Од СОНК бараат зголемувањето на платите да биде повеќе од пет отсто и да почне од јануари


Скопје, 13 ноември, 2018 - 14:14 (META) 

Самостојниот синдикат за образование, наука и култура на Република Македонија – СОНК се залага зголемувањето на платите од пет осто во овие дејности да биде од први јануари, а не од септември 2019 година.

– Со пет отсто апсолутно не сме задоволни. Платите се далеку под просекот. Ако просечната месечна плата е околу 24 илјади денари, просечната плата во образование е околу 19 илјади денари. Најниската е 12.100, а на наставниците и професорите е до 22 илајди, ако не се земе предвид платата на директорите – рече денеска на прес-конференција претседателот на СОНК, Јаким Неделков.

Тој додаде дека има 250 лица чиј работен однос треба да се трансформира од определено на неопределено време.

– Општинските комисии што се задолжени да направат чекор во трансформации на работни договори од определено на неопределено работно време или одреден број на такви општински комисии воопшто не функционираат. Според наша проценка, тоа намерно се прави за да истечат овие три месеци на договори на определено време за потоа да се распишат конкурси и се вработат други луѓе, веројатно поподобни овие што се на работно место – рече Неделков.

Министерот за финансии Драган Тевдовски на вчерашната средба со синдикатите, при претставување на предлог-буџетот за 2019 година рече дека знае дека платите се мали, но тие како министерство гледале колкав е фискалниот простор за зголемување, бидејќи морале да внимаваат и на поддршката на економијата, компаниите, земјоделците.


СОНК: Државните пари се трошат нефукционално


Скопје, 13 февруари, 2018 - 14:04 (META) 

Самостојниот синдикат за образование, наука и култура на Република Македонија (СОНК), се огласи со реакција на распределба на буџетските пари во културата на граѓанските организации. Велат дека станува збор за нефукционално трошење државни пари во дел од проектите.

„Всушност со ништо не ја отсликуваат, презентираат или воздигнуваат културата во Република Македонија, особено не преку финансирање на проекти кои во најмала рака се сомнителни во оправданоста да бидат одобрени преку ова Министерство, како и проекти кои се поднесени од членови на комисии и кои одлучуваат за доделување на средства за туѓи, но и за свои апликации“, се вели во реакцијата.

Во писмото од Синдикатот се вели дека има огромно разочарување кај „културните работници кои се вработени во установите од културата, а кои реално се едни од најслабо платените работници во Јавниот сектор и очигледно се заборавени од страна на државата“.

СОНК апелира до Министерството за култура итно да продолжат преговорите за потпишување на колективниот договор, како и обезбедување на пари за негова реализација.

„Се чини дека Министерството за култура не е заинтересирано да го потпише и имплементира колективниот договор за култура, со тоа и да се надмине проблемот со различните плати во оваа дејност, воедно и да се подигне висината на платите на ниво со кое што на културните работници ќе им се врати достоинството на нивната професијата“, порачува Синдикатот.


СНП: Барањата на СОНК се легитимни, СОНК нe


Скопје, 15 јануари, 2018 - 9:28 (META) 

Иницијативниот одбор за формирање на Синдикат на Наставнички пленум (СНП) реагира на најавата на Синдикатот на вработените во образованието, науката и културата (СОНК) да организира штрајк пред Министерството за образование и наука, велејќи дека иако барањата на штрајкот под патронат на Конфедерацијата на слободни синдикати (КСС) се легитимни, но СОНК не е.

„Протестира СОНК, под патронат на КСС. Ние, Иницијативниот одбор на СНП, сметаме дека протестот е невиден сарказам и обид за нова манипулација со нашата фела. Имено, сите ние многу убаво знаеме и паметиме каква беше улогата на СОНК претходната деценија. СОНК, на чело со актуелното раководство, без да ги праша наставниците, без да го чуе нивниот глас, го аминуваше срамното екстерно проверување, наводно на знаења, реално како инструмент за пресметка со неистомислениците. СОНК потпиша Колективен договор и ниту еднаш не побара истиот да биде почитуван. СОНК ги премолча заменските наставници! СОНК го аминуваше укинувањето надомест за патни трошоци. Голем е бројот злодела против фелата од страна на СОНК. Затоа ние, наставниците, масовно почнавме да истапуваме од неговите редови. Затоа покренавме иницијатива за формирање синдикат“, се вели во реакцијата.


Неделков: Се прави хајка против СОНК за да се разбие единството на синдикатот


Скопје, 25 октомври, 2016 - 14:24 (META) 

Самостојниот синдикат за образование, наука и култура на Република Македонија е цел на напади и на организирана хајка од страна определени медиуми и политичка партија, кои имаат цел да го разбијат единството на синдикатот, вели претседателот на СОНК, Јаким Неделков.

– Во изминатите седмици, наша проценка и тврдење е дека врз СОНК се врши организирана, диригирана и оркестрирана хајка за разбивање на единството во СОНК и за намалување на јачината на оваа синдикална организација. Одредена политичка партија неколкупати преку прес-конференција да се меша директно во работењето на нашата синдикална организација и да кажува невистини, лаги, шпекулации и инсинуации – вели Неделков.

Раководството на СОНК обвини дел од медиумите дека намерно шират лаги едека, наводно, професорите во средно образование две години добивале плата пониска за 75 евра. Неделков рече дека поранешен член на СОНК направил погрешна пресметка на платите во средното образование и пласирал невистини во јавноста.


СОНК: СДСМ го урива нашиот углед


Скопје, 16 октомври, 2016 - 14:06 (META) 

Самостојниот синдикат за образование, наука и култура (СОНК) обвини дека СДСМ прави повреда на уставно загарантираното право на синдикално организирање и активност, а во исто време со притисоците што ги врши врз СОНК прави кривично дело.

„Вчудоневидува фактот што потпретседател на СДСМ преку прес-конференција, одржана на 23 септември, вршеше невиден напад врз најголемиот синдикат во државата, а на протестот организиран од страна на истата политичка партија, за време на празникот 11 Октомври, група нивни претставници пред седиштето на СОНК, со транспаренти атакуваа врз нашиот синдикат. Вчера претседателот на комисија за образование на општинската организација од Прилеп, со пласирање целосни невистини изврши груб напад врз СОНК“, велат од СОНК.

Советот на СОНК го повика раководство на СДСМ да преземе мерки, да престанат ваквите и целосно да ги тргнат обидите за уривање на угледот на синдикатот.

„Доколку не бидат преземени бараните мерки, веднаш ќе побараме да дојдат претставници од Интернационалата за образование и од Европската конфедерација на синдикатите за образование, чија редовна членка е СОНК, како и од Меѓународната организација за труд, за да бидат запознаени со сите овие случувања. Исто така, СОНК ќе ги информира и амбасадите во Република Македонија, вклучително и Амбасадата на Европската Унија“, додаваат од СОНК.


СОНК бара Заев да им се извини на синдикатите


Скопје, 9 април, 2016 - 11:55 (META) 

Синдикатот за образование, наука и култура (СОНК) денеска реагираше на повикот на лидерот на СДСМ, Зоран Заев, сите синдикати да се приклучат во народниот фронт на опозицијата. Од СОНК бараат извинување од Заев затоа што, како што велат, синдикатите не требало политички да дејствуваат.

Според СОНК, членовите на синдикатот сакаат кризата во Македонија да заврши што побргу.

„Ја известуваме целокупната македонска јавност дека сме зачудени од изјавата на претседателот на СДСМ во врска со неговото повикување на синдикатите во некаков народен фронт, кој ќе го формирал. Изјавата на Зоран Заев е невиден преседан во политичкото дејствување, не само во нашата земја, туку и пошироко во демократска Европа. Преседан, кој не се случил уште од времето на болшевизмот“, пишува во соопштението на СОНК.

Од СОНК порачуваат дека синдикатите имаат своја област на дејствување, која не е партиска политика.

Синдикатите од Конфедерацијата на слободни синдикати на Македонија и синдикатите од Сојузот на синдикати на Македонија, бараат Заев да се извини бидејќи, според нив, упаднал во основите на демократското општество.

„Ваквиот преседан на Зоран Заев може да предизвика огромни социјални и економски последици и затоа лидерот на СДСМ мора да престане со секакво мешање во работата и во дејствувањето на синдикатите во Република Македонија. За ваквото незаконско дејствување на лидерот на СДСМ ќе ги известиме сите синдикални организации на европско и на светско ниво, во кои се членки синдикатите од Република Македонија“, се вели во соопштението на СОНК.

 


Министерот Адеми присуствуваше на конгресот на СОНК во Струга


Струга, 12 декември, 2015 - 16:22 (META) 

„Министерството за образование и наука (МОН) и Синдикатот за образование наука и култура (СОНК) се долгогодишни партнери и сè што работиме е во насока на подобрување на образовниот процес во сите негови сегменти“.

Ова денеска го истакна министерот за образование и наука, Абдилаќим Адеми, на шестиот конгрес на СОНК во Струга.

– До сите заеднички ставови сме дошле благодарение на постојаните средби, на кои сме наоѓале заеднички решенија кои оделе во насока на подобрување на условите за работа на наставниците, професорите и, пред сè, на учениците. На средбите, преку дебати ги усогласуваме ставовите за сите реформи во образованието, почнувајќи од основното, средното и високото образование. Заложбите на министерството за подбра образовна политика биле поддржани од луѓето чија основна и примарна цел е пренесување на своето знаење на учениците – истакна Адеми.

Адеми рече дека партнерството меѓу МОН и СОНК се гради и врз основа на социјалниот дијалог и меѓусебното разбирање за проблемите со кои се соочуваат во секојдневното работење.

– Досега сме постигнале многу во насока на подобрување на социјалниот дијалог меѓу двете страни. Но, сакам да истакнам дека ќе продолжиме да работиме на подобрување на оваа сфера, бидејќи секогаш има простор за донесување нови и подобри решенија – рече Адеми.

Министерот додаде дека образованието е процес кој постојано се развива, подобрува, усовршува.

– Очекувам дека денеска ќе се развие конструктивна дискусија и дека заедно повторно ќе дојдеме до подобри решенија што ќе им ја олеснат работата на сите кои се вклучени во воспитно-образовната дејност. Исто така очекуваме успешен избор на новото раководство на СОНК и убеден сум дека и понатаму ќе продолжиме да соработуваме како и досега – образложи министерот Адеми.

Синдикатот за образование наука и култура денеска во Струга го одржува шестиот конгрес на кој ќе избира претседател и ново раководство.

 


Масовно се потпишуваат истапници од СОНК во Битола


Битола, 20 октомври, 2015 - 10:23 (META) 

Масовно се земаат истапници од СОНК во Битола, тврдат членови на синдикатот од образованието. Вработените во битолското образование изминатите неколку дена го откажувале членството и веќе не сакале да плаќаат членарина на синдикатот, на чие чело е Јаким Неделков, бидејќи не ги исполнил ветувањата пред штрајкот и со прекинот на штрајкот.

Овој месец регионалната организација на СОНК во Битола доби нов претседател, Илија Белџигеровски.

Повеќе од две третини од членовите во неколку средни училишта во градот веќе не се дел од синдикатот. Најдрастичен е примерот во средното општинско техничко училиште „Ѓорги Наумов“, каде од 63 членови на СОНК до вчера истапници потпишале дури 48. Слична е ситуацијата во средното економско училиште, каде истапници потпишале две третини од членовите, а во двете гимназии засега се зголемува револтот кај членството во исчекување на официјален состанок на синдикатот.

– Членовите на СОНК во нашето училиште масовно потпишуваат истапници, не се задоволни од постапките на раководството на синдикатот за време на штрајкот, од неисполнетите ветувања, но и од несоодветните кадровски смени во синдикатот – вели Благој Секулов, претседател на синдикалната организација во техничкото училиште во Битола.

Членовите на СОНК во техничкото училиште беа меѓу ретките во Битола што влегоа масовно во штрајк од првиот до последниот ден, и токму поради тоа, како што велат, се  чувствуваат изиграни од Неделков.

Новоизбраниот претседател на СОНК во Битола, Илија Белџигеровски, вели дека нема сознанија што се случува со членството на СОНК во Битола, бидејќи сè уште официјално не ја презел функцијата.

– Не сум во тек со работите и немам поим што се случува. В среда ќе биде примопредавањето на печатот и на канцелариите и тогаш ќе имам увид во тоа колку членови брои синдикатот во Битола. И да имало истапување на синдикалци, тоа се ретки случаи, самоволие на некои од претседателите на синдикатот по училиштата – вели Белџигеровски.

А.Б.


СОНК ја разрешил регионалната претседателка на синдикатот во Битола


Битола, 18 септември, 2015 - 11:05 (META) 

Советот на СОНК ја разрешил регионалната претседателка на синдикатот во Битола, Фанче Јошевска.

Ваквата одлука на СОНК, Јошевска ја толкува како правно неиздржана. Кога Јошевска била исклучена од функцијата, воопшто не била ниту официјално поканета на состанокот, а во решението за нејзиното разрешување немало ниту правна поука дека може да се жали на таа одлука.

– Без основа, без аргументи и факти се поништени лагални избори за мое назначување на синдикалец во школото каде што работам. Оттаму скратено ми е правото да бидам реизбрана и за регионален синдикалец. Утре ќе се избира нов синдикалец во училиштето – вели Јошевска.

Наставници од Битола, членови на СОНК, почнаа со потпишување петиции како поддршка на Јошевска, особено членовите на синдикатот во техничкото училиште СОТУ „Ѓорги Наумов“, каде бојкотот на наставата и штрајкот траеше во континуитет од почетокот до самиот крај. Синдикалците сметаат дека ова е пресметка на првиот човек на СОНК, Јаким Неделковски, со неистомислениците во редовите на синдикатот.


Интернационалата за образование задоволна од компромисот меѓу МОН и СОНК


Скопје, 2 јуни, 2015 - 15:01 (META) 

Министерот за образование и наука, Абдилаќим Адеми, и претседателот на СОНК, Јаким Неделков, имаа средба со генералниот секретар на светска федерација на синдикати и организации во областа на образованието – Интернационалата за образование, Фред ван Лејвен, на која сите го искажаа задоволството од постигнатиот компромис меѓу МОН и СОНК.

– На средбата дискутиравме за активностите и за проектите во образованието и за активностите што ги преземаме со СОНК за подобрување на квалитетот на образованието. Ги информиравме гостите за преговорите со СОНК и дека е најважно што седнавме на иста маса, дискутиравме и се обидовме да најдеме заедничко прифатливо решение – рече Адеми.

Генералниот секретар на Интернационалата за образование, Фред ван Лејвен, им честита на МОН и на СОНК за постигнатиот договор и изрази задоволство што конфликтот од пред неколку месеци е решен.

– Цврсто веруваме дека Македонија е на добар пат за подобрување на образованието кое ќе биде од голема корист за иднината на државата. Во Министерството ги потсетивме дека мора да им се даде професионален и независен простор на наставниците и дека мора на СОНК да им се остави простор и слобода да предлагаат како да се подобри образованието – рече Ван Лејвен.

За незадоволството на одреден број наставници од раководството на СОНК, тој рече дека на синдикатот треба да му се даде време да ги убеди членовите за реформите и дека секогаш е предизвик да се сложат сите кога се работи за воведување нешто ново.

Адеми протестот на наставниците од пред два дена го искоментира како загарантирано право, но дека со СОНК е постигнат договор кој веќе се имплементира.

– Екстерното оценување треба да постои, но треба да се усоврши затоа што не велиме дека е совршено, но со заеднички напори треба да го унапредиме. Сметаме дека екстерното е потребно во процесот на образованието во Македонија, можеби за 10 години нема да биде, но сега е потребно и работиме на негово усовршување – рече Адеми.