Од понеделник започнува новата сезона за парно-греење


Скопје, 12 октомври, 2018 - 12:17 (META) 

Граѓаните и правните субјекти во Скопје кои се поврзани на централниот систем на топлинска енергија, од понеделник, 15 октомври 2018 година ќе почнат да добиваат топлинска енергија, сe до 15 април 2019, кога трае регулираниот период за редовна испорака, информираат од „БЕГ снабдување“.

„Во рамките на овој период, испораката на топлинска енергија се врши по строго утврдени правила и дијаграми во зависност од атмосферските услови и надворешните температури. Овие правила и дијаграми се утврдени во регулативата за испорака на топлина до потрошувачите одобрена од Регулаторната комисија за енергетика“, се вели во соопштението на компанијата.

Од таму додаваат дека годинава, споредено со минатата година, бројот на нови потрошувачи е зголемен.

„За сите детали за испораката на топлинска енергија, потрошувачите може да се информираат на веб-страницата www.beg-snabduvanje.com.mk (Мрежни правила за дистрибуција на топлинска енергија Прилог 3), или да се обратат до Центарот за грижа за потрошувачи на телефонскиот број 02 3076 200 и на 075 400 100 или преку е-пошта на: contact@beg-snabduvanje.com.mk “, се додава во соопштението.

 


Град Скопје предлага одржувањето на фонтаните во Центар да го преземе ЈП „Водовод“


Скопје, 17 јули, 2018 - 14:39 (META) 

Со предлог-одлуката за отстапување на чување, одржување, заштита и користење на фонтани, која ќе се најде пред Советот на Град Скопје на утрешната седница, се предлага јавното претпријатие „Водовод и канализација“ да ја презеде обврската за чување, одржување, заштита и користењето на поголем број фонтани лоцирани во централното градско подрачје, информираат од Град Скопје.

„Со предлог-одлуката Градот Скопје оваа обврска ја префрла на ЈП „Водовод и канализација“, а со истата се опфатени фонтана „Воин на коњ“, подна фонтана на плоштад Македонија, „Матрикс“, фонтани на плоштад „Филип II“ (Карпошово востание), фонтана на мост „Око“, фонтани на плоштад „Богородица“, фонтана во парк „Жена борец“, фонтана на плоштад „ВМРО“. Одржувањето на фонтаните од 2013 година го вршеше Градот Скопје, за чија цел се склучени неколку договори со „Бетон“, за што од градскиот буџет се одвојуваа од 25 до 30 милиони денари годишно. Средствата што досега беа користени за оваа намена, во иднина ќе бидат пренаменети за реализација на капитални проекти“, се вели во соопштението на Град Скопје.

Град Скопје се обврзува да ги подмирува сметките за потрошената електрична енергија на фонтаните, но нема да одвојува дополнителни средства за нивно одржување.


МНР: Моментот е деликатен, не треба да се брза, поважен е квалитетот на договорот од роковите


Скопје, 7 јуни, 2018 - 17:30 (META) 

Попладнево македонското Министерство за надворешни работи испрати соопштение до, како што вели, „домашната и меѓународната јавност“ дека се работи на постигнување договор за името, но дека „за вака значајни прашања не треба да се брза“.

Еве го соопштението во целост:

Министерството за надворешни работи во овој исклучително деликатен момент во процесот за надминување на разликата околу името меѓу Република Македонија и Грција, цени дека домашната и меѓународната јавност треба да бидат информирани за следното:

Во текот на разговорите беше покажана добра волја и беше постигнат добар резултат. Во овој момент, како и во секој процес од ваква природа, потребно е таа добра волја да се преточи од страна на работните групи во текст на договор, што на најсоодветен начин ќе ги отслика суштинските параметри од постигнатото политичко разбирање меѓу двете страни. Република Македонија посакува и интензивно работи тоа да се случи што побрзо до претстојниот состанок на Европскиот совет, воедно укажувајќи дека за вака значајни прашања не треба да се брза. Квалитетот на текстот на договорот и потребата од постигнување на трајно и одржливо решение прифатливо за двете страни, се далеку поважни од потребата процесот да се финализира во каков било рок.


СДСМ: Монтираните судски процеси беа карактеристика за ВМРО-ДПМНЕ


Скопје, 27 март, 2018 - 11:08 (META) 

Монтираните судски процеси беа карактеристика за криминалното владеење на ВМРО-ДПМНЕ, тоа време заврши, Македонија станува правна држава, реагираат од СДСМ на соопштението на ВМРО-ДПМНЕ.

Од партијата велат дека „ВМРО-ДПМНЕ нема кредибилитет да зборува за владеење на правото.“

„ Токму таа партија 11 години нарачуваше монтирани судски случаи кои служеа единствено за пресметка со неистомислениците. Со таквиот начин на владеење, ВМРО-ДПМНЕ целосно го урниса владеењето на правото, а Македонија долго време беше категоризирана како заробена држава. Времето на нарачани судски процеси, на криминално и коруптивно однесување на власта, заврши со заминувањето на ВМРО-ДПМНЕ во опозиција“, се вели во соопштението.


Железничкиот товарен сообраќај е во прекин, патничкиот ќе се одвива до полноќ


Скопје, 11 декември, 2017 - 17:13 (META) 

Железничкиот товарен сообраќај во Македонија е во целосен прекин од 07.30 часот утрово, а  железничкиот патнички сообраќај ќе се одвива само до полноќ, соопшти попладнево „МЖ-Транспорт“.

Како што информираат од компанијата, група вработени од машинскиот и извршен персонал во „МЖ-Транспорт“, еднострано и ненајавено, решиле да прекинат со извршување на своите работни обврски, поради неисплатен втор дел од платата за октомври.

„Железничкиот патнички сообраќај од станица Скопје Патничка ќе се одвива само до крајот на денешниот ден, т.е. до 24 часот. Сите возови кои во текот на денешниот ден ќе тргнат од станица Скопје Патничка, ќе бидат вратени во текот на утрешниот ден, согласно важечкиот возен ред“, се вели во соопштението.


Руска амбасада: Владата не информираше точно за средбата на Заев и на амбасадорот Шчербак


Скопје, 20 октомври, 2017 - 13:31 (META) 

Руската амбасада писмено реагираше на вчерашното соопштение на македонската влада за средбата на премиерот Зоран Заев со рускиот амбасадор Олег Шчербак. Од Амбасадата на Руската Федерација во земјава тврдат дека соопштението на Владата не ги пренело точно пораките од рускиот амбасадор упатени до премиерот.

„Амбасадата информира дека текстот на посоченото соопштение не е усогласен со руската страна и не претставува сосема коректен одраз на одделни оценки што беа изнесени за време на разговорот од страна на амбасадорот на Русија. Во исто време, руската страна ја потврдува својата посветеност на сестрано и конструктивно унапредување на традиционално пријателските односи меѓу Руската Федерација и Република Македонија“, стои во соопштението.

Во соопштението од владината прес-служба стои дека заедничката оценка на Заев и Шчербак била дека евроатланските стремежи на земјава не се и не треба да бидат пречка за развој на билатералните односи меѓу Македонија и Русија, особено зашто и кај двете држави постои став за одржлив систем на безбедност во светот. Ова, соред владината прес-служба, била заедничката оценка од денешната средба на премиерот Зоран Заев со амбасадорот на Руската Федерација во Македонија, Олег Шчербак.

Рускиот амбасадор, како што стои во владиното соопштение за средбата, ја поздравил енергичната посветеност на премиерот Заев и неговиот придонес за демократските процеси што ја движат Македонија напред и изразил почитување за политиките кои водат кон евроатлански интеграции на Македонија, но и унапредување на односите со другите држави.


ВМРО-ДПМНЕ: Беззаконието се крие со тоа што скандалите се прогласуваат за лажни вести


Скопје, 19 август, 2017 - 11:17 (META) 

Зоран Заев мисли дека хаосот и беззаконието што ги креираат ќе може да се сокрие преку соопштенија, во кои што, сите скандали ќе ги прогласат за лажни вести, се вели во реакцијата на ВМРО-ДПМНЕ на соопштението на СДСМ.

Од таму влеат дека „вистина е дека полицијата раководена од Оливер Спасовски безмислосно ќе убиеше две момчиња.“

„Не е лажна вест дека се вратија мафијашките пресметки, среде бел ден, по улиците низ Македонија и граѓаните се чувствуваат несигурни. Вистина е дека со лошиот Договор со Бугарија ќе се менуваат книгите по историја во Македонија и ќе се мониторираат македонските медиуми. Вистина е дека Заев плаќа со пари на граѓаните, неспособни и некомпетенти кадри кои почнаа да си даваат и оставки. Вистина е дека Мила Царовска испраќала дописи до сите општини да обезбедат локации за градење објекти за згрижување мигранти“, се додава во соопштението.


СДС да престане со манипулации и лаги за стечајците, велат од ВМРО-ДПМНЕ


Скопје, 18 август, 2017 - 11:17 (META) 

Крајно лицемерно е СДС да зборува за социјална заштита и грижа за функционирањето на социјалните работници, кога додека беа на власт, со прст не мрднаа за подобрување на системот на социјална заштита, реагираат од ВМРО-ДПМНЕ на соопштението на СДСМ за стечајните работници.

Во него се додава дека „СДС остави на улица 200.000 работници и стави клуч на 684 фабрики оставајќи без никаква егзистенција стотици илјади деца.“

„СДС е гробар на македонската економија. Десетици години и требаа на државата да излезе од провалијата во која што ја втурнаа. Врз грбот на граѓаните се прекршија сите приватизации додека олигарсите на СДС го зголемуваа своето богатство“, се додава во соопштението.


ФРОДЕМ: Опозицијата се сведе само на негирање


Скопје, 16 јули, 2017 - 15:32 (META) 

Фронт за демократска Македонија (ФРОДЕМ) ги повика добронамерните членови на ВМРО-ДПМНЕ „во наредниот период да се воздржат од вплеткување во манипулативни игри на Груевски и на врхушката за спасување на сопствената криминална кожа“.

„Опсесивниот, секојдневен притисок за вклучување на партиски лица во јавните реакции не е ништо друго туку „димна завеса“ која треба да создаде привид на божемна опозициона активност. А која е, всушност, опозиционата активност: негирање, негирање и негирање. Тоа не е став на опозиција, туку став на очајници кои не сакаат ништо друго освен трескавично, папагалско промовирање на зададени пропагандни пароли. Но, таа импотентност не нè загрижува. Нас реално нè загрижува фактот што зад параванот на партиските соопштенија, на божемната партиска активност, се врши активно попречување на правдата, односно безобѕирно криминално бранење на огромниот организиран криминал кој досега е направен“, се вели во соопштението од ФРОДЕМ.

Од партијата порачуваат дека власта мора да „го демонтира режимот“ или да им овозможи на вонпартиските професионалци да ги вратат нормалноста и редот во државата.


ВМРО-ДПМНЕ: СДСМ не ги слуша барањата на стружани за итно затворање на депонијата


Скопје, 16 јуни, 2017 - 10:01 (META) 

СДС и нивните коалициски партнери ја уништуваат Струга, jа загрозуваат летната туристичка сезона, a револтот од граѓаните кон владата на СДС се зголемува, се вели во редовното утринско соопштение на ВМРО-ДПМНЕ.

„Додека министрите од владата на СДС секој ден се среќаваат со разни амбасадори, стружани се задушуваат од густиот чад кој доаѓа од депонијата што секој ден гори. Владата на СДС е сосема глува и не ги слуша барањата на стружани за итно затворање и дислокација на отпадот. Пратениците од ВМРО-ДПМНЕ и од Коалицијата за подобра Македонија побараа по итна постапка да се одржи седница на која ќе се разгледува алармантната состојба во Струга со загадувањето од запалената депонија, која што со денови ги труе стружани. Талат Џафери на крајно недемократски начин се обиде да ја затвори оваа тема и не дозволуваше процедурални забелешки на пратениците од ВМРО-ДПМНЕ“, велат од партијата.

Од ВМРО-ДПМНЕ нагласуваат дека темата за депонијата во Струга е важна и дека не може и не смее да биде замолчена со одземање збор на пратеник.