Каменос: Без разлика на референдумот, последниот збор ќе го има грчкиот народ


Солун, 12 септември, 2018 - 9:40 (META) 

Каков и да е исходот од референдумот, последниот збор за Договорот од Преспа ќе го има грчкиот народ или на референдум или на избори, рече коалициониот партнер во грчката влада Панос Каменос, уште еднаш повторувајќи ги неговите позиции, но и откривајќи ги следните негови чекори откако Македонија би ги завршила предвидените обврски.

– Мојот прв предлог до премиерот ќе биде да му се обратиме на грчкиот народ, да побараме референдум, од грчкиот народ да заземе став за оваа промена на одлуката на лидерите на политичките партии. Втората опција што ќе ја имаме е било која одлука и расправа во парламентот да се префрли по завршувањето на четиригодишниот мандат. И третата и последна ќе биде распишување избори – рече Каменос на прес-конференцијата во рамките на 83. Меѓународен саем во Солун и додаде дека немаат мандат од народот за да го отстапат на било кој начин терминот Македонија.

Лидерот на Независни Грци објасни дека било во интерес на соседите „да ги прифатат грчките позиции“, бидејќи Грција сака да помогнеме и економски, „но не може да се фалсификува историјата и да се употребува името Македонија“.

– Ниту македонска националност постои, ниту македонски јазик постои, говорите словенски – рече Каменос.


Што ќе каже Ципрас за спорот со името на саемот во Солун?


Атина, 3 септември, 2018 - 11:27 (META) 

Јасна порака и поддршка на Договорт од Преспа ќе искаже Алексис Ципрас следната сабота во неговиот воведен говор на Меѓунардониот саем во Солун.

Ципрас, според извори со грчката влада, ќе рече дека ратификацијата на договорот ќе го реши деценискиот спор околу името како и дека иако преговорите биле тешки, во исто врме биле и неопходни.

– Ние дејствуваме со чувство на одговорност и патриотизам во спорот со името и силно веруваме дека следната година Договорот од Преспа ќе биде имплементиран – ќе порача Ципрас во исто време испраќајќи порака до опозициската Нова Демократија дека ако тие не го раификуваат договорт, ќе испратат негативна порака до меѓународната заедница.

Во меѓувреме американскиот амбасадор во, Атина Џефри Пејет, го поздрави договорот „кој го ослободил економскиот потенцијал на регионот и го трасирал патот на земјата кон членството во НАТО и ЕУ“.

Во последната изјата тој рече дека САД ќе бидат почесната земја–гостин на Саемот во Солун оваа недела, како и дека Грција е посакуваниот партнер за соработка со земјите од Западен Балкан.

На 15 септември Кирјакос Мицотакис исто така ќе се обрати на Саемот и меѓудругото, ќе ја изложи и позицијата на Нова Демократија околу ратификацијата на Договорот за името во Грчкиот парламент.


Спорот за името се појави и во ноќните клубови на Халкидики


Калитеа, 10 јули, 2018 - 11:01 (META) 

Во еден популарен ноќен клуб во Калитеа (Халкидики) во саботата настапила и грчката пејачка Ана Виси.

Позната по интеракцијата со публиката, таа разговарала со еден гостин на првата маса до бината и тој ја поздравил на англиски. Виси го прашала од каде е, на што тој дговорил „од Македонија“.

Пејачката, како што пренесува порталот „Селео.гр“, иако се вознемирила, сепак смирено му рекла „Грешка си, пријателе, веројатно мислеше нешто друго“.

Порталот коментира дека таквата смирена реакција на пејачката придонела да нема повеќе негодувања во клубот.

Порталот напоменува дека во клубот имало повеќе гости „од БЈРМ“ и од Бугарија и дека надвор биле паркрани многу „суперлуксузни“ автомобили.


Мицотакис: Договорот ги труе односите меѓу двете земји и двата народа


Атина, 22 јуни, 2018 - 11:24 (META) 

Договорот наместо да ги подобри, може да ги влоши односите меѓу двете земји и двата народа, изјави претседателот на грчката опозициска Нова демократија, Кирјакос Мицотакис на конференција во Солун.
Тој кусо ги претставил економските врски на Македонија и Грција, напомнувајќи дека грчкиот извоз лани достигнал 642 милиони евра, наспроти 556 милиони во 2016, а увозот е стабилен на околу 225 милиони, додека пак Грција е трета најголема земја снабдувач и трет трговски партнер на Македонија.

-Паралелно, секоја година имаме околу 3 милиони пристигнувања на туристи од кај нив. Сето ова покажува дека и покрај 25-годишното нерешено прашање во нашите билатерални односи, и покрај речиси 10-годишната економска криза во Грција, и покрај техничките и административните проблеми на царините, нашите економски односи останаа блиски. Како што во суштина останаа пријателски односите меѓу двата народa. И во никој случај не беа разнишани, иако постоеше нерешеното прашање. Но, сега се во опасност сериозно да се поткопаат со толку површниот и национално нестабилниот избор на Ципрас. Бидејќи овој договор, наместо да ги ублажи проблемите, може на крај да ги отруе односите на двата народa, оживувајќи ги страститe од други времиња – рече Мицотакис.

Тој се запрашал што ќе биде со производите со брендот и името Македонија што се произведуваат или постојат во Грција, па ги споменал „македонска алва“, „македонски мермери“, „македонска индустрија за цевки“, кои, според него, одеднаш се доведени во прашање.

– Постојат десетици компании во северна Грција, можеби стотици, кои го користат зборот Македонија или изведените зборови во нивното име или во нивните производи. Што ќе се случи со нив? Кои „мешани” комисии ќе одлучуваат за нивната иднина и кои судови ќе ги решаваат можните разлики? А во меѓувреме што ќе се случува на пазарот, кој не чека судски одлуки? И колку слабее нашиот правен арсенал кога се обраќаме до судовите за да го заштитиме брендот Македонија? Шокот за многу бизниси во Северна Грција ќе биде голем – вели Мицотакис.

Во врска со договорот, тој оценил дека е потпишан во „изолираната од полицијата Преспа и во пуст амбиент, меѓу кич настан со вратоврски и каубојски шешири“, а сите Грци го слушнале Заев како зборува за „Македонците и Грците”.

-Отстапувајќи ги националноста и јазикот, во пракса го поништува името. Затоа што, кога го отстапуваш зборот Македонец и дополнително дозволуваш, нашите соседи да тврдат дека говорат македонски јазик, тогаш не само што го легализираш, туку го зголемуваш нивниот иредентизам – рече Мицотакис и додаде дека со договорот, Грција го загубила основното дипломатско оружје – поканата за НАТО.


Ќе заседава ИК на ВМРО-ДПМНЕ, Мицкоски на средба и со пратеничката група


Скопје, 14 јуни, 2018 - 15:27 (META) 

Претседателот на ВМРО-ДПМНЕ Христијан Мицкоски денеска ќе има состаноци со пратеничката група, а попладневно ќе заседава и Извршниот Комитет на партијата.

Се очекува разгледување на договорот кој го постигнаа премиерот Зоран Заев и неговиот грчки колега Алексис Ципрас како решение на долгогодишниот спор за името.

Според Мицкоски, таквиот договор е договор за капитулација и пораз за државата. Вчера Мицкоски изјави дека ќе почне процес на широки консултации и очекува изјаснување и на другите субјекти кои имаат општествена одговорност како МАНУ, МПЦ, ИВЗ, Универзитетите и професорите.


Германија смета дека Македонија заслужува признание од цела ЕУ


Берлин, 14 јуни, 2018 - 11:51 (META) 

Германскиот министер за надворешни работи, Хајко Mас на прес-конференцијата со министерот за надворешни работи, Никола Димитров во Берлин рече дека Германија го поддржува договорот постигнат меѓу Македонија и Грција за кој смета дека е решение постигнато со заедничко разбирање кое ќе донесе промена кај граѓаните.

Тој рече дека одлуките за ЕУ и НАТО ќе бидат многу важен сигнал и истакна дека она што Македонија го постигнала во однос на исполнување на критериумите и процесот на реформи, навистина импресионира и дека заслужува признание од цела ЕУ.

– Ова решение е добро ние ќе го поддржуваме и натаму тој процес за влез на земјата во ЕУ. Не импресионира процесот на реформи што во последниве години се случува во Македонија. Земјата покажува резултати и треба да добие признание за тоа од целата Европска унија. Ви укажуваме да покажете решителност. Се надевам дека одлуките кои ќе се носат во иднина во однос н НАТО и ЕУ ќе бидат важен сигнал за граѓаните на вашата земја и ќе се оди во правец на европската перпектива, не сакаме некои други сили да ги остваруваат нивните планови во вашиот регион – рече Мас.

На новинарско прашање дали се подготвени да лобираат за помош за придвижување на евроинтеграцискиот процес на Македонија, Мас, рече дека се апсолутно подготвени.

– Уверен сум дека позицијата на Владата ќе биде прифатен од Парламентот, како и од нашите холандски и француски пријатели со кои интензивно ќе разговараме во следните денови за да дојдеме до заедничка позиција – рече Мас.

Шефот на македонската дипломатија, Никола Димитров рече дека мотивите во целиот овој процес на преговори, освен пријателство со Грција биле и членството во ЕУ и НАТО, при што според него, политичката одлука во јуни од Европскиот совет и поканата за членство во НАТО ќе значат дека компромисот што е постигнат ќе биде видлив за двете страни.

-Македонија живее историски денови, недели и месеци, на добар пат сме да затвориме еден спор кој беше како камен и ни го отежнуваше прогресот и не заклучи во чекалната каде многу години поминавме, од 2005 година како кандидат за членство, а годинава ја добивме деветтата препорака. Ова чекање создаде кризи, но научивме лекции. Сакаме да немаме спорови со соседите, да имаме независно судство, слободни медиуми и одговорни политичари – изјави Димитров во Берлин.

Според Димитров, Македонија на овој начин не создава само перспектива, туку го затвора и македонското прашање.


Груевски: Ова е полоша верзија од тоа што јавно го отфрливме во 2009 година


Скопје, 14 јуни, 2018 - 11:07 (META) 

Поранешниот премиер и екс лидерот на ВМРО-ДПМНЕ, Никола Груевски на својот „Фејсбук“ профил напиша дека тоа што било јавно отфрлено во 2009 година денеска било прифатено во далеку полоша верзија.

„Не само за надворешна, туку и за целосна внатрешна употреба, плус промена на уставот, откажување од дијаспората, историјата, АСНОМ, Илинденското востание и идентитетот“, напиша Груевски и сподели две телевизиски исечоци во кои тој зборува за спорот со името.

Првиот линк е од негово гостување во телевизиска емисија каде што вели дека ако на референдум биде поставено прашање Република Северна Македонија за севкупна меѓународна употреба, тој би гласал против.

На вториот линк е објавен дел од брифинг кој тој го држел за медиуми во 2008 година, пред самитот на НАТО во Букурешт.

-Грција е со намера да стави вето, доколку не ја прифатиме нејзината уцена, а ние не можеме да прифатиме уцена на таков начин. Сосема веројатно дека доколку се случи вето, понатамошните разговори со Грција за надминување на прашањето за името ќе бидат западнати во толку длабока криза што веројатно ќе бидат и прекинати – рекол Груевски пред 10 години.


ВМРО-ДПМНЕ: Заев ги продаде највисоките национални интереси


Скопје, 14 јуни, 2018 - 10:00 (META) 

Договорот на Зоран Заев за промена на уставното име на Република Македонија претставува капитулација за Македонија, Заев ги продаде највисоките национални интереси, велат од ВМРО-ДПМНЕ преку соопштение до јавноста.

„Овој договор е директен удар на темелите на државноста и го поткопува уставниот поредок на Република Македонија. Цела јавност виде како Зоран Заев од опозиција се колне во сопствените деца и предци дека нема да прифати промена на уставното име. Сега од позиција на власт Зоран Заев без срам го промени неговиот став и прави непроценлива и неповратна штета. Зоран Заев дури и кога се колне во сопствените деца, дрско лаже! Со овој капитулантски договор најмногу губат граѓаните и идните генерации. Овој договор е навреда и понижување за сите граѓани на Република Македонија“, велат од ВМРО-ДПМНЕ.

Од партијата потенцираат дека нема да прифатат промена на Уставот со цел промена на уставното име и дека ќе се спротивстават со сите демократски и правни средства против, како што велат, капитулантски договор.

„ВМРО-ДПМНЕ е партија која работела, работи и ќе продолжи да работи за интересите на граѓаните на оваа држава. ВМРО-ДПМНЕ останува на браникот на зачувување на националните интереси на Република Македонија. ВМРО-ДПМНЕ останува со Република Македонија“, додаваат од партијата.


ОБСЕ: Скопје и Атина постигнаа историски договор


Виена, 14 јуни, 2018 - 9:42 (META) 

Претседавачот на ОБСЕ, италијанскиот министер за надворешни работи Енцо Моаверо Миланези, и генералниот секретар, Томас Гремингер, го поздравија договорот меѓу Скопје и Атина за решавање на спорот за името.

Тие во соопштенијата наведуваат дека договорот е чекор напред кон јакнење на регионалната стабилност.

– Им честитам на премиерите Зоран Заев и Алексис Ципрас за нивното лидерство и посветеност на овој процес кој е многу важен за двете земји, за Југоисточна Европа и за Европа во целост – вели Моаверо, додавајќи оти ова е единствена можност што мора да се искористи.

Гремингер, пак, го нагласува значењето на дијалогот и компромисот во овој процес.

– Овој историски договор може да доведе до долгорочно решение во корист на сите граѓани и на целиот регион – наведува генералниот секретар на ОБСЕ.


Ципрас: Не можеме да им забраниме да се самоопределуваат како Македонци


Атина, 14 јуни, 2018 - 9:33 (META) 

Грчкиот премиер Алексис Ципрас во интервју за грчката државна телевизија ЕРТ вчера порача дека со новата спогодба, Грција не може да го забрани правото на жителите на Република Македонија да се самоопределуваат, јави дописничката на МИА од Атина.

– Во договорот постои решение за државјанството, бидејќи не можеме да им го забраниме правото на соседите да се самоопределуваат како Македонци. Овој договор не го потценува правото на самоопределување, тоа не можеме да го направиме. Не можеме да им забраниме да се самоопределуваат како Македонци – рече грчкиот премиер и објасни дека во договорот терминот „Македонци“ не се однесува на историјата на грчката Македонија.

Ципрас потенцираше дека опозициите во двете земји имаат идентични позиции, дури и изјавите им биле исти, додека, пак, во однос на ставот на коалицискиот партнер во грчката влада, Ципрас рече дека Панос Каменос го известил дека ќе си го задржи почетниот став и нема да гласа за договорот, но и дека нема да ја урне владата.