!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Власта на СДСМ го окупираше синдикатот


Скопје, 16 август, 2017 - 9:56 (META) 

СДСМ стави рака врз синдикатот кој треба да ги штити интересите на вработените. Додека граѓаните чекаат просечна плата од 30.000 денари и минимална плата од 16.000 денари, СДСМ наместо да го испорача ветувањето, го презема синдикатот за да се осигура дека ќе биде задушен секој револт од катастрофалните економски политики, обвини ВМРО-ДПМНЕ претпладнево.

„Партиската полиција на Оливер Спасовски, даде асистенција за влез во просториите на ССМ на лице блиско до СДС. Скандалот да биде поголем, тоа е сторено врз основа на решение со кое се одбива неговото барање за упис во Централниот регистар како овластено лице на синдикатот. МВР на Спасовски постапи надвор од процедура, дозволувајќи партиските наредби да бидат над законот и со закон пропишаните норми. СДСМ брза пред најавените покачувања на даноците и придонесите да ги стави синдикатот и работниците под своја контрола, како би си обезбедиле молк за погрешните економски политики кои ги влечат“, порачува ВМРО-ДПМНЕ.

Партијата порачува дека дека синдикалното организирање е загарантирано со Устав и истото не смее да биде загрозувано од ниедна власт како и дека ќе мора некој да сноси одговорност за незаконскиот упад во синдикатот.


Разрешена директорката на Филхармонија, Маја Чаначевиќ


Скопје, 28 јули, 2017 - 15:08 (META) 

Министерството за култура на Република Македонија донело решение за разрешување на Маја Чаначевиќ од функцијата директор на Националната установа Македонска филхармонија – Скопје. За вршител на должноста директор во оваа установа е назначен Виктор Илиески, член на ансамблот на филхармонијата.

Во соопштението од Министерството за култура се вели дека според наодите на инспекциските служби, директорката на установата не го усогласила работењето со законските одредби и со статутот на установата. Според соопштението, Чаначевиќ не донела годишна програма за работа на филхармонија во 2016 и 2017 година, делела повеќе гратис билети отколку што ѝ било дозволено со одлука на управниот одбор, односно за отворањето на новата концертна сала директорката поделила дури 636 гратис билети од вкупно 960 билети, без прецизна евиденција кому се доделени билетите. Инспекциите утврдиле, велат од Министерството за култура, дека за двајца вработени музичари, кои според евиденцијата подолг временски период не доаѓале на работа, директорката не презела мерки во согласност со законот и со статутот, а на едниот од нив, за вршење работни задачи што не се во описот на неговото работно место, покрај платата, дополнително му исплатила 550.683 денари.
Во образложенијата за смената се вели и дека директорката Чаначевиќ нема подготвено решенија за распоредување на вработените на работни места во согласност со новите акти за систематизација и за внатрешна организација на работните места, а направила трошок за мобилен телефон над одобрениот максимум и разликата не ја надоместила од својата плата. Како вина ѝ се припишува и тоа што не спровела постапка за реаудиција, а филхармонијата нема воведено електронски систем за евиденција на работното време на вработените.

Министерството вели дека оваа и другите смени на раководни кадри се прават заради „ослободување од партиски кадри“.

„Министерството за култура потсетува дека именувањето на в.д. директори се прави за што поскоро ослободување на клучните институции, кои досега беа заробени од партиски кадри. Ја информираме јавноста дека наскоро време ќе биде предложена измена на Законот за државни службеници, за да се одблокираат институциите и да се обезбеди демократски трансфер на власта во сите ресори. По исполнување на законските услови, низ целосно отворен и транспарентен процес, Министерството за култура ќе распише конкурси и ќе спроведе постапки за избор и за именување на нови директори на националните установи“, соопштува Министерството за култура.


Милан Ристески, кој влезе во Собранието на 27 април, не е повеќе директор на Онкологија


Скопје, 21 јуни, 2017 - 10:46 (META) 

Милан Ристески е симнат од функцијата директор на Клиниката за онкологија.

Ристески, првиот директор на клиника разрешен од новиот министер, Арбен Таравари, беше дел од протестите на иницијативата „За заедничка Македонија“, а беше и едно од лицата што влегоа во Собранието на 27 април, кога се случија дивеењата и бруталните претепувања на пратеници и на новинари.

Не неговото место доаѓа Нино Васев, лекар на клиниката.


Трамп се закани на Коми, размислува да ги укине брифинзите за новинари


Вашингтон, 12 мај, 2017 - 18:03 (META) 

Претседателот на САД Доналд Трамп со неколку твитови денеска предизвика вистинска сензација во јавноста, откако порача дека „можеби е подобро“ да се укинат брифинзите за новинарите во Белата куќа, а потоа му се закани на сменетиот директор на ФБИ, Џејмс Коми да не искажува негативни ставови за претседателот во јавноста, споменувајќи „снимки“.

„Бидејќи сум многу активен претседател а многу работи се случуваат, не е можно моите соработници да застанат на говорница и да бидат совршено точни. Можеби е најдобро да се укинат сите идни брифинзи за новинарите и во интерес на вистината да се даваат писмени одговори???“, напиша Трамп на Твитер.

Овој потег е испровоциран од непријатностите со кои се соочи Белата куќа поради различните објаснувања за причините Трамп да го смени директорот на ФБИ, Џејмс Коми.

Откако Трамп го смени Коми, неговите советници изјавија дека тоа го направил по препорака на заменик министерот за правда Род Розенстајн. Потоа и самиот Трамп и неговите советници истакнаа дека тој планирал да го отстрани Коми од функцијата уште пред да ја добие препораката.

По првиот твит, уследи уште еден во кој Трамп го предупредува Коми навестувајќи дека е можно да има снимки од нивните разговори.

„Коми подобро нека се надева дека нема „снимки“ од нашите разговори пред да почне да дава информации во медиумите“, напиша Трамп.


Иницијатива за смена на претседателката на Собранието на Србија


Белград, 19 април, 2017 - 11:35 (META) 

Собранието на Србија денеска ја продолжува седницата што беше прекината на 1 март поради предизборната кампања. На седницата опозициските пратеници ќе пробаат на дневен ред да ја воведат иницијативата за смена на претседателката на парламентот, Маја Гојковиќ.

Иницијативата за смена на Гојковиќ ја поднесоа Демократската партија и движењето „Доста беше“, тврдејќи дека таа го деградира највисокото законодавно тело, дека ги крши уставот и деловникот за работа на парламентот, а иницијативата ја поддржаа и други опозициски пратенички групи, како и независни пратеници.

Смена на Гојковиќ, помеѓу другите, бара и Либерално-демократската партија чиј лидер е Чедомир Јовановиќ, додека радикалите на Воислав Шешељ досега официјално не се придружија на оваа иницијатива.

За ставање на дневен ред, а потоа и за смена на претседателката на парламентот потребни се гласови на најмалку 126 пратеници. Доколку сите партии и независни пратеници што досега јавно побараа смена на Гојковиќ гласаат „за“, ќе имаат 77 гласови.

Собранието не продолжи да заседава веднаш по завршувањето на изборите на 2 април поради протестите на студентите и граѓаните од иницијативата „Против диктатурата“, кои секојдневно почнуваат и завршуваат пред зградата на парламентот.


Синдикатите потпишаа повелба и го поздравија разрешувањето на Митревски


Скопје, 2 декември, 2016 - 13:08 (META) 

Повеќе гранкови синдикати ставија потпис на повелбата за солидарност на синдикатите и на здруженијата за заштита на работничките права, со која, меѓу другото, се спротиставуваат на опструкциите на синдикализмот и бараат од надлежните органи во земјава да преземат активности за нивно надминување.

Со повелбата, која ја потпишаа Самостојниот синдикат на новинарите и медиумските работници (ССНМ), Синдикатот на работниците од управата, правосудните органи и здруженијата на граѓани (УПОЗ), Синдикатот на македонската дипломатска служба, Левичарско движење „Солидарност“, Движење за социјална правда „Ленка“, Конфедерацијата на синдикалните организации на Македонија, Синдикатот на културата на Република Македонија, Мултиетничкиот синдикат на образование, Младинската организација „Мугра“ и Независниот академски синдикат“, се поздравува и разрешувањето на досегашниот претседател на Сојузот на синдикати на Македонија (ССМ), Живко Митревски.

„По бројните антисиндикални потези на овој синдикален функционер, кулминацијата беше первертирањето на клучната суштина на синдикализмот: наместо политичките партии да ги прилагодуваат своите политички програми и активности во согласност со барањата на синдикатите, тој, практично самостојно или со поддршка на само грст гранкови синдикати, ја „усогласил“ агендата на ССМ со истата на владејачката партија! Да биде работата уште пострашна, таквото однесување е, изгледа, „заразно“. СОНК, исто така, побрза да се „усогласи“ со владејачката партија. Само потсетуваме дека се работи за политичка партија која пред очите на целата македонска јавност веќе со години одбива дури и синдикален дијалог и упорно го разградува системот на заштита на работничките права“, се вели во соопштението од синдикатите потписници на повелбата.

Синдикатите остро го осудуваат и минатонеделниот напад на канцеларијата на Здружението на работниците и работничките од текстилната и кожарската индустрија „Гласно“ во Штип, во кој беа уништени прозорците и таблата со логото на КУЦ „Текстил“. Тие бараат од Министерството за внатрешни работи и од јавното обвинителство итно да ги откријат извршителите на нападот, со кој, според нив, се испраќа сериозна закана за човекови права и слободата на здружување и изразување на граѓаните.

„Без сомнеж, најдискриминираните работници во Македонија се текстилните и кожарски работници. Наводната немоќ на полицијата да ги открие сторителите на овој вандализам во едно место како што е Штип, не може да биде ништо друго освен отворено исмевање на македонскиот правосуден систем“, се вели во соопштението.

Од синдикатите нагласуваат оти се убедени дека со смената на Митревски „синдикализмот се ослободува од партиските стеги и од еден од главните узурпатори на автентичното, автохтоно синдикално движење во Република Македонија“.

„Нема успешна економија без развиен синдикализам“, велат синдикатите потписници на повелбата.


Разрешени уште 15.000 државни службеници во Турција


Анкара, 22 ноември, 2016 - 10:31 (META) 

Турските власти, во рамките на акцијата за пресметување со пучистите, разрешија уште 15.000 државни службеници, воени лица, полицајци и други административни работници и затворија повеќе од 500 институции за кои се претпоставува дека се поврзани со неуспешниот обид за државен удар извршен на 15 јули.

Како што јавуваат светските медиуми, официјална Анкара разрешила 1.988 припадници на турските вооружени сили, 7.586 лица од полицијата, 403 од редовите на жандармеријата, а во државните институции се сменети повеќе од 5.000 лица.

Досега затворени се повеќе од 550 институции, 18 добротворни организации и девет медиуми, а по воениот пуч разрешени се 110.000 лица.


Спасовски: До сега се сменети 11 началници во МВР, можно е да се сменат уште четворица


Скопје, 8 октомври, 2016 - 15:17 (META) 

Досега во Министерството за внатрешни работи се сменети 11 началници, а останува можност за промена уште на четворица, одговори денеска министерот за внатрешни работи, Оливер Спасовски на новинарско прашање за последните кадровски смени во МВР, на промоцијата на полициски службеници во Идризово.

Спасовски информираше дека добил информација оти четири до пет лица на битни позиции во МВР биле во исто време на боледување.

– Инаку, тоа не се позициите кои сакав да ги сменам. Ако е заради тоа боледувањето, мислам дека е злоупотреба и треба да се вратат на работа – изјави министерот Спасовски.

 


Собрани 1,8 милиони потписи за смена на претседателот на Венецуела


Каракас, 7 јуни, 2016 - 10:58 (META) 

Приврзаниците на венецуелската опозиција излегоа на протести барајќи референдум за отповикување на претседателот Николас Мадуро.

Венецуела е во криза, поделена од политичката војна помеѓу парламентот, кој го држи опозицијата, и социјалистичката влада, во време кога народот е незадоволен поради колапсот на економијата на оваа земја богата со нафта.

Приврзаниците на коалицијата Тркалезна маса за демократско единство, на десниот центар, протестираа во Каракас и најавија дека ќе продолжат со протести и утре низ целата земја пред канцелариите на Националната изборна комисија.

Слоганот на протестите е „Мојот потпис има вредност“.

За референдумот собрани се вкупно 1,8 милиони потписи, а потребниот минимум за да се разгледа тој предлог е 200.000.

Опозицијата смета на незадоволството на народот за да изврши притисок на власта за да се одржи референдумот. Уморни од долгите редови во самопослугите, од секојдневниот прекин на струјата, 70 отсто од Венецуелците, според некои анкети, сакаат заминување на претседателот Мадуро, чиј мандат истекува во 2019 година.


Чавков на чело на „Алфите“ го врати аболираниот Ивица Антески – Пуки


Скопје, 21 мај, 2016 - 14:13 (META) 

Министерот за внатрешни работи Митко Чавков веќе го сменил Примислав Димовски од командир на едницата „Алфа“ и на негово место го поставил Ивица Антески – Пуки, еден од 56. лица кои се најдоа на списокот на помилувани од претседателот, Ѓорге Иванов, пишува  „Либертас“ повикувајќи се на свои извори од МВР.

Од Министерството за внатрешни работи засега нема потврда, но ниту демант на оваа информација.

Ивица Антески – Пуки, кој и претходно беше командир на оваа единица, е еден од осомничените во случајот „Тортура“, што го отвори Специјалното јавно обвинителство (СЈО) за апсењето на поранешниот министер за внатрешни работи Љубе Бошкоски, пред ресторанот „Воденица“ на 6 јуни 2011 година.

Според СЈО, нарачател на апсењето бил екс-директорот на Управата за безбедност и контраразузнавање (УБК) Сашо Мијалков, кој е првоосомничен во случајот, како одмазда кон Бошкоски поради пораките кои му ги упатил за време на предизборната кампања во 2011 година.

Старо-новиот министер за внатрешни работи, Чавков, во текот на вчерашниот ден го сменил досегашниот началник на СВР Охрид Сашо Смилески и на негово место го поставил Гоце Недески.