Заев: Не може да се очекува уставна промена за било кое име


Скопје, 21 мај, 2018 - 13:31 (META) 

Среќен сум затоа што добив ослободителна пресуда и конечно ја докажав мојата невиност и дочекав правда, рече премиерот Зоран Заев по објавувањето на пресудата за случајот „Поткуп“.

Тој побара од институциите јавно да ја објават целата снимка од ПИ-мерките и рече ако му ја достават, тој самиот ќе ја објави за да се види дека не барал поткуп.

За спорот со името Заев рече дека не може да се очекува уставна промена за кое било решение за името. Тој вели дека Република Илинденска Македонија е име кое не го загрозува, туку напротив го зајакнува идентитетот на Македонија, а на Грција и дава сложено име со временска одредница.

– Во Македонија не отпадна овој предлог. Мислам дека не постои политичка партија, интелектуалец, нормален граѓанин кој е повреден со овој предлог. Верувам дека треба да продолжиме. Прво да го разгледаме ова решение до крај и апелирам до сите во Грција да го разгледаат, зошто е вредно – рече Заев.

Премиерот информираше дека утре ќе ја предложи реконструкцијата на владата.

– Поради пресудата не знаев дали ќе има цела Влада. Подготвен сум и имињата се утврдени, ќе ги процесираме до Собранието утре и ќе ја докомплетираме Владата – изјави Заев.


Столтенберг: НАТО е подготвенa да ја покани Македонија веднаш штом се реши името


Брисел, 27 април, 2018 - 16:00 (META) 

Генералниот секретар на НАТО, Јенс Столтенберг, изјави дека Алијансата е подготвена да ја покани Македонија за членство веднаш штом ќе се реши прашањето за името. Столтенберг на денешната прес-конференција во Брисел рече дека и покрај тоа што Русија се спротивставува на ширењето на западниот воен сојуз, вратите на НАТО остануваат отворени.

– Јас го посетив Скопје и јасно реков дека НАТО останува посветен на она што беше зацртано на Самитот во 2008 година во Букурешт – ние сме подготвени да ја поканиме земјата да стане членка на НАТО веднаш штом се реши прашањето за името. Таа одлука сè уште стои. Преговорите за името се во тек и се надевам дека тие ќе бидат успешно завршени, а потоа ќе продолжиме понатаму – рече Столтенберг.

Запрашан за можните пречки од Русија во процесот на пристапување на Македонија кон НАТО, Столтенберг рече дека основно право на секој народ е да одлучи на кој безбедносен блок ќе му се приклучи.

– Русија се противи на проширувањето на НАТО со години. Речиси секогаш протестира кога ќе добиеме нови членки, но факт е дека вратата на НАТО е отворена. Дали НАТО ќе добие нов член, зависи од интересот на земјите. Никој нема право да интервенира во тоа или да го спречи тој процес – заклучи Столтенберг.


Мицотакис: Не е можно решение без соседите да го променат Уставот


Атина, 27 април, 2018 - 15:03 (META) 

Решение не може да постои без претходно соседната земја да го промени нејзиниот Устав и комплетно и неповратно да ги отстрани сите елементи на иредентизмот, рече Кирјакос Мицотакис, лидерот на најголемата грчка опозициска партија, говорејќи пред одговорните на различните сектори во Нова демократија.

Мицотакис смета дека начинот на кој владата управува со преговорите, предизвикува загриженост и уште еднаш го повтори неговиот став дека „нема да ги поделат Грците, за да ги обединат Скопјаните“.

– Особена загриженост предизвикува ситуацијата во скопското прашање. Таму каде што тајната дипломатија, со незнаење на никој, одеднаш донесе во прв план едно прашање, кое како што се чини, не беше зрело да се реши. И уште полошо, со скопското прашање, владата на крај успеа да ги обедини и да ги зајакне нашите соседи и се обиде да ги подели Грците – вели лидерот на опозициската Нова демократија.

Како што јави дописничката на МИА од Атина, Мицотакис упатил остри критики до владата на премиерот Алексис Ципрас дека е опасна за грчката надворешна политика.


Јункер: Прашањето за името мора итно да се реши, препораката не значи датум за преговори


Скопје, 26 април, 2018 - 15:26 (META) 

Претседателот на Европската комисија, Жан Клод Јункер, денеска во своето обраќање во грчкиот Парламент ја нагласи итноста од решавањето на прашањето за името меѓу Македонија и Грција.

– Господине претседателе, пред вашиот Парламент ќе кажам нешто што го кажав кога неодамна бев во Скопје, каде што беше поставено прашањето за името на оваа земја. Јас не сум надлежен да ви дадам некоја насока, ниту идеи ниту пак правци во однос на прашањето што треба во секој случај да го решите меѓу вас. Но, дозволете ми да ја нагласам итноста што го карактеризира решавањето на проблемот, со оглед на комплицираниот регион. Ги имам на ум зборовите на Черчил: овде историјата што се произведува не може да се консумира, толку е голема – рече Јункер.

Претседателот на ЕК, во обраќањето пред пратениците, во присуство на грчкиот претседател, меѓу другото, говореше и за земјите од регионот и нивната европска иднина. Рече дека Грција е столб на стабилноста во регионот, а на Западен Балкан му е потребна европската перспектива, за да не се повторат, како што рече, драмите што ги доживеавме во деведесетите години.

Претседателот на ЕК истакна дека препораката за почеток на пристапни преговори со ЕУ, не значи и доделување датум.

– Сите оние проблеми, посебно конфликти на границите што би можеле да создадат и билатерални судири, ќе треба во секој случај да се решат пред било какво пристапување. За да бидам целосно јасен, сакам да кажам дека, кога Европската комисија предложи, а тоа беше пред една седмица, почеток на преговорите за пристап за Албанија, но и за ПЈРМ, ова не значи дека сме дале датум за да почнат овие преговори за проширување и интеграција. Воопшто не е даден таков датум за интеграција. Не треба да се потпираме на нереални најави, не е можно да се случува тоа – рече Јункер, додавајќи дека сите земји кандидати ќе се оценат објективно, врз база на нивните вредности и критериуми.


Димитров пред ПССЕ: Ако не можеш да јаваш на два коња, што бараш во циркусот


Стразбур, 24 април, 2018 - 15:32 (META) 

Министерот за надворешни работи, Никола Димитров за време на својот говор во Парламентарното Собрание на Советот на Европа соопшти кои реформи ги презела Владата во борба против корупцијата, независно судство и слобода на медиумите. Европратениците најмногу му поставуваа прашања за проблемот со името.

-Никогаш не сме имале преговори на ова ниво каде што директно разговараат министрите за надворешни работи на двете земји. Мислам дека имаме прозорец на можности, не ги знам идните чекори, но мораме да продолжиме, да дадеме се од себе, што помалку домашна политика и повеќе стратегии, толку повеќе и шанси да ги решиме проблемите. Има слој на предрасуди и енигми, но никој не рече дека ќе биде лесно. Останува на нас да ги превртиме сите камења за да ја најдеме шансата – рече Димитров.

За очекувањата од самитот во Софија, наспроти изјавите на дел од членките во ЕУ дека се против проширување, Димитров рече дека не мисли оти тие две работи се судираат.

-Знаеме дека не сме во ситуација никој од земјите во регион да се придружи на ЕУ утре, свесни сме дека тоа е можно најрано во 2025. За нас во оваа ситуација е важен е процесот на пристапување и тоа е најважна алатка која ја имаме. Консолидацијата на Европа не може да го исклучи Балканот, тоа го покажа и бегалската криза. Сакам да го завршам говорот со цитат: „Ако не можеш да јаваш два коња во исто време, тогаш што правиш во циркусот“, тука ќе застанам – порача тој.

Запрашан од грчка европратеничка како е возможно Македонија да дојде до решение на спорот иако има намера да го задржи уставното име, Димитров одби конкретно да одговори велејќи дека преговорите не треба да се водат пред очи на јавноста.

– Жонглираме меѓу две интереси, сакаме да го штитиме процесот, но и да ја информираме јавноста. Постои опасност ставовите да станат национални позиции што оневозможува продолжување на преговорите. Сите ги знаеме позициите на двете страни. Мора креативно да видиме дали може да ги поместиме елементите за да се покрие најважното за Атина и за Скопје. За да се стори тоа мора повеќе да се разговара, а по договорот да и се елаборира се на јавноста – посочи тој.


Коѕиас: Нема доволно време Македонија во јуни да стане членка на НАТО


Атина, 18 април, 2018 - 13:57 (META) 

На следниот НАТО самит во јули, Македонија нема да стане членка, бидејќи временскиот период е краток, изрази шефот на грчката дипломатија Никос Коѕијас во интервју за грчкото радио „247“.
Според Коѕиас, договорот треба да се ратификува на различни начини, а веќе е април.

– Тие сакаат да распишат референдум. За референдум во земјата пријател на север, потребни се два месеци. Само за референдумот ќе дојде јуни. А откако ќе се заврши со референдумот, договорот ќе треба да оди во Собранието, а и за тоа треба половина месец или еден месец. Откако ќе стигне во Собранието, ќе треба тоа да направи уставни измени. За да имаме договор ќе треба да се согласиме за уставни промени. Што значи ќе стигне есен – објасни шефот на грчката дипломатија.

Во однос на разговорите и точките за кои се преговара, Коѕиас, рече дека идентитетот е прашање на самоопределување, а за националноста ќе се користи новото име, односно во пасошите ќе стои „државјанин на таа и таа земја, државјанин на името за кое што ќе постои договор“.

– Идентитетот е прашање на самоопределување. Да го запомниме ова, затоа што не треба и ние да ги прекршуваме меѓународните закони – објасни Коѕиас.

Како што јави дописничката на МИА од Атина, тој не сакаше јавно да коментира дали двете страни се блиску до договор за името „Горна Македонија“. Рече дека од петте предлози на Нимиц, отфрлено е името „Република Македонија (Скопје)“, а Грција остава на нашата земја да ја одбере географската одредница.

– Од моментот кога има сложена географската одредница немаме проблем, но оваа сложена географска одредница, треба да е и за внатрешноста на земјата – рече шефот на грчката дипломатија.

Категорично „не“ е одговорот на Коѕијас на прашањето дали без ревизија на Уставот и ерга омнес, може да се постигне договор. Министерот за надворешни работи на Грција во интервјуто оваа негова позиција уште еднаш ја поткрепи со примерот со документите. Рече дека од кај нас ги слушнал аргументите дека Грција не ја засега ако една општина во допис до друга општина го користи името Република Македонија. На ова, одговорил дека постојат низа документи што ќе создадат проблеми во функционирањето, како на пример Уставот, доколку би се пратил во странство, а името што е вклучено нема да се смени и да биде новото, она за меѓународна употреба, туку ќе биде уставното, но преведено.

– Ако не постои ерга омнес и употреба за сите меѓународни, меѓудржавни, билатерални односи, во меѓународните организации, а и во внатрешноста на земјата, ќе инвестираме во кавги и несогласувања во следниот век, ова се обидувам да ѝ го објаснам на ПЈРМ. Ќе излегуваат документи, дозволи, дипломи во странство со внатрешното име, ние ќе ги бркаме дека го прекршуваат договорот, а тие ќе велат дека се случи по грешка и ако денес имаме кавга за тоа кое име се користи во меѓународните организации, тогаш ќе имаме секојдневна кавга што ќе биде ќорсокак и ќе ги влошува условите меѓу двете држави, рече шефот на грчката дипломатија, додавајќи дека Грција бара договор што нема да создава, туку ќе ги решава проблемите – рече тој.


Димитров за „Ла Кроa“: Во идеално сценарио, решение на спорот за 3 месеци


Скопје, 18 април, 2018 - 13:06 (META) 

Во идеално сценарио, решение за спорот со името може да се постигне во наредните два до три месеци, а итноста за решение е диктирана од европскиот воз, вели шефот на македонската дипломатија Никола Димитров во интервју за францускиот весник „Ла Кроа“.

Во тој контекст Димитров ги спомена Самитот за Балканот што ќе се одржи во мај во Софија, петнаесет години по Самитот во Солун, но и датумите за избори, во 2019 година ќе се одржат претседателски избори во Македонија и парламентарни избори во Грција.

– Се обидуваме да излеземе од ровот во кој се имаме закопано повеќе од дваесет години. Две европски земји кои споделуваат еден географски регион, треба да можат да најдат достоинствен начин кој ќе овозможи да се прави разлика меѓу нашата држава и регионот Македонија кој се наоѓа во Грција, без да се повреди идентитетот и достоинството на македонскиот народ – вели Димитров во интервјуто насловено „Македонија излегува од сенка“.

Посочи оти е потребно да бидеме многу внимателни кон јавното мислење во Македонија и во Грција.

– Иако нашите две земји имаат различни позиции, понекогаш се случува да се најдеме на иста страна со политичките сили кои сакаат компромис, а тоа се силите кои гледаат во иднината, а кои се спротивставуваат со силите од минатото и со национализмот – додава Димитров.

На прашањето што ќе направи македонската страна со многубројните националистички споменици во Скопје, Димитров истакна дека опсесивното свртување кон античките времиња не е здраво.

– Прибегнувајќи кон митовите, ги губиме младите генерации. Министерството за култура треба да одлучи што ќе прави со „Скопје 2014″ – Голем архитектонски проект на антиквизација кое го спроведе претходното националистичко мнозинство. Лично, би сугерирал да се организира голем светски уметнички натпревар кој би му дал смисла на сиот тој хаос во градот – вели шефот на дипломатијата.

Во однос на перспективите за интеграција на Македонија во ЕУ вели дека бугарското претседателство претставува одлична можност Унијата да се сврти кон Балканот.

– Патот до целосна интеграција ќе биде долг. Ако не успееме да ја донесеме Европа во Македонија, да воспоставиме правила, правда, ред, тогаш помладите генерации ќе продолжат да ја напуштаат земјата како и балканскиот регион поради недостиг на надеж. За среќа, некои и се враќаат – додава тој.

Во врска со солидарноста од страна на земјите кои беа дел од поранешна Југославија, Димитров нагласи дека сега е време за надминување на расправиите.

– Не сакам да звучам надмено, меѓутоа се јавува една нова енергија во регионот и таа нова динамика е делумно поттикната од Македонија – нагласи Димитров во интервју за „Ла Кроа“.


Ѕанакопулос: Нема план „Б“, соседот треба да го промени уставното име


Атина, 4 април, 2018 - 12:02 (META) 

Промена на уставното име е една од правните обврски за да се постигне договор, вели портпаролот на грчката влада и министер без ресор Димитрис Ѕанакопулос, во интервју за грчката телевизија „Алфа“.

Прашан за натписите во медиумите за евентуален грчки план „Б“ за потпишување договор со меѓународните организации, без да мине низ парламентите на двете земји, Ѕанакопулос вели дека „не постои никакво меѓународно прашање што може да се реши без меѓународен договор“, што содржи конкретни обврски за двете страни, јави дописникот на МИА од Атина.

– Што правиш кога треба да решиш еден билатерален проблем? Се договараш за еден правно обврзувачки текст што ги опишува обврските на двете страни. Односно, грчката страна ќе го признае соседот под името што ќе биде договорено, а соседот ќе се согласи. За грчката страна да го признае ова име и да преземе конкретни обврски една од нив ќе треба да е, како што многупати имаме јасно кажано, промена на уставното име. Поранешната југословенска Република Македонија ќе ја преземе правната обврска да го промени уставното име, доколку сакаме да стигнеме до решение – вели Ѕанакопулос.

Во однос на тоа дали Атина бара промена Уставот само поради името или, пак, смета дека треба да се направат измени и на одредени членови, Ѕанакопулос објаснува дека постојат различни правни толкувања и тоа е дискусија што се води на политичко и правно ниво.


Специјален статус во НАТО во јули, полноправно членство по промена на Уставот?


Атина, 2 април, 2018 - 12:49 (META) 

Најновите неофицијални информации кои доаѓаат од Грција се дека преговорите за името би можеле да резултираат со компромис околу приемот во НАТО, со „надградба“ на статусот на Македонија на самитот во јули и ветување за полноправно членство кога ќе се промени Уставот.

Наводно, сега во центарот на преговорите е потпишување на меѓународен договор помеѓу двете земји, кој би предвидел (како подоцнежна обврска) промена на Уставот и старт на процедурите кои се неопходни за прием на Македонија во НАТО.

Шемата за која наводно сега се преговара е, според договорот, на самитот во јули, Македонија да добие „унапреден/надграден НАТО статус“, а во документот да се стави изричито дека целосното членство во НАТО ќе и биде доделено кога ќе биде завршена промената на Уставот.

Во моментов статусот на Македонија е кандидатски, со тоа што промената на името, односно договорот со Грција е едиствениот услов кој ја дели од членство во Алијансата.

Според медиумите, Ципрас преговара договорот да биде прифатен во грчкиот парламент, со мнозинство гласови, без Нова демократија на Мицотакис и Независните Грци на Каменос, без кои, сепак има просто мнозинство од 151 пратеник – заедно со другите партнери во коалицијата.

Според  „Катимерини“, Ципрас е во „отворена комуникација“ со Заев, дека атмосферата е многу позитивна, но се држи далеку од очите на јавноста.


Димитров одделно ќе го информира државниот врв и партиите за преговорите за името


Скопје, 2 април, 2018 - 12:33 (META) 

Лидерска средба за процесот на разговори за името нема да има. Министерот за надворешни работи Никола Димитров на поединечни средби ќе ги информира претставниците на државниот врв и политичките партии за текот на преговорите.

Димитров минатата недела најави дека по преговорите за името во Виена, ќе се одржи состанок на државниот врв и лидерите на најголемите партии.

Од ВМРО-ДПМНЕ ја информираа јавноста дека нема да има лидерска средба, ниту каква било друга средба поврзана со информација околу текот на разговорите за проблемот што Грција го има со нашето уставно име.

„Ширењето на дезинформации во јавноста на ваква тема е крајно несериозно и има за цел да ја дефокусира јавноста од вистинските прашања за сметка на некакви средби“, се вели во соопштението на ВМРО-ДПМНЕ.

Во петокот во Виена Димитров имаше средба со министерот за надворешни работи на Грција, Никос Коѕиас и со медијаторот Метју Нимиц. Македонија и Грција разменија нацрт- спогодби што треба да бидат преточени од посредникот Нимиц во една, во рамките на резолуциите 817 и 845, од привремената спогодба меѓу двете држави.

„Процесот за спорот за името е во деликатна фаза и шпекулациите од одредени медиуми се штетни. Јас стојам на моето јавно соопштение и ја информирам јавноста дека не сум дал дополнителни неформални изјави“, објави Димитров на „Твитер“ по демантот на грчкото МНР дека македонската страна се согласила на промени на Уставот на средбата во Виена.

На 27. јануари годинава во Клубот на пратениците, се одржа координативен состанок на државно- политичкиот врв во врска со разговорите за името.