!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Дипломатските средства за Северна Кореја се при крај, вели амбасадорката на САД во ОН


Вашингтон, 17 септември, 2017 - 19:48 (META) 

Доколку САД ги исцрпат дипломатските опции за да ја убедат Северна Кореја да ја запре нуклеарната програма, тогаш најверојатно работите во свои раце ќе ги преземе Пентагон, вели амбасадорката на САД во Обединетите нации, Ники Хејли, за „Си-ен-ен“.

– Ние сакавме да бидеме одговорни и да ги искористиме сите дипломатски средства за да го привлечеме нивното внимание. Ако тоа не успее, тогаш генералот Џејмс Матис (министер за одбрана на САД) ќе ги преземе работите во свои раце – вели Хејли.

Таа предупредува дека војна би значело уништување на Северна Кореја.

– Ако Северна Кореја продолжи со своето несовесно однесување и ако САД треба да се бранат себе и своите сојузници на секој начин, Северна Кореја ќе биде уништена. Сите го знаеме тоа, но никој од нас не го посакува – вели амбасадорката.

Советот за безбедност на ОН во понеделникот оваа недела усвои нов пакет санкции за Северна Кореја како одговор на шестиот и најголем нуклеарен тест на Пјонгјанг.

Американскиот претседател Доналд Трамп санкциите ги нарече „уште еден мал чекор“. Хејли вели дека тие се значајни, но се близу до границите на тоа што САД можат да го постигнат преку ОН.

– Исцрпевме речиси сè што Советот за безбедност засега може да направи – вели Хејли.


Ракетниот тест е подготовка за воени акции во Пацификот, порача Пјонгјанг


Пјонгјанг, 30 август, 2017 - 10:49 (META) 

Севернокорејскиот лидер Ким Џонг-ун го оценил вчерашното тестирање на балистичката ракета како успешно и го опишал како подготовка за напад на американскиот остров Гуам во Пацификот, се наведува во соопштението што го пренесе државната новинска агенција на Северна Кореја – КЦНА.

Во соопштението се наведува дека Ким Џонг-ун изразил големо задоволство поради успешниот тест и наредил уште неколку слични тестирања во области во Тихиот Океан.

Агенцијата КЦНА истакна дека балистичкиот тест на Пјонгјанг е одговор на заедничките воени вежби на САД и на Јужна Кореја.

Советот за безбедност на Обединетите нации (ОН) синоќа одржа итен состанок на кој остро го осуди лансирањето на балистичката ракета кон Јапонија и го повика Пјонгјанг да се откаже од ракетната и од нуклерната програма.

Советот за безбедност на ОН ги оцени акциите на Северна Кореја како „невидени“, наведувајќи дека се изведени со намера да се загрози мирот и стабилноста во регионот. Советот го повика Пјонгјанг да преземе „директни и конкретни мерки“ за намалување на тензиите на Корејскиот Полустров.

Итниот состанок беше одржан на барање на Вашингтон, Токио и на Сеул, откако Пјонгјанг вчера истрела балистичка ракета која ја прелета Јапонија пред да падне во Тихиот Океан.


Северна Кореја истрела ракета преку Јапонија, итна седница на Советот за безбедност на ОН


Пјонгјанг, 29 август, 2017 - 10:45 (META) 

Советот за безбедност на Обединетите нации (ОН) денеска ќе одржи итна седница на барање на САД, Јапонија и на Јужна Кореја, откако Пјонгјанг истрела балистичка ракета што ја прелета територијата на Јапонија пред да падне во Тихиот Океан.

Како што јавуваат светските медиуми, сирените за тревога се активирале во северниот дел на Јапанија, предупредувајќи ги луѓето да побараат засолниште, а железничкиот транспорт бил прекинат.

Јапонскиот премиер Шинзо Абе денеска изјавил дека во текот на 40-минутниот телефонски разговор со американскиот претседател, Доналд Трамп, се согласил да се засили притисокот на Северна Кореја.

Тој истакнал дека потегот на Пјонгјанг претставува „сериозна закана, без преседан“.

Истовремено, Северна Кореја поднела жалба до Советот за безбедност на ОН поради заедничките воени вежби на САД и на Јужна Кореја, наведувајќи дека таквите акции се провокација во екот на тензиите на Корејскиот Полуостров.

Советот за безбедност на ОН на почетокот на август усвои резолуција која предвидува воведување на нови, поостри санкции кон Северна Кореја, откако Пјонгјанг во јули истрела интерконтинентална балистичка ракета, втора по ред.

Северна Кореја претходно се закани дека би можела да истрела ракета кон американскиот остров Гуам во Пацификот, на што претседателот на САД, Доналд Трамп, изјави дека во таков случај Пјонгјанг ќе се соочи со „оган и бес“.


Северна Кореја е непосредна воена закана, смета министерот за одбрана на САД


Сингапур, 3 јуни, 2017 - 12:01 (META) 

Северна Кореја забрзано развива ракета со нуклеарна боева глава која може да претставува закана за Соединетите Американски Држави и за други земји, изјави денеска американскиот министер за одбрана, Џејмс Матис, говорејќи на меѓународна конференција во Сингапур.

Министерот за одбрана на САД ја нарекол Северна Кореја „непосредна воена закана“, јавуваат светските агенции. Матис истакнал дека администрацијата на американскиот претседател Доналд Трамп е охрабрена од тоа што Кина повторно покажала посветеност на соработката со САД и со другите земји што би влијаело на тоа Пјонгјанг да ја напушти програмата за нуклеарно оружје.

Советот за безбедност на Обединетите нации (ОН) вчера усвои резолуција со која се воведуваат санкции против четири институции и 14 севернокорејски функционери, вклучувајќи го и функционерот за кого се верува дека е на чело на разузнавачките служби на земјата.

Текстот на документот што го предложија САД е усвоен едногласно, а резолуцијата ја поддржа и Кина.


Советот за безбедност на ОН се закани со нови санкции кон Пјонгјанг


Њујорк, 20 април, 2017 - 21:12 (META) 

Советот за безбедност на Обединетите нации вечерва ја усвои резолуцијата со која остро се осудуваат последните тестирања на ракети од страна на Северена Кореја и се закани со нови санкции кон Пјонгјанг, јавуваат светските агенции.

Со резолуцијата, која е усвоена едногласно, се осудува однесувањето и „илегалните активности“ на властите во Пјонгјанг, кои се повикуваат повеќе да не изведуваат нуклеарни проби и тестирањата на ракети, забранети со претходните резолуции на Советот за безбедност на ОН.

„Илегалните активности на Северна Кореја со нуклеарни и со балистички ракети во голема мера доведуваат до зголемување на тензиите во регионот и пошироко“, било наведено во резолуцијата.

Резолуцијата е усвоена по договор со Русија, која денеска демантираше дека го блокирала текстот, туку дека сакала во него да се вметне формулацијата „низ дијалог“, која претходно била исфрлена од документот на барање на САД.

Резолуцијата ја поддржала и Кина, која е сојузник на Северна Кореја.

Инаку, Пјонгјанг е под санкции на ОН од 2006 година.


Русија ја блокираше осудата на Северна Кореја во СБ на ОН


Њујорк, 20 април, 2017 - 10:52 (META) 

Русија ја блокираше осудата на Северна Кореја во Советот за безбедност на ОН, која ја предложија САД, а беше поддржана и од Кина, по неуспешниот обид на Пјонгјанг за лансирање ракети, велат дипломатите.

Во предложената декларација, во која АФП имале увид, се бара Пјонгјанг да се воздржи од спроведување нуклеарен тест или балистички проектили, по неуспешните лансирања во неделата.

Во декларацијата, која Москва ја блокираше, членовите на Советот за безбедност изразуваат апсолутна загриженост поради дестабилизирачкото однесувањето на Северна Кореја и најавуваат преземање значајни чекори.

Русија барала во декларацијата да стои претходната формулација, која ја нагласувала потребата за наоѓање решение за ситуацијата преку дијалог, велат неименувани дипломати.

Американската амбасадорка во Обединетите нации, Ники Хејли, испрати порака до Северна Кореја дека САД не сакаат кавга и оти Северна Кореја не треба да ја почне. Таа изјави дека топката сега е кај Северна Кореја и оти тие се на потег.

Генералниот секретар на ОН, Антонио Гутереш, за новинарите изјави дека Обединетите нации во целост ги поддржуват напорите на сите земји, кои се обидуваат да спречат Северна Кореја да стекне капацитети врз основа на кои би можела да стане закана не само за регионот туку и за целиот свет.


СБ на ОН треба да гласа резолуција за Сирија, Русија веројатно ќе постави вето


Њујорк, 12 април, 2017 - 11:33 (META) 

Советот за безбедност на ОН денеска би требало да гласа за резолуција со која се бара сириската влада да соработува во истрагата за нападот за кој постои сомнеж дека е изведен со хемиско оружје во провинцијата Идлиб, а неименувани дипломати наведуваат дека Русија најверојатно ќе вложи вето.

За резолуцијата ќе се гласа во време кога американскиот државен секретар, Рекс Тилерсон, ќе биде во Москва каде ќе де обиде да изврши притисок Русија да ја ревидира својата поддршка кон сирискиот претседател Башар ал Асад.

Дипломатите наведуваат дека се очекува Русија да вложи вето, што би бил осми пат Русија да го искористи своето право во Советот за безбедност да блокира акција на сојузниците против Сирија.

Во резолуцијата сириската влада се повикува да ги обелодени плановите и другите информации за воената операција од 4 април, кога е извршен нападот на Хан Шејхун. Се бара пристап до воздухопловната база за инспекторите на Обединетите нации.

Во нападот загинаа најмалку 87 цивили, меѓу кои 31 дете.

Станува збор за ревидирана нацрт-резолуција, слична на таа што САД, Велика Британија и Франција минатата недела ја проследија до членките на Советот за безбедност, во која се осудува нападот во Идлиб.


Руски државјанин роден во Киргистан осомничен за нападот во Санкт Петербург


Санкт Петербург, 4 април, 2017 - 11:04 (META) 

Руски државјанин, роден во Киргистан е осомничен за бомбашкиот напад во воз, во метрото во Санкт Петербург во кој, вчера загинаа 14 лица, а 49 беа повредени, јавуваат руските агенции, повикувајќи се на службите за безбедност во земјата.

Киргистанските безбедносни служби, како што пренесува „Би-би-си“, го идентификувале напаѓачот како Акбарзон Јалилов, кој, според информациите, бил роден во градот Ош во 1995 година.

Инаку, претходно осомничен беше маж со брада, кој беше снимен од безбедносните камери, но тој, според информациите на медиумите, сам се пријавил во полиција, по што било утврдено дека не е поврзан со нападот.

Рускиот претседател Владимир Путин, кој беше во посета на Санкт Петербуг кога се случи нападот, синоќа го посетил местото на експлозијата каде положил букет цвеќе на влезот од метрото.

Советот за безбедност на Обединетите нации го осуди „варварскиот и кукавички терористички напад“ во Санкт Петербург и повикал сторителите на злосторството да бидат изведени пред лицето на правдата.

Американскиот претседател Доналд Трамп, како што соопшти Белата куќа, телефонски разговарал со рускиот претседател Владимир Путин, при што му изразил сочуство и му дал целосна поддршка во борбата против тероризмот.

„Претседателот Трамп и претседателот Путин се сложија дека е потребно тероризмот дефинитивно и брзо да биде совладан. Претседателот Трамп ја понуди целосната поддршка на американската влада во одговорот кој Москва ќе го даде по убиствениот напад во метрото во Санкт Петербург и ќе пружи помош одговорните да се изведат пред суд“, било наведно во соопштението од Белата куќа, пренесуваат светските агенции.


Советот за безбедност ја продолжи мисијата на ОН во Авганистан


Њујорк, 18 март, 2017 - 12:00 (META) 

Советот за безбедност на Обединетите нации синоќа едногласно ја донесе резолуцијата со која се продолжува мисијата на ОН во Авганистан (УНАМА) до март 2018 година.

Во неа, како што пренесуваат светските медиуми, се изразува сериозна загриженост поради присуството и потенцијалното зајакнување на разгранокот на Исламска држава, што претставува сериозна закана за безбедноста на Авганистан и на земјите во регионот.

Советот за безбедност на ОН ја повика владата на Авганистан да почне да ги решава алармантните закани, кои доаѓаат од талибанците, Ал каеда и од нејзините разграноци и од други екстремистички групи.

Исто така, Советот за безбедност ја повтори поддршката за авганистанските национални одбранбени и безбедносни сили, особено во борбата против тероризмот и насилниот екстремизам.

Според податоците на ОН, минатата година во Авганистан се убиени 3.498 лица, вклучувајќи 923 деца, а уште 7.920 лица се ранети.


Косово заслужува полноправно членство, смета новиот амбасадор на САД во ОН


Њујорк, 22 февруари, 2017 - 13:24 (META) 

Новиот амбасадор на САД во ОН, Ники Хејли, се заложи за полноправно членство на Косово во ОН, пренесува„Коха нет“ (koha.net).

– САД веруваат дека меѓународната заедница треба да признае оти Косово направи големи чекори од прогласувањето независност. Косово заслужува да го заземе местото што му припаѓа во меѓународната заедница, вклучувајќи и полноправно членство во ОН – рекла Хејли на седницата на Советот за безбедност на ОН, која почна вчеравечер.

Таа, сепак, напоменала дека земјата треба да направи многу повеќе за засилување на владеењето на правото.