а не да предвидува негова измена“, се вели во соопштението од кабинетот.

Во врска со повикот на премиерот Заев за поддршка на евентуалниот договор од страна на сите политички чинители, претседателот Иванов уште еднаш укажува дека е потребен широк национален консензус за изнаоѓање решение кое нема да го наруши достоинството на македонскиот народ и граѓаните.

„Претседателот Иванов смета дека е несериозно и неодговорно прашањето за името, кое е исклучително важно прашање за граѓаните на Македонија, и наметнати технички барања, да се решаваат телефонски и по пат на личен договор меѓу премиерите на двете држави“, се додава во соопштението.


Османи – Могерини: Наредните часови можат да бидат клучни за исходот од преговорите


Брисел, 7 јуни, 2018 - 13:05 (META) 

Вицепремиерот задолжен за европски прашања, Бујар Османи заедно со министерот за економија Крешник Бектеши, во рамките на дводневната посета работна посета на Брисел, остварија средба со високата претставничка на Европската Унија за надворешни работи и безбедносна политика и потпретседателката на Европската комисија, Федерика Могерини.

На средбата, Османи ја информирал Могерини за новиот реформски план „18“, со кој Македонија останува посветена на реформскиот процес и по добивањето на препораката и позитивниот извештај на Европската комисија.

„Планот „3-6-9“ создаде солидна основа и подготовка за имплементација на суштинските и долгорочните реформи во насока на приближување на нашето општество со европското, при што, „планот 18“ претставува логично продолжение на реформската агенда на Владата за системска координација и следење на имплементацијата на овие реформи, се до почетокот на преговорите“, истакна Османи.

На средбата, Османи информирал и за остварениот напредокот во односите меѓу Македонија и Грција.

„Имаме сериозен напредок и како никогаш порано двете земји не биле поблиску до решение. Наредните часови можат да бидат клучни за исходот од преговорите и се надевам дека евентуално позитивниот исход ќе создаде атмосфера за продлабочување на односите меѓу Македонија и Грција, како и услови за забрзано продлабочување на евроатланската перспектива на Македонија“, додаде Османи.


Ѕанакопулос: Нема да има договор без ерга омнес и уставна ревизија


Атина, 1 јуни, 2018 - 11:44 (META) 

Нема да постои договор доколку не се прифати ерга омнес и уставна ревизија, вели портпаролот на грчката Влада и министер без ресор, Димитрис Ѕанакопулос, во интервју за грчката телевизија „Епсилон“, а пренесува МИА.

Во интервјуто Ѕанакопулос објаснува дека во овој момент не постои договор и затоа избегна да навлегува во детали што се однесуваат на евентуалното решение.

– Додека не се договори се, не е договорено ништо. Така е во преговорите. Но, она што со целосна сигурност можам да го кажам е дека ерга омнес и уставна ревизија се важни, односно главни предуслови за да може да постои било каков договор со поранешната југословенска Република Македонија – рече Ѕанакопулос.

Според него, треба да се донесат конечните политички одлуки, бидејќи не станува збор за едноставен договор, туку договор со многу технички и правни, но и политички прашања, „кои секоја страна треба да ги има добро и внимателно проучено“.

Сепак во однос на јазикот, го спомена она што и шефот на грчката дипломатија го има потенцирано дека „македонскиот јазик е признаен од 1977 во Обединети нации за време на владата на Константинос Караманлис“.

Прашан за ставот на македонскиот претседател, портпаролот на грчката Влада вели дека реакцијата на Иванов, треба да се види од друг аспект.

– Се прашувам како е можно претседателот Иванов да има толку силна реакција за еден договор што во Грција некои го сметаат за договор што им штети на националните интереси. Сакам да кажам дека ако го видите ова на друг начин реакцијата на претседателот Иванов значи дека грчката Влада преговараше добро, грчката Влада се обиде да земе договор што му служи на националниот интерес – рече Ѕанакопулос.

Во однос на т.н Панмакедонски организации, односно здруженијата од грчката дијаспора кои ги организраа протестите во Солун и Атина, портпаролот на грчката влада вели дека тие функционираат на радикален начин и според него не го изразуваат ставот на мнозинството на грчкиот народ.


Заев: Една од опциите е прифатливa за двете страни


Софија, 17 мај, 2018 - 14:04 (META) 

Заедно со грчкиот премиер Алексис Ципрас разгледавме можни опции за креативни решенија кои македонската страна ги презентираше од последната фаза од преговорите. Следуваат консултации во двете земји со релевантните политички фактори.

Ова денеска го изјави премиерот Зоран Заев по средбата со Ципрас во Софија која траеше околу час и половина

. На новинарско прашање во однос на предложените креативните решенија, Заев дополни дека „една од опциите е прифатливa за двете страни“.

– Важно беше да ги потврдиме сите успеси кои министрите ги постигнаа, а се големи и значајни. Кога ќе го поминеме до крај целиот процес ќе видиме сите колку се значајни. Ние разговаравме и суштествено разгледувавме неколку опции. Една од опциите е прифатливa за двете страни. Продолжуваме дома со констултаци со институциите, и ако е возможно тоа, веројатно ќе имаме решение. После сето тоа што беше постигнато, потврдивме дека стоиме како премиери.  За тоа што беше останато разгледавме неколку опции и утврдивме една опција. Но мора да внимаваме како тоа ќе биде спроведено. Ќе разговараме со претседателите на државите и другите лидери, и со опозицијата – изјави Заев.

Заев рече дека денес пријателството помеѓу Македонија ни Грција е посилно.

– На денешниот состанок со премиерот на Грција, пријателот на Македонија, Алексис Ципрас, заеднички го констатиравме досегашниот напредок кој е постигнат во процесот на изнаоѓање на решение за спшорот околу името на нашата држава. Решаваме спор за да го засилиме достоинството и идентитето на граѓаните во двете земји. На овие теми разговарав и со претседателот на Франција, Емануел Макрон и со канцеларката Ангела Меркел – додаде тој.

Тој рече дека после сето она што било постигнато помеѓу двете држави, го констатирале и потврдиле и како премиери.

– Тоа што беше останато, го отворивме како прашање преку неколку опции и утвдивме една опција која може да биде прифатлива за двете страни. Мора да внимаваме како тоа институционално ќе биде спроведено. Мора да разговараме со претседателите на двете држави со другите лидери, со шефовите на опозициите. Остануваме во делот на идните детали околу оваа работа – дополни Заев.

На новинарско прашање за можно одложување на решението, тој рече дека ако нема решение ќе биде одложено.

– Јас реков дека ние изградивме пријателство кое е неповратно и тоа пријателство ќе расте. Би било убаво тоа решение, кое би сакале од двете страни да биде прифатливо, да биде уште сега. Затоа што знаете дека крајот на јуни имаме Европски совет и решението би било дополнително охрабрување за советот. Во јули има НАТО самит,  и убаво е тоа и таму да се констатира.  Ако не е возможно, ќе продолжиме во барањето на решение се додека не се договориме. Вредно е да продолжиме затоа што многу е решено и на крајот имаме и опција која би можела да биде прифатена од двете страни, имајќи ги предвид аспирациите на двете страни. Ако тоа во земјите внатрешно биде соодветно потврдено и прифатено, би било и официјализирано – додаде Заев.


Пејчиновиќ Буриќ: Поважен е патот кон ЕУ и реформите, отколку целта


Скопје, 13 март, 2018 - 11:38 (META) 

Шесте земји од Западен Балкан различно чекорат по патот кон ЕУ, при што, поважен е патот и квалитетното спроведување на реформите отколку целта, рече денеска шефицата на хрватската дипломатија, Марија Пејчиновиќ Буриќ, која е во посета на Македонија.

На прес-конференцијата со министерот за надворешни работи, Никола Димитров таа додаде дека реформите се клучни за напредокот на секоја земја на патот кон Европската унија и НАТО и дека  Македонија е добар пример за тоа.

Процесот, според Пејчиновиќ Буриќ, ќе се забрза по решавањето на спорот со Грција околу името.

– Македонија има пријател во Хрватска и откако ќе се реши прашањето за името ќе ја добие нејзината поддршка за што е можно побрзо вклучување во НАТО и почнување на преговорите за влез во ЕУ – рече Пејчиновиќ Буриќ.

Димитров додаде оти искуствата на Хрватска се мошне важни за земјава.


Кумуцакос: Изјавите на Димитров го покажуваат патот кон утрешниот протест


Атина, 3 февруари, 2018 - 14:36 (META) 

Пратеникот на грчката опозициска партија Нова демократија, Јоргос Кумуцакос изјави дека се неприфатливи изјавите на министерот за надворешни работи, Никола Димитров дека Скопје отфрла било какви преговори за наводна „македонска етничка припадност“, јавува дописникот на Македонската информативна агенција (МИА).

Според Кумуцакос, „таквите изјави го покажуваат патот, односно утре на плоштадот Синтагма изразувањето на националната чувствителност станува сила на преговорите“.

За утре, во Атина се најавува голем протест под мотото „Македонија е грчка“ против употребата за терминот „Македонија“ во решението за спорот за името. Според „Катимерини“, протестот наместо во центарот на Атина ќе се одржи во Пиреја, за да не создаде сообраќаен хаос во градот.