Анѓушев: 40 милиони евра за компаниите преку ИПА-програмата за 2019 година


Скопје, 12 март, 2018 - 14:58 (META) 

На денешната средба со компаниите членки на Сојузот на стопански комори ССК, вицепремиерот за економски прашања, Кочо Анѓушев им порача дека може да ги користат средствата предвидени во третиот столб од Програмата за економски пораст, а кои се даваат преку Фондот за иновации.

Компаниите за овие мерки може да конкурираат во март и во јуни, врз основа на резултатите од завршните сметки. Може да добијат пари за нови инвестиции, но и да си направат одреден поврат на средства доколку лани инвестирале и нивната работа била поуспешна за разлика од изминатите две години.

Анѓушев додаде дека и да не биде изгласан законот за иновации, овие средства се предвидени со буџетот и компаниите ќе можат да конкурираат врз основа на правилник, а не субјективна оценка на одредени лица. Тој најави и европски пари од ИПА програмата за 2019 година

„За догодина се предвидени 40 милиони евра за малите и средни претпријатија што претставува значителна помош од Европската комисија. За годинава и лани, немаше предвидено такви средства. Европските грантови за мали и средни претпријатија ќе бидат за регионална распределба, според регионално неразвиените подрачја“, рече Анѓушев.


Груевски зад затворени врати ги слуша предлозите на бизнисмените


Скопје, 19 февруари, 2016 - 15:08 (META) 

Лидерот на ВМРО-ДПМНЕ, Никола Груевски, заедно со економскиот тим, разговара со бизнисмените кои се дел од Сојузот на стопански комори за да ги слушне нивните предлози и мерки, кои потоа ќе биле вметнати во програмата на партијата за претстојните парламентарни избори.

– Се консултиравме со граѓаните, преку трибини и тој дел го сублимираме и ќе ги извлекуваме најдобрите идеи. Сега е на ред секторски да работиме на програмата и на ред е да слушнеме идеи и предлози за подобрување на економијата во земјата – рече Груевски.

Тој зборуваше за досегашните законски измени и за намалувањето на данокот што според него во голем дел ја олесниле работата на компаниите.

По официјалното обраќање, Груевски и бизнисмените останаа да разговараат зад затворени врати.


ССК: Половните возила се најголеми загадувачи на воздухот


Скопје, 4 декември, 2015 - 12:26 (META) 

Најголеми загадувачи не се индустриските објекти и огревното дрво, туку проблемот со загадувањето на воздухот најдиректно го лоцираме во увозот на половни возила, вели Митко Алексовски, претседателот на Сојузот на стопански комори.

– Половните возила немаат заштитни филтри и катализатори и емитуваат огромно количество штетни честички во воздухот. Најголемите загадувачи, старите возила, не ги исполнуваат декларираните европски нормативи и ја зголемуваат емисијата на штетни ПМ10-честички во воздухот. Бројката на овие возила, според податоците од Царинска управа, во последните пет години изнесува 191.639, а пред 2010 година ваквиот проблем со прекумерната загаденост не беше регистрирана – изјави Алексовски.

Алексовски вели дека студијата „Зелен раст“ на Светска банка покажува дека во Македонија, во просек, 1.350 луѓе годишно умираат поради загадување на воздухот, а тоа ја чини Македонија 253 милиони евра.

Од ССК предлагаат да се преземат две мерки, односно итно воведување на стандардот ЕУРО4 за увоз на половни возила и воведување регулаторна политика за јаглероден диоксид при увоз и при регистрација.