!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Млад демиркапиец загина во сообраќајка во Демиркаписка Клисура


Демир Капија, 9 декември, 2017 - 13:43 (META) 

Во директен судир што се случил ноќеска на автопатот Скопје – Гевгелија, во Демиркаписка Клисура животот го загубил 24-годишен жител на Демир Капија.

Како што соопшти полицијата, во 3.50 часот денеска се судриле автомобил „сеат леаон“ со неготински регистерски таблички, управуван од С.Ј.(24) од Демир Капија, и автомобил „мерцедес“ со скопски таблички, управувано од Ѓ.Ч. (65) од Скопје.

Во судирот животот го загубил младиот демиркапиец, а возачот на „мерцедесот“ бил повреден.

Се работи на целосно расчистување на случајот.


Еден загинат, петмина повредени во судир на патот Кратово – Пробиштип


Кратово, 23 ноември, 2017 - 12:34 (META) 

Едно лице починало од повредите што ги добило во тешката сообраќајка што се случила претпладнево на регионалниот пат меѓу Кратово и Пробиштип, велат за „Мета“ од МВР.

Кај местото Жгури дошло до судир на автомобил „рено меган“ со скопски таблички и „фолксваген“ со штипски ознаки. По несреќата пет лица биле префрлени во Клиничката болница во Штип, каде едно лице им подлегнало на повредите. Шестото лице било пренесено со телесни повреди во Здравствен дом Пробиштип.

Увидот на местото на несреќата уште трае, а полицијата ќе го соопшти идентитетот на загинатото лице откако ќе биде известено семејството.


Автомобил се удрил во автобус со Македонци во Австрија


Виена, 23 ноември, 2017 - 12:13 (META) 

Еден загинат е епилогот на сообраќајната несреќа што се случила вчера, во 21.50 часот, кај Шлирбах во Австрија, кога автомобил удрил во автобус со кој Македонци патувале од Германија кон Македонија, јави австриската државна телевизија ОРФ.

Засега не се познати причините зошто автомобилот, со кој управувал 27-годишен Австриец, преминал на левата лента и удрил во автобусот. Во судирот животот го загубил 25-годишник од Гафленц, Австрија, кој бил сопатник во автомобилот, а возачот е пренесен во болница со тешки повреди.

Во автобусот имало 28 патници од Македонија, и сите, вклучително и возачот на автобусот, се неповредени.

Испратен е нов автобус од Македонија кој треба да ги преземе патниците и да ги донесе во земјава.


Девет лица загинаа во Бугарија во судир на минибус и на камион


Ловеч, 17 ноември, 2017 - 18:55 (META) 

Девет лица загинаа, а 19 се повредени во судир на минибус и на камион во Северна Бугарија, близу градот Ловеч, соопшти бугарското МВР.

Меѓу настраданите е и возачот на минибусот, кој враќал група лица од градот Перник од екскурзија.

Повредените беа пренесувани во болниците во Ловеч и во Плевен, а се подготвува и транспорт на најтешко повредените во Софија.

Несреќата се случила околу 13 часот. Во минибусот имало 26 лица, а во камионот две лица.


Судир на ученички автобус и комби – повредени 10 ученици


Демир Хисар, 14 ноември, 2017 - 17:55 (META) 

Десет ученици од демирхисарското основно училиште „Гоце Делчев“ се повредени откако автобусот со кој се превезувале се судрил со комби.

Како што соопшти СВР Битола, во несреќата е повреден и возачот на комбито.

Сообраќајната несреќа се случила околу 7.30 часот на патот Демир Хисар – Кичево, а во автобусот имало 30 ученици.

На повредените им била укажана лекарска помош во Клинички центар Битола, по што се пуштени на домашно лекување.


Шест лица повредени во сообраќајка на патот Маврови Анови – Дебар


Гостивар, 8 ноември, 2017 - 20:47 (META) 

Шест лица се повредени, од кои четири деца, во сообраќајна несреќа што денеска попладне се случила на патот Маврови Анови – Дебар.

Според информациите на СВР Тетово, сообраќајната несреќа се случила околу 16 часот, кога возило „мерцедес“ со тетовски регистарски ознаки, што го управувал 46-годишниот Ј.Џ. од Голема Речица се судрило со товарно возило „ман“, што го управувал 43-годишниот М.Б. од селото Челопек.

Во несреќата, покрај возачот на мерцедесот повредени се неговата сопруга Е.Џ. (36) и четири малолетни деца кои биле во автомобилот. Повредените деца, од кои едно потешко, се префрлени на скопските клиники.


Во сообраќајка загина Зоран Стефановски, поранешен претседател на Советот за радиодифузија


Скопје, 6 ноември, 2017 - 11:18 (META) 

Во сообраќајна незгода што се случила ноќеска во Скопје, загина Зоран Стефановски, поранешен претседател на Советот за радиодифузија.

Според полицијата, несреќата се случила околу еден часот по полноќ, кога Стефановски, кој управувал возило „рено меган“ со прилепски регистарски ознаки, излетал од патот и удрил во сообраќаен знак и рекламен билборд на крстосницата од булеварот Александар Македонски и сервисната улица која ги повзува со кружен тек булеварот Никола Карев и улицата Беласица.

Стефановски со возило на итна помош бил префрлен во градската хируршка болница „Свети Наум Охридски“, каде околу 1.20 часот им подлегнал на повредите.


Најмалку 30 лица загинаа, а 15 се повредени во автобуска несреќа во Непал


Катманду, 28 октомври, 2017 - 14:33 (META) 

Најмалку 30 лица загинаа, а 15 се повредени во автобуска несреќа што се случила во близина на Катманду, соопштила полицијата. Автобусот излетал од патот во реката Тришули, која е позната по брзите и силни водени струи.

На теренот се припадници на војската и нуркачи, кои се обидуваат да ги пронајдат телата на патниците.

– Досега извлековме 30 тела и веруваме дека сè уште има заглавени во потонатиот автобус – соопштиле локалните власти.

Причина за сообраќајните несреќи во Непал се неодржувањето на патиштата, особено во планининските области, и лошата состојба на возилата.


Сообраќајна несреќа кај Крива Паланка, две лица се потешко повредени


Крива Паланка, 3 септември, 2017 - 13:38 (META) 

Во сообраќајната несреќа што се случила денеска околу 10.15 часот кај местото Чешмиче, на магистралниот пат Куманово – Крива Паланка, две лице се потешко повредени.

Сообраќајот сè уште е во прекин, а возилата се пренасочуваат по стариот пат.

Во несреќата учествувало теренско возило „тојота“ со косовски регистарски ознаки, управувано од С.Ф., и автомобил „рено меган“ со кривопаланечки регистарски ознаки, управувано од И.С. (52). Во „реното“ се наоѓале и двајца сопатници, 46-годишна жена и А.С. (19).


Урко доби условна казна за сообраќајката по која почина повреденото момче


Скопје, 14 август, 2017 - 16:25 (META) 

Дејан Митровски – Урко, кој едно време беше телохранител на тогашниот премиер Никола Груевски доби само условна, но не и затворска казна за сообраќајката на 27 јуни лани, кога кај Стара рампа на булеварот Борис Трајковски во Скопје со автомобил удри млад мотоциклист, кој почина од повредите пет дена подоцна в болница.

Пресудата е донесена на 20 јуни годинава, а на предметот работела Биљана Коцевска од Основен суд Скопје 1. Таа одредила условна казна од две години затвор, која ќе се активира ако во следните пет години Митровски стори ново кривично дело.

22-годишниот Стојанчо Андонов беше удрен од автомобилот „бмв“ зад чиј волан бил Митровски, во момент кога автомобилот прегазувал двојна полна лента. Семејството на починатото момче не побарало оштета.

Митровски на судењето ја признал вината.

Судијката се повикала на вештачењето, според кое мотоциклот со кој управувал Андонов се движел со брзина од 94,6 километри на час, а немал вградено предно светло.