Во 21 век жителите од Канатларци повторно имаат пошта


Прилеп, 26 септември, 2018 - 15:50 (META) 

Денеска беше радосен ден за околу 2.000 жители во прилепското село Канатларци, зашто по осум години, а во 21 век, повторно имаат селска пошта. „Македонски пошти“ во соработка со Општина Прилеп, ја рестартираше оваа експозитура што се наоѓа во центарот на селото.

Жителите се задоволни, зашто велат дека ќе им се скратат трошоците и времето што досега го оддвојувале за да платат сметки до градот.

„Секако дека сме задоволни. Досега одвојуваме ден и во време на најголеми земјоделски работи за да платиме сметки во градот. Што да правиме, што се мора, мора. Па, некогаш заедно по неколку мина, одевме до градот. Канатларци е големо село, има и млади, кои што имаат многу потреби поврзани со поштата. Секако дека отворањето на оваа селска пошта многу ни значи“, велат жителите.

Генералниот директор на „Македонски пошти“, Ејуп Рустеми, кој што со градоначалникот на Прилеп, Илија Јованоски симболично го означија почетокот на работата на оваа селска пошта, рече дека не само за Канатларци, оваа експозитура ќе биде на располагање и на жителите во околните села.

– Како „Македонски пошти“ сакаме да бидеме присутни во секое населено место, за да бидеме  што поблиску до секој граѓанин. Оваа соработка што ја имаме, со промоција на оваа пошта овде, мислам дека ќе продолжи понатаму и со Општина Прилеп и со сите други општини. Со тоа сакаме што поблиску да бидат исполнети сите други потреби на граѓаните за да ги извршуваат непречено во „Македонски пошти“ – рече  Рустеми.

Во поштата во Канатларци, поштенски услуги ќе добиваат и жителите на соседните села Ерековци, Марул и Подмол.

Мештаните во Канатларци очекуваат од Општина Прилеп и ЈКП „Водовод и канализација“, наскоро да се реши проблемот со водоснабдувањето, за што добија ветување од локалните власти.


Дирекцијата за заштита на личните податоци е против увидот на УЈП во сметките на граѓаните


Скопје, 14 август, 2018 - 11:11 (META) 

Дирекцијата за заштита на личните податоци е против увидот на Управата за јавни приходи (УЈП) во сметките на граѓаните, информираат тие преку соопштение.

Во него велат дека уште на крајот на мај годинава тие дале негативно мислење, дека предложените измени на Законот за банки не се усогласени со Законот за заштита на личните податоци.

„Предложените законски решенија не се во согласност со начелата за заштита на личните податоци (особено начелото на пропорционалност и неопходност), утврдени во член 5 став 1 од Законот за заштита на личните податоци. Предложените нови законски решенија, кои се однесуваат на УЈП, создаваат таканаречен „bulk pull” систем со кој не се обезбедува пропорционално и неопходно собирање и обработување на личните податоци. Односно, се овозможува преобемно и неограничено обработување на лични податоци, а кои лични податоци по својот обем не се неопходни во однос на исполнување на целите заради кои се обработуваат според начелата за заштита на личните податоци утврдени во член 5 став 1 алинеи 1, 2 и 3 од Законот за заштита на личните податоци“, се додава меѓудругото во соопштението.

Од таму велат дека во февруари годинава одржале состанок со Македонската банкарска асоцијација и со УЈП, и уште тогаш кажале дека претходно ќе бидат неопходни измени и на Законот за УЈП, со кои ќе се утврдат заштитни мерки за правата и слободите на физичките лица.


ВМРО-ДПМНЕ: Со „отворањето“ на сметките граѓаните ќе станат мета на уцени од власта


Скопје, 14 август, 2018 - 9:26 (META) 

Со укинувањето на приватноста на банкарски сметки, власта на Заев дополнително ќе ги оданочува извозниците на интелектуален труд и ја загрозува приватноста на граѓаните. Укинувањето на приватноста на сметките ќе ги направи граѓаните потенцијална мета на уцени, закани и други криминогени дејанија на структури блиски до власта, обвинува ВМРО-ДПМНЕ.

Според опозициската партија, со ова законско решение „СДСМ уште еднаш бескрупулозно го крши Уставот на Република Македонија поточно членот 25 со кој ,На секој граѓанин му се гарантира почитување и заштита на приватноста на неговиот личен и семеен живот, на достоинството и угледот’.


Власта и опозицијата се договорија за закон за отпишување камата за наплата на долгови


Скопје, 7 јуни, 2018 - 16:02 (META) 

Пратеничката Соња Мираковска од владејачкото мнозинство денеска на прес-конференција изрази задоволство што парламентарни партии постигнале консензус за предлагање и усвојување на закон за отпишување на камата за наплата на долгови.

Предлог-законот, како што истакна Мираковска, е од исклучително значење за граѓаните на Република Македонија.

– Законот за отпишување на камата за наплата на долгови, што го предложивме вчера, обезбедува отпис на затезната односно казнената камата, која се однесува на главниот долг и на трошоците на постапката за комунални дејности, електрична, топлинска енергија, вода и смет, телефонија, мобилни и кабелски оператори, одржување на заеднички простории, наводнување и одводнување на земјоделско земјиште, вклучувајќи ги и трошоците на постапката од страна на должникот – рече пратеничката од НСДП.

Предложениот закон предвидува отпишување на каматата што се пресметува од поднесување на тужбата за присилна наплата на паричниот долг, до конечна исплата на паричното побарување.

Решението е поддржано и од опозицијата, а претходно денеска прес-конференција одржа и пратеникот Панчо Минов.


Над половина од корисниците, со пониски или еднакви порамнителни сметки за парно


Скопје, 4 јуни, 2018 - 13:23 (META) 

Најголем дел од потрошувачите (62 отсто) оваа година ќе добијат пониски или еднакви порамнителни сметки со авансните, покажуваат податоците на БЕГ – Снабдување со топлина.

Но, од компанијата информираат дека висината на порамнителните сметки е различна за секој потрошувач и зависи од карактеристиките и енергетската ефикасност на објектот како и од измерената количина на испорачана топлинска енергија до самиот објект.

„Иако изминатата грејната сезона траеше шест дена подолго од вообичаеното, сепак повисоките просечни надворешни температури во текот на минатата зима ја намалија испораката на топлинска енергија во централниот систем за топлинска енергија во Скопје. Помалата количина на испорачана топлинска енегија до потрошувачите од прогнозираната ќе биде нивелирана во сметките што потрошувачите за месеците – мај, јуни и јули, кога вообичаено се врши порамнување помеѓу прогнозираната и реално испорачаната топлинска енергија“, велат од БЕГ-Снабдување со топлина.


Лукаревска: Неиздавање на фискални сметки, најчеста злоупотреба откриена од УЈП


Скопје, 31 мај, 2018 - 12:43 (META) 

Неиздавањето на фискални сметки и сомнителното сторнирање на сметките се најчестите злоупотреби што ги открила Управата за јавни приходи (УЈП) во последните контроли што ги спровела во периодот од 19 април до 22 мај годинава.

– Најчести неправилности утврдени со контролите се неиздавање фискални сметки, односно користење на компјутерски сметки/маркери како замена на фискални сметки, непоседување на резервен фискален систем на опрема, непоседување и неевидентирање на податоци во книга за дневен финансиски извештај и итна смедководствена книга, неусогласен промет, односно разлика на готовински промет во каса и евиднетиран промет преку фискален систем на опрема – рече на прес-конференција, директорката Сања Лукаревска.

Таа информираше дека од контролираните 311 објекти мобилните екипи на УЈП  откриле неправилности во работењето кај 108 објекти низ целата државата.

Од почетокот на годината, од контролирани 3.086 објекти констатирани се неправилности во работењето кај 362 објекти, од кои 98 се во Скопје, а само еден во Делчево.

Со контролите биле опфатени хотели, ресторани, сендвичарници, барови, пицерии, автомеханичари, вукланизери, продавници за атоделови, салони за убавина, фризерници, цвеќарници, продавници за облека и манифестации што ги организрираат општините.

Лукаревска најави дека наскоро УЈП ќе спроведе кампања за покревање на свеста на граѓаните да бараат, а фирмите да издаваат фискални сметки, како и дека летово ќе се зголемат контролите во туристичките агенции и летните фестивали.


СДСМ: На семејства во Прилеп им биле отпишувани долгови во изборни години


Прилеп, 3 февруари, 2018 - 13:54 (META) 

Членот на Извршниот одбор на ОО СДСМ, Прилеп, Филип Попоски информираше дека, полицијата до Основното јавно обвинителство поднела кривична пријава против поранешниот директор на „Комуналец“ од Прилеп, Златко Ристески и други лица членови на Управниот одбор на претпријатието, за основано сомнение дека сториле кривично дело „злоупотреба на службена положба и овластување“.

„Според пријавата, Златко Ристески во 2012 година предизвикал сообраќајна несреќа со службеното возило „цитроен Ц4“, која не ја пријавил во полиција. Потоа, самиот организирал подигање и поправка на возилото, а „Комуналец“ добил фактура за набавка на автоделови за оштетеното возило во висина од 250.000 денари. Пријавените членови на Управниот одбор на „Комуналец“ ја одобриле исплатата на фактурата, иако Златко Ристески не дал на увид Налог за користење на службеното возило, или каков било документ, со што може да се потврди дека на денот кога се случила сообраќајката бил на службено патување“, изјави Попоски.

Тој додаде дека, „и актуелниот директор на „Комуналец“, Звонко Јованоски, соопштил дека Златко Ристески го оштетил ова јавно претрпијатие за половина милион евра.“

„Ристески, своеволно и спротивно на законот, им го отпишувал долгот за неплатени сметки за отпад на одредени семејства, со што само по овој основ, го оштетил претпријатието за над 10 милиони денари. Ненаплатените сметки биле во изборните години 2011, 2012 и 2016 година. Спротивно на закон, Ристески не им исплаќал одредени надоместоци на вработените, со што создал долг во висина од 47 милиони денари, од кои 21 милион денари за камати, судски трошоци, адвокати и извршители поврзани со тужби од вработени,“ изјави Попоски.


Спинови околу цената на водата: Од дрвјата не се гледа шумата


Скопје, 31 јануари, 2018 - 11:10 (META) 

Еднa од поактуелните теми е зголемувањето на цената на водата во целата држава, како последица на законското решение. Преку примерот за расправите за цената на водата за Скопје, можат да се идентификуваат спиновите околу ова прашање, кои не дозволуваат да се согледаат вистинските прашања:

Спин 1: Граѓаните не смеат да плаќаат за расипништвото и неспособноста на владејачката СДСМ. Покачувањето на цената на водата ќе биде најголем удар врз најсиромашните. Доколку се реализираат намерите на СДСМ, граѓаните на годишно ниво, ќе мора да одвојуваат пари и за 13 сметка. 

[Извор: Веб страна на ВМРО ДПМНЕВодата не смее…, датум: 28.01.2018]

Спин 2: Наместо 500 денари просечна сметка за вода, граѓаните од март ќе плаќаат 522 денари… Од овие 22 денара поскапување граѓаните ќе добијат многу поздрава животна средина.

[Извор: Канал 5 – Шилегов: повисоките сметки ќе…(56 секунда), датум: 26.01.2018]

Спин 3: Сакаме да истакнеме дека и покрај наследената превработеност на претпријатието со неквалификуван кадар и големата задолженост направена од претходното раководство, жителите на градот Скопје ќе плаќаат најниска цена за вода за пиење на територијата на Република Македонија.

[Извор: Веб страница на ЈП Водовод и канализација – Скопје, датум: 26.01.2018]

Kontraspin-foto-Vistinomer-1024x281-e1500652724996

Контраспин: Повеќе извртувања на вистината има околу новите цени на водата во Република Македонија што настанаа како резултат на законската новина дека цената на водата, односно водните услуги, од почетокот на годинава се формира на регулиран пазар, за чија што методологија е одговорна Регулаторната комисија за енергетика. Преку примерот на Скопје, каде има најголем број потрошувачи од едно подрачје, преку примерот за тоа како реагираат политичките партии случајно или намерно, преку тоа како реагира и самото јавно претпријатие, но и граѓаните, може да се согледаат само „дрвјата“, но, не и „шумата“.

ОД ВМРО-ДПМНЕ СЕ ОЧЕКУВА ТРОШКА ОДГОВОРНОСТ,  НЕ СПИНОВИ

Спинот број еден ја покажува сета бескрупулозност на до вчера владејачката ВМРО-ДПМНЕ кога станува збор за начинот на нивната политички борба во услови на опозиција. Во нивниот спин, покрај флоскулите, има две суштински неточности. Имено, како бројка гледано, барем граѓаните на Скопје нема да мораат да плаќаат 13 сметки за вода како што тврдат.  Реално, зголемувањето е од 1,32 денари за кубик вода. Ова значи дека на сметка од 100 кубици – екстремна потрошувачка, сметката на граѓаните или на домаќинството би била поголема за 132 денари. Ако 100 кубици вода досега чинеле 2939 денари, тоа значи дека на 12 сметки покачувањето би изнесувало 1584 (132 ден. X 12 месеци) или половина сметка повеќе.

Но, тоа е помалото извртување на вистината, зашто обично сметките се прават на потрошувачки од вода од околу 15 до 20 кубици во месецот во просек, за четиричлено семејство, па зголемувањето на цената навистина е многу мал трошок плус во текот на месецот.

Многу поголем е спинот во премолчувањето на  ВМРО-ДПМНЕ за нејзината улога генерално за цената или квалитететот на водите и другите водни услуги во Скопје.

Прво, тоа е партијата која што, како владејачка, го донесе законот според кој сега се одредуваат цените на водата. Но, второ, уште поважно, ВМРО-ДПМНЕ треба на јавноста да одговори на прашањето, со кои аргументи донесе одлука да изгради административна зграда за градското јавно претпријатие од Скопје, која според последните пресметки чини над 21 милиони евра и која ќе се отплаќа со години, токму од парите на скопските домаќинства?!

Па, како тоа да беше малку, непосредно пред локалните избори во 2017 година, за украсување на ѕидовите на новата зграда се потрошени дополнителни 22 илјади евра преку јавна набавка – договор со еден уметник!

Затоа, ВМРО-ДПМНЕ наместо да спинува околу цените на водата, упатно е на јавноста да ѝ каже која е логиката во тоа што го направиле, имајќи предвид дека нето годишниот приход од наплата на сметките на водата на ЈП „Водовод и канализација“, Скопје е 16-тина милиони евра, а за прв пат оствариле добивка во 2016 година од само 47 илјади евра!

ГРАЃАНИТЕ НЕ ДОБИВААТ НА ЖИВОТНАТА СРЕДИНА

Спинот број 2 е околу тоа дека парите ќе оделе за екологија, т.е. со ова зголемување граѓаните ќе добиеле многу поздрава животна средина, како што вели градоначалникот Петре Шилегов.

Но, вистината е дека граѓаните нема да добијат ниту помалку, ниту повеќе на квалитет на животната средина. Станува збор за извртување на вистината, зашто и досега и отсега, пречистителните станици кои се споменати како причини за зголемувањето од 2.04 денари по кубик, ги одржува истото јавно претпријатие на град Скопје.

Значи, ЈП „Водовод и канализација“ и досега ги одржувало овие станици, со тоа што трошокот од 100 милиони денари, колку што се споменува за нивно годишно одржување, досега, веројатно, го подмирувале од Министерството за животна средина и просторно планирање (така беше објаснето во јавноста).

Патем, станува збор за околу милион и шестотини илјади евра плус, што на овие оперативни трошоци, кои ги има сега „Водовод и канализација“, е сума која не е безначајна. Но, муабетот беше дека граѓаните не добиваат во смисла на поквалитетна животна средина (ништо не се сменило од претходната година-две да речеме), а добиваат плус по 2,04 денари од кубик на своите сметки.

ЕФИКАСНОСТА НЕ Е ПРАШАЊЕ НА ПАРТИЈА, ТУКУ НА ЗНАЕЊЕ

Третиот спин е класичното партиско соопштение на јавно претпријатие, во делот кога ја оценува состојбата во самата компанија:

Сакаме да истакнеме дека и покрај наследената превработеност на претпријатието со неквалификуван кадар и големата задолженост направена од претходното раководство…,

Новото раководство на Водовод и канализација треба да ги знае следните работи:

Прво, дали има или нема превработеност се прави со опсежна длабинска и сериозна анализа од сериозни експерти по ова прашање, имајќи ги предвид сложеноста и обемноста на јавните работи кои се од огромно значање за граѓаните на голем по површина град каков што е Скопје. На пример, само во секторот канализација, според проценките на стручните луѓе внатре во претпријатието има голем кусок на кадри, бидејќи според теоријата на која тие се повикуваат, на еден вработен треба да му доаѓа за одржување по околу 3 километри канализациона мрежа, а сега тој просек изнесувал 8,5 километри.

Второ, aко има голема задолженост, за што е виновно претходното раководство, новото треба да види дали таа задолженост е оправдана или неоправдана и треба да се процени дали е тоа поради претходното раководство или поради некој трет. Гледајќи ги финансиските сметки на ЈП „Водовод и канализација“, не е доведено во прашање тврдењето за голема задолженост. Но, ако за тоа е виновно раководството, новото раководство е тоа што е должно да направи севкупна и длабинска ревизија и ако станува збор за криминал, должно е да ги извести надлежните органи – Град Скопје и Јавното обвинителството.

Трето, ефикасноста на работата на ова јавно претпријатие е еден од клучните елементи за цената на водата за пиење, за можните заштеди и резерви, за одржливоста на системот и конечно за финансирање на екологијата, т.е. третманот со отпадните води.

Имено, од Годишниот извештај на ЈП Водовод и канализација за 2016 година, од каде ги црпевме и другите бројки во овој текст, може да се види следново:

  • Годишно производство на вода за 2016, вкупно – 132 милиони кубни метри.
  • Севкупни стварни загуби за 2016 година – 33.127 милиони кубни метри вода или 32 отсто
  • Самото ЈП признава дека станува збор за околу 12 отсто поголеми загуби од она што се смета за нормално во земјите во ргионот – 20 отсто, што е некаде околу 10 милиони кубни метри вода.
  • 10 милиони кубни метри вода по цена на чинење од 28,67 дена за м3 е еднакво на 286.700.000  милиони денари или речиси за тројно повеќе од колку што изнесува трошокот што го пресметале за одржување на двете пречистителни станици.

По една, две, три години, само на овој начин ќе се мери ефикасноста на новото раководство на ова ЈП, доведено од политичката партија што освои најмногу мандати во Град Скопје – СДСМ. Но, ако СДСМ и градоначалникот имаат право да даваат политички оценки, раководството на ЈП „Водовод и канализација“ и не само на ова јавно претпријатие, туку на кое и да било – немаат такво право. Тие се поставени колку што можат најдобро и најефикасно да стопанисуваат со ресурсите за јавно добро.

* * *

И поради сите овие спинови што ги набројавме погоре не можат да се видат најважните работи, меѓу што и фактот дека водата е едно најголмите јавни добра што ги имаме и дека треба да се чува и рационално да се искористува.

Во таа внимателност спаѓа секако и цената на водните услуги, за пиење и за отпадните води. Македонија генерално, а посебно Скопје има најевтина цена на водата споредено со блискиот региони . На пример во Софија, кубик вода ги чини граѓаните 1,08 евра, во Загреб од 2015 година за домаќинствата цената изнесува 4,60 евра по кубик, додека во Подгорица околу 40 денари или 0,65 евра по кубик, а во Белград за домаќинствата се наплатува по 0,68 евра или околу 80 динари. Цената во Скопје е, да се потсетиме, со сегашното зголемување 30,71 денари за кубик или нецели 0,5 евра.

И конечно, да и се вратиме и на екологијата. Скопјани, на пример, имаат покриеност од само 30 отсто од потребната атмосферска канализација. А што се однесува до чист Вардар, треба да се знае дека главната пречистителна станица што треба да биде изградена за не помалку од десетина година кај Трубарево, чини 120-130 милиони евра. Тоа треба од некаде да се плати, а меѓудругото и од граѓаните на Скопје.

Поради погоре наведените аргументи, сметаме дека околу цената на водата за пиење има повеќе спинови од кои не може да се согледаат суштунските проблеми.

Пишува: Теофил Блажевски


Извршителите нема да блокираат сметки на приматели на социјална помош


Скопје, 29 декември, 2017 - 12:35 (META) 

Министерството за труд и социјална политика и Комората на извршители на Македонија денеска потпишаа меморандум со кој извршителите се обврзуваат да не ги блокираат сметките на лицата приматели на социјална помош.

Извршителите ќе имаат пристап до посебен електронски регистар, така што веднаш ќе имаат увид дека станува збор за луѓе од ранлива категорија.

-Со овој меморандум ние веднаш ќе можеме да утврдиме, дека ако утврдила државата дека тоа лице е социјален случај, треба да се отстрани од системот на извршување до промена на неговиот статус. Кога ќе се промени статусот, до вработување или до стекнување на некој имот, тогаш ќе може да се реализира извршувањето во тој дел – изјави претседателот на Комората на извршители, Зоран Димов.

Претходно овие лица чекаа и по неколку дена да заврши писмената коресподенција меѓу извршителот и Центарот за социјални работи, а дури потоа да им бидат деблокирани сметките и да имаат пристап до парите за социјална заштита.

Оваа новина ја забрзува постапката и штити од непотребни трошоци, но не подразбира отпис на долговите, туку нивна наплата штом ќе имаат паричен прилив од друго место.


Ердоган: Ќе поднесам оставка ако опозицијата докаже дека имам сметки во странство


Истанбул, 26 ноември, 2017 - 19:34 (META) 

Претседателот на Турција, Реџеп Таип Ердоган, денеска во Истанбул изјави дека е подготвен да си поднесе оставка доколу опозициската Народно републиканска партија докаже дека тој има сметки во странство, јавуваат турските медиуми.

– Ако можете да потврдите дека моите пари се во некои банки надвор од границата, јас ќе поднесам оставка од претседателската функција. Ако не можете да докажете, тогаш вие треба да си заминете од политиката – изјави Ердоган.

Реакцијата на Ердоган доаѓа откако лидерот на опозициската партија, Ќемал Калачдароглу, пред парламентарната група на неговата партија претходно неделава изјави дека членови на семејството на Ердоган имаат милиони долари во компанија со седиште во даночните раеви во странство.