Заев: Една од опциите е прифатливa за двете страни


Софија, 17 мај, 2018 - 14:04 (META) 

Заедно со грчкиот премиер Алексис Ципрас разгледавме можни опции за креативни решенија кои македонската страна ги презентираше од последната фаза од преговорите. Следуваат консултации во двете земји со релевантните политички фактори.

Ова денеска го изјави премиерот Зоран Заев по средбата со Ципрас во Софија која траеше околу час и половина

. На новинарско прашање во однос на предложените креативните решенија, Заев дополни дека „една од опциите е прифатливa за двете страни“.

– Важно беше да ги потврдиме сите успеси кои министрите ги постигнаа, а се големи и значајни. Кога ќе го поминеме до крај целиот процес ќе видиме сите колку се значајни. Ние разговаравме и суштествено разгледувавме неколку опции. Една од опциите е прифатливa за двете страни. Продолжуваме дома со констултаци со институциите, и ако е возможно тоа, веројатно ќе имаме решение. После сето тоа што беше постигнато, потврдивме дека стоиме како премиери.  За тоа што беше останато разгледавме неколку опции и утврдивме една опција. Но мора да внимаваме како тоа ќе биде спроведено. Ќе разговараме со претседателите на државите и другите лидери, и со опозицијата – изјави Заев.

Заев рече дека денес пријателството помеѓу Македонија ни Грција е посилно.

– На денешниот состанок со премиерот на Грција, пријателот на Македонија, Алексис Ципрас, заеднички го констатиравме досегашниот напредок кој е постигнат во процесот на изнаоѓање на решение за спшорот околу името на нашата држава. Решаваме спор за да го засилиме достоинството и идентитето на граѓаните во двете земји. На овие теми разговарав и со претседателот на Франција, Емануел Макрон и со канцеларката Ангела Меркел – додаде тој.

Тој рече дека после сето она што било постигнато помеѓу двете држави, го констатирале и потврдиле и како премиери.

– Тоа што беше останато, го отворивме како прашање преку неколку опции и утвдивме една опција која може да биде прифатлива за двете страни. Мора да внимаваме како тоа институционално ќе биде спроведено. Мора да разговараме со претседателите на двете држави со другите лидери, со шефовите на опозициите. Остануваме во делот на идните детали околу оваа работа – дополни Заев.

На новинарско прашање за можно одложување на решението, тој рече дека ако нема решение ќе биде одложено.

– Јас реков дека ние изградивме пријателство кое е неповратно и тоа пријателство ќе расте. Би било убаво тоа решение, кое би сакале од двете страни да биде прифатливо, да биде уште сега. Затоа што знаете дека крајот на јуни имаме Европски совет и решението би било дополнително охрабрување за советот. Во јули има НАТО самит,  и убаво е тоа и таму да се констатира.  Ако не е возможно, ќе продолжиме во барањето на решение се додека не се договориме. Вредно е да продолжиме затоа што многу е решено и на крајот имаме и опција која би можела да биде прифатена од двете страни, имајќи ги предвид аспирациите на двете страни. Ако тоа во земјите внатрешно биде соодветно потврдено и прифатено, би било и официјализирано – додаде Заев.


Пејчиновиќ Буриќ: Поважен е патот кон ЕУ и реформите, отколку целта


Скопје, 13 март, 2018 - 11:38 (META) 

Шесте земји од Западен Балкан различно чекорат по патот кон ЕУ, при што, поважен е патот и квалитетното спроведување на реформите отколку целта, рече денеска шефицата на хрватската дипломатија, Марија Пејчиновиќ Буриќ, која е во посета на Македонија.

На прес-конференцијата со министерот за надворешни работи, Никола Димитров таа додаде дека реформите се клучни за напредокот на секоја земја на патот кон Европската унија и НАТО и дека  Македонија е добар пример за тоа.

Процесот, според Пејчиновиќ Буриќ, ќе се забрза по решавањето на спорот со Грција околу името.

– Македонија има пријател во Хрватска и откако ќе се реши прашањето за името ќе ја добие нејзината поддршка за што е можно побрзо вклучување во НАТО и почнување на преговорите за влез во ЕУ – рече Пејчиновиќ Буриќ.

Димитров додаде оти искуствата на Хрватска се мошне важни за земјава.


Кумуцакос: Изјавите на Димитров го покажуваат патот кон утрешниот протест


Атина, 3 февруари, 2018 - 14:36 (META) 

Пратеникот на грчката опозициска партија Нова демократија, Јоргос Кумуцакос изјави дека се неприфатливи изјавите на министерот за надворешни работи, Никола Димитров дека Скопје отфрла било какви преговори за наводна „македонска етничка припадност“, јавува дописникот на Македонската информативна агенција (МИА).

Според Кумуцакос, „таквите изјави го покажуваат патот, односно утре на плоштадот Синтагма изразувањето на националната чувствителност станува сила на преговорите“.

За утре, во Атина се најавува голем протест под мотото „Македонија е грчка“ против употребата за терминот „Македонија“ во решението за спорот за името. Според „Катимерини“, протестот наместо во центарот на Атина ќе се одржи во Пиреја, за да не создаде сообраќаен хаос во градот.


Нимиц денеска на средби во Атина, ОН сметаат на можно решение на проблемот со името


Атина, 30 јануари, 2018 - 9:53 (META) 

Обединетите нации (ОН) сметаат дека може да биде постигнат напредок во решавањето на 25-годишниот спор помеѓу Грција и Македонија за името, ако има компромис кај раководствaта и народите на двете земји, изјави заменик-портпаролот на ОН, Фархан Хак.

Хак додал дека ОН целосно ја дели оценката на медијаторот дека е создаден позитивен импулс во релациите меѓу двете земји и оти е можно решение на проблемот со името.

Инаку, специјалниот претставник на ОН во разговорите помеѓу Македонија и Грција, Метју Нимиц денеска во Атина ќе има средби со шефот на грчката дипломатија Никос Коѕиас и со одговорниот за надворешна политика во опозициската Нова демократија, Јоргос Кумуцакос.

По посетата на Атина, Нимиц утре и задутре доаѓа во Македонија на средби со државниот врв.


Наскоро лидерска средба кај Иванов за името


Скопје, 24 јануари, 2018 - 12:28 (META) 

Лидерите на политичките партии наскоро ќе се сретнат со претседателот Ѓорге Иванов за да разговараат за рамката за решението на спорот со името, кој нашата држава го има со Грција, информираше денеска портпаролот на Влада, Миле Бошњаковски.

– Владата го започна процесот на анализа и на координација околу најновата рамка на медијаторот Метју Нимиц. Очекуваме да изградиме широк национален консензус. Кабинетот на министерот за надворешни работи е во координација со кабинетот на претседателот Иванов за организација на средба на која што ќе бидат повеќе политички субјекти, на која ќе се разговара за рамката – рече Бошњаковски.

Средбата помеѓу премиерите Зоран Заев и Алексис Ципрас е предвидена за попладне во Давос. Бошњаковски го повтори ставот на владата дека „атмосферата е позитивна“ и дека „постои оптимизам во двете држави дека ќе се најде решение за спорот со името со цел да се сочува достоинството на двете страни.“

– Самата средба претставува исчекор напред кон решение – додаде Бошњаковски.


Османи: Постои консензус терминот Македонија да се најде во можното решение за спорот за името


Скопје, 10 јануари, 2018 - 22:40 (META) 

Постои консензус, терминот Македонија да го има во која било варијанта во решавање на спорот за името, Грција го прифаќа тоа, но се уште не треба да влегуваме во таа расправа, рече вицепремиерот за европски прашања, Бујар Османи во вечерашното гостување на телевизија „24“, по неговото враќање од Атина и средбите со шефот на грчката дипломатија, Никос Коѕиас и со заменик-министерот за надворешни работи задолжен за европски прашања и меѓународни економски односи на Грција, Јоргос Катругалос.

Тој додаде дека се разговарало за можни варијанти за името, но како што кажа „нема да се помогне на процесот, ако јавно се лицитира со нив, бидејќи се уште не се созреани“.

– Некои од предлозите треба да бидат доволно созреани, за да можат да го издржат притисокот на јавноста. Не можам да навлегувам во детали, бидејќи нема да помогнам на процесот. Се обидуваме да најдеме прифатливо решение кое не мора да удира на најчувствителните вредности на двете држави – изјави Османи.

Тој додаде дека решавањето на проблемот е комплексен процес, но ја гледа волјата на двете влади да ги надминат притисоците на дневна политичка основа и да најдат решение.

– Се обидуваме да ги разглобиме сите аспекти на прашањето. Ова прашање има рационално јадро, но врз него се наталожени многу емоционални слоеви со текот на годините, кои треба да се тргнат – додаде Османи.

Според него, многу е важно да се искористи моментот за решавање на овој спор, за државата да влезе во НАТО, бидејќи како што кажа, е важно поради безбедносни причини.


Беса и е потребна на политичката сцена во Македонија, порача Мицкоски


Скопје, 7 јануари, 2018 - 17:03 (META) 

Во врска со расколот во Движењето Беса, претседателот на ВМРО-ДПМНЕ, Христијан Мицкоски порача што побрзо обединување, бидејќи како што кажа, политички субјект како оваа партија и е потребна на политичката сцена во Македонија.

– Што се однесува до ВМРО-ДПМНЕ, можам да кажам дека партијата е обединета и сплотена – изјави Мицскоски, по присуството на божикната литургија во „Св.Климент Охридски“.

Тој повика и на поширок фронт на луѓе од јавната сфера, кои би се сплотиле со нив во битката против власта.

Прашан за спорот со името со Грција, тој рече дека, немаат информација за тоа како се одвиваат преговорите, ниту за нивната содржина и суштина.

– Заклучно со овој момент можам да го потврдам истото тоа што го потврди и најголемата опозициска партија кај нашиот јужен сосед, односно нејзиниот претседател Мицотакис, кој кажа дека и кај нив најголемата опозициска партија не е вклучена во разговорите за името – рече Мицкоски.


Хрватска: Шпанија треба да го реши проблемот со Каталонија во рамките на Уставот


Загреб, 28 октомври, 2017 - 17:40 (META) 

Хрватското министерство за надворешни и европски работи смета дека случувањата во Каталонија се внатрешно прашање на Шпанија.

Оттука, Хрватска се залага за демократско и мирно решавање на проблемот, во согласност со европските вредности.

Во соопштението на министерството, исто така, се наведува дека Хрватска не смета дека прогласувањето независност на Каталонија е во согласност со шпанскиот устав и верува дека најдобро решение е тоа кое се темели на дијалог, со полна почит кон владеење на правото и заштитата на правата на сите граѓани кои живеат во Каталонија.

Хрватскиот премиер Андреј Пленковиќ вчера изјави дека спорот помеѓу Мадрид и Каталонија треба да се реши во рамките на Уставот на Шпанија.


Груевски: Заев е донесен на власт да го реши спорот за името како што сака Грција


Скопје, 24 септември, 2017 - 21:32 (META) 

Зоран Заев е донесен на власт да го реши спорот за името така како што сака Грција, рече лидерот на ВМРО-ДПМНЕ, Никола Груевски, во интервју за телевизија „Сител“.

Тој рече дека се чека да завршат локалните избори за да почнат конкретни преговори.

– Главната цел зошто се донесени на власт како поразени на изборите во декември 2016 година е да се реши спорот за името и тоа да биде по терк на Грција. Тоа го знаат веќе сите, не само во Македонија, туку и во цела Европа. Се чека само да завршат локалните избори и да почнат конкретни преговори – рече Груевски како одговор на премиерот Зоран Заев кој денеска на прес-конференција, меѓу другото, зборуваше и за спорот со Грција.

За локалните избори, Груевски вели дека не очекува да бидат фер, дека се заплашуваат кандидатите на ВМРО-ДПМНЕ и дека последните постапки покажале дека полицијатаа ќе биде ставена во партиска служба и за кампањата.

По завршувањето на локалните избори, Груевски најави дека ВМРО-ДПМНЕ ќе побара предвремени парламентарни избори за, како што вели, „да почне нова ера и да се стави крај на ова помрачување што ѝ се случи на државата со доаѓањето на СДСМ на власт“.


Димитров: Преговорите со Грција дефинитивно ќе почнат до крајот на годинава


Берлин, 8 септември, 2017 - 18:00 (META) 

Министерот за надворешни работи, Никола Димитров, во интервју за „Дојче веле“ дадено при неговата посета на Германија, изразува силна увереност дека преговорите со Грција за спорот околу името, кои подолго време беа во застој, ќе продолжат до крајот на годинава.

– За време на посетата на грчкиот министер Никос Коѕиас, минатата среда во Скопје, ги дискутиравме мерките за градење доверба. Сè уште не ги почнавме преговорите. Тие ќе почнат дефинитивно пред крајот на годината. Јас го правам она што мислам дека треба да биде работа на дипломатите: решавање на проблеми, отворање врати и создавање пријатели. Можеби не можеме да ја смениме историјата, но сигурно можеме да се обидеме да влијаеме на иднината и да го направиме животот подобар за нашите граѓани денес. Тоа е нашата цел – вели Димитров.

Тој во интервјуто нагласува дека балканската рута на мигрантите мора да остане затворена.

– Мислам дека треба да направиме сè што е потребно за да остане затворенa, бидејќи сите ние, вклучувајќи ги и бегалците, имаме интерес за организирана помош и мораме да се бориме против илегалната миграција. Она што е навистина важно е ЕУ да продолжи да ја поддржува Турција во финансиска смисла, бидејќи имаат милиони бегалци во нивната земја. Еднакво важно е да продолжиме да ѝ помагаме на Грција и тоа на солидарен начин – единствениот начин на кој треба да се решава ова прашање – вели Димитров.

Прашан дали Македонија е подготвена да прими бегалци кои се во ЕУ, тој вели дека тоа би се случило дури откако земјата ќе стане членка на Унијата.

– Пред сè, во интерес на македонските граѓани е Македонија да влезе во ЕУ, а кога еднаш ќе бидеме дел од ЕУ, тогаш дефинитивно ќе бидеме подготвени да го делиме товарот со ЕУ. Но, пред тоа треба да влеземе во ЕУ, за да може да се даде одговор на ова прашање – вели шефот на македонската дипломатија.