!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ОЈО утврдува кривична одговорност за смртта на двегодишното дете од Охрид


Охрид, 10 октомври, 2017 - 15:42 (META) 

Основното јавно обвинителство Охрид го доби наодот од обдукција и од токсиколошката анализа на двегодишното дете кое почина во август годинава на детското одделение во Медицинскиот центар Охрид.

„Патолошко-хистолошката дијагноза и резултатите од токсилошките анализи укажуваат дека смртта кај детето настанала поради воспаление на двете белодробни крила, по што инфекцијата, навлегувајќи во крвта, предизвикала сепса. Детето првпат било примено на 25 август и по препишана терапија било пуштено дома. Поради влошување на состојбата, тоа двати било донесено во охридската болница, но последниот пат без знаци на живот“, информираат од ОЈО.


За смртта на трите бебиња, Комисијата утврдила дека биле запазени медицинските протоколи


Скопје, 31 август, 2017 - 14:56 (META) 

Министерството за здравство информира дека Комисијата за стручен надзор донела заклучоци во врска со трите починати новороденчиња на Клиниката за гинекологија и акушерство.

„Комисијата констатира дека се работи за високоризична, повеќеплодна бременост, проследена со гестациски дијабетес зависен од инсулин, хипертензија и инфект кај мајката, што довело до предвремено раѓање на новороденчиња со ниска гестациска возраст (помала од 28 гестациска недела) и мала родилна тежина под 1.000 грама. Сите овие ризик-фактори го отежнуваат преживувањето на новородените деца и ја зголемуваат стапката на морбидитет и на морталитет“, информираат од Министерство за здравство.

Од таму додадаваат дека врз основа на разгледаната медицинска документација и разговорите со здравствените работници, Комисијата констатирала дека е постапено во согласност со предвидените медицински протоколи за следење високоризична бременост.


Ако е здравството во хаос, тоа не е од времето на Таравари


Скопје, 31 август, 2017 - 11:53 (META) 

ВМРО-ДПМНЕ излезе со соопштение во врска со состојбите во здравството, земајќи ја како повод смртта на три новороденчиња од пред неколку дена во Клиниката за гинекологија и акушерство при Клиничкиот центар „Мајка Тереза“ од Скопје, која ја оценуваме како недоследна, пишува „Вистиномер“.

„Претставничка на ВМРО-ДПМНЕ, по повод смртта на три новороденчиња од пред неколку дена во универзитетската клиника во Скопје, даде изјава во име на партијата, во која се тврди дека тоа било резултат на неспособноста на новиот министер за здравство, Арбен Таравари, и на новата в.д. директорка на Клиниката. Во таа изјава има генерална оценка дека здравството било во хаос и оти ако има кај одговрните грам морал, ќе си поднеле оставка.

Оваа изјава ја оценуваме во најмала рака како недоследна, особено за тврдењето дека здравството било во хаос (откако дошол Таравари на негово чело – имплицитно наведување на читателот – з.а.).

Прво, станува збор за уште еден од бројните случаи на смрт на новороденчиња во Македонија и во оваа клиника, која е со најголем број породувања во државата од преку 8.000 годишно. Проблемот на новороденечката смртност е генерален проблем на здравствениот систем во Македонија кој трае повеќе од една деценија. На тоа алармираат и светските и домашните извештаи за овој проблем, а лани повторно се искачи на високо ниво. И тој негативен број варира од повеќе од 8 до 14 промили во период од над 13 години“, се вели во написот на „Вистиномер“.

(Целиот текст од „Вистиномер“ можете да го прочитате и да го преземете ТУКА)


Рускиот амбасадор во Судан пронајден мртов


Картум, 24 август, 2017 - 10:36 (META) 

Во својата резиденција во Картум, главниот град на Судан, пронајден е мртов рускиот амбасадор Миргајас Ширинскиj.

„Рускиот амбасадор починал синоќа во својата резиденција во Картум“ стои во соопштението издадено од суданското Министерство за надворешни работи.

Причината за смртта не е наведена, но висок полициски претставник не ја исклучува можноста дека станува збор убиство.

Ширинскиj, кој е роден 1954 година, починал додека пливал во базенот на својата куќа, вели полицискиот претставник.


Во Мека починале 31 странски аџии


Мека, 14 август, 2017 - 13:50 (META) 

Најмалку 31 аџии синоќа починаа на аџилак во Саудиска Арабија, јавува државната Саудиска новинска агенција (СПА).

Според извештаите сите починати се странски државјани, но засега не се открива причината за нивната смрт.

Аџилакот е една од основните религиозни обврски на муслиманите, а оваа година во Мека и Медина се очекува да пристигнат повеќе од два милиони верници.

До сега во Саудиска Арабија пристигнале најмалку 620.000 верници.


Чешки параглајдерист загина кај Крушево


Крушево, 30 јули, 2017 - 14:30 (META) 

Чешки параглајдерист вчера бил пронајден починат во местото Две чешми, во близина на Крушево.

Како што соопшти МВР, спасувачките екипи во 13.40 часот го пронашле мртвото тело на 51-годишниот Ј.В. (51) од Република Чешка.

Параглајдеристот вчера околу 13 часот полетал од Мечкин камен во Крушево и додека управувал, се закачил на дрво, по што паднал на земја и починал. Ј.В. бил член на чешка аматерска асоцијација за летање. Смртта е констатирана од лекар од итна медицинска помош.


Двајца мажи починале на Инфективна, надлежните велат нема простор за паника


Скопје, 26 јули, 2017 - 14:37 (META) 

Двајца мажи на возраст од 23 и од 50 години починале на Клиниката за инфективни болести во Скопје во тешка состојба, а Комисијата за заразни болести при Мининистерството за здравство сè уште не сака да ги соопшти причините за смртта. Од таму велат дека симптомите одговараат на повеќе болести, а официјалната причина ќе се знае по спроведените анализи.

Пациентите на клиниката биле примени во тешка состојба, со висока телесна температура и во бесознание, со сериозни проблеми со црниот дроб, бубрезите и со проблеми при засирување на крвта.

Звонко Миленковиќ, претседател на Комисија за заразни болести, информираше дека едниот пацинет починал денеска, а другиот пред три дена. Едниот пациент починал три дена по приемот на Клинката, а другиот неколку часа откако бил примен.

Тој не сакаше да ја каже причината за сериозната здравствена состојба на пациентите и само кажа дека двајцата се роднински поврзани и дека на Клиниката за инфективни болести сега лежат уште четворица пациенти со исти симптоми од кои дел се роднински поврзани со починатите.

– Нема никаква потреба да се создава паника кај населението бидејќи не станува збор за болести со висок степен на заразност и се сомневаме дека болеста можеби била пренесена од некои животни, а здравствените власти, односно центрите за јавно здравје, ги преземаат неопходните мерки во ваква ситуација – рече Миленковиќ, појаснувајќи дека починатите биле од Гостиварско.

Миленковиќ додаде дека клиниката не е во карантин туку дека пацинетите се во изолација на клиниката.


Повеќе од 100 странци починале во мигрантските центри во Малезија


Куала Лумпур, 30 март, 2017 - 14:25 (META) 

Повеќе од 100 странци починале од разни болести и од непознати причини, во изминатите две години во мигрантските центри за притвор, покажуваат податоците на малезиската Национална комисија за заштита на човековите права.

Во текот на 2015 година се забележани 83 смртни случаи, додека во текот на 2016 година, завршно до 20 декември, починале 35 лица.

Повеќе од половина од починатите се од Мјанмар, муслимани кои од земјата бегаат од властите и од мнозинското будистичко население.


Почина 29-годишен затворник во Штип


Штип, 23 март, 2017 - 17:35 (META) 

Затвореник од Штип, на возраст од 29 години, починал во ќелијата, каде бил пренесен откако му се слошило во текот на постројувањето во дворот. Полицијата соопшти дека Ердал Јусинов починал вчера, околу 14.15 часот, во Казнено-поправниот дом – Штип, во креветот од собата. По наредба на јавен обвинител, телото на починатиот било предадено на обдукција.

Како што дознаваме, причина за смртта бил срцев удар. Во моментот кога му се слошило, немало кој да му укаже помош, бидејќи затворскиот лекар е на специјализација. Од затворската управа веднаш повикале брза помош, но кога пристигнала, лекарот од итната медицинска помош само констатирал смрт.

Јусинов во затворот преседел нешто повеќе од еден месец. Во средината на февруари годинава, дошол на издржување казна затвор во траење од една година за тешка кражба. Еден ден пред да почине, му се родило второто дете.


Почина милијардерот Дејвид Рокфелер


Њујорк, 20 март, 2017 - 18:03 (META) 

Милијардерот, банкар и филантроп Дејвид Рокфелер почина на 101 година од животот, мирно во сон, во својот дом, соопшти неговото семејство.

Дејвид бил најмлад од шесте деца на Џон Д. Рокфелер и беше последниот жив претставник на својата генерација Рокфелер.

Тој беше на чело на едно од најмоќните семејства на светот, а по смртта на своите браќа и сестри станал „чувар“ на семејното богатството и управуваше со една од најголемите деловни, но и филантропски империи на планетата.

Неговото семејство соопшти дека Дејвид донирал повеќе од две милијарди долари на разни институции. Се оженил со Маргарет Меграт во 1940 година и зад себе оставил шест деца.