!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Врховен суд: Прво да образложат, па после ќе добијат увид во списите за Грујовски и за Бошковски


Скопје, 13 септември, 2017 - 15:59 (META) 

Прво Советот за утврдување на факти писмено да го образложи барањето за пристап до списите од предметите „Таргет“ и „Тврдина“, а потоа Врховниот суд ќе определи време и простор, соопштиле од судот за државната новинска агенција МИА.

Реакцијата на судот следи откако Советот денеска обвини дека на членовите на комисијата која истражува дали судиите кои одлучувале по барањата за притвори на Горан Грујовски и на Никола Бошковски денеска не им било дозволено да влезат во Врховниот суд, по наредба на претседателот на судот Јово Вангеловски.

– Во време на одржување на јавна седница по повод жалба против пресуда за доживотен затвор, ниту безбедносно ниту технички е можно извршување на активности на Советот – рекле од Врховен суд, додавајќи дека Советот навремено писмено бил известен и дека на неговите претставници ќе им биде определен термин за прием во судот во согласност со прописите.

Од Врховниот суд навеле дека целокупната писмена кореспонденција помеѓу Врховниот суд и Советот за утврдување на факти е доверлива и дека изнесувањето содржини од писмената кореспонденција со ознака „доверливо“ од страна на Советот претставува кривично дело.


Јанева: Уште ќе разговараме со Советот на јавни обвинители, ништо не е конечно


Скопје, 20 февруари, 2017 - 17:06 (META) 

Специјалната јавна обвинителка, Катица Јанева, и петмина обвинители од нејзиниот тим на денешната средба со членовите на Советот на јавни обвинители, дискутирале по барањето на Советот за давање увид во списите од документацијата од предметот „Пуч“. Тие, како што соопштија од Советот, се договориле ваквите средби да продолжат по потреба и во иднина.

Јанева по завршувањето на состанокот, кој траеше два часа, изјави дека на него не било разговарано само за предметот „Пуч“ туку и за повеќе прашања.

– Беше работна средба и мислам дека ќе има и други работни средби. Разговаравме за тековни работи, за проблемите со кои се соочува СЈО. Разговаравме за многу прашања – рече Јанева.

Прашана дали ќе му ги даде на Советот материјалите за „Пуч“, специјалната јавна обвинителка рече дека „уште ќе се разговара, зашто уште ништо не е конечно“ и повтори дека ќе има уште средби.

Јанева и претседателот на Советот на јавни обвинители, Петар Аневски, минатата недела имаа кратка средба, на која беше договорен форматот на денешната средба и беа најавени разговори околу динамиката на предавање на материјалите од „Пуч“.

СЈО на 18 јануари годинава соопшти дека се откажува и го повлекува обвинението за случајот „Пуч“, во кој меѓу обвинетите беа лидерот на СДСМ, Зоран Заев, и поранешниот директор на Управата за безбедност и контраразузнавање (УБК), Зоран Верушевски, бидејќи фактичката состојба прикажана во обвинителниот акт била во спротивност со доказите со кои располага СЈО, како и со наодите во истражните постапки „Таргет“ и „Тврдина“.

По десетина дена, Советот на јавни обвинители до СЈО и до Кривичниот суд во Скопје испрати барање да му ги достават списите од „Пуч“, „заради разјаснување и согледување на дејствата преземени од Јанева“.

Предметот „Пуч“ СЈО го презеде од Основното јавно обвинителство за гонење организиран криминал и корупција во декември 2015 година.


Јанева пред Советот на јавни обвинители ќе го образложува повлекувањето на „Пуч“


Скопје, 14 февруари, 2017 - 11:26 (META) 

Специјалната јавна обвинителка, Катица Јанева денеска во 12 часот во Советот на јавни обвинители ќе одговара на прашањата на Советот за одлуката на СЈО да го повлече обвинението за предметот „Пуч“.

Претседателот на Советот на јавни обвинители, Петар Аневски за „Телевизија 24“ потврдил дека Јанева е повикана да ги образложи причините зошто СЈО се откажа од обвинението за „Пуч“.

Специјалното јавно обвинителство обвинението за случајот „Пуч“ го повлече на 18 јануари, а две недели подоцна Советот на јавни обвинители ги побара списите од предметот, во кој обвинети беа лидерот на СДСМ, Зоран Заев и поранешниот директор на Управата за безбедност и контраразузнавање, Зоран Верушевски.

Од СЈО за „Мета“ тогаш потврдија дека ќе одговори на барањето на Советот на јавни обвинители и во најкраток можен рок ќе ги достави списите и документацијата од предметот „Пуч“.


Јанева бара, a судот не дава копии од списи и докази за „Пуч“


Скопје, 1 март, 2016 - 17:15 (META) 

Судијата што го води случајот „Пуч“, во кој меѓу обвинетите е и лидерот на СДСМ, Зоран Заев, ги одбил барањата на Специјалното јавно обвинителство да им бидат доставени копии од списи и електронски докази.

Во образложението на ваквата одлука од судот велат дека со нивно доставување би била направена повреда на обврската за чување на класифицирани информации бидејќи државните институции што ги класифицирале документите, сè уште не ја тргнале таквата назнака.

Специјалното обвинителство минатиот месец трипати побарало да им бидат доставени копиите од списи и листа на електронски докази, но надлежниот судија ги одбил сите. Последното барање пристигнало на 26 февруари, во кое, според Основниот суд Скопје 1, СЈО навело дека не се согласува со образложението на судот. Надлежниот судија го одбил и ова барање.

„Ценејќи дека Обвинителството за гонење кривични дела поврзани и кои произлегуваат од незаконското следење на комуникациите ја презело надлежноста врз конкретниот предмет, при што наведените списи и електронски докази не им биле доставени од Јавното обвинителство за гонење организиран криминал и корупција, судот утврди дека постојат законски пречки за доставување копии од наведените списи и електронски докази бидејќи во случајов се работи за докази класифицирани најнапред како државна тајна, а потоа со декласификација се набележани со напомената службена тајна. Од друга страна, се работи за списи и за електронски докази кои се сочинети од разни државни органи, кои ги класифицирале како државна тајна, па судот во никој случај не би можел да издава копии или преписи на овие класифицирани докази, особено без изречна дозвола и одобрение од државните органите што ги издале, бидејќи тоа нема да бидат веродостојни копии согласно законот и други прописи, а судот не е оригинерен издавач на истите докази и списи“, стои во соопштението на судот.

Оттаму додаваат дека Кривичниот суд и понатаму им ги става на располагање просториите и техничките можности на обвинителите од СЈО да вршат увид во предметот „Пуч“.

Поради недоставени списи и електронски докази, како што пренесуваат дел од медиумите, можно е повторно да биде одложено рочиштето за „Пуч“, кое е закажано за утре во 10 часот.

Од судот, пак, велат дека главната расправа за „Пуч“ ќе продолжи утре.

„Главната расправа за конкретниот предмет продолжува утре, 2 март 2016 година, во 10 часот. Досега беа закажани осум главни расправи, но сите беа одложени, а последните две беа одложени токму по барање на обвинителството (специјалното обвинителство – н.з.) заради увид во предметот“, велат од Основниот суд Скопје 1.