!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Повеќе од милион луѓе во Истанбул на годишнината од обидот за пуч


Истанбул, 16 јули, 2017 - 13:18 (META) 

Повеќе од еден милион Турци во Истанбул синоќа беа на гигантскиот собир наречен „Епопеја на победата за демократија“, со кој беше одбележана првата годишнина од обидот за државен удар, што се случи на 15 јули лани.

Мостот над Босфор, наречен Мост на мачениците на 15 јули, кој е долг 1,5 километар, беше исполнет со луѓе, а според некои проценки, имало повеќе од еден еден милион лица. Пред една година мостот беше заземен со тенкови. Притоа  беа убиени повеќе луѓе, но тенковите беа запрени и не им беше дозволено да минат на другиот брег, што беше одлучувачки момент за неуспехот на пучот.

Точно на тоа место беше отворен меморијалот на мачениците од пучот на 15 јули, во кој загинаа 249 лица, а 2.100 беа ранети.

Синоќешниот собир почна со огромна поворка, на чие чело беа претседателот Реџеп Таип Ердоган и неговата сопруга Емине. Фатени за рака, тие минаа пеш од домот до мостот, заедно со голема група луѓе, меѓу кои семејствата и блиските на жртвите на превратот.

– Овој мост пред една година беше сведок на најкрвавиот злосторнички преврат во нашата историја. Но истата таа ноќ, тој стана и сведок на победата. Како и денеска луѓето во рацете имаа единствено знамиња. Но тие имаа посилно оружје. Својата вера – рече Ердоган.

Ердоган од Истанбул замина за Анкара, каде по полноќ учествуваше на седницата на парламентот во спомен на жртвите, која почна во 2.32 минути по локално време, кога парламентот беше подложен на напад од турски „Ф-16“ за време на пучот. Опозициските пратеници го бојкотираа настанот.

Во говорот во Анкара, Ердоган изјави дека ќе го потпише законот за враќање на смртната казна доколку му биде доставен.


Околу 15.000 Курди во Стразбур побараа ослободување на Абдула Очалан


Стразбур, 11 февруари, 2017 - 17:04 (META) 

Околу 15.000 луѓе денеска се собраа во Стразбур на годишниот собир на Курдите во Европа, на кој демонстрантите побараа автономен статус за Курдистан и ослободување на нивниот лидер Абдула Очалан, јавуваат агенциите.

Полицијата во Стразбур навела дека на собирот имало меѓу 12 и 15 илјади луѓе. Демонстрантите во Стразбур пристигнале од Германија, како и од делови на Франција, Белгија и Луксембург.

Курдите што живеат во Европа веќе 18 години се собираат во Стразбур каде бараат ослободување на нивниот историски водач Абдула Очалан, кој се наоѓа во затвор во турција, како и решавање на статусот на Курдистан.

Генералниот конзулат на Турција во Стразбур побарал собирот да биде забранет со оценка дека тој претставува поддршка за терористите, бидејќи Анкара Работничката партија на Курдистан (ПКК) ја смета за терористичка организација.

По двегодишен прекин на огнот, судирите меѓу Кудрите и Турција продолжија во 2015 година, по прекинот на мировните преговори меѓу двете страни.


Ле Пен: 2017 ќе биде година на националистичките партии


Кобленц, 21 јануари, 2017 - 19:43 (META) 

Претседателката на крајно десничарската француска партија Национален фронт, Марин ле Пен, денеска на собирот на претставниците на десно-популистичките партии во Европскиот парламент, кој се одржува во германскиот град Кобленц, изјави дека 2017 ќе биде година на националистичките партии, пренесува ХРТ.

„Минатата година англосаксонскиот свет со Брексит и со изборот на Доналд Трамп за претседател на САД ја почна борбата за сопствена слобода. Во 2017 година тоа ќе го направат нациите на континентална Европа“, рекла Ле Пен, притоа укажувајќи на важните избори кои оваа година треба да се одржат во Франција, Германија и во Холандија.

Таа на состанокот на крајно десничарските партии ја критикувала Европската Унија, нарекувајќи ја антидемократска творба која се бори против националните интереси на земјите членки.

Ле Пен во својот говор пред водечките европски политичари од крајната десница, како Холанѓанецот Герт Вилдерс, Матео Салвини од италијанската Северна лига и Фрауке Петри од Алтернатива за Германија, остро ја критикувала политиката на Ангела Меркел кон бегалците, оценувајќи ја како „неодговорна и спротивна на волјата на сопствениот народ“.

Истовремено, во Кобленц се одржуваат протести против собирот на европските националистички партии. Под паролата „Кобленц останува шаренолик“, околу 3.000 демонстранти протестираат против расизмот и за поголема толеранција.


Во Париз собир за поддршка на мигрантите


Париз, 27 ноември, 2016 - 13:20 (META) 

Околу 1.000 луѓе се собраа во Париз во знак на поддршка за мигрантите, оценувајќи дека Франција недостојно се однесува спрема луѓето кои бегаат од конфликтните области.

„Мигрантите се добредојдени“ извикуваа демонстрантите кои носеа такви плакати испишани на француски, арапски и на англиски јазик.

Демонстрантите, помеѓу кои и приврзаници на левицата, претставници на синдикати и разни здруженија, се собраа во северниот дел на Париз каде што се наоѓа мигрантскиот камп со 3.800 луѓе кои во текот на месецот беше преселен на друго место.

Собирот помина мирно.


Ердоган на прославата по повод денот на републиката најави враќање на смртната казна


Скопје, 30 октомври, 2016 - 1:12 (META) 

Турскиот претседател Реџеп Таип Ердоган најави дека владата ќе побара од парламентот на Турција да го разгледа повторното воведување на смртната казна во земјата, со која би биле санкционирани организаторите на неуспешниот обид за воен удар во јули годинава.

– Нашата влада до парламентот ќе достави предлог за воведување на смртната казна. Уверен сум дека парламентот ќе го одбори, а кога тој предлог ќе дојде кај мене на потпис, јас ќе го ратификувам. Тоа ќе се случи наскоро, немојте да се грижите. Ќе се случи наскоро ако даде Господ – изјави Ердоган на собир во Анкара.

По неуспешниот обид за воен удар од 15 јули годинава, Ердоган се закани со повторно воведување на смртната казна за казнување на пучистите, што наиде на осуда од страна на ЕУ.


Народен собир на ВМРО-ДПМНЕ во салата „Борис Трајковски“


Скопје, 16 октомври, 2016 - 10:18 (META) 

Владејачката партија ВМРО-ДПМНЕ денеска во 15 часот, во спортскиот центар „Борис Трајковски“ ќе одржи голем народен собир, најави Унијата на млади сили на ВМРО-ДПМНЕ на нивната страница на „Фејсбук“.

„ВМРО-ДПМНЕ порачува: време е за крај на политичката криза. Време е за крај на деструкциите, конфликтите, поигрувањето со чуствата на луѓето, крај за штетите на угледот на државата. Без оглед на желбите и сценаријата на нашите опоненти, ние секогаш сме се одликувале со поинаква свест од нив, поинакво чуство на одговорност кон граѓаните и кон државата затоа што за нас секогаш интересите на Македонија биле и се пред сите други. На Македонија ѝ требаш сега“, се вели во најавата на „Фејсбук“.

Изминатите два дена, ВМРО-ДПМНЕ во Македонската опера и балет организираше трибини, собири и партиски настани, а на денешниот собир свое обраќање се очекува да има и лидерот на партијата, Никола Груевски.


ВМРО-ДПМНЕ утре ќе организира голем народен собир


Скопје, 15 октомври, 2016 - 12:45 (META) 

Владејачката партија ВМРО-ДПМНЕ утре во 15 часот во спортскиот центар „Борис Трајковски“ ќе одржи голем народен собир, најави Унијата на млади сили на ВМРО-ДПМНЕ на нивната страница на „Фејсбук“.

„ВМРО-ДПМНЕ порачува, време е за крај на политичката криза. Време е за крај на деструкциите, конфликтноста, поигрувањето со чуствата на луѓето, крај за штетите на угледот на државата. Без оглед на желбите и сценаријата на нашите опоненти ние секогаш сме се одликувале со поразлична свест од нив, поразлично чуство на одговорност кон граѓаните и кон државата затоа што за нас секогаш интересите на Македонија биле и се пред сите други. На Македонија и требаш сега“, се вели во најавата на „Фејсбук“.

Вицепремиерот и министер за здравство, Никола Тодоров вчера најави дека овој викенд ќе биде викенд за трибини, собири и за партиски настани, а свое обраќање и дискусии ќе имаат политичари од ВМРО-ДПМНЕ, но и експерти и луѓе кои се надвор од политиката.

– Наредните денови ќе имаме партиски настани, собири и трибини, на кои ќе се дискутира за нашите проекти, постигнувања, но и за генерални политики. Ова ќе биде викенд на отчетност и на реални проекти и дела. Карактеристично за нашата партија и тоа што нас нè прави поинакви од нашите политички противници. Додека тие се занимаваат со смислување начини како да одбегнат избори или како да продолжат со деструкцијата и да ја продлабочат кризата, ние дискутираме за реалните проблеми на луѓето, на граѓанинот, што е и наша обврска како политичари, и се фокусираме на секојдневието на граѓаните, а не на маглата од негативизам што ја креира опозицијата – рече Тодоров.


ВМРО-ДПМНЕ не подготвува одговор на граѓанскиот марш, ама спрема партиски собир


Скопје, 12 октомври, 2016 - 11:25 (META) 

ВМРО-ДПМНЕ засега не планира марш или собир на отворено кој би бил реакција на тој што вчера го направи СДСМ во Скопје. Сепак, членови од партијата на власт велат дека најавен им е собир в недела (16 октомври) во затворен простор во Скопје, на кој, евентуално, би се промовирала програмата и новиот слоган на партијата.

– Тоа би значело почеток на кампањата за предвремените парламентарни избори, при што, меѓу другото, ќе се манифестира и бројноста и поддршка на граѓаните и на членството кон ВМРО-ДПМНЕ. Тоа се планира да се направи во наредните две недели или симболично во предвечерјето на празникот 23 Октомври. Евентуалното одложување на собирот ќе зависи од распуштањето на парламентот. Ако денеска се распуштеше парламентот, датумот ќе беше прецизиран – вели нашиот извор, кој е на висока позиција во владејачката партија.

Дали ВМРО-ДПМНЕ подготвува некаков собир прашавме и во центарот за комуникации на партијата.

– За секоја одлука ќе бидете навремено известени – беше лаконскиот одговор на Иво Котевски, директор на центарот за комуникаци на владејачката партија.

Вчера, СДСМ во соработка со невладините организации организираше граѓански марш, кој почна во 14 часот, во близина на новите простории на Специјалното јавно обвинителство на улицата Франклин Рузвелт. Оттаму неколкуте илјади граѓани, движејќи се по двете коловозни ленти на булеварот Партизански одреди, придружувани од звуци на тапани и револуционерни песни, пристигнаа пред Собранието на Република Македонија, каде говореа повеќе опозициски партиски активисти и припадници на невладиниот сектор, како и уметници.


В понеделник во 17 часот, собир за поддршка на СЈО


Скопје, 23 септември, 2016 - 11:32 (META) 

В понеделник, во 17 часот, пред Собранието ќе се одржи собир за поддршка на Специјалното јавно обвинителтво.

Во повикот на социјалните мрежи, пишува дека по летните одмори, СЈО повторно е под напад на режимските гласноговорници и има вистински линч и пропаганда против обвинителката Катица Јанева и целото СЈО.

„Власта со која сè уште управува обвинетиот Груевски, ја користи секоја можност за да ја блокира работата на оваа институција. Судиите од тефтерот на Горде продолжуваат да ги одбиваат барањата за притвор, го укинаа единственото што беше прифатено и го вратија едниот обвинителен предлог што СЈО го поднесе до кривичното одделение, поради причина која не им е проблем кога постапуваат по предметите на Зврлевски. Уставниот суд сè уште нема закажано седница на која ќе се разгледува иницијативата за уставноста на СЈО. Пратениците од ДПМНЕ одбиваат секаква поддршка за СЈО. Одбиваат да ги донесат потребните законски измени за заштита на сведоци и на свиркачи, одбиваат да го продолжат рокот за работење на СЈО, а собраниската говорница ја користат само за дискредитација на Катица Јанева и на институцијата што таа ја претставува“, пишува во повикот за собир објавен на „Фејсбук“.

Организаторите велат дека на СЈО повторно му е потребна помош од граѓаните и не смее режимот да помисли дека СЈО повеќе ја нема поддршката на граѓаните.

Настанот го организира „Шарената револуција“.


Најмасовниот собир по обидот за пуч најавен за денеска во Истанбул


Истанбул, 7 август, 2016 - 10:35 (META) 

Стотици илјади луѓе се очекува да излезат во Истанбул, каде за денеска е најавен најмасовниот собир на граѓани по неуспешниот обид за државен удар во Турција, минатиот месец, јавуваат светските агенции. Собирот се очекува да биде последен по демонстрациите што изминативе три недели секојдневно се одржуваат во Турција.

Приврзаниците на Партијата на правдата и развојот на турскиот претседател Реџеп Таип Ердоган излегуваат на улица секоја ноќ, по обидот за пуч.

Собирот, под паролата „Демократија и маченици“, ќе биде одржан под силни безбедносни мерки, а Ердоган ги повика и лидерите на опозициските партии, освен на прокурдската партија ХДП, да им се обратат на насобраните граѓаните.

Митингот ќе биде одржан на истанбулскиот плоштад Јеникапи, а според прогнозите на дел од турските медиуми, на него се очекува да се соберат дури 3,5 милиони луѓе.

Собирот ќе биде пренесуван во живо на огромни екрани ширум целата земја, а екран ќе биде поставен и во Пенсилванија, САД, каде во доброволен егзил живее имамот Фетулах Ѓулен, кого Ердоган го обвинува дека стои зад обидот за пуч.

„Еден огромен екран ќе биде поставен на уште едно место. Знаете каде? Во Пенсилванија. Пораката ќе биде испратена“, изјавил Ердоган.

Досега своето учество на собирот го потврдиле и двајца лидери на опозициските партии.