Царовска: Ќе побараме стан за семејството со трите деца што настрадаа во пожар


Скопје, 25 јуни, 2018 - 14:21 (META) 

На семејството чии три деца минатата седмица загинаа во пожар во нивниот субстандарден дом во Велес, социјалните работници му нуделе сместување под кирија уште пред да се случи трагедијата, но, одбивало. Дали постои евентуален пропуст во нивната работа, испитува социјална испекција која во петокот и денеска е во велешкиот Центар, вели министерката за труд и социјална политика Мила Царовска.

Таа рече дека имала средба со родителите на починатите деца кои, како што рече, добиле еднократна парична помош и поддршка. Тие ја информирале министерката дека пред две три години кога биле доделувани социјални станови, тие не добиле на користење таков стан, а пак бил доделен стан на лица што биле станбено обезбедени.

– Тие сакаат државен стан. Им ветив дека заеднички ќе поднесеме барање до Комисијата за државни станови да разгледаме дали во Велес има постоечки стан или друг објект во кој тие натаму можат да бидат сместени. Во државата нема станови кои можат да бидат доделени на ниту едно лице, така ниту ним, туку да можат во него да живеат- рече Царовска одговарајќи на новинарски прашања на прес-конференцијата на која беше презентиран Предлог законот за спречување и заштита од дискриминација.

Во новиот текст на Законот за првпат сексуалната ориентација и родовиот идентитет се воведуваат како основи за дискриминација. Во поимникот се вметнуваат нови термини, меѓу кои „лице со попреченост“, „соодветно приспособување“ и „пристапност до инфраструктурата, добрата и услугите“. Понатаму, се додава нов облик на дискриминација – сегрегацијата, како и „инструкцијата” за дискриминација.


Центарот за социјални работи и Општина Велес ќе го организираат погребот на трите деца


Скопје, 21 јуни, 2018 - 11:24 (META) 

Центарот за социјална работа во Велес и Општина Велес денеска се ангажираат за организирање на погребот на трите деца, две сестри и еден брат, на возраст од 1,2 и 4 години, кои вчера ги загубија животите во пожарот во нивниот дом под ридот Вршник во Велес, соопшти Министерството за труд и социјална политика (МТСП).

Од министерството појаснуваат дека семејството било корисник на социјална помош.
Според првичните сознанија на јавниот обвинител, родителите ги заклучиле децата, две сестри и еден брат, и заминале во продавница. За тоа време, од засега непознати причини, избувнал пожар и за кратко време ја зафатил куќата.

Јавниот обвинител издал наредби за обдукција на починатите деца и продолжува со постапката за утврдување на причините на несреќата.


Бесплатно лекување и за лица до 18 години од семејства корисници на социјална помош


Скопје, 15 мај, 2018 - 16:25 (META) 

На денешната 68. седница на Владата, е донесена програмата за измени и дополнувања на Програмата за обезбедување средства за болничко лекување без наплата на учество (партиципација) која што покрај пензионерите ќе ги опфати и лица до 18 годишна возраст на семејства корисници на социјална парична помош за 2018 година.

Исто така, на денешната седница на предлог на Министерството за транспорт и врски, владата ја разгледа и ја усвои Информацијата за потребата од подобрување на состојбата на општинската патна мрежа. По добивањето на анализите од страна на задолжените институции, Министерството за транспорт и врски ќе достави акциски план за подобрување на состојбата на општинската патна мрежа.

Владата на донесе Решение за формирање на Комисија за спроведување на реформи во пензискиот систем која што ќе биде должна да информира за текот на спроведување на активностите за имплементација на истите.


Извршителите нема да блокираат сметки на приматели на социјална помош


Скопје, 29 декември, 2017 - 12:35 (META) 

Министерството за труд и социјална политика и Комората на извршители на Македонија денеска потпишаа меморандум со кој извршителите се обврзуваат да не ги блокираат сметките на лицата приматели на социјална помош.

Извршителите ќе имаат пристап до посебен електронски регистар, така што веднаш ќе имаат увид дека станува збор за луѓе од ранлива категорија.

-Со овој меморандум ние веднаш ќе можеме да утврдиме, дека ако утврдила државата дека тоа лице е социјален случај, треба да се отстрани од системот на извршување до промена на неговиот статус. Кога ќе се промени статусот, до вработување или до стекнување на некој имот, тогаш ќе може да се реализира извршувањето во тој дел – изјави претседателот на Комората на извршители, Зоран Димов.

Претходно овие лица чекаа и по неколку дена да заврши писмената коресподенција меѓу извршителот и Центарот за социјални работи, а дури потоа да им бидат деблокирани сметките и да имаат пристап до парите за социјална заштита.

Оваа новина ја забрзува постапката и штити од непотребни трошоци, но не подразбира отпис на долговите, туку нивна наплата штом ќе имаат паричен прилив од друго место.


ВМРО-ДПМНЕ: Се зголемуваат ставки за договорни услуги, се крати за граѓаните


Скопје, 1 август, 2017 - 16:31 (META) 

Владата на СДС спроведе ребаланс на буџет од кој јавноста виде дека ќе се зголемуваат ставки за договорни услуги, ќе се отвора простор за партиски вработувања, но затоа ќе се кратат средства за градинки, пензионерски домови и за дневни центри за згрижување на деца со посебни потреби, изјави на прес-конференција Невенка Стаменковска од ВМРО-ДПМНЕ.

Таа додаде дека ВМРО-ДПМНЕ во својата програма јасно ветила дека ќе ја зголемува социјалната помош за ранливите категории граѓани за 10,6 проценти на годишно ниво.

– Тоа значи дека ако ВМРО-ДПМНЕ беше на власт, оваа година примателите на социјална помош ќе добиеа поголема социјална помош за 10,6 проценти. Тоа е вистинската грижа и одговорност која граѓаните сакаат да ја видат и од СДС. ВМРО-ДПМНЕ како еден од своите врвни приоритети го има подобрувањето на животниот стандард, подобрувањето на условите за живот и намалувањето на социјалниот ризик за примателите на социјална парична помош – изјави Стаменковска.


Царовска: Ако сте загубиле социјална помош поради брз трансфер на пари, конкурирајте пак


Куманово, 13 јули, 2017 - 16:22 (META) 

Корисниците на социјална парична помош што го загубиле правото поради пари добиени по брз трансфер во текот на претходната власт, да се обратат до центрите за социјална работа во градовите низ Македонија и повторно да побараат социјална парична помош, порача министерката за труд и социјална политика, Мила Царовска. Таа појасни дека во целата земја има 910 такви случаи.

– И сè ова е направено без законска основа, поради тоа што парите примени преку брз трансфер не се приходи за ниту едно семејство, затоа што ниту се даночат ниту се препишуваат во Управата за јавни приходи. Затоа со последната измена на правилникот се ослободуваат граѓаните од парите што ги примиле преку брз трансфер да не им се пресметуваат како приходи во нивното семејство, поради тоа што често тие средства не се од членови од семејството коe има обврска по закон да ги издржува – објасни министерката при посетата на Центарот за социјални работи во Куманово.


Царовска: Пензиите ќе се усогласуваат двапати годишно, социјалната помош ќе се зголеми


Скопје, 20 јуни, 2017 - 12:00 (META) 

Министерката за труд и социјална политика, Мила Царовска, на средба во општинската организација на СДСМ во Центар, порача дека СДСМ како чинител на власта ќе најде начин да ги направи пензиите одржливи, како и двапати годишно тие да се усогласуваат со трошоците за живот.

Според Царовска, во план е социјалната помош да се зголеми, но тоа ќе се случи следната година.

– Во 2018 година најрано ќе се зголеми социјалната парична помош во согласност со линијата на сиромаштија. Социјалната помош за четиричлено домаќинство ќе треба да биде 12.000 денари, со тоа што тие што ќе примаат таков тип социјална парична помош, ќе треба да се активираат на пазар на труд и да работат – вели министерката.

Што се однесува до лицата со попреченост, кои од денеска ќе кампуваат пред Собранието, Царовска вели дека се предвидува решавање на дел од нивните барања.

– Тие нема да можеме сите наеднаш да ги решиме, но ние веќе имаме пет точки од нивните барања кои со итни промени на законот ќе ги надминеме. На пример, целиме кон тоа родителите на тие лица да имаат право на стартно работно време и по 26 години и да остваруваат додаток за туѓа нега без цензус од 21.000 денари – вели министерката.


Струмичани уценувале гласач дека ќе му ја укинат социјалната помош


Струмица, 11 декември, 2016 - 12:33 (META) 

На 10 декември, во 16 часот, во СВР Струмица, Г.К. (46) од Ново Село, Струмичко, пријавил повреда на слобода на определување на избирачите од страна на лицата С.М. и П.Г. од истото село.

Имено, на 5 декември, С.М. и П.Г дошле во неговиот дом и му се заканувале дека ќе му ја укинат социјалната помош и дека ќе го убијат доколку не им ја даде личната карта. Истиот се исплашил и им ја дал личната карта.

За настанот се пожалил на познаник од Струмица, кој го донел во СВР-Струмица да го пријави случајот. За настанот е запознаено Основното јавно обвинителство, Струмица. СВР Струмица презема мерки за целосно расчистување на случајот.


Ременски нареди да не се подготвуваат решенија за права од социјална заштита


Скопје, 5 декември, 2016 - 19:12 (META) 

Министерката за труд и социјална политика, Фросина Ташевска-Ременски, денеска упати писмена наредба до директорите на меѓуопштинските центри за социјална работа за итно запирање на подготвувањето на секаков вид решенија поврзани со правата од социјалната заштита, соопшти кабинетот на министерката.

Во наредбата, како што стои во соопштението, министерката побарала центрите за социјална работа итно да достават информации за бројот на подготвени решенија од социјална заштита за периодот од 5 ноември до 5 декември и строго да се придржуваат кон писмената инструкција за обнова на правата од социјална и детска заштита од 19 месецов до 27 следниот месец и точно да ги информираат корисниците.

Од Министерството за труд и социјална политика се посочува дека од повеќе извори на информации се посочени докази со кои се потврдува прекршувањето на законски утврдените забрани и наредби од министерот.

„Станува збор за сериозни злоупотреби на службената положба и овластување од страна на директори и на вработени (со име и презиме) во центрите за социјални работи, односно за партиска агитација помеѓу корисници на социјална помош, давање ветувања за позитивен исход за предмети што ги води центарот, заплашување со укинување на право од социјална заштита, подготвување на фиктивни решенија за право на помош и нега од друго лице, засилена динамика на подготвување решенија за право на помош и нега од друго лице, што не соодветствува со бројот на решени предмети од страна на Комисијата, бројка со која располага МТСП, јавување по телефон од вработени и од директори на центри за социјални работи кај корисници на право од социјална заштита и нивни блиски роднини во партиски цели, предизборни ветувања и несоодветна улога заради правото за гласање во домашни услови, злоупотреба на ресурси на јавните установи спротивно на забраните во писмената наредба, злоупотреба на податоци на корисниците на социјална помош во партиски цели и злоупотреба на боледувања“, стои во соопштението.

Министерството за труд и социјална политика поднело пријави и докази до надлежните служби за понатамошно кривично и правно процесирање.


Германија вработила 30.000 бегалци, а 130.000 добиваат социјална помош


Берлин, 11 јули, 2016 - 10:37 (META) 

Германската сојузна агенција за вработување соопшти дека најмалку 30.000 бегалци биле вработени од минатата година досега.

Но, германската влада и понатаму се обидува голем број од невработените да ги натера да најдат работа по пат на интеграциски мерки и курсеви за учење јазици.

– Бегалците, главно, се вработуваат во сектори каде што има недостиг од соодветни кандидати – изјавил претставникот од Сојузната агенција за вработување, Франк Јирген Вајзе.

Од новоангажираните работници во периодот од април 2015 до март 2016 година секој четврт е ангажиран со привремен договор за вработување, а 130.000 бегалци примаат социјална помош.