Мотоциклист загинал во судир со автомобил и друг мотоцикл


Кочани, 12 март, 2018 - 11:39 (META) 

Во тешка сообраќајна нессреќа вчера на патот Штип – Кочани животот го загубил 39-годишен жител на Свети Николе, откако мотоциклот со кој управувал се судрил со друг мотоцикл и со автомобил.

Според полицијата, во сообраќајната незгода која се случила пред 17 часот учествувале автомобил „фолксваген голф“ управувано од 19-годишна жителка на Кочани,  мотоцикл „сузуки“ со светиниколски регистарски ознаки управуван од В.Ц. (39) од Свети Николе и мотоцикл „хонда“ со бугарски национални ознаки управуван од В.Ј. (33), на кој сопатник бил К.Г. (22), двајцата од Свети Николе.

Од здобиените повреди починал В.Ц., додека В.Ј. и сопатникот К.Г. се здобиле со телесни повреди и се пренесени во Медицински центар Штип.


Таксист загинал во судир со камион на патот Градско – Прилеп


Кавадарци, 28 февруари, 2018 - 14:39 (META) 

Во тешка сообраќајна несреќа што се случила денеска во 10.10 часот на магистралниот пат Градско – Прилеп, загинал таксист кој управувал со автомобил „мерцедес“ со скопски таблички.

Како што извести полицијата, се судриле „волво“ камион со приколка управуван од Ј.Г.(30) од Велес и такси возилото со кое управувал К.Л.(35) од Скопје. Таксистот го загубил животот веднаш, додека сопатничките во возилото, М.И.(64) и А.И.(31), двете од Битола, биле повредени и биле пренесени во болницата во Кавадарци. По укажаната прва помош се пренесени во Клиничкиот центар „Мајка Тереза“ во Скопје.

Возачот на камионот и неговиот сопатник не биле повредени.


Маж од скопско Марино загинал во сообраќајка во Скопје


Скопје, 13 јануари, 2018 - 11:49 (META) 

Во сообраќајна несреќа што се случила вчера околу 23.30 часот на булеварот„Александар Македонски“ во Скопје, животот го загубил 36-годишниот Г.С. од скопското село Марино, соопшти СВР Скопје.

Загинатиот управувал со автомобил „мерцедес“ со скопски таблички кога загубил контрола над возилото, по што автомобилот удрил во метални столпчиња, а потоа во дрво и во метална канделабра. Од повредите возачот го загубил животот, а сопатникот З.М. (38) од Марино се здобил со телесни повреди и со возило на Итна медицинска помош е пренесен во Ургентен центар – Скопје, каде е задржан на лекување на Клиниката за трауматологија.

Увид извршила екипа од Секторот за внатрешни работи-Скопје. По наредба на Јавен обвинител, телото на починатиот е предадено на судска медицина за обдукција.


Двајца загинати во две сообраќајки близу Македонска Каменица


Македонска Каменица, 26 септември, 2017 - 19:11 (META) 

Маж и жена загинале во две одвоени сообраќајки близу Македонска Каменица денеска.

Според СВР Штип, на магистралниот пат на потегот од селото Истибања до Македонска Каменица, на свиокот во близина на рибникот „Саваро“, загинал 51-годишен маж од селото Облешево. Возилото „махиндра“ со кое управувал, претпладнево излетало од коловозот и тој на местото на несреќата починал од добиените повреди.

Три часа подоцна на влезот од Македонска Каменица, на патот кој води до селото Цер, дошло до судир меѓу автомобил „форд“ со регистерски таблички од Македонска Каменица и автомобил „фолксваген“ со скопски таблички. Во судирот животот го загубила 75-годишна сопатничка во „фолксвагенот“, а нејзиниот 55-годишен син, кој управувал со автомобилот, е повреден.

Според СВР Штип, за неполни девет месеци на патиштата во Источна Македонија загинале 20 лица.


Во несреќи вчера загинале двајца мажи од Кумановско


Куманово, 20 јули, 2017 - 13:54 (META) 

Во две несреќи вчера попладнето, животите ги загубиле двајца мажи од Кумановско.

Во првиот случај, како што извести МВР, околу 16.30 часот, Н.Ф.(49) од кумановското село Лопате, собирајќи слама во сопствената нива, паднал од тракторска приколка на која бил качен и бил прегазен од тркалото од приколката. Подоцна лекарите од кумановската болница, каде бил однесен, констатирале смрт. Увид на местото на несреќата извршила увидна екипа на СВР-Куманово.

Во втората несреќа жртва бил Р.Д. (52) од Куманово. Тој управувал со автомобил „опел зафира“ на aвтопатот А1, Велес – Градско, а околу 18.30 часот во близина на клучката за селото Виничани загубил контрола над возилото, при што автомобилот излетал од коловозот и се превртел во канал. Возачот од повредите починал веднаш и неговото тело е предадено за обдукција.


Жена почина од повреди од сообраќајка кај Кадрифаково


Штип, 13 мај, 2017 - 13:14 (META) 

Од тешките повреди стекнати при превртување на автомобилот во кој се возела, вчера починала 75-годишната С.Д., соопшти МВР.

Сообраќајката се случила на патот Штип – Велес, кај селото Кадрифаково. Автомобил „дачија логан“ со скопски регистерски таблички, управуван од 51-годишниот скопанец Д.Д., во еден момент излетал од коловозот, при што и возачот и жената добиле тешки телесни повреди.

Двајцата биле пренесени во Клиничкиот центар во Штип и им била укажана лекарска помош, но жената по два часа од несреќата починала. Возачот е задржан на лекување.


Богоевски и Васиљ бараат Спасов да си поднесе оставка, а МВР да го расветли случајот


Скопје, 30 октомври, 2016 - 17:34 (META) 

Граѓанските активисти Павле Богоевски и Влатко Васиљ денеска на прес-конференција го повикаа дополнителниот заменик-министер за социјална политика, Диме Спасов, да си поднесе оставка поради вчерашните случувања.

Богоевски рече дека Спасов мора да одговара за своите постапки, како и лицата што му помогнале да го прикрие делото.

– Нашиот систем не смее да продолжи да толерира прекршување на законите од тие што треба да ги спроведуваат. Бараме и очекуваме Диме Спасов да поднесе оставка од својата функција. Веднаш – рече Богоевски.

Активистот Влатко Васиљ побара Министерството за внатрешни работи и министерот Оливер Спасовски да ги преземат сите дејства за да го расветлат овој случај и да ги санкционираат сторителите.

– Бараме од Министерството и од министерот за внатрешни работи да ги преземат сите потребни дејства за расветлување на случајот и за санкционирање на сторителите. Истовремено, потсетуваме дека и давањето лажен исказ и лажното пријавување кривично дело се посебни кривични дела за кои мора да постои одговорност. Мора да го оставиме зад нас времето кога луѓето што треба да го постават примерот за граѓанско однесување, се однесуваат како шерифи кои се над законот – рече Васиљ.


Диме Спасов направил сообраќајка и избегал од местото додека траел увидот?


Скопје, 29 октомври, 2016 - 12:09 (META) 

Дополнителниот заменик-министер за труд и социјална политика, Диме Спасов, ноќеска направил сообраќајка, пишуваат медиумите.

Според пишувањата, сообраќајната незгода се случила во населбата Тафталиџе, а Спасов избегал од местото на настанот додека траел увидот.

Спасов со џип, што според првичните сознанија е сопственост на Агенцијата за вработување, околу полноќ удрил две паркирани возила. Додека екипата земала изјави од сведоците, во близина дошло друго возило, Спасов ги напуштил полицајците и си заминал со тоа возило.

На пишувањата на медиумите реагираа од неговиот кабинет од Министерството за труд и социјала и најавија тужби за медиумите што објавиле за сообраќајната незгода.

„Во врска со одредени наслови и текстови на портали кои денеска беа објавени, за наводна ‘тешка сообраќајна незгода со последици’, должни сме да реагираме бидејќи истите се базираат на невистини, шпекулации и груби дезинформации кои очигледно се смислени за да наштетат на угледот на дополнителниот заменик-министер за труд и социјална политика. Опозициските портали дрско и непоткрепено манипулираа дека се случила тешка сообраќајна несреќа со настанати штети, што е целосна невистина. За овој типичен пример на организиран и координиран напад поттикнат од политички цели против дополнителниот заменик-министер, во наредните денови не е исклучено и поведување постапки пред надлежните судови за докажување на вистината“, пишува во реакцијата од кабинетот на Спасов.


Двајца повредени во сообраќајка во Кочани


Кочани, 6 јануари, 2016 - 13:07 (META) 

Двајца се тешко повредени во сообраќајната несреќа што се случи вчера во 11.30 часот во Кочани, на улицата Димитар Влахов.

Возило „сеат леон“ со кочански регистарски таблички, управувано од К.П. (28) од Кочани, се судрило со „пежо 406“ со штипски регистарски ознаки, управувано од Т.Ј. (66) од селото Чешиново и со „форд ескорт“ со штипски регистарски ознаки, управувано од Б.Т. (48) од Кочани.

Во незгодата, тешки телесни повреди добиле Б.Т. и Т.Ј. Лекарска помош им е укажана во ЈЗУ – Кочани, по што биле препратени во Клинички центар Скопје на понатамошно лекување. Увид на местото на настанот извршила екипа од полициската станица Кочани.


Еден загинат и четворица тешко повредени во сообраќајна незгода во Куманово


Куманово, 28 ноември, 2015 - 13:12 (META) 

Едно лице го загубило животот, а четири биле тешко повредени во сообраќајна несреќа што ноќеска околу 1 часот се случила на булеварот Трета македонска ударна бригада, во Куманово.

Како што информираат од полицијата, сообраќајната несреќа се случила кога автомобил, марка „субару импреза“, што го управувал Роби П.(40) од Куманово, излетал од патот и удрил во бетонски ѕид. Од здобиените повреди при ударот, Роби П. починал на самото место.

Со тешките телесни повреди се здобиле неговите сопатници Ц.В.(40), М.М.(39), И.Т.(28), и И.Б.(31), сите од Куманово, на кои била укажана лекарска помош во кумановската општа болница. На натамошно лекување во болницата се задржани Ц.В. и М.М., додека И.Т. и И.Б. поради серизноста на повредите се пренесени во Ургентниот центар во Скопје.

Јавен обвинител и увидна екипа на Секторот за внатрешни работи извршиле увид на местото.