!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Џафери и Пацоли се заложиле за развивање на парламентарната соработка


Скопје, 25 октомври, 2017 - 16:13 (META) 

Македонија и Косово придонесуваат соседските односи во регионот да се издигнат на највисоко можно ниво, истакнал претседателот на Собранието, Талат Џафери, на средбата со министерот за надворешни работи на Косово, Беџет Пацоли, кој е во официјална посета на земјава.

„Претседателот Џафери, во име на Собранието, изрази целосна подготвеност за споделување на исуствата во процесот на евроинтеграциите со колегите од косовскиот парламент и изрази надеж дека и во косовскиот парламент ќе биде формирана пратеничка група за соработка со Собранието на Република Македонија“, стои во соопштението за средбата и се додава дека Џафери го информирал својот соговорник за актуелната политичка состојба во земјата и за настаните кои следеа по предвремените парламентарни избори во декември минатата година.

Шефот на косовската дипломатија, како што се наведува во соопштението, изразил задоволство што границата ја поминал само со лична карта, „особено поради фактот дека тоа била негова лична заложба во краткиот период додека ја извршувал функцијата претседател на Косово“.


Поради насилствата на 27 април, суспендирани четворица вработени во МНР


Скопје, 20 октомври, 2017 - 21:17 (META) 

Министерството за надворешни работи (МНР) соопшти дека суспендирало четворица вработени кои биле во Собранието на Република Македонија при упадот и бруталните насилства на 27 април годинава.

Како што се вели во соопштението, за ова Министерството за внатрешни работи (МВР) доставипо известување до Основното јавно обвинителство – Скопје.

„Министерството цени дека со нивните дејствија односно нивното неовластено влегување и присуство во Собранието на Република Македонија за време на настанот, постапувале спротивно на Етичкиот кодекс за вработените во Министерството за надворешни работи и го нарушиле угледот на професијата дипломат и воедно угледот на Министерството и државата. Таквото однесување, согласно позитивната регулатива, претставува дисциплински престап согласно Законот за административни службеници и Законот за надворешни работи, како и на Етичкиот кодекс за вработените во Министерството за надворешни работи и други лица што вршат работи во и за министерството за надворешни работи“, се вели во соопштението од МНР.

Постапката е почната на 7 јуни годинава, кога МНР од МВР побарало информации за можна инволвираност на вработени  во МНР во дивеењата во Собранието.


ВМРО-ДПМНЕ бара амнестија за насилниците од 27 април


Скопје, 18 октомври, 2017 - 14:56 (META) 

Опозициската ВМРО-ДПМНЕ бара „итно и неодложно“ ослободување и амнестија на сите лица што „извршиле одредени законски прекршувања во инцидентите во Собранието на Република Македонија од 27 април“.

Според ВМРО-ДПМНЕ, овој чин ќе придонесе за помирување во Македонија и за релаксирање на политичките тензии.

Ваков заклучок, како што информираат од партијата, бил донесен на последната седница на извршниот комитет на ВМРО-ДПМНЕ, на кој бил констатирано дека „во изминатите пет месеци очигледна е политиката на власта за масовно ослободување на криминалци од затворите и притворските одделенија по разни фабрикувани правни основи, чиј заеднички именител е политичка интервенција од власта“.

„Извршниот комитет на ВМРО-ДПМНЕ информира дека поведува иницијатива за итно и неодложно ослободување и амнестирање на сите лица што извршиле одредени законски прекршувања во инцидентите пред и во Собранието на Република Македонија на 27 април 2017 година. ВМРО-ДПМНЕ иако беше со блиски, а во некои делови и со идентични ставови со ставовите на граѓаните кои мирно протестираа цели 80 дена, беше првата партија што јавно ги осуди законските прекршувања од дел од граѓаните што протестираа и со тоа се наруши мирниот карактер на овие граѓански протести. Сепак, гледајќи од денешна гледна точка, кога пред очите на целата јавност со политичка одлука и интервенција се ослободуваат огромен број сторители на тешки кривични дела, меѓу кои и свирепи убиства на етничка база, што говори дека е ова масовен тренд, добро испланиран, а не случајност, ВМРО-ДПМНЕ смета дека е неправедно какво било понатамошно гонење на лицата учесници во немирите на 27 април. Ние сочувствуваме и жестоко ги осудивме повредувањата на пратениците на 27 април, но не сметаме дека нивните рани повеќе болат од раните на оние лица чии сторители наскоро ќе бидат ослободени со законот за амнестија веднаш по изборите. Уште помалку цениме дека делата за кои се товарат овие лица се поважни од животите на убиените млади лица кај Смиљковско Езеро“, стои во соопштението од ВМРО-ДПМНЕ.

Од партијата соопштуваат дека поради ова, пратеничката група на ВМРО-ДПМНЕ ќе поднесе амандман на Законот за амнестија или ќе предложи посебен закон за прекин на постапката и за ослободување на лицата учесници во настаните од 27 април.


30 дена притвор за четворица од уапсените за обидот за убиство на Зијадин Села


Скопје, 18 октомври, 2017 - 12:01 (META) 

На барање на Основното јавно обвинителство Скопје, судија на претходна постапка им одредил притвор од 30 дена на четворица од петтемина уапсени за обидот за убиство на пратеникот и лидер на Алијанса на Албанците, Зијадин Села, за време на насилствата во Собранието од 27 април годинава, соопштија од Обвинителството.

Обвинителството, како што информираат оттаму, побарало притвор и за петтиот осомничен, но поради влошена здравствена состојба, за него судот дополнително ќе одлучува.

За учество во насилствата во Собранието вчера беа уапсени уште три лица, кои беа идентификувани со помош на граѓаните, откако по наредба на Обвинителството, МВР на својата веб-страница објави фотографии од нив направени за време на упадот во Собранието од 27 април.


Брза и масовна била помошта од граѓаните за идентификување на тројцата насилници од 27 април


Скопје, 18 октомври, 2017 - 11:45 (META) 

Брза и масовна била реакцијата на граѓаните што помогнале во идентификувањето и во пронаоѓањето на трите лица осомничени за учество во насилствата во Собранието, од 27 април, за кои МВР, по налог на Основното јавно обвинителство Скопје, вчера објави фотографии на својата интернет-страница и побара помош од граѓаните, дознава „Мета“ од извори во истрагата.

Неофицијално, голем број граѓани експресно реагирале по објавувањето на фотографиите, со информации за осомничените лица. Реакции со поддршка имало и преку „Фејсбук“, а голем бил бројот на граѓани кои за кратко време се јавиле на бројот 192 со информации за осомничените, кои, како што дознаваме, се од Скопје.

Тие беа уапсени само неколку часа по објавувањето на фотографиите. Благодарност до совесните граѓаните за помошта во утврдувањето на идентитетот на лицата чии фотографии беа објавени изрази и Јавното обвинителство, кое синоќа соопшти дека трите лица се лишени од слобода.

Фотографиите и повикот до граѓаните за нивно препознавање, како што соопшти Обвинителството, беа објавени во согласност со член 277 од Законот за кривична постапка, по претходно дадено одобрение од Основното јавно обвинителство Скопје и во соработка со Министерството за внатрешни работи.

„Кога е потребно заради утврдување на идентитетот на лицата и предметите или во други случаи од интерес за успешно водење на постапката, правосудната полиција може да го фотографира осомничениот, да земе отпечаток од папиларните линии од прстите и од дланките, да земе биолошки материјал за ДНК-анализа, а по претходно одобрение на јавниот обвинител да ја објави и неговата фотографија. Правосудната полиција може од осомничениот да земе и примероци заради ДНК-анализа, согласно со членот 249 став (3) од овој закон“, стои во членот 277 од ЗКП.

Инаку, ова е можеби првпат Обвинителството да го користи членот 277 од ЗКП, односно преку јавно објавување на фотографии да бара помош од граѓаните за идентификување осомничени лица.


МВР бара помош од граѓаните за пронаоѓање на тројца насилници од 27 април


Скопје, 17 октомври, 2017 - 12:14 (META) 

Министерството за внатрешни работи, по претходно одобрение на јавен обвинител, на својата интернет-страница јавно објави фотографии од три лица кои се бараат во врска со насилствата во Собранието од 27 април годинава.

Од МВР наведуваат дека станува збор за лица кои се важни за постапката.

„Ги повикуваме сите граѓани што имаат какви било сознанија за лицата, за тоа веднаш да ја известат најблиската полициска станица, да пријават на телефонскиот број 192, да ја употребат апликацијата „Пријави сомнително лице“ на официјалната веб-страница на МВР или да пријават во Јавно обвинителство“, стои во соопштението на МВР.

Инаку, вчеравечер, по наредба на јавен обвинител, извршени се претреси и уапсени се пет лица, осомничени за учество во насилствата во Собранието на 27 април.


Иванов по изборите ќе предложи наследници на Габер и на Старова во Уставен суд


Скопје, 4 октомври, 2017 - 10:07 (META) 

Претседателот на државата, Ѓорге Иванов, своите предлози за именување на двајца судии во Уставниот суд, на местата на Наташа Габер-Дамјановска и на Гзиме Старова, чиј деветгодишен мандат истекува в сабота, ќе ги достави до Собранието по локалните избори, велат за „Мета“ од кабинетот на Иванов.

„Претседателот на Република Македонија ќе достави предлог до Собранието на Република Македонија по завршувањето на локалните избори“, се вели во кусиот одговор од кабинетот на Иванов на нашето прашање дали досега е разговарано на оваа тема и дали претседателот на Република Македонија има предложено кандидати.

Тоа значи дека уште најмалку еден месец, Уставниот суд ќе работи во скратен состав, со шест од вкупно девет судии, бидејќи Собранието сè уште не именувало судија на местото на Исмаил Дарлишта, чиј мандат истече уште на 31 јули оваа година.

Според член 84 од Уставот, претседателот предлага двајца членови на Уставниот суд. Габер-Дамјановска и Старова беа избрани на 7 октомври 2008 година, на предлог на тогашниот претседател на државата, Бранко Црвенковски, по неколку месеци одложување бидејќи опозицијата ја бојкотираше работата на Собранието.

Ваквата ситуација ќе биде вистински тест за кохабитацијата меѓу претседателот и актуелното парламентарно мнозинство, предводено од СДСМ.

Упатените за „Мета“ велат дека Иванов ќе мора да се договори со мнозинството околу кандидатите, бидејќи во спротивно Собранието нема да му ги изгласа неговите предлози, што би било непријатно и за личностите кои се номинирани и може да го одолговлече комплетирањето на составот на Уставниот суд.

Инаку, минималниот број на судии со кои може да функционира Уставниот суд е шест, но во таков случај проблем е обезбедувањето мнозинство за донесување одлуки.

Членовите на Уставниот суд, Собранието ги избира на пленарна седница со 61 глас, а доколку е предложен кандидат Албанец, тогаш се гласа и со Бандентерово мнозинство.


Судот му одреди уште 30 дена притвор на Игор Југ


Скопје, 29 септември, 2017 - 14:19 (META) 

Кривичниот суд му одреди 30 дена притвор на Игор Југ, за учеството во насилствата во Собранието од 27 април оваа година, соопштија од судот.

На Југ вчера му истече осумдневниот притвор што првично му беше одреден, а Основното јавно обвинителство Скопје веднаш побара продолжување на мерката. Тој, како што пренесуваат дел од медиумите, по одлуката на судот е вратен во истражниот затвор „Скопје“, во Шуто Оризари.

Обвинителството ја прошири истрагата за Југ, кој освен за недозволено поседување на оружје, се товари дека бил водач на толпа која на 27 април упадна во Собранието и нападна пратеници на актуелната владејачка коалиција, новинари и припадници на обезбедувањето.

Игор Југ, кој беше во бегство и се бараше со потерница, беше уапсен на 21 септември, во стан во Куманово.

Југ на 27 април беше со групата која успеа да стигне до прес-салата во Собранието, каде во тие моменти беа пратениците од актуелната владејачка коалиција. Тој беше облечен во црна маичка со симболот на проусташката организација „Хрватски оружени сили“ (ХОС).


ОЈО Скопје бара продолжување на притворот на Игор Југ за насилствата од 27 април


Скопје, 29 септември, 2017 - 11:42 (META) 

Основното јавно обвинителство Скопје вчера побарало од Кривичниот суд да му ја продолжи мерката притвор на Игор Југ, што му беше одредена поради учеството во насилствата во Собранието од 27 април оваа година.

Како што соопштија денеска од Јавното обвинителството, надлежниот обвинител побарал на Југ да му биде одреден притвор по сите три основи, односно поради опасност од бегство, попречување на истрагата и можност за повторување на кривичното дело.

Инаку, на Југ вчера му истече осумдневниот притвор што првично му беше одреден. Како што пишуваат дел од медиумите, тој вчера по барање на обвинителството бил спроведен на распит. Засега нема информации од Кривичниот суд дали е прифатено барањето за притвор на ОЈО Скопје.

„Предлогот е поднесен бидејќи од досега прибавените докази од страна на Основното јавно обвинителство – Скопје, произлезе дека покрај за кривично дело неовластено изработување, држење, посредување и тргување со оружје или распрскувачки материи од член 396 од Кривичниот законик, постои основано сомневање дека осомничениот презел дејства како водач на толпа во врска со случувањата во Собранието на Република Македонија од 27 април годинава.
Поради тоа, надлежниот јавен обвинител донесе наредба за спроведување истражна постапка и за кривичното дело учество во толпа што ќе изврши кривично дело од член 385, став 3 од Кривичниот законик, за што е пропишана казна затвор од една до 10 години“, стои во соопштението на Јавното обвинителство.

Инаку, Игор Југ, кој беше во бегство и се бараше со потерница, беше уапсен на 21 септември, во стан во Куманово.


Уапсен Игор Југ, еден од учесниците во насилствата од 27 април


Куманово, 21 септември, 2017 - 10:16 (META) 

Игор Југ, еден од учесниците во насилствата во Собранието од 27 април годинава, утрово е уапсен во стан во Куманово, потврдија од Министерството за внатрешни работи.

Оттаму информираат дека 47-годишниот Југ е уапсен по претходна наредба од Основното јавно обвинителство Скопје од 16 мај оваа година.

„На 21 септември 2017 година, од страна на овластени службени лица при Секторот за внатрешни работи Куманово по претходна наредба од 16 мај 2017 година на Основно јавно обвинителство Скопје во врска со настаните од 27 април 2017 година во Собранието на Република Македонија е приведено лицето И.Ј. (47) од Куманово поради основано сомневање за сторено кривично дело учество во толпа што ќе спречи службено лице во вршење на службено дејство“, стои во соопштението на МВР.

Југ се бараше со централна потерница распишана од Одделот за насилен криминал на СВР Скопје, поради основано сомневање за сторено кривично дело учество во толпа што ќе изврши кривично дело. Тој, како што додаваат од МВР се барал и со локална потерница од Надворешната канцеларија за криминалистички работи Бит-пазар поради разбојништво.

Инаку, Игор Југ е водач на здружението „Владо Черноземски“ од Куманово, кое беше дел од т.н. „Патриотски фронт“.

Југ на 27 април беше дел од групата која успеа да стигне до прес-салата во Собранието, каде во тие моменти беа пратениците од актуелната владејачка коалиција. Тој беше облечен во црна маичка со симболот на проусташката организација „Хрватски оружени сили“ (ХОС).