Четврти министерски состанок на Македонија, Грција, Бугарија и Албанија во Солун


Скопје, 12 октомври, 2018 - 10:32 (META) 

Министрите за надворешни работи на Македонија, Бугарија, Албанија и домаќинот Грција, на почетокот на ноември ќе одржат нова квадрилатерална средба во Солун.

Според информациите на дописничката на МИА од Атина, четвртиот министерски состанокот на кој се разгледуваат теми поврзани со регионалната соработка во повеќе области ќе се одржи на 8 и 9 ноември и овој пат во Солун.

Првиот ваков состанок беше во април 2016, а последен пат шефовите на дипломатиите на четирите земји во Солун се сретнаа во мај годинава. На квадрилатералната средба, освен министрите за надворешни работи, учествуваат и министри или надлежните од Министерствата за внатрешни работи од четирите земји.


Што ќе каже Ципрас за спорот со името на саемот во Солун?


Атина, 3 септември, 2018 - 11:27 (META) 

Јасна порака и поддршка на Договорт од Преспа ќе искаже Алексис Ципрас следната сабота во неговиот воведен говор на Меѓунардониот саем во Солун.

Ципрас, според извори со грчката влада, ќе рече дека ратификацијата на договорот ќе го реши деценискиот спор околу името како и дека иако преговорите биле тешки, во исто врме биле и неопходни.

– Ние дејствуваме со чувство на одговорност и патриотизам во спорот со името и силно веруваме дека следната година Договорот од Преспа ќе биде имплементиран – ќе порача Ципрас во исто време испраќајќи порака до опозициската Нова Демократија дека ако тие не го раификуваат договорт, ќе испратат негативна порака до меѓународната заедница.

Во меѓувреме американскиот амбасадор во, Атина Џефри Пејет, го поздрави договорот „кој го ослободил економскиот потенцијал на регионот и го трасирал патот на земјата кон членството во НАТО и ЕУ“.

Во последната изјата тој рече дека САД ќе бидат почесната земја–гостин на Саемот во Солун оваа недела, како и дека Грција е посакуваниот партнер за соработка со земјите од Западен Балкан.

На 15 септември Кирјакос Мицотакис исто така ќе се обрати на Саемот и меѓудругото, ќе ја изложи и позицијата на Нова Демократија околу ратификацијата на Договорот за името во Грчкиот парламент.


Грција денеска треба да им пише на ЕУ и НАТО за зачленувањето на Македонија


Скопје, 25 јуни, 2018 - 9:43 (META) 

До Советот на ЕУ за општи работи, кој во Луксембург ќе расправа за  почеток на пристапни преговори на Македонија и на Албанија, денеска треба да биде доставено писмото од Грција дека нема да се противи за европска и евро-атлантска интеграција на Македонија, што е исполнување на дел од нејзините обврски од Договорот за решавање на спорот за името.

Шефот на грчката дипломатија, Никос Коѕиас, во петокот на конференција во Родос пред новинарите најави дека денеска наутро писмата со иста содржина Грција треба да ги достави до ЕУ и НАТО.

– Во мојата дипломатска канцеларија ги имаме од завчера подготвени писмата. Одбрав да ги потпишам самиот во Брисел во недела за во понеделник наутро да се достават до Европската унија и НАТО. Тоа се писма кои велат дека бев известен од другата страна за ратификацијата на Договорот во Собранието и дека врз основа на обврските и предусловите кои ги имам поставено, може да продолжат напред – рече Коѕиас.

Одлуката за отпочнување на пристапните преговори со ЕУ треба да биде донесена во четврток и петок на состанокот на шефови на држави и влади на членките на Унијата.

Инаку, вчера во Солун се одржа протест против договорот меѓу Македонија и Грција, јавија локалните медиуми.  Преку социјалните мрежи, групата под името „Обединети Македонци“ што го организираше протест, ги повика граѓаните да учествуваат без партиски обележја, само со грчките знамиња.

Протестот на малубројни десничари започна од Белата кула во центарот на Солун, а продолжи низ улиците, додека насобраните граѓани извикуваа слогани против владата, но и дека Македонија е грчка.

Во текот на протестот, демонстрантите застанаа пред конзулатот на Република Македонија и пред американската амбасада, па продолжија кон канцелариите на СИРИЗА и Независни Грци, при што ги нападнаат,  но полицијата ги растера со солзавец.


Заев: Има креативен напредок за името, но тоа се само идеи на маса


Дојран, 5 мај, 2018 - 19:30 (META) 

Премиерот Зоран Заев во Дојран, коментирајќи ја вчерашната средба меѓу шефовите на дипломатиите на Македонија и Грција, Никола Димитров и Никос Коѕиас во Солун, оцени дека е направен напредок во однос на наоѓање решение за проблемот со името.

– Направен е напредок во делот на креативноста на изнаоѓањето на решенијата за она коешто за нас е важно да може да помине, сочувувајќи го достоинството и идентитетот, но и за грчката страна, исто така, можност да помине достоинството и идентитетот. Секако, тоа се само идеи на маса за коишто продолжуваме да размислуваме, рече Заев.

Според Заев, на крајот на идната седмица пак ќе има средба и ќе се види како ќе се одвиваат работите.

– Целта е веќе кога сме дојдени на крајот и така критиките ги добиваме од граѓаните, да ги добиеме и позитивните поени со можно решение. Јас сум убеден дека поради креативноста, посветеноста на двете страни во преговарачкиот процес можеме конечно да здивнеме со еден проблем помалку којшто секако е еден од крупните во Македонија којшто ќе ги отвори портите на НАТО и ЕУ, притоа важно е секако да не бидеме обесчестени, да не бидеме понижени, како и грчката страна исто така. Убеден сум кога веќе стасавме до овде, двете страни имаат искрена, вистинска намера за решение на проблемот – додаде Заев.


Коѕиас: Денеска смисливме многу алтернативи, но не стигнавме до одлука


Солун, 4 мај, 2018 - 15:45 (META) 

Министерот за надворешни работи на Грција Никос Коѕиас, на денешната прес конференција по министерскиот состанок во Солун, рече дека остануваат уште 1-2 централни прашања да се решат, а со неговиот македонски колега Никола Димитров разговарале за алтернативите и варијантите за решение, но не дошле до решение, пренесува МИА.

– Мислам дека денеска смисливме многу алтернативи, не стигнавме до одлука, ќе треба да ги известиме и нашите премиери. Ако одлучиме за овие алтернативи, тогаш ќе бидат созреани условите за средби на повисоко ниво, но за тоа, секако, не одлучуваат министрите за надворешни работи, туку нивните шефови, кои кога ќе ги направиме чекорите, што се надевам дека ќе ги направиме, ќе можат да остварат контакт и самите да се договорат за нивните средби. Но, мислам дека треба до крај да се бориме за да се најде ова решение – рече Коѕијас.

Следната закажана средба меѓу Димитров и Коѕиас е на 12 мај во Атина.


Димитров и Коѕијас разговарале за комбинации од потешките прашања


Солун, 4 мај, 2018 - 14:43 (META) 

Шефовите на дипломатиите на Македонија и Грција, Никола Димитров и Никос Коѕијас на маргините на денашната квадрилатерална средба во Солун истражувале опции и комбинации за потешките прашања од преговорите за името, кои би биле прифатливи за двете страни, јави МИА.

-Знаете дека разлики се уште има. Ова што вчера и денеска го правевме е испитување комбинации, кои едната или другата страна, би можеле да ги прифатат и тоа е нашата задача. За овие елементи треба да разговараме и дома и да ја искористиме и следната средба – рече Димитров по средбата.


Димитров од Солун: Ја делиме истата судбина со ЕУ, но сè уште не сме на масата


Солун, 4 мај, 2018 - 12:39 (META) 

Ја делиме истата судбина со ЕУ, но се уште не сме на масата, изјави шефот на македонската дипломатија Никола Димитров на третиот квадрилатерален министерски состанок на Македонија, Грција, Албанија и Бугарија, кој се одржува денеска во Солун, известува МИА.

Димитров им се заблагодари на бугарската министерка за надворешни работи Екатерина Захариева и на бугарскиот премиер Бојко Борисов, поради тоа што како земја претседавач со Унијата успеале регионот го вратат на политичката агенда на ЕУ, а 2018 да ја направат година на можности.

– На состанокот имаме две земји кандидатки и две земји членки. Верувам дека не може да станеме едно вистински среќно место доколку регионот не се движи во заедничка насока – рече Димитров и додаде дека сегашните случувања се позитивен момент за целиот регион.

Грчкиот министер за надворешни работи Никос Коѕиас, на отворањето на состанокот порача дека предизвиците во светски рамки го принудуваат регионот на ЈИЕ да ја зголеми интеграцијата.

– Промените што се случуваат во светот водат до заклучок дека мораме да ја интензивираме и продлабочиме соработката меѓу земјите од ЈИЕ – рече Коѕиас.

Тој напомена дека натамошното продлабочување и соработката е особено потребно поради две цели, „ПЈРМ“ и Албанија да станат дел од ЕУ и да се овозможи подготовка за нивната соработка во рамки на Унијата.

Теми на состанокот се прекуграничната соработка, европерспективите на Западен Балкан, влијанието на случувањата на Блискиот Исток врз регионот, можностите за развивање на сообраќајната инфраструктура. Ќе стане збор и за соработката меѓу полициите, борбата против прекуграничниот и организираниот криминал и справувањето со миграцијата.

Шефовите на дипломатиите на Македонија и на Грција, Никола Димитров и Никос Коѕиас денеска ќе имаат нова билатерална средба во рамките на министерскиот состанок, известува МИА.

Димитров и Коѕиас повторно треба да се сретнат и следната недела на меѓународна конференција што ќе се одржи во местото Сунио, во близина на Атина.


Димитров и Коѕиас ќе се сретнат утре во Солун


Скопје, 2 мај, 2018 - 9:59 (META) 

Министерот за надворешни работи Никола Димитров и неговиот грчки колега Никос Коѕиас утре ќе се сретнат во Солун каде што и двајцата ќе учествуваат на квадрилатералниот форум на кој ќе бидат и нивните колеги од Бугарија и од Албанија.

По последната средба Димитров – Коѕиас во Виена, медијаторот Метју Нимиц, рече дека двете страни остануваат посветени на решавање на проблемот, без да презентира детали од разговорите.

Грчките медиуми пренесоа дека остануваат „тешките прашања“ односно опсегот на употреба на името што ќе се договори и барањето на Атина за промена на македонскиот устав.

Премиерот Зоран Заев вчера рече дека секоја средба е нова креативност во функција на доближување на разликите кои постојат меѓу Македонија и Грција.

– Некогаш тоа е со големи, некогаш со микро чекори за отстранување на разликите кои постојат. Се надевам дека секогаш со секоја средба, ќе се помогне во тој правец – вели Заев.


Ципрас од Солун: Промена Уставот е предуслов за целосен договор за името


Солун, 29 март, 2018 - 10:50 (META) 

Грчкиот премиер Алексис Ципрас од Солун го повтори ставот дека „промената на Уставот на соседот е предуслов за трајно решение“.

Ципрас ова го кажа на „Регионалната конференција во Централна Македонија“ подвлекувајќи дека „Централна Македонија и особено Солун сакаат да бидат столбот на развојот и може да имаат само корист од решението на спорот кој го имаме со соседот“.

Како што јавуваат грчките медиуми, Ципрас рекол дека „преговараме со чувство на национална одговорност, со цел да постигнеме решение кое ќе значи зачувување на нашата историја и, во исто време, ќе оневозможи било каков иредентизам од другата страна. Нема да се водиме од партиските, туку од националните интереси“.

Тој повикал „и другата страна да се раководи од овие принципи и покаже сила да донесе храбри и тешки одлуки“.


Воена база во Македонија побарал Ердоган од Заев, тврди Теодоракис


Атина, 22 март, 2018 - 14:17 (META) 

Лидерот на центристичката, социјално-либерална грчка партија Река, Ставрос Теодоракис, во емисијата „Сега“ на грчки „Скај“ изјави дека „Таип Ердоган му побарал на Зоран Заев да Турција отвори воена база“ како контра услуга за поддршката и помошта што земјата би ѝ ја давала на Македонија, пренесува десничарскиот грчки „Елефтерос типос“.

И Грција и Турција се членки на НАТО, но постојано се во судир околу поморската граница во Егејот и кипарското прашање.

– Ќе дозволиме ли да се формира турска воена база на нашата северна граница и толку близу до Солун – запрашал Теодоракис, чија партија има шест пратеници во грчкиот парламент и двајца во Европарламентот.

Теодоракис ова го кажал во контекст на преговорите за името и како поткрепа на заложбата дека проблемот треба што поскоро да се реши.

Тој неодамна имаше средба со премиерот Ципрас на која разговараа за потребата од формирање Совет за национална безбедност.

Сложено име за севкупна употреба, но и бришење на „агресивниот дух кон Грците“ од Уставот, учебниците и секојдневниот живот во соседната земја, се позициите на Теодоракис за прашањето за името.

– Едно сложено име за севкупна употреба, паралелно со конкретни обврски од нашите соседи дека ќе има бришење во нивниот Устав и во учебниците. Многу инсистирам на учебниците затоа што тие ја градат свеста, дека од нивното секојдневие, од нивната култура, ќе се избрише овој агресивен дух кон Грците и кон грчката Македонија – вели Теодоракис за „Скај“.

Лидерот на „Река“ одби директно да одговори каква ќе биде позицијата доколку договорот дојде во грчкиот Парламент.

Гласањето, според него, ќе зависи од самиот предлог и што тој точно ќе содржи.