!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Советот на Европа ги повика САД да ја укинат смртната казна


Брисел, 25 април, 2017 - 14:47 (META) 

Советот на Европа ги повика САД да ги укинат смртните казни по серијата погубувања извршени во сојузната држава Арканзас.

– Особено вознемирува и се противи на глобалната тенденција за укинување на овие нехумани и застарени казни. Апелираме, САД, како набљудувач во Советот на Европа, да се воздржат од понатамошни погубувања“, стои во соопштението на Советот на Европа.

Како што се наведува, низ Европската конвенција за човекови права, Советот на Европа успеал да создаде услови смртната казна да биде укината на подрачје кое опфаќа околу 820 милиони луѓе. Белорусија, која не е членка на 47-члениот Совет на Европа, е единствената европска земја која има смртна казна.

Во брзање да погубат неколку осуденици пред да истече рокот на смртоносните инјекции, властите на Арканзас погубија двајца затвореници, што е прво двојно погубување во САД во последните 17 години.
Џек Џоунс и Марсел Вилијамс беа осудени на смрт во 90-тите години на минатиот век, а погубени се со смртоносни инјекции откако судот ги одби нивните жалби.

Властите на Арканзас планираа да погубат осум осуденици за 11 дена, но четворица од нив успеаја со жалби да добијат одложување на казните.


Ердоган повика на воведување смртна казна во Турција по референдумот


Чанаккале, 18 март, 2017 - 14:45 (META) 

Турскиот претседател, Реџеп Таип Ердоган, денеска изјави дека очекува во Турција да биде воведена смртна казна по референдумот за уставните измени, закажан за 16 април, пренесува ХРТ. Ердоган нагласил дека „без двоумење“ ќе потпише нацрт-закон за воведување смртна казна, веднаш по неговото прифаќање од страна на парламентот.

„Семејствата на мачениците, семејствата на нашите јунаци не треба да се грижат. Верувам, ако даде Господ, дека парламентот ќе направи сè што е потребно во врска со вашите барања за смртна казна по 16 април“, рекол Ердоган за време на својот говор во Чанак-кале, на северозападот на Турција.

Смртната казна во Турција е укината во 2004 година, во рамките на кандидатурата за членство на земјата во Европската Унија. Нејзиното повторно воведување ќе значи крај за пристапните преговори на Анкара за членство во ЕУ.

„Не нè интересира што ќе речат Ханс или Жорж (имиња со кои Ердоган ја означува Европа, н.з.). Што ќе каже народот? Што ќе каже правото? Тоа ни е важно“, рекол турскиот претседател.

Ердоган, по неуспешниот обид за воен удар во Турција на 15 јули минатата година, повеќепати изјавуваше дека ќе одобри повторно воведување на смртната казна, ако парламентот донесе таква одлука.

Сепак, ова е првпат тој да го повика парламентот да прифати воведување на смртна казна, по референдумот за уставните измени, кои предвидуваат проширување на овластувањата на претседателот на Турција.


Во Саудиска Арабија, 15 лица осудени на смрт поради шпионажа


Ријад, 6 декември, 2016 - 11:33 (META) 

Саудискиот суд денеска осуди 15 лица на смрт поради шпионирање во полза на Иран, соопшти денеска саудиската државна телевизија „Ал Арабија“.

Осудените се дел од групата од 32 лица, кои се уапсени во 2013 година под обвинение дека шпиониреле за Иран.

Судењето на групата, која ја сочинуваат 30 саудиски шиитски муслимани, еден Иранец и еден Авганистанец, почна во февруари годинава.

Засега не е познат исходот од судењето на другите 17 осомничени.


Поништена смртната казна на поранешниот египетски претседател Морси


Каиро, 15 ноември, 2016 - 13:03 (META) 

Египетскиот апелациски суд денеска ја поништи смртната казна на соборениот претседател на Муслиманско братство, Мохамер Морси, и нареди повторно судење.

Морси е осуден на смрт во јуни 2015 година во врска со масовното бегство од затвор за време на пучот во земјата во 2011 година.

Морси, првиот демократски избран претседател, по бунтот во 2011 година, беше соборен од власт од Абдел Фатах ал Сиси, по масовните протести против неговото владеење. Веднаш беше уапсен по соборувањето и доби долготрајна затворска казна поврзана со други обвиненија, вклучувајќи и два случаи на шпионажа на високорангирани претставници.

Денешната судска пресуда значи дека не му се заканува егзекуција.


Ердоган на прославата по повод денот на републиката најави враќање на смртната казна


Скопје, 30 октомври, 2016 - 1:12 (META) 

Турскиот претседател Реџеп Таип Ердоган најави дека владата ќе побара од парламентот на Турција да го разгледа повторното воведување на смртната казна во земјата, со која би биле санкционирани организаторите на неуспешниот обид за воен удар во јули годинава.

– Нашата влада до парламентот ќе достави предлог за воведување на смртната казна. Уверен сум дека парламентот ќе го одбори, а кога тој предлог ќе дојде кај мене на потпис, јас ќе го ратификувам. Тоа ќе се случи наскоро, немојте да се грижите. Ќе се случи наскоро ако даде Господ – изјави Ердоган на собир во Анкара.

По неуспешниот обид за воен удар од 15 јули годинава, Ердоган се закани со повторно воведување на смртната казна за казнување на пучистите, што наиде на осуда од страна на ЕУ.


Могерини и Хан на 9 септември ќе ја посетат Турција


Братислава, 3 септември, 2016 - 17:02 (META) 

Високата претставничка за надворешна политика и за безбедност на Европскаа Унија, Федерика Могерини, и еврокомесарот за проширување, Јоханес Хан, на 9 септември ќе ја посетат Турција.

Тема на посетата ќе биде иднината на односите на Европската Унија со Турција, по обидот за пуч, информираше Могерини по неформалниот состанок на министрите за надворешни работи во Братислава, а пренесе агенцијата ТАСС.

„Турција се согласи да ја продолжи спогодбата со ЕУ за мигрантите и двете страни ќе продолжат да работат на визната либерализација“, додала Могерини, а цитираат британските медиуми.


Ердоган ќе одобри воведување смртна казна ако Парламентот ја изгласа


Истанбул, 8 август, 2016 - 10:08 (META) 

Турскиот претседател Реџеп Тајип Ердоган синоќа соопшти дека ќе одобри воведување смртна казна, доколку Парламентот се изјасни за тоа.

– Доколку нацијата донесе таква одлука верувам дека политичките партии ќе ја прифатат. За тоа ќе одлучи турскиот Парламент, имајќи предвид дека народот е носител на суверенитетот, а јас однапред потврдувам дека ќе ја одобрам одлуката на Парламентот – рече Ердоган во обраќањето на митингот во Истанбул.

Во врска со апелите дека воведувањето на смртната казна се коси со меѓународните конвенции за човекови права, посебно со Европската конвенција и законите на ЕУ, Ердоган истакна дека таа сè уште постои во САД, Јапонија и Кина.


Ердоган: Народот бара враќање на смртната казна и ќе мора да го послушам


Анкара, 26 јули, 2016 - 10:05 (META) 

Турскиот претседател Реџеп Таип Ердоган соопшти дека лидерот на земјата мора да ги слуша граѓаните, а тие, како што рече, сакаат повторно воведување на смртната казна.

– Што зборува денес турскиот народ? Тој сака повторно да се воведе смртната казна, а ние, како влада, мора да го слушаме. Не смееме да кажеме „не“ или дека тоа нè не интересира – истакна Ердоган.

Претходно европските лидери го предупредија Ердоган дека воведувањето смртна казна ќе значи прекин на преговорите за членство во ЕУ.

Претседателот на Европската комисија, Жан-Клод Јункер, вчера изјави дека Турција нема набргу да стане членка на ЕУ доколку воведе смртна казна.

Еврокомесарот за проширување Јоханес Хан денеска порача дека и покрај тешката ситуација во Турција, не треба да се носат избрзани решенија. Тој во интервјуто за виенскиот весник „Стандард“ рече дека наесен, по извештајот за напредок, треба да се донесат одлуки за последиците.

Хан нагласи дека воведувањето смртна казна ќе претставува „нокаут-критериум“ за пристапните преговори со Турција и додаде дека постојат повеќе најави за кршење на владеењето на правото во земјата.

– Мора да гледаме како ќе се материјализираат работите – порача еврокомесарот.


Оланд ѝ порача на Турција: Во ЕУ нема место за земји со смртна казна


Лисабон, 19 јули, 2016 - 19:34 (META) 

Францускиот претседател Франсоа Оланд денеска изјави дека најголем приоритет на Европа се безбедноста и одбраната.

– Во рамки на новиот поттик за изградба на Европа, најголеми приоритети се заштитата, одбраната и сигурноста на нашите граници – рече Оланд на заедничката прес-конференција во Лисабон со португалскиот претседател Марсел Ребел де Соса.

Пет дена по терористичкиот напад во Ница, францускиот претседател денеска во Лисабон рече дека е подготвен да ја продолжи вонредната состојба за шест месеци.

Оланд ја предупреди Турција дека не може да воведе смртна казна, како што навести претседателот Реџеп Таип Ердоган по неуспешниот државен удар.

– Земја која сака да воспостави врски со ЕУ и да почне пристапни преговори, не може да воведе смртна казна во својот закон – рече Оланд.


Ердоган не ја отфрла можноста за воведување смртна казна


Анкара, 19 јули, 2016 - 15:08 (META) 

Турскиот претседател, Реџеп Таип Ердоган, во своето прво интервју по неуспешниот воен пуч, не ги демантираше најавите дека Турција повторно ќе ја воведе смртната казна за да се пресмета со уапсените, кои се товарат за учество во организација на неуспешниот удар. Според последните податоци, приведени се околу 9.000 лица.

– Јано е дека имаме злосторство за велепредавство. Но, секако парламентот ќе мора за тоа да донесе одлука во смисла за уставни измени, а политичките лидери ќе мора да расправаат за тој предлог и ако помине, јас, на крај, како претседател ќе го ставам својот потпис на одлуката на парламентот – рече турскиот претседател.

Ердоган во интервјуто за „Си-ен-ен“ вели дека народот се противи на тоа учесниците во пучот да бидат во затвор и со години да се хранат на товар на државата.

– Народот сака што побргу да завршиме со ова, затоа што на луѓето им се убиени роднини, соседи и деца. Тие многу страдаат, многу се чувствителни и затоа и ние мораме да дејствуваме разумно и со сочувство – рече Ердоган.