Пратеничката Лазарова од СДСМ повредена во верижна сообраќајка


Скопје, 11 февруари, 2018 - 13:25 (META) 

Пратеничката Мери Лазарова од СДСМ, вчеравечер била причинител на верижна сообраќајка на патот Демир Капија – Удово, во која добила тешки повреди. Градоначалникот на Валандово, Перо Костадинов, бил со неа, а во несреќата задобил лесни повреди, соопштуваат медиумите.

Според официјалното соопштение, пак, од МВР, вчера околу 17.50 часот на патот Демир Капија – Удово, на место викано „Маркова чешма“, се случила сообраќајна незгода во која М.Л. (33) од Валандово, управувајќи автомобил „опел корса“ со гевгелиски регистарски ознаки удрила во одрон од камења на коловозот.

Веднаш потоа, А.М. (57) од Богданци, управувајќи товарно возило „Волво“ со гевгелиски ознаки, кој возел зад автомобилот на пратеничката, удрил во опелот, па пратеничката и сопатникот во автомобилот, П.К. (30) од селото Удово , со возило на Итна медицинска помош биле пренесени во Општа болница Кавадарци. Кај П.К. биле констатирани телесни повреди, додека кај М.Л. биле констатирани тешки телесни повреди.

Поради сериозноста на повредите, М.Л. била пренесена во комплексот клиники „Мајка Тереза“ во Скопје.

Увид на местото на настанот извршиле Јавен обвинител и увидна екипа од Полициската станица Неготино.


Полицаец од конвојот на канадскиот премиер повреден во судир со џип во САД


Лос Анџелес, 10 февруари, 2018 - 19:29 (META) 

Полицаец на моторцикл кој бил во придружба на конвојот возила во кој бил канадскиот премиер Џастин Трудо бил повреден денеска во Калифорнија откако удрил во џип. Полицаецот е пренесен во болница со повреди, а Трудо не бил повреден.

Несреќата ја предизвикал џип што нагло свртел лево додека возел пред конвојот.

Несреќата се случила во јужна Калифорнија, кратко откако Трудо ја завршил посетата на Претседателската библиотека „Роналд Реган“ во долината Сими.

Канадскиот премиер е во дводневна посета на Калифорнија.


Маж од скопско Марино загинал во сообраќајка во Скопје


Скопје, 13 јануари, 2018 - 11:49 (META) 

Во сообраќајна несреќа што се случила вчера околу 23.30 часот на булеварот„Александар Македонски“ во Скопје, животот го загубил 36-годишниот Г.С. од скопското село Марино, соопшти СВР Скопје.

Загинатиот управувал со автомобил „мерцедес“ со скопски таблички кога загубил контрола над возилото, по што автомобилот удрил во метални столпчиња, а потоа во дрво и во метална канделабра. Од повредите возачот го загубил животот, а сопатникот З.М. (38) од Марино се здобил со телесни повреди и со возило на Итна медицинска помош е пренесен во Ургентен центар – Скопје, каде е задржан на лекување на Клиниката за трауматологија.

Увид извршила екипа од Секторот за внатрешни работи-Скопје. По наредба на Јавен обвинител, телото на починатиот е предадено на судска медицина за обдукција.


Четири девојки се повредени во сообраќајна несреќа на патот Штип – Струмица


Штип, 6 јануари, 2018 - 13:05 (META) 

Утрово околу 03.50 часот на магистралниот пат Штип – Струмица се случила сообраќајна несреќа во која, автомобил „БМВ“ со штипски регистарски ознаки, управувано од Д.З. (21) од Штип, излетало од патот и удрило во две дрва кои се скршиле и паднале, при што бил оштетен автомобил „пежо 206“.

По несреќата, возачот и сопатничките М.Д. (19), М.П. (19), Т.Н. (18) и З.П. (19), сите од Штип, биле пренесени во болницата во Штип, каде што им била укажана лекарска помош. Поради сериозноста на повредите М.Д. била пренесена во Комплексот клиники „Мајка Тереза“ во Скопје.

Возачот Д.З. е задржан на испитување во болницата во Штип. Увид на местото на настанот, по овластување на Јавен обвинител, извршила екипа од СВР Штип.


Тешка сообраќајка кај Кичево, загина тримесечно бебе, пет лица се повредени


Кичево, 3 јануари, 2018 - 19:59 (META) 

Тримесечно бебе загина, а пет лица се повредени попладнево во тешката сообраќајна несреќа што се случи на регионалниот пат Кичево-Македонски Брод, помеѓу селата Србјани и Староец.

Во сообраќајката учествувале две патнички моторни возила и едно товарно моторно возило.

Повредените лица се пренесени во Медицинскиот центар Кичево, а сообраќајот се пренасочува по алтернативен пат.


Сообраќајка на патот Тетово-Гостивар и опожарено возило на патот Штип-Неготино


Скопје, 3 јануари, 2018 - 19:45 (META) 

Сообраќајот на автопатот Тетово-Гостивар, на излез од село Камењане-Тетово од 18.30 часот е во прекин поради случена сообраќајна незгода помеѓу две патнички моторни возила, соопшти Автомото сојузот на Македонија.

Од АМСМ додаваат дека од 17.50 часот на регионалниот пат Штип-Неготино, поточно над село Лесковица сообраќајот е во прекин поради опожарување на патничко моторно возило.


Верижен судир на автомобили, камион и автобус кај клучката Хиподром


Скопје, 2 јануари, 2018 - 9:45 (META) 

Во сообраќајна несреќа што утрово се случила пред клучката Хиподром во правец кон Велес, според првичните информации на полицијата, има повредено едно женско лице кое е пренесено на Ургентниот центар во Скопје.

Од МВР велат дека сообраќајката се случила помеѓу четири автомобили, од кои два со скопски регистерски таблички, еден со велешки и еден со прилепски таблички, со камион и автобус. Камионот имал охридски таблички, а автобусот скопски.

Сообраќајката во полиција била пријавена во 7.40 часот. Увидот уште не е завршен.

Сообраќајот на тој дел од патниот правец Скопје – Велес, односно кај клучка Хиподром се одвива отежнато. Поставена е соодветна сообраќајна сигнализација.


Тешко повредени тројца велешани откако на нив налетал автомобил


Велес, 1 јануари, 2018 - 13:32 (META) 

Во тешка сообраќајна несреќа што се случила ноќеска во 3.30 часот близу Градската библиотека во Велес, тешки телесни повреди задобиле тројца тинејџери, од кои двајца потоа се пренесени во Ургентниот центар во Скопје во животозагрозувачка состојба.

Како што извести СВР Велес, околу 03.30 часот на улицата „Алексо Демниевски“, Т.Т (33) од Велес изгубил контрола над автомобилот „фиат пунто“ со велешки таблички и удрил во К.К (19), Б.Д (18), Ф.К(18), кои во тој момент ја преминувале улицата, а потоа и во ѕид од камења.

Со возило на Итна медицинска помош во Општа болница Велес пренесени се К.К и Ф.К. Откако таму се констатирани тешки телесни повреди, тие се препратени во Клиничкиот Центар – Скопје и се наоѓаат во животна опасност.

Екипа на СВР Велес извршиле увид според инструкции од јавен обвинител, кој исто така издал наредби за прибирање на траги од местото на настанот и за вршење на анализа на крв и урина од возачот.


Такси-возач загина во верижен судир на булевар Србија


Скопје, 29 декември, 2017 - 11:03 (META) 

Едно лице загина, а друго е тешко повредено во сообраќајна несреќа што ноќеска, околу еден часот по полноќ се случила на булеварот Србија во Скопје, а во која учествувале повеќе возила.

Како што информираат од МВР, несреќата се случила кога автомобил, марка „ауди а4“, управувано од 28-годишниот Ѓ.Д. се судрил со возило „пежо 206“, а потоа преку тревникот преминало на коловозните ленти од спротивата насока, по што удрило во оградата на бензинска пумпа, а потоа во такси-возило. По незгодата, аудито се запалило и целосно е опожарено.

Во незгодата загинал возачот на такси-возилото, 58-годишниот Т.Ј. Тешка телесна повреда – фрактура на колено, била констатирана кај сопатникот во „аудито“, 21-годишниот Б.М. од селото Сопиште.

Увид на местото извршиле јавен обвинител и екипа од СВР Скопје. По наредба на јавниот обвинител телото на починатиот било предадено на обдукција.

Поради несреќата, сообраќајот на булеварот Србија, на делот од крстосницата со булевар Јане Сандански до крстосницата со булевар Трета Македонска Бригада, бил во прекин во двате насоки од 1.30 часот до 5.30 часот.


Тројца загинати во превртување на автомобил, камион и запрежна кола


Скопје, 28 декември, 2017 - 13:58 (META) 

Во три несреќни случаи во изминатото деноноќие, три лица ги загубиле животите, извести МВР.

Првиот случај бил на Градечка Планина кај Валандово, при што камион „там 80 т“ управуван од 58-годишен валандовец вчера попладне се превртел и паднал во провалија, при што од добиените повреди починал Ж.Д.(51) од Валандово, кој бил сопатник во возилото, а друг сопатник задобил повреди на главата.

Во вториот случај, 75-годишниот С.М. од делчевското село Град вчера околу 20 часот бил пронајден починат во атарот на селото. На телото имало знаци на внатрешно и надворешно крварење, по што екипа на на Итна помош утврдила дека смртните повреди ги задобил кога врз него се превртела запрежна кола натоварена со дрва.

Во сообраќајна несреќа утрово пак во Скопско, загинал тинејџер. Според полицијата, на која случајот и бил пријавен нешто пред 7 часот утрово на локалниот пат од населбата Илинден кон селото Миладиновци, скопско, автомобил „голф“ со скопски таблички, управуван од А.З.(19) од Миладиновци излетал од коловозот и се превртел. Тинејџерот починал на местото на несреќата.