!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Тевдовски: Најновата еврообврзница е со досега најниска каматна стапка


Скопје, 12 јануари, 2018 - 16:31 (META) 

Парите од еврообврзницата, со која Македoнија на странскиот пазар се задолжи за половина милијарда евра, ќе бидат потрошени за покривање на буџетскиот дефицит, враќање на стари долгови, реализација на капитaлни инвестиции, зголемување на средствата за одбраната и за зголемени плати во образованието и здравството, информираше денеска министерот за финансии, Драган Тевдовски.

Според него, историски најниската каматна стапка од 2,75 проценти за еврообврзницата е показател дека на меѓународниот финансиски пазар и меѓу инвеститорите постои доверба во перспективите на македонската економија и стабилноста на земјата.

Просечната каматна стапка на претходните еврообврзници изнесуваше 5,34 проценти.

– Парите од оваа евробврзница нема да се трошат за непродуктивни работи, споменици и фасади. Дел од овие пари ќе се потрошат и за покривање на стари долгови по овие ставки. Во буџетот, кој што е изгласан од Собранието, е проектирано за кои капитални инвестиции ќе бидат потрошени парите – нагласи министерот за финансии.

Тој додаде дека, првпат во историјата каматната стапка на еврообврзницата е пониска од проектираниот пораст на економијата од 3,2 проценти. Со еврообврзницата ќе бидат вратени и претходно направени долгови, па така на 29 јануари ќе се отплати првата рата на „Пи би џи“ (PBG) кредитот земен во 2013 година во износ од 95 милиони евра.

– Исто така, ги искористивме поволните услови на меѓународните пазари и срушивме дел од огромниот ѕид на долгови со кои се соочува Македонија во 2020 година. Предвреме вративме една третина од еврообврзницата од 270 милиони евра издадена во 2015 година, која достасува во декември 2020, и чија што каматна стапка на издавање од 4,875 проценти е значително повисока од каматна стапка на новоиздадената еврообврзница од 2,75 проценти. Со ова го намаливме долгот кој достасува во 2020 година и обезбедивме значително понизок ризик на рефинансирање – додаде Тевдовски.

Тој појасни дека, имајќи предвид што со еврообврзницата враќаме речиси 200 милиони евра претходно наталожени долгови, нето-задолжувањето со оваа еврообврзница изнесува околу 300 милиони евра.

На новинарско прашање во однос на транспарентноста на целата постапка за задолжување со еврообврзницата, министерот за финансии рече дека и при претставувањето на буџетот во Собранието најавил дека дефицитот ќе се финансира од позајмување од домашниот или од странските пазари, но под услов каматните стапки да се поволни.

Одлуката за новото задолжување била објавена во Службен весник, но не е најавена на прес-конференција оти ако било соопштено дека се планира издавање на еврообврзница, тоа би можело да ја крене цената, бидејќи станува збор за ценовно чувствителна информација.

– Со тоа што излеговме на меѓународен пазар, средствата на домашните банки ги оставивме слободни и може да се употребат за финансирање во домашната економија – дополни Тевдовски.


Елаборатите за спомениците од „Скопје 2014“ тргнале, ама уште не стигнале во Владата


Скопје, 16 ноември, 2017 - 13:33 (META) 

Владата тврди дека Министерството за култура сè уште ги нема доставено елаборатите подготвени од работната група за некои од спомениците од проектот „Скопје 2014“, но од Министерството велат дека елаборатите се испратени до сите надлежни институции.

Портпаролот на Владата, Миле Бошњаковски, на денешниот брифинг рече дека до Владата сè уште не се пристигнати елаборатите и дека кога ќе пристигнат, ќе бидат ставени на дневен ред на некоја од наредните седници на Владата.

Портпаролот на Министерство за култура, Петрит Сарачини, пак, за „Мета“ вели дека елаборатите се испратени до сите надлежни институции, како Владата, Град Скопје и Општина Центар.

– Елаборатите се испратени, институциите ги анализираат и се очекуваат предлози за решенија. Постапките за одлучување по овие елаборати ќе ги води надлежната институција што била одговорна за реализација на овие проекти – нагласи Сарачини.

Сарачини вели дека јавноста не треба да притиска, туку да почека процедурите за овие елаборати да се испочитуваат целосно, во согласност со законите, и дека потоа тие ќе бидат објавени.

Министерот за култура, Роберт Алаѓозовски, пред три дена во изјава за медиуми рече дека работната група ги подготвила елаборатите за спомениците на Андон Јанев – Ќосето кај комплексот судови, на Мајка Тереза и за „Воин на коњ“ на плоштад Македонија и додаде дека тие ќе бидат проследени до Владата, која ќе одлучи што понатаму со нив.

– Дел од елаборатите се подготвени и ги разгледуваме надлежностите на институциите на локално и на централно ниво за овие објекти – рече министерот за култура, кој појасни дека процедурите се толку згрешени што е сложено да се отплетка кој е надлежен да преземе активности во однос на овие објекти поставени во Скопје.

Алаѓозовски изјави дека културното наследство не само што не било соодветно третирано, туку дека било и злоупотребено.


Владата ќе одлучува што со „Воинот на коњ“, „Ќосето“ и „Мајка Тереза“


Скопје, 13 ноември, 2017 - 13:27 (META) 

Министерството за култура ги добило од работната група првите елаборати за спомениците на Андон Јанев – Ќосето кај коплексот судови, на „Мајка Тереза“ и за „Воин на коњ“ на плоштад „Македонија“, соопшти министерот за култура, Роберт Алаѓозовски, кој денеска учествуваше на конференцијата за програмата на Европската Унија „Креативна Европа“.

Елаборатите, како што изјави Алаѓозовски, ќе бидат проследени до Владата, која ќе одлучи што понатаму со нив.

– Дел од елаборатите се подготвени и ги разгледуваме надлежностите на институциите на локално и на централно ниво за овие објекти – рече министерот за култура, кој појасни дека процедурите се толку згрешени што е сложено да се отплетка кој е надлежен да преземе активности во однос на овие објекти поставени во Скопје.

Алаѓозовски изјави дека културното наследство не само што не било соодветно третирано, туку дека било и злоупотребено.

– Многу актуелни градби, како скулптуралната композиција која носи чуден наслов „Мајка Тереза“ беше погрешно финансирана од програмата за културно наследство, иако таму нема никакво културно наследство. Истото се однесува и за спорните градби на Плаошник. Ние ќе го заштитиме вистинско културно наследство. Обезбедивме средства за манастирот Трескавец, обезбедивме средстав за Офицерскиот дом, ќе обезбедиме средства и за нашето најзагрозено културно наследство – рече Алаѓозовски, додавајќи дека нема да се дозволи проектот „Скопје 2014“ да продолжи и да повлекува финансиски средства.


ВМРО-ДПМНЕ: Сè што СДСМ ќе урне, ќе го обновиме кога ќе се вратиме на власт


Скопје, 3 ноември, 2017 - 20:26 (META) 

ВМРО-ДПМНЕ порача вечерва дека сè што СДСМ „ќе урне и ќе уништи од она што е создадено, веднаш по враќањето на власт ќе биде обновено и вратено таму каде што било и такво како што било“. Опозициската партија се закани и дека ќе се бара одговорност за секој што ќе учествува во разни уривања, уништување или преместувања.

Во соопштението партијата порачува дека отстранувањето на споменикот на Ќосето, како и на други личности, ќе внесе раздор во народот.

„ВМРО-ДПМНЕ укажува дека политиката на пресметка или обид за собирање на политички поени на СДС преку отсранување на спомениците на композиција на светица која за време на својот живот била и добитник на Нобелова награда за мир, скопјанката Мајка Тереза, или преку отстранувањето на обележјето на македонскиот војвода Андон Јанев Ќосето, близок и многу доверлив соработник на Гоце Делчев, Даме Груев и Христо Татарчев, човек кој сериозно го ризикувал својот живот за целите на македонската револуционерна борба за слобода, ќе биде чекор кој ќе внесе негативна енергија и нов раздор во македонското општество“, се вели во партиското соопштение.

Партијата му порача на владејачкиот СДСМ „да се фокусира на градење наместо на уривање, на создавање наместо на уништување и на решавање на проблемите на граѓаните“.


Донаторите на споменикот на Ќосето ќе останат без просториите во Скопје


Скопје, 31 октомври, 2017 - 12:17 (META) 

Владата на денешната 34. седница, меѓу другото, ќе одлучува и за одземање на просториите во Скопје на Здружението за духовно обединување на Сетинци, Попадинци и Крушоради од Лерин, кое се јавува како донатор на неколку споменици од проектот „Скопје 2014“.

„На дневниот ред на Владата ќе се најде и предлог-одлуката за престанок на трајно користење на недвижност на Здружението за духовно обединување на Сетинци, Попадинци и Крушоради од Лерин во Македонија – Скопје“, стои во соопштението од владината прес-служба за денешната седница.

Според податоците, објавени во „Службен весник“, ова Здружение од претходната влада на трајно користење доби деловни простории, со вкупна површина од 49 квадратни метри, на улицата Вељко Влаховиќ во центарот на Скопје. Покрај просториите, Здружението на трајно користење од претходната влада доби и половно возило „ауди а4“, со проценета вредност од 300.000 денари, односно околу 5.000 евра.

Здружението за духовно обединување на Сетинци, Попадинци и Крушоради од Лерин ги донираше споменикот на генерал Михајло Апостолски, кој е поставен кај клучката „Континентал“, потоа контроверзниот споменик на Андон Лазов Јанев – Ќосето, кај Судска палата, споменикот на Ѓорѓи Сугарев кај комплекост факултети. Донација на Здружението се и спомениците на Никола Петров Русински и на Пере Тошев поставени во близина на Универзитетската библиотека, споменикот на Света Лидија, кој е поставен кај плоштадот Богородица и споменикот Децата бегалци од Егејска Македонија, кај хотелот „Холидеј ин“.

На денешната седница Владата ќе решава и по предлог-одлуката за престанок и за давање на трајно користење на недвижност на Републичко здружение на децата бегалци и нивните потомци од Егејскиот дел на Македонија „Т’га за југ“ од Скопје.


Непобедени се сите оние кои се бореле за слобода, порача Шекеринска од Прилеп


Прилеп/Куманово, 11 октомври, 2017 - 17:14 (META) 

Непобедени се сите оние кои се бореле за слобода и како резултат на нивната борба пред многу години, денес Македонија е независна и суверена држава, но секоја генерација има своја борба, изјави за медиумите вицепремиерката и министерка за одбрана, Радмила Шекеринска, во рамките на денешната свеченост во Прилеп по повод 11 Октомври – Денот на народното востание.

Шекеринска ја предводеше делегацијата на Министерството за одбрана, придружувана од началникот на Генералштабот на АРМ, Методија Величковски, која положи свежо цвеќе на споменикот на Методија Андонов – Ченто, на споменикот на Кузман Јосифовски – Питу и на спомен-обележјето Могила на непобедените.

– Нашата држава покажува дека е зрела да продолжи да ја развива демократијата и економијата и да ја зајакнува безбедноста, и дека на овој ден, покрај почитта која ја даваме на загинатите борци, време е да се посветиме и на оние кои денес безрезервно ја штитат нашата држава и државни интереси – изјави Шекеринска.

Владината делегација, предводена од министерот за транспорт и врски Горан Сугарески, придружуван од министерот за странски инвестиции Аднан Ќахил и заменик-министерот за здравство Гоце Чакаровски, положи свежо цвеќе и оддаде почит на паднатите борци на НОБ во Прилеп.

– Борбата за европска Македонија се темели и почива на она што значи слобода, демократија и човекови права – рече Сугарески, додавајќи дека демократските и развојни процеси кои се почнати нема да запрат и дека Македонија ќе биде пристојно место за живеење.

Празникот 11 Октомври беше одбележан и во Куманово, каде владина делегација предводена од министерот за внатрешни работи, Оливер Спасовски, министерот без ресор задолжен за регулатива за подобрување на инвестициската клима за домашните претпријатија, Зоран Шапуриќ, и министерката без ресор задолжена за странски инвестиции Зорица Апостолска, положија свежо цвеќе на Спомен-костурницата во Куманово.

На положувањето свежо цвеќе учествуваа и делегации на Сојузот на борците, делегации на Собранието на Република Македонија и на Општина Куманово, како и делегации на невладини организации и граѓани.


Врхушката на ВМРО-ДПМНЕ барала амнестија, Заев тврди дека не прифатил


Скопје, 6 јуни, 2017 - 23:09 (META) 

Имаше барања од врхушката на поранешната владејачка партија, но тие барања беа отфрлени, изјави вечерва премиерот Зоран Заев во интервју за националниот сервис МРТВ, одговарајќи на прашањето дали во изминатиот период имало разговори за амнестија на функционери од ВМРО-ДПМНЕ. Тој истакна дека правдата мора да важи за сите, односно дека дури и неговите најблиски соработници и членови на семејството ќе треба да одговараат доколку го прекршат законот.

Новата Влада нема да урива и да разместува споменици, затоа што тоа значи дополнителни трошоци, рече Заев. Сепак, тој истакна дека „сака барем една фасада да соголи за да покаже колку е тоа грдо“, но дека тоа е само лична желба, а како премиер не може да дозволи такво трошење пари на граѓаните, како и дека е ставен мораториум за изградба на споменици.


Сириската војска целосно ја презела контролата врз Палмира од милитантите на ИД


Дамаск, 2 март, 2017 - 20:34 (META) 

Сириската војска, поддржана од Русија, целосно ја презела контролата врз античкиот град Палмира од милитантите на Исламска држава, потврдиле властите во Дамаск и во Москва, јавува „Би-би-си“.

Војската на Сирија и други провладини сили, според извештаите, навлегле во градот и ги истиснале милитантите на ИД, со што ставиле крај на втората окупација на Палмира од страна на џихадистичката група.

Борците на ИД првпат беа истерани од Палмира во март минатата година, но успеаја повторно да го заземат градот.

За време на првата окупација, милитантите уништија дел од античките споменици и градби во Палмира, кои беа дел од светското културно наследство.


ИД го уништила Тетрапилонот во Палмира


Дамаск, 20 јануари, 2017 - 13:44 (META) 

Екстремистите на Исламска држава го уништиле Тетрапилонот, еден од најпознатите споменици во древна Палмира, како и фасадата на Римскиот театар, јавуваат сириските медиуми.

Сириската новинска агенција САНА не објави детали, ниту прецизира кога спомениците се оштетени.

Џихадистите на ИД минатата година уништија неколку древни храмови во Палмира.

Тетрапилон е платформа на која се наоѓаат четири столба од кои сочуван е само еден од изворните, изработени од египетски гранит.

ИД ја држи Палмира под контрола од декември минатата година, кога вторпат го освои градот.


Подземен контејнер пред споменикот на Григор Прличев во Охрид


Охрид, 9 септември, 2016 - 11:35 (META) 

По Струга и Дебар, како дел од проектот на Центарот за развој на Југозападниот плански регион, и во Охрид ќе бидат поставени три подземни контејнери во централното градско подрачје.

Локациите биле предложени од секторот за комунални дејности, сообраќај и улици и од секторот за урбанизам на Општината, а биле усвоени на седница на Советот на Охрид.

Охридската јавност реагира на избраната локација за едниот од контејнерите што се поставува. Имено, тој ќе биде поставен на само три метри од споменикот на Григор Прличев, македонскиот поет и преродбеник, роден во Охрид.

Најзагрижените предлагаат, кога веќе не може да се помести контејнерот, тоа да се направи со споменикот, кој, пак, е тука лоциран со децении, пред Центарот за култура што го носи името на Прличев.