Обвинителството почнува со расветлување на вчерашните немири пред Собранието


Скопје, 18 јуни, 2018 - 14:10 (META) 

Основното јавно обвинителство – Скопје соопшти дека по работниот состанок со претставници од МВР, кој се одржал утрово, почнува со расветлување на вчерашните немири пред Собранието. Според обвинителството, уапсени биле 26 лица, од кои пет малолетници. Децата по утврдување на идентитетот и возраста, согласно Законот за правда на децата, се пуштени на слобода.

Повредени биле десетмина полицајци, од кои еден задобил тешки повреди, а, како што велат од обвинителството, повреди задобиле седуммина граѓани.

Обвинителите на МВР им дале насоки за доставување докази за сите уапсени лица, вклучително и малолетниците, и биле побарани снимки од безбедносните камери. Тој материјал заедно со другите обезбедени докази, ќе се користи за утврдување на вината на уапсените, како и за утврдување на идентитетот на други лица кои учествувале во настанот и можеби сториле кривични дела.

Основното јавно обвинителство – Скопје, исто така, во врска со заканувачките пораки и слики на социјалните мрежи, побарало од МВР да ги евидентира заканите кон функционерите и да обезбеди релевантни докази.


МВР: Приведени се 26 лица, демонстрантите фрлија солзавец во угостителски објект


Скопје, 18 јуни, 2018 - 13:05 (META) 

Седум лица побарале лекарска помош, повредени се 10 полициски службеници, а приведени се 26 лица, соопштуваат денеска од МВР за ескалацијата на вчерашните протести пред Собранието, против Договорот постигнат помеѓу Македонија и Грција.

Од МВР велат дека дел од демонстрантите, од кои голем број биле маскирани, насилно ја турнале заштитната ограда и почнале да фрлаат камења и пиротехнички средства и други предмети кон зградата на Собранието и полицискиот кордон, воедно обидувајќи се насилно да влезат во Собранието.

Со цел спречување на понатамошно нарушување на јавниот ред и мир и насилен упад во Собранието, а постапувајќи согласно процедурите, од Министерството потенцираат дека полицијата спровела соодветни мерки и активности.

Според полицијата, околу 21.30 часот околу 50 демонстранти, движејќи се во група се упатиле кон Плоштад Македонија и насилно упаднале во два угостителски објекти, каде искршиле дел од инвентарот и предизвикале паника и страв кај присутните гости, а во еден објект демонстрантите врз гостите фрлиле солзавец. Во близина на хотелот „Холидеј ин“ запалено било комбе „Фиат“, а огнот бил изгаснат од страна на Бригадата за противпожарна заштита.

„Во врска со новинарот на порталот Инфомакс, ја информираме јавноста дека тој одбивал да се легитимира, а притоа дал активен отпор. Постапувајќи согласно процедурите, лицето е однесено во полициска станица и по утврдувањето на неговиот идентитет, истото веднаш е пуштено. Министерството за внатрешни работи уште еднаш апелира новинарите и снимателите кои ги извршуваат своите работни задачи во текот на известувањето да го почитуваат етичкиот кодекс на однесување и со своите постапки да не ги попречуваат службените лица во извршувањето на своите задачи, при заштитата на јавнот ред и мир“, велат од МВР.


СДСМ го осудува насилството пред Собранието и повикува на смиреност


Скопје, 18 јуни, 2018 - 11:10 (META) 

СДСМ се огласи со осуда на „вчерашните насилства пред Собранието, нападите од насобраната толпа врз новинарите, снимателите и полицајците коишто се обидуваа да спречат насилен упад во Собранието“.

„Секој има право да протестира и да го искаже својот став и мислење, но на вчерашниот собир беше забележан говор на омраза, повици за насилство, навреди и провокации кон граѓани, кон новинари, кон различни етнички заедници. Очигледно е дека одредени субјекти кои работат спротивно од интересите на државата и граѓаните сакаат да го повторат насилството од 27 април, на кое му претходеа слични повици и активности“, порача владејачката партија, повикувајќи ги граѓаните на демократски начин да го изразуваат мислењето, да бидат смирени и да не подлегнуваат на провокациите.


На протестот „Македонија е грчка“ учествувале 140.000 граѓани, дел се судрија со анархистите


Атина, 4 февруари, 2018 - 17:10 (META) 

Грчката полиција соопшти дека на протестот „Македонија е грчка“ во центарот на Атина, учествувале 140 илјади граѓани, кои од цела Грција дошле со 283 автобуси, јавува Македонската информативна агенција (МИА).

Паралелно со протестот на плоштадот Синтагма, на оддалеченост од околу 800 метри, анархистички и антифашистички организации одржале контра-протест, по што дошло до судири, а полицијата реагирала со солзавец.

На протестот говорел грчкиот композитор Микис Теодоракис, митрополити од Грчката православна црква и претставници на организаторите.

Теодоракис упатил остри критики до грчката влада, кажал дека Македонија е грчка и побарал референдум.

„Ако една грчка влада помисли да го стави потписот на земјата за сложено име, нема друг избор освен да го праша грчкиот народ. Упатувам повик до пратениците, кои го имаат тоа право да побараат референдум“, рече Теодоракис.

Куќата на грчкиот композитор била испрскана со црвена боја, пред тој да се појави на протестот.


Приведен граѓанин кој се обидел да го испрска Груевски со солзавец на митингот во Центар


Скопје, 6 октомври, 2017 - 0:39 (META) 

Скопската полиција привела граѓанин кој испрскал спреј-солзавец кон бината на митингот на ВМРО-ДПМНЕ во општина Центар, за време на говорот на лидерот на партијата, Никола Груевски.

МВР го потврди инцидентот и оттаму велат дека околу 21.55 часот е приведен 36-годишен маж со иницијали Р.Р.

Дваесетина минути подоцна, во полициската станица Центар дошол 29-годишниот Д.Г., кој пријавил дека додека присуствувал на митингот бил испраскан со спреј од лицето Р.Р.


Илјадници демонстранти побараа затворање на Златна зора и апсење на нејзините членови


Атина, 17 септември, 2017 - 12:12 (META) 

Околу 3.000 левичарски активисти и мигранти вчера маршираа низ центарот на Атина во знак на сеќавање на рапертот и активист Павлос Фисас, кој пред четири години беше убиен од симпатизери на неонацистичката партија Златна зора.

Полицијата го спречи обидот на учесниците на маршот да стигнат до седиштето на партијата, поради што дел од демонстрантите почнаа да фрлаат молотови коктели врз полицајците, кои одговорија со солзавец. Како што јавуваат грчките медиуми, поради нередите уапсени се петмина демонстранти.

Медиумите објавија дека едно од барањата на учесниците на маршот, кој тргна од централниот плоштад во Атина – Синтагма и продолжи покрај зградата на амбасадата на САД во Грција, е и затворање на седиштето на оваа ултрадесничарска партија и апсење на нејзините членови.

Маршот беше одржан и во знак на сеќавање на Хедер Хејер, левичарската активистка која минатиот месец беше убиена во нередите во Шарлотсвил, во американската сојузна држава Вирџинија.


Шест повредени на аеродромот во Франкфурт


Франкфурт, 11 септември, 2017 - 14:11 (META) 

Најмалку шест лица се повредени во инцидент на аеродромот во Франкфурт откако на еден терминал бил фрлен солзавец, јавуваат германските медиуми.

Полицијата соопшти дека шест лица се хоспитализирани поради проблеми со дишење.

– Причината за активацијата на солзавецот не е позната. Истрагата е во тек – соопшти портпаролот на полицијата.

Засега нема информации дали инцидентот е поврзан со тероризам, а германскиот весник „Билд“ објави дека сè се завршило во рок од 16 минути, по што продолжил приемот на патници.


Осум лица загинаа кога се урна ѕид при стампедо на фудбалски стадион во Сенегал


Дакар, 16 јули, 2017 - 12:58 (META) 

Осум лица загинаа, а околу 40 се сериозно повредени вчера, кога се урна ѕид на фудбалскиот стадион „Демпа диоп“ во главниот град на Сенегал, Дакар. На уривањето на ѕидот му претходела тепачка, а потоа стампедо предизвикано од фрлениот солзавец од полицијата, при што бил урнат и ѕидот.

На финалето во кое играа клубовите „УС Оукам“ и „Стаде де Мбоур“, навивачите почнале тепачка, по што интервенирала полицијата, фрлајќи солзавец за да ги растера. Потоа уследило панично стампедо, и притоа бил урнат еден ѕид.

Претседателот на Сенегал, Маки Сал, објави на „Твитер“ дека тие што стојат зад трагедијата ќе бидат казнети.


Судир меѓу полицијата и демонстрантите пред почетокот на самитот на Г20 во Хамбург


Хамбург, 6 јули, 2017 - 21:40 (META) 

Германската полиција и група демонстранти денеска се судрија на улиците на Хамбург во пресрет на самитот на Г20, кој почнува утре, јавуваат агенциите.

Најмалку едно лице било сериозно повредено во насилствата, а на неколку им била укажана помош на самото место, пренесува „Би-би-си“.

Полицијата интервенирала со водени топови кон групата демонстранти, кои фрлале шишиња и камења кон полициските екипи.

Мерките за безбедност во Хамбург се на високо ниво. Се очекува на антикапиталистичките протести за време на самитот на Г20 да присуствуваат околу 100.000 демонстранти.

Денеска во Хамбург пристигна американскиот претседател Доналд Трамп, кој имал средба со германската канцеларка Ангела Меркел.

На маргините на самитот утре се очекува и средба меѓу Трамп и рускиот претседател Владимир Путин.


Жестоки судири меѓу демонстрантите и полицијата на протестите во Атина


Атина, 7 декември, 2016 - 11:03 (META) 

Атина повторно преживеа сцени на насилни судири и хаос на вчерашните протести за одбележување на годишнината од убиството на младиот Александрос Григоропулос, кој беше жртва на полициско насилство. Полицијата уапси 25 и приведе 26 лица во немирите кои траеја со часови во центарот на градот и во бунтовната населба Ексархија.

Ексархија наликуваше на бојно поле. Демонстрантите напаѓаа со стотици молотови коктели, камења и со пиротехника, а полицијата одговараше со шок-бомби и со солзавец. Полициските мерки не помогнаа многу за да се смират немирите, па во анархистичкиот кварт до доцна во ноќта одекнуваа експлозии, а граѓаните се задушуваа во солзавец.

Во судирите е повреден еден полицаец, а причинета е голема материјална штета на личен имот и на приватни возила.

Пред судирите во центарот на градот имаше десетици протестни поворки со кои се одбележува сеќавањето на Григоропулос и на бунтот против полициското насилство.

Младиот Григоропулос загина од куршум на грчки полицаец пред осум години, по кавга во наслебата Ексархија. Неговото убиство предизвика интензивни тримесечни протести и демонстрации низ цела Грција и беше една од причините за падот на владата на Костас Караманлис.