Манчевски апелира членовите на Советот на МРТВ и на ААВМУ сами да си поднесат оставки


Скопје, 24 јули, 2018 - 16:18 (META) 

ВМРО-ДПМНЕ повеќе од пет месеци го блокира донесувањето на новиот закон за аудио и аудиовизуелни медиумски услуги (ААВМУ), а тоа го продолжи и денеска. Апелирам и членовите на Програмскиот совет на МРТ и на Советот на Агенцијата за аудио и аудиовизелни медиумски услуги (ААВМУ) да поднесат оставка и да овозможат да се случат медиумските реформи, порача Министерот за информатичко општество и администрација Дамјан Манчевски во рамки на седницата на собраниската Комисија за транспорт и врски, која ги разгледува амандманите поднесени од ВМРО-ДПМНЕ на предлог-законот за измена на Законот за аудио и аудиовизуелни медиумски услуги.

– И на денешната седница, пратениците од ВМРО-ДПМНЕ, продолжуваат да го блокираат процесот на носење на Законот за АВМУ. Медиумските реформи и сите останати реформи во Македонија се во заложништво, поради лични интереси на поединци, со партиска позадина и со барање за амнестија. На комисијата скоро половина година се зборува за сè освен за законот, освен за медиумските реформи, и покрај сите катастрофални резултати и оценки во изминатите десет години – истакна министерот Манчевски.

Тој на членовите на Советот на ААВМУ и на Програмскиот совет на МРТ, повикувајќи се на нивната совест и доблест, им порача да се повлечат за да овозможат да се случат предвидените медиумски реформи, односно формирање нови независни совети кои ќе бидат слободни од политички влијанија.

– Сакам да апелирам на совест и доблест на луѓето кои членуваат во Советот на МРТВ и Советот на Агенцијата. Апелирам пред се за нивната  лична храброст да поднесат оставка. Да дозволат медиумските реформи да се случат во Македонија. Да дозволат политичарите и сите политички партии да ги тргнат рацете од медиумите. Да дозволат отворена и транспарентна постапка во којашто јавно, со име и презиме ќе се изберат членовите на овие две тела. Ќе можат и тие повторно да аплицираат и доколку исполнуваат услови да бидат избрани повторно. Мораме конечно да продолжиме со реформите во медимскта сфера и со сите останати реформи кои од процедурални причини, но во позадина поради партиски интереси и со барање за амнестија, континуирано се кочат – заклучи Манчевски.

Според него, измените во законот за АВМУ, гарантираат услови за професионализација на медиумските тела, слободно и независно работење на медиумите во државата и  шанса политичарите да ги тргнат рацете од медиумите.


Македонија ќе го добие првото верско радио


Скопје, 16 јули, 2018 - 15:03 (META) 

Советот на Агенцијата за аудио и аудиовизуелни медиумски услуги денеска донесе одлука да се распише јавен конкурс за верско, католичко, радио на територијата на Струмица.

Како што објаснија од стручните служби, првин Комисијата за односи со верските заедници поднела барање за такво непрофитно радио, а потоа со исто барање излегло и Здружението на граѓаните „Радио Марија“.

Со двајца отсутни членови на Советот, преостанатите петмина едногласно ја донесоа оваа одлука за, како што рече членот на Советот, Милаим Фетаи, и претходно имало такви барања, но не биле дадени дозволи.

Распишувањето конкурс е законска обврска, иако веќе е познат заинтересираниот што сака да го отвори.


ЗНМ бара да се прекине мандатот на членови на Советите на МРТ и на ААВМУ


Скопје, 29 јуни, 2018 - 12:18 (META) 

Ако опозицијата продолжува да се однесува неконструктивно и со фиктивна амандманска расправа во собраниската Комисија за транспорт, врски и екологија го блокира донесувањето на измените и дополнувањата на Законот за аудио и аудиовизуелни медиумски услуги за да ги заштити своите партиски војници, бараме собраниската Комисија за прашања на изборите и именувањата да утврди престанок на мандатот на тројца членови на Програмскиот совет на МРТ и на еден член на Советот на Агенцијата за аудио и аудиовизелни медиумски услуги (ААВМУ), затоа што при нивниот избор не е почитувана законската процедура и да почне постапка за избор на нови членови.

Тоа го порача Здружението на новинарите на Македонија (ЗНМ) денеска, велејќи дека е крајно време да се донесе законот што ја добил широката поддршка од новинарската заедница и ја поминал меѓународната експертиза од ОБСЕ и Советот на Европа, како клучен за почнување на медиумските реформи , кои треба да го подобрат квалитетот на новинарството.

Според претседателот на ЗНМ, Насер Селмани, тројцата членови на Програмскиот совет на МРТ се избрани спротивно на членот на законот кој вели дека членови на овој Совет на можат да бидат личности кои во изминатите пет години имаат извршувано јавна функција.

Како што за „Мета“ објасни извршниот директор на ЗНМ, Драган Секуловски, во Советот на ААВМУ проблем е тоа што еден од членовите е со несоодветно образование, односно со завршен Машински факултет и не ги исполнува условите за стручност на членовите на овој совет.

Селмани, изнесувајќи го ставот на ЗНМ, порача дека новите законски измени ќе го укинат коруптивниот систем за субвенционирање на домашна продукција во националните прватни телевизии и ќе овозможат непристрасен и лишен од политички влијание избор на советите на двете тела, а и ги намалуваат казните за медиумите. Но тој во него гледа и голем пропуст, што, како што вели, опозициските пратеници би требало да го исправат со барем еден од амандманите што ги поднеле, но тие тоа не го сториле, со што отворено застануваат само во заштита на нивните „партиски војници“.

– Единствениот недостаток на овој закон е што не обезбедува стабилно и одржливо финансирање на МРТ и ААВМУ, што е услов за нивната независност и професионалност. Чудно е што од околу 80 амандмани поднесени од пратениците на ВМРО-ДПМНЕ, ниту еден не се однесува на овој клучен недостаток на законот. Ова покажува дека главна преокупација на пратениците на опозицијата не е судбината на МРТ, туку, како преку одолговлекување на расправата да ги заштити нивните партиски војници во Програмскиот совет на МРТ и Советот на ААВМУ – рече тој.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


ВМРО-ДПМНЕ: Манчевски сака закон за партизација на медиумските регулаторни тела


Скопје, 12 јуни, 2018 - 16:13 (META) 

Дамјан Манчевски денеска изврши класичен притисок врз законодавната власт со намера да се донесе неквалитетен закон кој што ќе овозможи груба партизација на медиумските регулаторни тела, обвини ВМРО-ДПМНЕ, реагирајќи на денешната прес-конференција на министерот за информатичко општество и администрација. Манчевски обвини дека опозицијата го кочи донесувањето на Предлог законот за аудио и аудиовизуелни медиумски услуги и со голем број амандмани се се бори да ги задржи нејзините кадри во Советот на Агенцијата за аудио и аудиовизуелни медиумски услуги (ААВМУ) и во Програмскиот совет на Македонската радиотелевизија (МРТ).

„Тоа што ја интересира СДСМ е набрзина носење на закон кој што ќе им овозможи владеење со медиумски креиран мрак и лишување на граѓаните од информациите за неработењето, партизацијата на администрацијата, злоупотребите на власта, штетните политики во сите сфери, осиромашувањето на граѓаните, девастирањето на државата дома и на меѓународен план“, велат од ВМРО-ДПМНЕ.

Најголемата опозициска партија вели дека собраниските комисии работат со определена динамика која овозможува квалитетна дискусија која ќе донесе подобрен законски текст, „а во таа насока се и поднесените амандмани од ВМРО-ДПМНЕ“.

„Притоа амандманите содржат квалитетни решенија кои го подобруваат текстот на Законот и нема да дозволат власта да има целосна партиска контрола врз независните тела. Доколку ВМРО-ДПМНЕ сакаше да го блокира процесот на носење на законот немаше да поднесе само 60-тина амандмани, кои сепак, произлегуваат од јавните расправи организирани во Собранието и согласно размислувањата за подобар законски текст“, се вели во партиското соопштение.


Манчевски: Опозицијата четири месеци ги кочи медиумските закони


Скопје, 12 јуни, 2018 - 15:27 (META) 

Министерот за информатичко општество и администрација Дамјан Манчевски денеска на прес-конференција во Владата побара собраниската Комисија за транспорт, врски и екологија, со која претседава ВМРО-ДПМНЕ, да работи без престан и секојдневно, додека не заврши амандманската расправа за Предлог законот за аудио и аудиовизуелни медиумски услуги.

Тој рече дека опозицијата треба да мисли на интересот на граѓаните, наместо со голем број амандмани да се бори да ги задржи нејзините кадри во Советот на Агенцијата за аудио и аудиовизуелни медиумски услуги (ААВМУ) и во Програмскиот совет на Македонска радиотелевизија (МРТ)

– Не сме против дебата за амандманите, но треба да заврши во разумно време. Пратениците од ВМРО-ДПМНЕ се против јавна расправа, односно јавно претставување на кандидатите за членови на Програмскиот совет на МРТ и на Советот на Агенцијата за аудио и аудиовизуелни медиумски услуги – рече Манчевски.

Според Манчевски, цели четири месеци опозицијата прави бескрајни дебати чија јасна цел е одложување на донесувањето на законот. Притоа, вели министерот, ВМРО-ДПМНЕ поднесува контрадикторни амандмани.

– Се одржаа само шест седници на Комисијата на кои успеавме да поминеме само седум амандмани, а ни остануваат уште 67. Со оваа динамика законот ќе биде усвоен за 2,5 години од сега. Во измените,  се предлага задолжителната програма на МРТ од домашна продукција да се намали од сегашните 50 на 40 отсто, а во амандманите ВМРО-ДПМНЕ бара и намалување и зголемување и предлага да биде од 30 до 70 отсто во седум различни амандмани – рече министерот за информатичко општество и администрација.

Тој вели дека власта нема да се откаже од намерите да ја тргне медиумската сфера од влијанието на политичарите и да ги остави медиумите да работи слободно.

– Нема да дозволиме Македонија никогаш повеќе да биде оценета како неслободна држава каде медиумите работат под притисок, уцени и страв. Регулаторните тела и особено националниот радиодифузер и медиумите треба да се остават на медиумските работници – вели Манчевски.

„Манчевски денеска изврши класичен притисок врз законодавната власт со намера да се донесе неквалитетен закон кој што ќе овозможи груба партизација на медиумските регулаторни тела, обвини ВМРО-ДПМНЕ, реагирајќи на денешната прес-конференција на министерот за информатичко општество и администрација.

„Тоа што ја интересира СДСМ е набрзина носење на закон кој што ќе им овозможи владеење со медиумски креиран мрак и лишување на граѓаните од информациите за неработењето, партизацијата на администрацијата, злоупотребите на власта, штетните политики во сите сфери, осиромашувањето на граѓаните, девастирањето на државата дома и на меѓународен план“, велат од ВМРО-ДПМНЕ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


АЕК и ААВМУ за јавноста сè уште се главно „политички“ тела


Скопје, 4 април, 2018 - 14:26 (META) 

Мал е процентот граѓани кои знаат што претставуваат двата регулатора во сферата на медиумите и на електронските комуникации и кои се нивните надлежности. Ова е заклучокот на презентацијата на завршниот мониторинг извештај за работата на АВМУ и АЕК.

Во изминатите 18 месеци, „Евротинк“ во соработка со „НВО Инфоцентар“, „Транспарентност Македонија“ и Хелсиншкиот комитет за човекови права ја следеше работата на двете агенции нивната транспарентност и перцепцијата за нив во пошироката јавност. На завршниот мониторинг извештај презентиран денеска му предходеа 5 квартални извештаи кои се јавно достапни.

Општата препорака од претставниците на организациите што го работеле извештајот е двата регулатора повеќе да се ангажираат за информирање на јавноста за нивните надлежности и за помошта што може да им ја пружат. Притоа, како што кажа комуникологот Сеад Џигал, во ова дигитално време тоа не треба да се прави само еднонасочно, туку двете агенции да бидат подготвени и за двонасочна комуникација.

Иако на почетокот на проектот, финансиран од амбасадата на Велика Британија, постоела одредена недоверба во поглед на институциите, тие потоа почнале одлична соработка со спроведувачите на набљудувањето, што е за пофалба, истакна британскиот амбасадор Чарлс Гарет.

Директорот на АЕК, Сашо Димитријоски, и директорот на ААВМУ, Зоран Трајчевски, рекоа дека од соработката со граѓанските организации дошле до увид за одредени проблеми, што довело до подобрување на нивната работа. Како што истакнаа презентерите, за пофалба е што АЕК, за разлика од ситуацијата кога донираше пари за Панорамското тркало на ЈСП, ја прекинала таквата практика.

Министерот за информатичко општество и администрација, Дамјан Манчевски, зборувајќи за измените на законот за аудио и аудиовизуелни медиумски услуги, кој е веќе во собраниска процедура, истакна дека треба тој да донесе професионализација на Советот на ААВМУ и на Програмскиот совет на МРТ за конечно политиката да ги тргне рацете од медиумите. Манчевски потенцираше дека членови на Советите во АВМУ и МРТ и на  Комисијата во АЕК, сеуште се високи партиски функционери.

Тој нагласи дека Владата се зафатила со главните аспекти на медиумските реформи и порача дека е потребен дополнителен ангажман на сите, за медиумската сфера да биде контролирана од саморегулацијата, а не од државата и политичките структури.

Според проф. д-р Снежана Трпевска, експерт за медиуми, со медиумските реформи се доцни, а ќе биде потребен голем ангажман за да се средуваат работите во медиумскиот сектор во иднина.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


ААВМУ лани заштедила, годинава очекува помали приходи


Скопје, 26 февруари, 2018 - 17:04 (META) 

Агенцијата за аудио и аудиовизуелни медиумски услуги (ААВМУ) во текот на минатата година работела домаќински и заштедила многу, односно не потрошила толку колку што било предвидено, со што е практично авансирана цела една година, односно да се покријат трошоците и за оваа година, рече Зоран Фидановски, член на Советот на ААВМУ на денешната седница на која се усвои завршната сметка на Агенцијата за 2017 година.

Инаку, како што презентираше директорот на ААВМУ, Зоран Трајчевски, од 111 милиони денари приходи, расходите изнесувале 90 милиони денари.

Со истиот став како Фидановски е и Лазо Петрушевски, претседателот на Советот, кој рече дека заштедата ќе биде добредојдена, оти се очекуваат помали приходи за агенцијата во 2018 година.

– Од година во година Агенцијата работи стандардно домаќински, но тоа не треба да не олабави, оти, знаете ситуацијата не е поволна – неколку радиодифузери се откажаа од дозволите. Ситуацијата е економски лоша. Дури еден национален радиодифузер се откажа од дозволата што чинеше 3,5 милиони денари (57.000 евра) – рече Петрушевски.

Тој посочи и дека новиот закон за аудио и аудиовизуелни медиумски услуги предвидува многу помал број на дозволи на емитување од досег,а па тоа ќе донесе многу помали приходи на Агенцијата.

Советот на ААВМУ на денешната седница донесе одлуки за прекинување на постапката за одземање на дозволата за емитување на телевизиите „Едо“ и „Шутел“ од Скопје и радијата „Ват“ од Скопје и „Дрини“ од Струга, оти во последниот рок го платиле надоместокот.

Поради неплаќање за дозволата, Советот почна постапка за одземање на дозволата на телевизијата „Хана“ од Куманово, која доби дополнителен рок за плаќање. Ако тоа го направи, исто како за „Шутел“ и „Едо“, постапката ќе биде прекината.


„Сител 3“ ја загуби дозволата поради неплаќање на надоместокот


Скопје, 21 февруари, 2018 - 11:33 (META) 

Телевизијата „Сител 3“ ја загуби дозволата за пренесување на нејзината програма преку кабелските оператори во Република Македонија поради неплаќање на годишниот надомест, според одлуката што вчера ја донесе Советот на Агенцијата за аудио и аудиовизуелни медиумски услуги (ААВМУ).

– Сателитските телевизии што се пренесуваат преку кабелските оператори во Македонија надоместокот за дозволата треба да го платат на почетокот на годината за целата година, а фактура им испративме на 5 јануари, со рок за плаќање од 30 дена. Потоа добија дополнителни 15 дена и повторно не платија, поради што таа фактура ја сторниравме и им издадовме нова фактура само за периодот од почетокот на годината до донесувањето на одлуката за одземање на дозволата – објаснија за „Мета“ од ААВМУ.

Вкупно, за емитување во 2018 година, телевизијата требало да плати 3,45 милиони денари (56.000 евра)

Телевизијата има рок од 8 дена да ја плати новата фактура, но и ако го направат тоа, дозволата издадена на 5 јануари 2015 година нема да биде вратена. Телевизијата има право да се жали на Управен суд, но сеедно, работата е чиста – тие не си ги исполнија обврските, велат од ААВМУ.

Покрај оваа одлука, на вчерашната седница Советот донел одлуки за запирање на постапките за одземање на дозволите на телевизиите „Спектра“ од Лабуништа, „Аниса“ од Пласница, „Здравкин“ од Велес, како и на радијата „Слободна Македонија“, „Ред ФМ“ од Тетово и „Скај“ од Берово.

Радиото „Слободна Македонија“ надоместот од 781.787 денари (12.680 евра) го платила вчера пред седницата на Советот на АВМУ.


ААВМУ им даде опомена на „Шутел“ и „Едо“ пред одземање на лиценците


Скопје, 14 февруари, 2018 - 17:21 (META) 

Советот на Агенцијата за аудио и аудиовизуелни медиумски услуги (ААВМУ) на денешната седница едногласно ја прекина постапката за одземање дозвола за емитување на една телевизија и три радија, кои по последната опомена со која им беа дадени 15 дена да си ги исполнат обврските, ги уплатиле парите.

Тоа се телевизијата „Канал 21“ од Велес, потоа Универзитетско радио на универзитет Гоце Делчев од Штип, како и радијата „Акорд“ од Кичево и „Бум“ од Куманово.

Советот почна постапка за одземање на лиценците на две скопски телевизии „Шутел“ и „Едо“ и пет радија од целата земја, кои не ја платиле лиценцата.

Тие имаат рок од две недели ги платат средствата.


ААВМУ: 15 локални медиуми добија рок од 15 дена да ги платат лиценците или да стават клуч


Скопје, 8 февруари, 2018 - 12:14 (META) 

Советот на Агенцијата за аудио и аудиовизуелни медиумски услуги (ААВМУ) денеска почна постапка за одземање на лиценците на 15 радија и телевизии што не го платиле надоместокот за емитување. Претходно, бидејќи си го подмирила долгот во дополнителниот рок, беше запрена постапката за одземање на дозволата на телевизијата „Тера“ од Битола.

Според претседателот на Советот на ААВМУ, Лазо Петрушевски, очигледно е дека неисполнувањето на обврските од радиодифузерите е поради финансиски проблеми, но законски Советот е обврзан да ги одземе лиценците ако не се платат.

Денеска најголема дискусија покрена предлогот за одземање на дозволата на универзитетското радио „УГД ФМ“ при универзитетот Гоце Делчев од Штип. Како што кажа членот на Советот на ААВМУ, Зоран Фидановски, „жалосно е што ова непрофитно радио се наоѓа во таква состојба, затоа што станува збор за добро опремена куќа во која се обучуваат дел од студентите“. Тој изрази надеж дека универзитетот ќе најде сила во рок од 15 дена да плати за дозволата.

На тоа Зоран Трајчевски, директорот на АВМУ рече дека може и да се случило радиото да има испратено налог до Министерството за финансии, па ААВМУ да не е информирана.

– Можеби платиле. Сме имале такви случаи во минатото, со ненавремено префрлање средства, па ни праќале вирман. Да се надеваме дека и сега е така – рече Трајчевски.

Инаку, од 15-те радија и телевизии, само две, радиото „Бум“ од Куманово и радиото „Аниса“ од Пласница подмириле дел од парите за годишната дозвола за емитување. Другите,
телевизијата „Ера“ од Скопје, радиото „Канал 77“, телевизијата „Канал 1“ од Велес, телевизијата „К3“ од Куманово, телевизијата „Спектра“ од Лабуништа, радиото „Дуе“ од Гостивар, радиото „Акорд“ од Кичево, радиото „Лав“ од Охрид, радиото „Тет“ од Прилеп, радиото „Фама“ од Тетово и радиото „Ред ФМ“, добија рок од 15 дена да ги исплатат парите или почнатата обврска за одземање на нивните лиценци ќе биде финализирана.