!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Советот за безбедност ја продолжи мисијата на ОН во Авганистан


Њујорк, 18 март, 2017 - 12:00 (META) 

Советот за безбедност на Обединетите нации синоќа едногласно ја донесе резолуцијата со која се продолжува мисијата на ОН во Авганистан (УНАМА) до март 2018 година.

Во неа, како што пренесуваат светските медиуми, се изразува сериозна загриженост поради присуството и потенцијалното зајакнување на разгранокот на Исламска држава, што претставува сериозна закана за безбедноста на Авганистан и на земјите во регионот.

Советот за безбедност на ОН ја повика владата на Авганистан да почне да ги решава алармантните закани, кои доаѓаат од талибанците, Ал каеда и од нејзините разграноци и од други екстремистички групи.

Исто така, Советот за безбедност ја повтори поддршката за авганистанските национални одбранбени и безбедносни сили, особено во борбата против тероризмот и насилниот екстремизам.

Според податоците на ОН, минатата година во Авганистан се убиени 3.498 лица, вклучувајќи 923 деца, а уште 7.920 лица се ранети.


Косово заслужува полноправно членство, смета новиот амбасадор на САД во ОН


Њујорк, 22 февруари, 2017 - 13:24 (META) 

Новиот амбасадор на САД во ОН, Ники Хејли, се заложи за полноправно членство на Косово во ОН, пренесува„Коха нет“ (koha.net).

– САД веруваат дека меѓународната заедница треба да признае оти Косово направи големи чекори од прогласувањето независност. Косово заслужува да го заземе местото што му припаѓа во меѓународната заедница, вклучувајќи и полноправно членство во ОН – рекла Хејли на седницата на Советот за безбедност на ОН, која почна вчеравечер.

Таа, сепак, напоменала дека земјата треба да направи многу повеќе за засилување на владеењето на правото.


Состанок на Советот за безбедност на ОН поради ракетните тестови на Северна Кореја


Њујорк, 13 февруари, 2017 - 9:37 (META) 

Соединетите Американски Држави, Јапонија и Јужна Кореја денеска побараа итни консултации во Советот за безбедност на Обединетите нации за севернокорејското лансирање на нов тип балистичка ракета со среден до долг дострел, соопшти денеска претставник на мисијата на САД во ОН.

Како што соопшти јужнокорејската војска, Северна Кореја користела систем „студено исфрлање“, каде проектилот го покрева компресиран гас. Јужнокорејската војска наведе дека станува збор за тип ракети со среден дострел.


Советот за безбедност на ОН го осуди нападот во Ерусалим


Њујорк, 9 јануари, 2017 - 9:42 (META) 

Советот за безбедност на Обединетите нации денеска најостро го осуди терористичкиот напад во Ерусалим, во кој загинаа четири лица и им изрази сочувство на Владата и на народот на Израел.

Како што се наведува во соопштението, неопходно е да се изнесат пред лицето на правдата тие што се одговорни за нападот и се истакнува дека тероризмот во сите облици станува најсериозна закана за глобалниот мир и за безбедноста.


Концептот на две држави е единствениот пат за мир меѓу Израел и Палестина, порача Кери


Вашингтон, 28 декември, 2016 - 21:01 (META) 

Успехот на израeлско-палестинскиот мировен договор, базиран на концептот на две држави, е доведен во голема опасност, истакна денеска државниот секретар на САД, Џон Кери. Тој нагласи дека резолуцијата на Советот за безбедност на Обединетите нации, со која се осудува изградбата на еврејски населби на окупираните палестински територии, е во линија со американските вредности.

Минатиот петок, САД решија да не стават вето и беа воздржани при донесувањето на резолуцијата на Советот за безбедност на ОН, што предизвика жестоки реакции од Израел.

„Концептот на две држави е единствениот пат за постигнување на праведен и долгорочен мир меѓу Израелците и Палестинците. Тоа е единствениот пат да се осигури иднината на Израел како еврејска и демократска држава. Оваа иднина сега е доведена во опасност. Пријателите треба да си ја кажуваат вистината едни на други и пријателството бара заемна почит. Соединетите Држави гласаа во согласност со своите вредности, како што тоа го правеа и претходните администрации на САД во Советот за безбедност на ОН“, рече Кери, пренесува „Би-би-си“.

Американскиот државен секретар истакна дека САД нема да можат да го заштитуваат Израел ако биде дозволено концептот на две држави да биде уништен „пред нивни очи“.

„Израелскиот премиер (Бенјамин Нетанјаху, н.з.) во јавноста го поддржува концептот на две држави, но неговата актуелна владина коалиција има најдесна политичка ориентација во целата историја на Израел, со агенда која е водена од најекстремни елементи. Резултатот од ваквите политики на владата води во спротивен правец, води кон една држава“, посочи американскиот државен секретар.

Новоизбраниот претседател на САД, Доналд Трамп, денеска, во пресрет на говорот на државниот секретар Џон Кери за израелско-палестинскиот судир, на својот официјален твитер-профил напиша дека не смее да се дозволи Израел да биде „третиран со таков презир и со непочитување“, алудирајќи, меѓу другото, на резолуцијата на Советот за безбедност на ОН. Тој му порача на Израел „да остане силен“, бидејќи се ближи 20 јануари, денот кога Трамп и официјално треба да ја преземе функцијата претседател на САД.


Трамп: Израел не смее да биде третиран со презир и со непочитување


Вашингтон, 28 декември, 2016 - 18:46 (META) 

Новоизбраниот претседател на САД, Доналд Трамп, денеска, во пресрет на говорот на државниот секретар Џон Кери за израелско-палестинскиот судир, порача дека не смее да се дозволи Израел да биде „третиран со таков презир и непочитување“.

„Имаа (Израел, н.з) голем пријател во САД, но не повеќе. Почетокот на крајот беше ужасниот договор со Иран и сега ова (Обединетите нации)! Остани силен Израел, 20 јануари се приближува“, напиша Трамп на својот официјален твитер-профил.

Избраниот американски претседател во својата порака алудира на договорот околу нуклеарната програма на Иран, на кој жестоко се спротиставуваше израелскиот премиер, Бенјамин Нетанјаху, како и на неодамнешната резолуција на Советот за безбедност на ОН против еврејските населби на окупираните палестински територии.

Трамп наведува дека прави сè што може да ги „занемари“, како што ги нарекува, „запаливите“ изјави и препреки на претседателот на САД, Барак Обама.

„Мислев дека транзицијата ќе оди лесно, но нема“, вели Трамп.

Државниот секретар на САД, Џон Кери, денеска треба да го претстави планот на администрацијата на Обама во врска со судирот меѓу Израел и Палестина.


Советот за безбедност на ОН го осуди нападот во Берлин


Њујорк, 21 декември, 2016 - 11:32 (META) 

Советот за безбедност на ОН го осуди „варварскиот и малодушен терористички напад“ на божиќниот панаѓур во Берлин и апелира изврштелите да бидат изведени пред лицето на правдата.

„Секој акт на тероризам претставуваа кривичен чин за кој нема оправдување, без разлика кои се мотивите, на тоа каде, кога и кој го извршил“, соопштија од Советот за безбедност.

Одговорноста за нападот со камион во Берлин, во кој загинаа 12 лица, презеде Исламска држава (ИД).


Советот за безбедност на ОН треба да гласа за помош за Алепо


Њујорк, 18 декември, 2016 - 11:24 (META) 

Советот за безбедност на ОН денеска треба да гласа за резолуција со која се бара итен и безусловен пристап на претставниците на Обединетите нации во деловите на Алепо што се под опсада, како и во Сирија за да се овозможи испорака на хуманитарна помош.

Советот на безбедност претпладне ќе одржи консултации за резолуцијата што ја подготви Франција, а потоа ќе биде одржан и состанок на кој членките на Советот треба да гласаат.

Според нацрт-резолуцијата, генералниот секретар Бан Ки-мун се повикува веднаш да распореди персонал на светската организација на терен за да се спроведе „неутрален надзор“ и „директно набљудување“, за да известуваат за евакуациите.

Во документот исто така се наведува дека евакуацијата на цивили мора да биде „доброволна кон дестинации по нивен избор“.

Рускиот амбасадор во ОН, Виталиј Чуркин, во петокот рече дека ќе ја разгледа нацрт-резолуцијата, но беше скептичен дека набљудувачите би можеле бргу да бидат распоредени.


Франција и Германија повикаа на итен состанок на Советот за безбедност на ОН за Алепо


Њујорк, 16 декември, 2016 - 19:43 (META) 

Франција и Германија вечерва повикаа на одржување на итна седница на Советот за безбедност на Обединетите нации (ОН) за ситуацијата во сирискиот град Алепо, јавуваат светските агенции.

Амбасадорот на Франција во ОН, Франсоа Делатр, предупреди дека доколку не се постигне договор за безбедна евакуација на цивилите и не им се овозможи пристап на хуманитарните работници и меѓународните набљудувачи во Алепо, членките можат да свикаат итна специјална сесија на Генералното собрание на ОН.

Високиот комесар на ОН за бегалци, Стефан О’Брајан, вечерва на состанок на Советот за безбедност на ОН треба да го претстави извештајот за ситуацијата во Алепо.

Францускиот амбасадор во ОН изјавил дека Франција почнала со подготовка на нацрт-резолуција за Алепо.


Русија и Кина ставија вето на резолуцијата на ОН за Алепо


Њујорк, 6 декември, 2016 - 10:42 (META) 

Русија и Кина синоќа ставија вето на резолуцијата на Советот за безбедност на Обединетите нации за седумдневен прекин на огнот во сирискиот град Алепо.

Русија во образложението за ветото рече дека прекинот на огнот ќе им овозможи на бунтовниците да се прегрупираат и оти на Вашингтон и на Москва им е потребно време за да разговораат за идните чекори во Алепо.

Против резолуцијата, која ја подготвија Нов Зеланд, Египет и Шпанија, гласаше и Венецуела, додека Ангола беше воздржана.

Другите 11 држави членки на Советот за безбедност на ОН се изјаснија позитивно за резолуцијата.