!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Спасовски: Радикализмот е заеднички проблем на Македонија и на БИХ


Сараево, 22 септември, 2017 - 13:56 (META) 

Екстремниот радикализам е заеднички проблем на Македонија и на Босна и Херцеговина, но, и глобален проблем, изјави министерот за внатрешни работи, Оливер Спасовски во Сараево по средбата со неговиот домаќин, министерот за внатрешни работи на БИХ, Драган Мектиќ.

– Двете држави се изложени на дејствија на радикални групи и на криминални организации, поради што унапредувањето на полициската соработка е од исклучително значење. Денеска беше договорено одржување на редовни состаноци на раководителите на единиците за меѓународна полициска соработка, на кои ќе се разменуваат информации, но и ќе се договараат заеднички операции и генерални планови за дејствување – рече Спасовски, на прес-конференцијата по средбата.

Тој додаде дека важно е да се воспостават механизми за превенција и да се работи на процесот на дерадикализација и ресоцијализација на лицата кои се вратиле од воените жаришта.

На денешната средба, како што истакна Спасовски била почната постапка за потпишување на меморандум за соработка меѓу агенцијата за школување полициски службеници во Мостар и Центарот за обука во Скопје.

– Агенцијата за школување на полициски службеници во Мостар има солидна програма и наставен кадар кој ќе помогне при процесот на стекнување и дооформување на стручното образование на полициските службеници во Македонија – изјави Спасовски.


Заев учествуваше на дипломатскиот прием организиран од Трамп


Њујорк, 21 септември, 2017 - 11:11 (META) 

Премиерот Зоран Заев учествуваше на дипломатскиот прием организиран од претседателот на Соединетите Американски Држави, Доналд Трамп, во рамките на 72. Генерално собрание на Обединетите нации во Њујорк.

„Дипломатскиот прием организиран од претседателот на САД на ГС на ОН е можност за зацврстување на пријателствата и за идни соработки во интерес на нашите држави“, напиша Заев на „Твитер“.

Премиерот Заев, во рамките на активностите на Генералното собрание на ОН денеска ќе има билатерална средба со премиерот на Беглија, Чарлс Мишел, соопштија од владината прес-служба.

Заев ќе присуствува и на приемот по повод кандидатурата на Германија во Советот за безбедност на ОН, за периодот 2019-2020 година, што, во име на канцеларката Ангела Меркел, го организира министерот за надворешни работи на Германија Зигмар Габриел.

„Во текот на денот предвидени се и други средби и разговори со влијателни гости на Генералното собрание на ОН, како и со американски политичари и тинк-тенк експерти од сферата на надворешните политики и меѓународните односи на САД“, стои во соопштението на Владата.


Заев се сретнал со еден од првите луѓе на „Гугл“ и разговарале за соработка


Њујорк, 19 септември, 2017 - 9:32 (META) 

Премиерот Зоран Заев во рамките на посетата на Соединетите Американски Држави се сретнал со Џерад Коен, еден од првите луѓе на една од најразвиените светски компании „Гугл“.

На состанокот, како што информираат од Владата, било разговарано за соработка помеѓу компанијата „Гугл“ (Google Jigsaw) и била поставена основа за развивање на таа соработка.

На средбата, лицата што го придружувале високиот претставник на компанијата, Коен, ги кажале впечатоците од нивната неодамнешна посета на Македонија и нагласиле дека земјата има млади креативни луѓе кои би можеле да придонесат во иновативниот информатичко-технолошни сектор.

Заев истакнал дека Владата ќе даде поддршка на компании и на поединци со иновативни идеи.

„Заинтересирани сме да ги поддржиме и добрите иницијативи во ИТ-секторот и во технологијата“, изјавил Заев.


Каракачанов: Темата за Македонци во Бугарија не е добра за односите меѓу двете земји


Скопје, 18 септември, 2017 - 14:19 (META) 

Сакам изрично да нагласам за да ги прекинам политичките шпекулации – ги поддржуваме државното единство и територијалниот интегритет на Република Македонија. Немаме проблем со името на Репубика Македонија, ја признаваме земјата под уставно име. Подготвени сме да помогнеме во решавање на спорот со други земји за конечно да се отворат вратите на Македонија за полноправно членство во НАТО. Ова денеска го изјави бугарскиот министер за одбрана, Красимир Каракачанов, по средбата со неговата македонска колешка и домаќин, Радмила Шекеринска.

Одговарајќи на новинарско прашање дали ќе има промени во идеологијата и во неговите ставови во врска македонското малцинство во Бугарија по потпишувањето на Договорот за добрососедство меѓу двете земји, Каракачанов рече дека темата е многу долга и дека за секој што се интересира за историјата на македонското прашање може да даде „специјални лекции“ како историчар, но денеска е дојден во Македонија како министер за одбрана.

– Отсекогаш сум сметал дека не треба да се измислуваат проблеми таму каде што нема, таков проблем во Бугарија нема. Тука сум во улога на министер за одбрана. Ако сакате да водиме историски разговори ќе зборувам во улога на историчар. Вакви теми не се во корист за добрите односи меѓу двете земји – рече тој.

Шекеринска и Каракачанов нагласија дека денешната средба, меѓу другото, е одржана за да се покаже дека договорот што го потпишаа двете земји нема да остане само на зборови.

– Тој договор и она што се случуваше по потпишувањето покажува дека двете држави се свесни дека само преку добрососедството нашиот регион може да оди напред и да ја гарантираме нашата заедничка безбедност – рече Шекеринска.

Каракачанов истакна дека за време на бугарското претседателство со Европската Унија, приоритет ќе биде интеграцијата на регионот на Западен Балкан во Унијата. Тој додаде дека официјална позиција на Бугарија е поддршка на Македонија за членство во НАТО и дека по потпишувањето на договорот од 1 август „работите почнаа да се движат во позитивна насока“.

На средбата двајцата министри се договориле за зголемување на соработката меѓу специјалните сили, проширување на соработката во делот на образованието во одбраната и за соработка меѓу воздухопловните сили.

Шекеринска истакна дека Македонија и Бугарија ќе имаат заедничка воена вежба, планирана во 2018 година, која јасно ќе покаже дека двете земји се одлучни да градат добри соседски односи и да ја градат заедничката безбедност во регионот.


ССК потпиша договор за соработка со стопанската комора на Пекинг


Подгорица, 15 септември, 2017 - 13:41 (META) 

Сојузот на стопански комори на Македонија (ССК) потпиша договор за зајакнување на трговската и на економска соработка со Стопанската комора на Пекинг.

ССК исто така потпиша декларација за воспоставување механизми на лидерите на носечките комори на земјите од Централна и Источна Европа (ЦИЕ) во процесот 16 + 1 кој има цел да ја зголеми соработка на Кина со земјите од ЦИЕ.

„Потпишаните договори со прецизно воспоставени цели и активности на дејствување, значат нови можности за македонските компании, преку ССК активно да се вклучат во иницијативите за зголемување на соработката и трговските партнерства со Кина и 16 земји вклучени во овој мегапроект за економска, политичка и за културна соработка. Сите организации потписници на декларацијата се обврзани да ги имплементираат резолуциите донесени на тркалезната маса, што ќе значи зајакнување на комуникацијата и на меѓусебната соработката, поврзување, како и градење на трговски релации и промоција на инвестиции“, изјави претседателот на ИКТ Комората при ССК, Саша Огненовски.

ССК неколку години наназад активно учествува на форумите на 16+1 за подобрување на конкурентоста на македонските компании, за што активно работи и на промовирање на кинескиот мегапроект „Еден појас, еден пат“ за инфраструктурно и економско поврзување на Азија, Европа, Африка и на Блискиот Исток.


Македонското и холандското министерство за финансии потпишаа договор за соработка


Скопје, 15 септември, 2017 - 12:18 (META) 

Министерството за финансии на Македонија и Министерството за финансии на Холандија потпишаа договор за меѓусебна соработка. Договорот го потпишаа министерот за финансии на Македонија, Драган Тевдовски, и министерот за финансии на Холандија, Хероен Дајслблум.

„Со овој договор двете министерства ќе ја прошират соработката преку размена на знаења, искуства и на информации за политиките кои се спроведуваат. Со договорот се предвидуваат програми за обуки, студиски престои, работилници и сл. Освен соработка преку пренесување искуства, Холандија преку договорот ќе обезбеди и финансиска поддршка за обуки и за други трошоци“, информираат од Министерството за финансии.

И двете страни ги истакнаа блиските билатерални односи помеѓу Македонија и Холандија, како и потребата од развој на соработката и на техничко ниво помеѓу министерствата за финансии.


Џафери – Брглез: Словенија континуирано ја поддржува Македонија на патот кон ЕУ и НАТО


Скопје, 12 септември, 2017 - 14:15 (META) 

Словенија континуирано ја поддржува Македонија во процесот на евроатлантските интеграции, бидејќи целосната интеграција на регионот придонесува за зајакнувањето на стабилноста, мирот и на просперитетот. Ова било истакнато на денешната средба меѓу претседателот на Собранието, Талат Џафери, и неговиот колега – претседателот на Државниот збор на Словенија, Милан Брглез, кој е во посета на земјава.

Како што соопштија собраниските служби, за време на средбата Џафери го информирал својот словенечки колега за работата на Собранието, за претстојните локални избори и за динамиката на спроведувањето на реформите од планот „3-6-9“.

„Во однос на билатералната соработка, соговорниците се согласија дека таа е добра, но и дека може да биде продлабочена и проширена особено во доменот на парламентарната дипломатија. Двата парламенти соработуваат во рамките на Парламентарното собрание на Процесот за соработка во Југоисточна Европа (ПС на ПСЈИЕ) со кое во моментов претседава Република Словенија, а кое воедно претставува важен форум за зајакнување и за проширување на регионалната соработка“, стои во соопштението за средбата.

Џафери и Брглез разговарале и за мигрантската криза – за состојбите и мерките што ги презема Македонија на овој план, заедно со земјите – партнери, меѓу кои е и Словенија.


Заев – Нетанјаху: Македонија и Израел заедно стојат на страната на мирот во светот


Ерусалим, 4 септември, 2017 - 16:03 (META) 

Владина делегација предводена од премиерот Зоран Заев денеска се сретна со премиерот на Израел, Бенјамин Нетанјаху. Двајцата лидери испратиле порака дека стојат заедно на страната на мирот во светот.

– Гледаме заедно кон подобра иднина. Ги разгледуваме начините и полињата каде што можеме да соработуваме во интерес на луѓето и на нашите земји. Научивме од минатото како да ја обезбедиме иднината. Израел е технолошки развиена земја и ќе ѝ помогне на Република Македонија – вели Нетанјаху.

Заев соопштил дека новата Влада ќе ги употреби израелските искуства за квалитетен живот на граѓаните на Македонија.

– Со Израел немаме отворени прашања, пријателски земји сме. Нашата соработка со Израел се надеваме дека ќе биде на две нивоа, безбедноста и светскиот мир, она за што е Израел добар пример во светот. Се надеваме дека низ организациите како што е НАТО – целиме да бидеме членка на НАТО – ќе продолжиме да соработуваме, бидејќи заканите од радикализмот и од екстремизмот се присутни овде, во Израел, и во овој регион, но исто така и во Македонија и во регионот на Западен Балкан. Соработувавме на полето на безбедноста и на одбраната досега и знам дека ќе ја зголемиме соработката, бидејќи е интерес на сите граѓани и нации – рече Заев.

Во изјавата за медиумите Заев нагласил дека Македонија со голема почит го негува културното богатство на Евреите.

Двајцата лидери се договориле за продлабочување на економската соработка, разговарале за израелски инвестиции во Македонија и за директна авионска линија на релација Скопје – Тел Авив.


Путин предложи заедничка енергетска платформа на Самитот на БРИКС


Сијаме, 4 септември, 2017 - 11:19 (META) 

Рускиот претседател Владимир Путин им понуди на членките на БРИКС (организација во која членуваат Бразил, Русија, Индија, Кина и Јужноафриканска Република) заедничка платформа во областа на енергетските истражувања.

– Важно е да се зголеми дијалогот за енергетиката на овие пет земји – изјави Путин на самитот на БРИКС, кој почна денеска во Сијам.

Путин предложи да се основа заедничка енергетска платформа која би овозможила подобра размена на информации, аналитички и на научни податоци.

Тој потсети дека стратегијата на економско партнерство на БРИКС е основана на самитот во Русија во 2015 година.

– Сметаме дека треба да развиваме електронска трговија без пречки, да се поддржат малите и средни претпријатија и да има поголема ефикасност во партнерствата на државата и приватниот сектор – рече рускиот претседател.

Кинескиот претседател Кси Џинпинг ги повика земјите – членки на БРИКС да играат поголема улога во светот, да го отфрлат протекционизмот и да внесат нова енергија во решавањето на разликите помеѓу богатите и земјите во развој.


Заев – Ривлин: Можност за интензивирање на безбедносната и на економската соработка


Тел Авив, 3 септември, 2017 - 14:10 (META) 

Владината делегација предводена од премиерот Зоран Заев денеска, за време на официјалната посета во Израел, се сретна со израелскиот претседател Руевен Ривлин. На средбата се разговарало за можностите за интензивирање на соработката, соопшти владината прес-служба.

– Владата е насочена да обезбеди квалитетен живот на граѓаните и мотивација младите да останат да работат и да живеат во родната земја. Интеграциите во ЕУ и во НАТО и продлабочувањето на односите со пријателските држави, како со Израел, многу ќе придонесат за тоа – рекол Заев.

Премиерот додал дека Владата ќе ги земе предвид искуствата на Израел на безбедносен и на економски план, а двајцата соговорници договориле чекори за економско поврзување на двете земји.

Во владиното соопштение се вели дека израелскиот претседател Ривлин ги поздравил демократските промени во Македонија и реформските определби на новата влада, кои отвораат можности за односите меѓу двете земји.