!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Советот на Европа го разгледува можното укинување на санкциите кон Русија


Стразбур, 27 ноември, 2017 - 10:55 (META) 

Советот на Европа ја разгледува можноста за укинување на санкциите кон Русија затоа што се стравува дека официјална Москва би можела да се повлече од организацијата, пишува „Фајненшел тајмс“, повикувајќи се на изјава на генералниот секретар на Советот на Европа, Торбјорн Јагланд.

– Ќе биде многу лошо доколку Русија ја напушти оваа организација, затоа што конвенциите и судот се многу важни за граѓаните на Русија – рече Јагланд и наведе дека повлекувањето на Москва од Советот за Европа би имало негативно влијание врз Европа.

Јагланд негира дека имал средби со руски претставници кои се заканувале дека Русија ќе се повлече од организацијата. Тој наведува дека одбивањето на Москва да го плати придонесот во буџетот на Советот на Европа може да доведе до тоа Русија доброволно да ја напушти организацијата или на иницијатива на други земји.

Генералниот секретар на Советот на Европа нагласил дека организацијата нема да ги доведе во прашање своите ставови и да ја признае „анексијата“ на Крим, но дека е неопходно трезвено да се проценат овластувањата на организацијата која ги штити правата на луѓето, вклучувајќи ги и на тие што живеат во Русија и на Крим.

Советот на ЕУ на 28 јуни повторно ги продолжи за шест месеци рестриктивните економски мерки против Русија.


Турција ќе дава помалку пари во буџетот на Советот на Европа


Брисел, 9 ноември, 2017 - 9:30 (META) 

Турција одлучи да ги намали средствата кои ги донира во буџетот на Советот на Европа, соопшти генералниот секретар на организацијата, Торбјорн Јагланд.

– Добивме писмо од министерот за надворешни работи Мевлут Чавушоглу во кое не информира дека Турција повеќе не сака да биде голем финансиер. Турција сака повторно да дава редовен приход, но таа треба да ни прецизира кога одлуката ќе биде применета – рече Јагланд, додавајќи дека не му се познати мотивите на Анкара.

Турција ја следи Русија, која во јуни престана да дава придонес во буџетот на Советот на Европа, протестирајќи против критиките на оваа паневропска институција која е задолжена за мониторинг на заштитата на човековите права во 47 земји членки.


Заев – Гњатовскиј: Состојбите во затворите ќе се променат, според препораките на ЕУ


Скопје, 16 октомври, 2017 - 11:09 (META) 

Поради односот на претходната влада, во врска со условите во македонските затвори и односот на полицијата, Македонија во март годинава била соочена со можноста да добие т.н. јавна изјава, која на препорака на Комитетот за превенција од тортура ја испорачува Советот на Европа на земјите што континуирано одбиваат да ги имплеменираат препораките на ова тело, со што се ставаат во редот на земјите што не ги почитуваат човековите права.

Ова на средба со премиерот Зоран Заев го истакнал претседателот на Комитетот со седиште во Стразбур, Микола Гњатовскиј.

„Гледаме дека имате јасна претстава што ви претстои и што треба да се направи. За нас во комитетот во Стразбур е многу важно да воспоставиме и да го одржуваме отворениот дијалог и соработка за овие прашања, особено поради искуството со претходната владина гарнитура, која не исполни ниту едно од ветувањата и не имплементираше ништо од нашите препораки кои произлегоа од загрижувачките услови во затворските институции, како и во постапките на полицијата“, рекол Гњатовскиј, стои во владиното соопштение за средбата.

Заев, заедно со министрите за внатрешни работи и за правда, Оливер Спасовски и Билен Саљији, како и со заменик-министерот за правда, Оливер Ристовски, и со директорот на Управата за извршување санкции, Јовица Стојановиќ, ги запознал претставниците на Комитетот за превенција со сите активности што ги презеде новата влада за реформи во сите одделни сегменти на системот за спроведување истраги, на мерката притвор, како и на судските процеси и во делот на извршување на затворските санкции, во кои досега се констатирани забелешки за тортура.

Премиерот ги информирал членовите на Комитетот дека неговата неодамнешна посета на најголемата казнено-поправна установа во земјата, затворот „Идризово“, била поттикната од „желбата лично и на самото место да се запознае со сите сериозни забелешки за условите и за третманот на затворениците што ги констатираа и на кои предупредуваат со години наназад домашните и меѓународните организации“.

– Ние ќе ги промениме овие состојби и ќе ги спроведеме препораките на Комитетот. Со тоа ќе им дадеме причина на делегатите во Советот на Европа дека Република Македонија не заслужува таква слика за неа. Нам ни се исклучително важни стандардите на Советот на Европа во однос на човековите права и оваа Влада нема да направи ништо за да ги наруши. Но, нам исто толку ни се важни овие реформи заради нас, заради нашите граѓани“, истакнал Заев на средбата со Гњатовскиј.


Притворениот турски судија Мурат Арслан, добитник на наградата „Вацлав Хавел“


Стразбур, 11 октомври, 2017 - 16:42 (META) 

Поранешниот турски судија и поборник за независност на судството во Турција, Мурат Арслан, кој се наоѓа во притвор уште од минатата година, е добитник на наградата за човекови права „Вацлав Хавел“, што ја доделува Парламентарното собрание на Советот на Европа на предлог на Меѓународното здружение на судии, пренесува ХРТ.

Петтата награда „Вацлав Хавел“ за промовирање на човековите права е доделена во понедленикот оваа недела, на свечена церемонија во Палатата на Европа во Стразбур, на првиот ден од заседанието на Парламентарното собрание на Советот на Европа.

Мурат Арслан е поранешен судија и известител на Уставниот суд на Турција, претседател на сега забранетото здружение на судии и на јавни обвинители на Турција и голем поборник за независност на турското правосудство, кој се наоѓа во притвор од 2016 година, кога десетици илјади лица во земјата беа задржани во притвор по неуспешниот обид за воен удар.

Тој е награден за храбрата борба за судска независност во својата земја.

Наградата се доделува од 2013 година во спомен на Вацлав Хавел – писател, противник на тоталитаризмот, иницијатор на Кадифената револуција, претседател на Чехословачка и прв претседател на Чешката Република.


Бугарија и Романија добија пристап до информацискиот систем на Шенген


Варна, 4 октомври, 2017 - 14:49 (META) 

Европскиот парламент го поддржа предлогот на Советот на ЕУ, на Бугарија и на Романија да им се овозможи делумен пристап до базата на податоци за визите од информацискиот систем за шенгенскиот режим, јавија бугарските медиуми. Кога ќе биде изгласана од Советот на ЕУ, одлуката ќе им дозволи на двете држави да проверуваат информации во визниот систем, без да можат да внесуваат, менуваат или да бришат податоци.

Решението на Европскиот парламент е формално и е условено од потребата за постојани проверки на надворешните граници на ЕУ на сите лица и возила и не е тесно сврзано со влегувањето на Бугарија и на Романија во шенгенскиот безвизен режим.

Но, бугарскиот и романскиот премиер, Бојко Борисов и Михај Тудосе, вчера по конференцијата на премиерите на балканските земји во поранешната летна царска резиденција, дворецот Евксиноград во бугарскиот град Варна, рекоа дека нема формални пречки за влегување на двете земји во шенгенскиот систем и сметаат дека тоа треба да се случи најдоцна за една година.

Тудосе смета дека Бугарија и Романија се судбински одредени да чекорат заедно и на патот кон шенгенскиот безвизен режим. Според него, прашањето е политичко и според општото мислење на европските партнери, нема формални преки за вклучувањето во шенген-зоната.

Борисов напоменува дека Бугарија се наоѓа на едно од најкритичните места на патот на мигрантите кон Централна Европа, но дека благодарение на заедничките напори со  Романија, е постигната „нулта миграција“.

– Повеќето од нашите европски партнери се категорични дека во однос на заштитата на надворешните граници на ЕУ, Бугарија и Романија се справувааат многу подобро отколку ред други земји од шенген-зоната – смета бугарскиот премиер.


Надворешна наместо внатрешна контрола на работата на полицијата


Скопје, 28 јуни, 2017 - 16:36 (META) 

Контролата на професионалното и законито работење на полицијата, според најавените реформи во Министерството за внатрешни работи, ќе се врши преку надворешен механизам, наместо преку досегашниот Сектор за внатрешна контрола.

Ова, меѓу другото, го истакнал министерот за внатрешни работи, Оливер Спасовски, на денешната средба со делегацијата на Советот на Европа, предводена од Тања Ракушиќ-Хаџиќ, раководителка на одделението за кривично-правна соработка на генералниот директор за човекови права и владеење на правото при Советот на Европа.

Според Спасовски, одделот за внатрешна контрола и професионални стандарди на МВР не ја исполнил својата функција поради партизираноста, што довело до губење на довербата во полицијата.

„Министерот Спасовски нагласи дека формирањето на надворешен механизам за контрола – како дел од проектот (на Советот на Европа за јакнење на почитувањето на човековите права при полициско постапување) е одлично решение, особено во правец на формирање на посебно одделение во Јавното обвинителство, како и одделение при Народниот правобранител со вклученост на невладините организации“, стои во соопштението на МВР за средбата.

Спасовски додал дека правната рамка, односно законите за овие решенија треба да бидат дефинирани кон средината на јули, а до септември треба да се достават до Собранието на Република Македонија.

Ракушиќ-Хаџиќ на средбата изразила надеж дека проектот на Советот на Европа ќе помогне во враќањето на довербата на граѓаните во полицијата.


Советот на Европа ги повика САД да ја укинат смртната казна


Брисел, 25 април, 2017 - 14:47 (META) 

Советот на Европа ги повика САД да ги укинат смртните казни по серијата погубувања извршени во сојузната држава Арканзас.

– Особено вознемирува и се противи на глобалната тенденција за укинување на овие нехумани и застарени казни. Апелираме, САД, како набљудувач во Советот на Европа, да се воздржат од понатамошни погубувања“, стои во соопштението на Советот на Европа.

Како што се наведува, низ Европската конвенција за човекови права, Советот на Европа успеал да создаде услови смртната казна да биде укината на подрачје кое опфаќа околу 820 милиони луѓе. Белорусија, која не е членка на 47-члениот Совет на Европа, е единствената европска земја која има смртна казна.

Во брзање да погубат неколку осуденици пред да истече рокот на смртоносните инјекции, властите на Арканзас погубија двајца затвореници, што е прво двојно погубување во САД во последните 17 години.
Џек Џоунс и Марсел Вилијамс беа осудени на смрт во 90-тите години на минатиот век, а погубени се со смртоносни инјекции откако судот ги одби нивните жалби.

Властите на Арканзас планираа да погубат осум осуденици за 11 дена, но четворица од нив успеаја со жалби да добијат одложување на казните.


Од ЕУ и од Советот на Европа – 3,9 милиони евра за борба против криминалот и дискриминацијата


Скопје, 14 март, 2017 - 14:04 (META) 

Од властите на Турција и на земјите од Западен Балкан вклучени во програмата „Хоризонтална поддршка“, зависи колку ќе искористат од предвидените 25 милиони евра за обезбедување на правдата, борба со дискриминацијата и за заштитата на правата на ранливите групи, како и за борбата со економскиот криминал, порача денеска Пилар Моралес, раководител на програмскиот оддел на Советот на Европа. Таа зборуваше на првата средба за „Хоризонтална поддршка“ за Западен Балкан и за Турција, што во Скопје денеска ја организираше македонското Министерство за надворешни работи.

Програмата е заеднички проект на Европската Унија и на Советот на Европа. Од вкупно предвидените 25 милиони евра, за Македонија се предвидени 3,9 милиони евра.

Со денешната конференција во Скопје се одбележува една година од почетокот на проектот, кој се состои од пет активности: подобрување на политиките за човековите права; зголемување на судските капацитети за заштита на човековите права; борба против малтретирањето и неказнувањето; акција против економскиот криминал и акција против трговијата со луѓе.

На конференцијата, покрај претставници на МНР,  учествуваа и претставници на Министерството за внатрешни работи, Министерството за правда, Академијата за судии и јавни обвинители, Делегацијата на Европската Унија, како и од Советот на Европа.


ЕУ-програма за зајакнување на борбата против корупција и организиран криминал


Скопје, 27 февруари, 2017 - 10:00 (META) 

Заедничката програма за борба против корупција, економски и организиран криминал на Европската Унија и на Советот на Европа, која има цел да ги зајакне институциите во борбата против корупцијата, перењето пари и финансирањето тероризам, почнува денеска со конференцијата „Акција против економски криминал“.

На конференцијата ќе се обратат министерот за финансии Кирил Миновски и Моника Мартинез од Советот на Европа.

Заедничката програма, која има буџет од 1.350.000 евра, треба да обезбеди поддршка на Управата за финансиско разузнавање, финансиската полиција, министерствата за правда и за внатрешни работи, како и на компаниите од финансискиот сектор во нивните напори во борбата против економскиот криминал и корупцијата.

Програмата ќе се фокусира на зајакнување на операциите против перење пари и спречување на финансирањето тероризам.


Вработени во МВР на обука во Даблин за компјутерски криминал


Скопје, 13 февруари, 2017 - 13:19 (META) 

Двајца вработени во Министерството за внатрешни работи ќе бидат дел од обуката за дигитална форензика и истрага на компјутерски криминал, на Универзитетот во Даблил, Република Ирска.

Обуката, како што соопштуваат од МВР, е во рамките на заедничкиот проект на Европската Унија и Советот на Европа за таргетирање на компјтерски криминал во Југоисточна Европа и Труција (iPROCEEDS).

„Учеството во Програмата е финансирана од iPROCEEDS во времетраење од 24 месеци и ќе ги покрие модулите како дигитална форензика, техники за финансиска истрага – следење на пари, мрежни истраги, истраги на мобилни уреди, ВОИП технологии и безжични истраги и други. Обуката ќе се одвива преку комбинација на предавања, работа во лаборатории, студии на случај, читање, мали групни и индивидуални вежби, демонстрации со алатки и дискусии“, велат од МВР.