Во железничка несреќа во Турција загинаа најмалку 24 лица


Истанбул, 9 јули, 2018 - 12:12 (META) 

Најмалку 24 лица загинаа во железничка несреќа кога воз излета од шините на западот на Турција, соопштија турските власти за новиот биланс на жртвите.

На местото на несреќата која се случи во неделата на границата со Грција, рано утринава беше продолжена операцијата за потрага и спасување.

Патничкиот воз со вкупно 368 лица излета кај селото Сарилар кај Истанбул, на границата со Грција.Околу стотина возила на Итна медицинска помош како и воени хеликоптери се упатиле за помош на повредените патници.

Локалните власти соопштија дека несреќата се случила поради обилните дождови во тој регион.


Шпанската крајбрежна стража спасила 56 мигранти во Средоземно море


Мадрид, 20 јануари, 2018 - 16:17 (META) 

Шпанската крајбрежна стража соопшти дека спасила 56 мигранти од Африка од два чамци на Средоземно море.

Еден чамец со 23 мигранти бил пресретнат кај Гибралтарскиот залив, додека друг чамец со 33 мигранти е лоциран источно од малиот остров Алборан, на пола пат помеѓу Африка и Шпанија.

Меѓународната организација за миграција соопшти дека минатата година 22.800 мигранти дошле во Шпанија, што е двојно повеќе во однос на 2016 година.


Тела на шестмина мигранти пронајдени во близина на Ланзароте


Мадрид, 15 јануари, 2018 - 19:20 (META) 

Тела на шестмина мигранти се пронајдени во близина на Канарските острови, соопшти шпанската полиција.

Спасувачките служби наведоа дека, телата на петмината мигранти биле пронајдени во голем гумен чамец во близина на островот Ланзароте, додека шестиот починал подоцна откако бил извлечен од водата.

Полицијата подоцна пронашла 18 мигранти кои успеале да допливаат до крајбрежјето. Илјадници мигранти секоја година тргнуваат од Африка со надеж дека ќе стигнат до крајбрежјето на Европа, ризикувајќи ги своите животи.


ДЗС: Се преземаат мерки за спречување поплави, неколку места се критични


Скопје, 2 декември, 2017 - 14:03 (META) 

На одредени места постои опасност од излевање на водата надвор од речните корита, предупредија од Дирекцијата за заштита и спасување (ДЗС). Од дирекцијата велат дека зголемување на нивото на водата е забележано на реките Треска, Радика, Сатеска, Кичевска, по горниот тек на Вардар во атарот на селото Раотинце, како и на нивните притоки.

„Подрачните одделенија за заштита и спасување, во соработка со единиците на локална самоуправа, извршија увид на критичните точки на водотеците. Се преземаат мерки за спречување поплави“, велат од ДЗС.

Од ДЗС додаваат дека будно ја следат состојбата на терен и дека силите за заштита и спасување се во состојба на зголемена мобилност, поради најавите за интензивирање на врнежите од дожд наредните денови.

Министерот за земјоделство, шумарство и водостопанство, Љупчо Николовски, вели дека се во постојан контакт со Управата за хидрометеоролошки работи.

– Ја следиме состојбата и штом ќе добиеме соодветни сознанија, односно официјални потврди, ќе се спроведат сите процедури што се во наша надлежност – изјави Николовски по презентацијата на предлог-буџетот за земјоделство за 2018 година.


Авганистанските сили спасиле 30 луѓе од талибански затвор


Кабул, 19 ноември, 2017 - 12:15 (META) 

Најмалку 30 лица се спасени во рација што ја спровеле авганистанските сили заедно со специјалните странски сили во талибански затвор во провинцијата Хелманд.

Ова го соопштија војската и локалните власти.

Помеѓу спасените се и четири деца кои имаат помалку од 12 години и двајца полицајци.

Талибанците уапсиле повеќе од 20 лица поради давање помош на владата или затоа што се членови на семејствата на авганистански војници или полицајци.

Во меѓувреме, талибанците соопштија дека луѓето кои се спасени се криминалци осудени поради грабежи, киднапирања и други кривични дела.


Во поплавите на југот на Азија настрадаа 600 лица


Њу Делхи, 20 август, 2017 - 16:02 (META) 

Околу 600 лица настрадаа во поплавите на југот на Азија каде што акцијата за спасување се уште трае. Во поплавите и свлечиштата предизвикани од нив, биле погодени повеќе од еден милион луѓе.

Властите на Индија побарале помош од војската во две области кои се најгусто населени, а во кои загинаа 55 лица. Во индиската држава Утар Прадеш речиси 100.000 луѓе, од своите домови биле префрлени во засолништа.Индиската држава Бихар е најтешко погодена, каде што бројот на жртвите се зголеми на 153.

Најмалку 20 од 28 милиони жители на Непал се погодени од поплавите, а се проценува дека настрадале 123 лица.

Неколку милиони луѓе во Непал, Бангладеш и Индија се соочуваат со недостаток на храна и постои опасност од заразни болести поради загадената вода. Меѓународниот комитет на Црвениот крст повика на итна акција поради хуманитарната криза на југот на Азија.


Светски познат консултант ќе го спасува „Агрокор“


Загреб, 5 април, 2017 - 11:23 (META) 

Антонио Алварез Трети, новоназначениот извршен директор за реструктурирање на хрватскиот гигант „Агрокор“, вчера попладнето пристигна во Загреб и го претстави и својот тим, во кој е само едно лице по потекло од Хрватска, јавија хрватските медиуми.

– Нема никаква гаранција дека ќе успееме, но нема да бидам сам, имам тим што го одбрав. Ќе комуницираме со сите кредитори и компании и очекуваме напредок во целиот процес. Сакаме да создадеме отворен однос. Ќе направиме сè за да ги зачуваме работните места. Мојот прв чекор е да создадам стабилност – вели Алварез.

Хрватскиот гигант „Агрокор“, кој работи и во Србија, БИХ и во Словенија, минатата седмица потпиша предстечаен договор со банките и со другите кредитори, на кои им должи околу 10 милијарди евра, да се направи напор да се задржи ликвидноста на компанијата. Сметките на „Агрокор“ се блокирани од минатата седмица поради долг за даноци од околу 10 милиони евра.

Алварез Трети има 25-годишно искуство и е еден од водечките независни глобални советници за реструктурирање. Тој е извршен директор за реструктурирање во познатата консултантска куќа „Алварез и Маршал“, која работи низ целиот свет, а денес вработува повеќе од 2.900 луѓе во 45 канцеларии во 18 земји на четири континенти.


Пронајден исчезнатиот планинар


Кавадарци, 3 март, 2017 - 15:19 (META) 

Планинарот исчезнат близу Тиквешко Езеро, е пронајден вчера жив во близина на селото Шешково, соопшти полицијата.

К.К. од Скопје бил исчезнат три дена, а завчера биле пронајдени неговите четворица придружници, од кои тој се одвоил.

По пронаоѓањето, К.К. бил однесен во Здравствен дом – Кавадарци, каде е констатирано дека се наоѓа во добра психофизичка состојба.


Исчезнал планинар во тиквешко Мариово


Галиште, 2 март, 2017 - 12:57 (META) 

Планинар е исчезнат веќе четврти ден во тиквешко Мариово и по него се трага, а полицијата вчера спасила четворица негови придружници, кои биле без храна и вода близу врвот Орле кај селото Галиште.

Пријавата е добиена вчера попладне, па бил ангажиран хеликоптер. Спасувачката екипа пронашла четворица скопјани на возраст од 19 до 33 години, кои кажале дека два дена претходно загубиле контакт со петтиот член на групата.

МВР известува дека се прават напори за пронаоѓање на исчезнатиот.


Спасувачки хеликоптер се урна во Италија


Рим, 24 јануари, 2017 - 13:55 (META) 

Хеликоптер на спасувачките служби со шест лица се урна во Централна Италија, јавуваат светските агенции, притоа не наведувајќи информации дали членовите на екипажот преживеале.

Италијанските медиуми наведуваат дека хеликоптерот превезувал лице кое се повредило при скијање.

Според првичните информации, леталото не било вклучено во спасувачката операција во хотелот „Ригопјано“, кој минатата недела беше затрупан од лавина снег во истиот регион на Италија и каде досега се потврдени 12 смртни случаи.