!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Врховен суд: Прво да образложат, па после ќе добијат увид во списите за Грујовски и за Бошковски


Скопје, 13 септември, 2017 - 15:59 (META) 

Прво Советот за утврдување на факти писмено да го образложи барањето за пристап до списите од предметите „Таргет“ и „Тврдина“, а потоа Врховниот суд ќе определи време и простор, соопштиле од судот за државната новинска агенција МИА.

Реакцијата на судот следи откако Советот денеска обвини дека на членовите на комисијата која истражува дали судиите кои одлучувале по барањата за притвори на Горан Грујовски и на Никола Бошковски денеска не им било дозволено да влезат во Врховниот суд, по наредба на претседателот на судот Јово Вангеловски.

– Во време на одржување на јавна седница по повод жалба против пресуда за доживотен затвор, ниту безбедносно ниту технички е можно извршување на активности на Советот – рекле од Врховен суд, додавајќи дека Советот навремено писмено бил известен и дека на неговите претставници ќе им биде определен термин за прием во судот во согласност со прописите.

Од Врховниот суд навеле дека целокупната писмена кореспонденција помеѓу Врховниот суд и Советот за утврдување на факти е доверлива и дека изнесувањето содржини од писмената кореспонденција со ознака „доверливо“ од страна на Советот претставува кривично дело.


Вангеловски не ѝ дозволил на комисијата за Грујовски и за Бошковски да влезе во Врховен


Скопје, 13 септември, 2017 - 13:33 (META) 

На Комисијата која истражува дали судиите од Кривичниот, Апелацискиот и од Врховниот суд, кои одлучувале по барањата за притвори, ја прекршиле постапката и им овозможиле на Горан Грујовски и на Никола Бошковски да побегнат од државата, денеска не ѝ било дозволено да влезе во Врховниот суд и да изврши увид во списите од предметите „Таргет“ и „Тврдина“.

Како што соопштија од Советот за утврдување на факти, кој ја формираше комисијата, минатата недела го информирале Врховниот суд дека денеска ќе вршат увид во документите, но кога пристигнале во судот, судската полиција не ги пуштила да влезат внатре.

Според Советот, припадниците на судската полиција им кажале на членовите на комисијата дека не ги пуштаат внатре зашто таква наредба добиле од претседателот на Врховниот суд, Јово Вангеловски.

„На барање на членовите на Комисијата да им се објасни кој не го дозволува нивниот пристап во судот и извршување на потребното службено дејство – увид во списте на предметите, судската полиција усно објасни дека претседателот на Врховниот суд им наредил да не ја пуштаат Комисијата во судот. Потоа претседателот на Врховниот суд по телефон го повика претседателот на Комисијата и му предочи дека претходно упатил писмо до Советот за факти во кое го известил дека не дозволува да се врши увид во бараните списи, сè додека на судот не му биде доставена основа поради која Комисијата го бара увидот, а потоа тој ќе оценел дали ќе дозволи увид, ќе определел термин и простор каде да биде извршено таквото дејство, со закана дека со ваквиот начин на комуницирање ќе поднесуваме последици“, стои во соопштението од Советот за утврдување на факти.

Оттаму велат дека ваквото однесување Вангеловски претставува спречување на членовите на комисијата во вршењето на нивните овластувања, согласно членот 42 од законот за Советот за утврдување на факти, поради што, како што велат од Советот, ќе поведат кривична постапка против Вангеловски пред надлежен јавен обвинител.

Од Советот напоменуваат дека ова не е првпат Вангеловски и судиите во Врховниот суд да прават опструкции кога биле повикувани од Советот да дадат изјави или да овозможат пристап до информации кои ги има Врховниот суд.

„И денешното однесување на претседателот на Врховниот суд претставува повторување на нивното претходно однесување, односно и понатаму тече опструкцијата“, велат од Советот.


Мијалков остана без пасош, одлуките за притворите во „Титаник“ – утре


Скопје, 2 јули, 2017 - 11:32 (META) 

Кривичните совети на Основниот суд Скопје 1 го отфрлија како неосновано и барањето на Специјалното јавно обвинителство за одредување мерка притвор за поранешниот директор на Управата за безбедност и контраразузнавање (УБК), Сашо Мијалков, кој е првообвинет во случаите „Трагет“ и „Тврдина“, што СЈО ги спои во едно обвинение.

Бараната мерка притвор, како што соопшти денеска Кривичниот суд, е замената со мерки за претпазливост, односно на Мијалков му е одземен пасошот и наложено му е еднаш неделно да се јавува во судот.

Судот ги одбил барањата за притвор и за другите четворица обвинети во случаите „Таргет“ и „Тврдина“, меѓу кои е и поранешниот началник на петтата управа, Горан Грујовски. И ним им се одземени пасошите и имаат обврска еднаш неделно да се јавуваат во судот.

Досега судот ги одби сите барања за притвор на СЈО, кое најави дека ќе поднесе жалби до Апелацискиот суд Скопје на одлуките на кривичните совети.

Рокот за поднесување на жалбите е три дена од донесувањето на одлуките.

Во врска со одлуките за случајот „Титаник“, каде СЈО бара да им бидат одредени притвори на лидерот на ВМРО-ДПМНЕ и поранешен премиер, Никола Груевски, поранешниот шеф на неговиот кабинет, Мартин Протогер, поранешните министри за внатрешни работи и за транспорт и врски, Гордана Јанкулоска и Миле Јанакиески, како и на поранешниот генерален секретар на Владата, Кирил Божиновски, како што може да се заклучи од соопштението на судот, тие се донесени, но ќе бидат соопштени утре.

„Откако одлуките ќе бидат писмено изработени и доставени до странките, јавноста ќе биде известена во текот на утрешниот ден“, стои во соопштението.


СЈО „на работна средба на повисоко ниво“ со претставници на „Македонски телеком“


Скопје, 24 април, 2017 - 15:09 (META) 

Обвинители на Специјалното јавно обвинителство денеска одржале „работна средба на повисоко ниво“ со претставници на „Македонски телеком“, во врска барањето за СЈО за претрес на компјутерските системи, а во рамките на истрагата за масовното прислушување.

„Во просториите на „Македонски телеком“ денеска е одржана работна средба на повисоко ниво со преставници на оваа компанија, за да се најде решение за предметите од интерес на ова јавно обвинителство. Очекуваме воспоставената соработка да продолжи и во претстојниот период“, стои во соопштението на СЈО.

Кривичниот суд во Скопје досега четирипати ги одби барањата на СЈО да биде издаден налог за претрес на системите во „Македонски телеком“. Поради ова, Специјалното јавно обвинителство, како што пренесоа дел од медиумите, бара начин преку претставници на компанијата, да му биде дозволен увид во системите.

Инаку, СЈО бара претрес во „Македонските телеком“ за потребите на случајот „Таргет“, чија цел е да утврди кој го вршел незаконското следење на комуникациите.


СЈО ќе бара начин да ја деблокира истрагата за „Таргет“


Скопје, 5 декември, 2016 - 16:40 (META) 

Специјалната јавна обвинителка, Катица Јанева, и нејзините помошници обвинители наредните денови на состанок треба да решаваат што ќе преземат во врска со блокирањето на истрагата за случајот „Таргет“ од страна на Кривичниот суд, велат неофицијално за „Мета“ од СЈО.

Она што е официјално е дека СЈО „нема право на жалба на одлуката“ на Кривичниот совет, до повисоките судски инстанци, односно до Апелацискиот суд, бидејќи одлуката на Кривичниот совет се смета за второстепена и конечна.

Од СЈО за „Мета“ потврдуваат дека ниту денеска, заклучно со 15 часот, не го добиле записникот од подготвителното рочиште за случајот „Тврдина 2“, за да може да испратат барање за дозвола од УБК за декласификација на доказите во предметот, како што им наложи судијката Лидија Петровска.

Кривичниот совет, составен од судиите Владимир Панчевски (до вчера претседател на Кривичниот суд, н.з.), и судијките Дијана Груевска-Илевска (заменик-претседател на судот, н.з.) и Љубинка Башеска (судијката во случајот „Пуч“, н.з.) минатата недела вторпат одби да му издаде налог на Специјалното јавно обвинителство за претрес на компјутерските системи во еден од телекомуникациските оператори заради обезбедување податоци и докази во врска со телефонските броеви што биле цел на незаконското следење на комуникациите.

 


Судот го одбил барањето на СЈО за претрес на системите во телекомуникациски оператор


Скопје, 24 ноември, 2016 - 16:22 (META) 

Судија на претходна постапка го одбил барањето на Специјалното јавно обвинителство (СЈО) да издаде судски налог, во рамките на случајот „Таргет“, за претрес на компјутерските системи во еден од телекомуникациските оператори заради обезбедување податоци и докази во врска со телефонските броеви што биле цел на незаконското следење на комуникациите.

СЈО ваквата одлука ја обжалило до Кривичниот совет, но и оттаму, информираат од Специјалното јавно обвинителство, била одбиена нивната жалба, а била уважена одлуката на судијата на претходна постапка. Образложението на Кривичниот совет било дека барањето на СЈО било нејасно, непрецизно и општо.

„Со решение на Кривичниот совет на Одделението за организиран криминал и корупција при Основниот суд Скопје 1, уважена е несогласноста која судијата на претходна постапка ја дал во врска со нашето барање за издавање наредба за пребарување компјутерски системи и компјутерски податоци. Во образложението, Кривичниот совет наведува дека наредбата е нејасна, непрецизна и општа и дека не е наведено прецизно одреденото место или опис каде ќе се изврши претресот, без да биде наведена адресата, конкретниот сектор или оддел во компанијата, ниту е наведен конкретен опис на видот и на карактерот на уредите – компјутери“, стои во соопштението од Специјалното јавно обвинителство.

Од СЈО велат дека ќе постапат по забелешките на судот и веќе упатиле барање до телекомуникацискиот оператор да им ги обезбеди податоците што, според судот, се неопходни за да биде издадена наредба за пребарување во компјутерските системи и податоци.

„Појаснуваме дека во барањето за издавање наредба за претрес наведен е називот на системите, односно носителите на податоци, наведено е конкретно кои податоци се бараат и од кој телекомуникациски оператор конкретно. Сепак, во насока на постапување по забелешките на судот, упатено е барање до телекомуникацискиот оператор за итно обезбедување на податоците кои, според наоѓањето на судот, се неопходни за издавање наредба за пребарување на компјутерски систем и на компјутерски податоци“, се додава во соопштението на СЈО, во кое не е наведено конкретно за кој телекомуникацискиот оператор станува збор.

По објавите на социјалните мрежи дека телекомуникацискиот оператор „Македонски телеком“ е тој што не ги доставил податоците до СЈО, во понеделеникот неделава реагираа од компанијата, од каде тврдат дека навремено одговориле на сите барања на Специјалното јавно обвинителство и дека остануваат отворени за понатамошна соработка со надлежните органи.


Со „Таргет“ обвинетите во „Пуч“ ќе станат сведоци, а сведоците обвинети


Скопје, 19 ноември, 2016 - 14:18 (META) 

Што ќе се случи со обвинението за случајот „Пуч“ по отворањето на новата истрага на Специјалното јавно обвинителство? Дали ќе биде повлечено, проширено со нови обвинети или, пак, на обвинителната клупа на местото на сегашните ќе се седнат сега осомничените во случајот „Таргет“? Тоа ќе се знае откако судскиот процес и официјално ќе почне. Засега единствено што е сигурно е дека истрагата за „Таргет“ ќе има импликации во постапката за „Пуч“.

Ова го посочи и обвинителката Фатиме Фетаи, која го презентираше случајот „Таргет“, а го повтори и нејзината колешка Ленче Ристоска, одговарајќи на новинарските прашања. Ни Фетаи ни Ристоска не сакаа да кажат во која насока ќе одат тие импликации.

– Како ќе тече постапката, за тоа ќе треба да се произнесеме пред судот и ќе чекаме судот формално да закажа главна расправа. Она што во моментов можам да го кажам и она што е утврдено како неминовно, а како што кажа и колешката Фетаи, овој предмет ќе има импликации на тој предмет, меѓутоа во која насока ќе одат тие имликации не би зборувале предвремено туку ќе чекаме во иднина формално да го изнесеме нашиот став – изјави Ристоска.

Во случајот „Пуч“ обвинети во моментов се поранешниот директор на Управата за безбедност и контраразузнавање (УБК) Зоран Верушевски, неговата сопруга Соња Верушевска, лидерот на СДСМ Зоран Заев, Ѓорѓи Лазаревски, функционер во МВР и Бранко Палифров, вработен во Општина Струмица. Тие се товарат за кривичните дела шпионажа, неовластено прислушување и за насилство врз претставници на највисоките државни органи. За случајот веќе е осуден поранешниот инженер во УБК, Звонко Костовски, кој го призна делото и се спогоди со обвинителството. Сепак за неговата пресуда СЈО до Врховниот суд поднесе Барање за заштита на законитоста (БЗЗ), заради неколку спорни моменти.

Единствен сведок во случајот е актулениот лидер на ВМРО-ДПМНЕ и поранешен премиер Никола Груевски.

Токму Груевски, во своето обраќање на 31 јануари 2015 година, истиот ден кога МВР го објави во јавноста случајот „Пуч“ и поднесе кривична пријава против Зоран Заев, истакна дека зад прислушувањето стои странска разузнавачка служба чиј главен соработник во земјава е Зоран Верушевски кој развил своја агентурна мрежа во Македонија.

Денеска во рамките на случајот „Таргет“ СЈО соопшти дека прислушувањето било вршено од Управата за безбедност и контраразузнавање преку нејзините системи за следење на комуникација, во период од 2008 година до 2015 година.

Осомничени се 10 поранешни и сегашни вработени во УБК кои се наоѓале на раководни позиции или биле дел од пониски ешалони, постои основно сомневање дека ја искористувале службената положба и незаконски прислушувале.

Овие лица, чиј идентитет СЈО не го откри, најверојанто се Костовски, Лазаревски и Верушевски, кои според наводите во „Таргет“ се тие кои што го откриле прислушувањето, за разлика од „Пуч“ каде се обвинети дека тие незаконски прислушувале.

Во врска со тврдењето за вмешаност на странски служби, обвинителката Ристоска денеска изјави дека СЈО не поседува докази дека странски разузнавачки служби  вршеле следење на комуникациите.

– Од она што ние го поседуваме како доказен материјал а е и предмет на испитувањето беше дали,во рамките на УБК била вршена злоупотреба на системите и сите докази кои што ги обезбедивме одеа во таа насока. Досега ние не поседуваме докази за тоа дека од страна на странски служби или жолти комбиња било вршено следење на комуникациите – рече Ристоска посочувајќи дека во испитувањето како појдовна основа ја зеле пресудата против Костовски.


Терминот „таргет“ СЈО го украде од Груевски


Скопје, 18 ноември, 2016 - 16:17 (META) 

Кодното име „Таргет“ на најновата истрага на Специјалното јавно обвинителство (СЈО) случајно или пророчки лани во јануари го спомна актуелниот лидер на ВМРО-ДПМНЕ и тогашен премиер, Никола Груевски, токму во контекст на незаконското прислушување.

Груевски, во своето обраќање на 25 февруари 2015 година, еден месец откако МВР го објави во јавноста случајот „Пуч“ и поднесе кривична пријава против Зоран Заев, истакна дека Македонија била „таргет на незаконско следење на комуникациите од страна на странска служба“.

Нивен главен соработник во земјава, како што рече Груевски, бил Зоран Верушевски, кој развил своја агентурна мрежа во Македонија, а прислушувањето по негова нарачка го вршеле поранешниот инженер во УБК, Звонко Костовски, (осуден во „Пуч“) и функционерот во МВР, Ѓорѓи Лазаревски (обвинет во „Пуч“).

„…Овие информации и други со кои располагаат институциите и кои се обезбедни во процесот, јасно укажуваат дека материјалот бил наменет за надовершни лица кои не го разбираат македонскиот јазик и кои не доволно добро ги знаат политиките и други јавни личности во Македонија… Да сумирам. Македонија во изминатиот период била таргет на снимање на телефонски разговори на странска разузнавачка служба потпомогната од нивните соработници во Македонија…“, изјави тогаш Груевски.

Ова е видеозаписот од говорот на Груевски од 25 февруари 2015 година. Посочената изјава е на 18 минути и 40 секунди:


ВМРО-ДПМНЕ: Јанева подобро да се кандидираше за носител на листа на СДСМ


Скопје, 18 ноември, 2016 - 14:14 (META) 

Денешната прес-конференција на Специјалното јавно обвинителство, на која беше презентиран случајот „Таргет“, за владејачката партија ВМРО-ДПМНЕ е уште еден доказ дека Катица Јанева е продолжена рака на лидерот на СДСМ, Зоран Заев, и дека ја спроведува неговата намера „да ја редефинира и федерализира Република Македонија како бинационална држава и да ја обвини Македонија дека е виновна и за спорот што го има Грција со нашето име и за сите други отворени прашања со соседите“.

Според реакцијата на ВМРО-ДПМНЕ, целта на прес-конференцијата била да ги покрие, како што стои во соопштението, скандалозните изјави и ветувања на Заев дадени пред албанската дијаспора во Швајцарија. Владејачката партија ја обвинува Јанева дека без ниту еден доказ ја погазила правната бранша и влегла во политичка кампања.

„Специјалното јавно обвинителство одлучи да се вклучи во изборна кампања уште пред да тргнат изборните каравани и да се официјализира почетокот“, се вели во реакцијата.

Од владејачката партија велат дека Јанева денеска не објаснила како претседателот на ВМРО-ДПМНЕ, Никола Груевски, поранешниот директор на Управата за безбедност и контраразузнавање, Сашо Мијалков, и сите други функционери на партијата се лицата кои биле најприслушувани, и со тоа срамно се обидела да ги покрие „аболираниот криминалец Зоран Заев и неговиот пријател Зоран Верушевски“.

„Катица Јанева денеска не ја објасни нивната скајп-комуникација за заштита и за поддршка од чадорот, ниту скајп-комуникацијата дека ќе се лее крв до колена. Впрочем, и изјавите на Заев и неговите ветувања дадени на албанската дијаспора се најдобриот доказ за „пучот“ кој бил подготвуван на Македонија. Многу почесно ќе беше кон граѓаните доколку Катица Јанева се кандидираше за носител на листа на СДСМ, наместо на овој начин да ја злоупотребува службената положба и овластувања“, велат од ВМРО-ДПМНЕ.


СЈО не потврдува, но не исклучува дека и Иванов и амбасадорите биле прислушувани


Скопје, 18 ноември, 2016 - 13:46 (META) 

Специјалното јавно обвинителство (СЈО), иако тоа прашање беше поставено, денеска не кажа дали во изминатите седум години (од 2008 до крајот на 2015 година), освен политичари, новинари и бизнисмени биле прислушувани и амбасадори и дипломати во земјава, како и шефот на државата, Ѓорге Иванов.

Обвинителката Ленче Ристоска, иако не ја потврди, не ја ни исклучи можноста дека и Иванов и странски дипломати биле „таргет“ на осомничените, за кои денеска беше отворена истражна постапка која СЈО ја презентираше на прес-конференција.

Ристоска рече дека „во моментот не поседува податоци за тоа кој сè бил прислушуван“, но оти верува дека истрагата ќе даде одговор и на овие прашања. Таа елегантно го избегна директен одговор и се извлече со формулацијата: „Овие податоци сега не ги поседувам пред мене за да ви соопштам точно кој сè бил предмет на следење“.

– За лицата што биле таргет поседуваме определни податоци, меѓутоа овие податоци сега не ги поседувам пред мене за да ви соопштам точно кој сè бил предмет на следење. Се разбира, се работи за поголем број телефонски броеви, чии сопственици треба и дополнително да ги утврдуваме. Како што ќе напредува истрагата, верувам дека ќе добиете одговори и на тоа прашање – рече Ристоска, одговарајќи на прашањето дали биле прислушувани и странски амбасадори.

За тоа дали и претседателот Иванов бил прислушуван, таа изјави дека „во овој момент не може да обезбеди таков податок“.

– Се разбира, ако има, дополнително ќе ве известиме, во моментов немам таков податок дали претседателот на државата бил таргет – рече Ристоска.